| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
10. ஸங்கா²ருபபத்திஸுத்தங்
10. Saṅkhārupapattisuttaṃ
160. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘ஸங்கா²ருபபத்திங் 1 வோ, பி⁴க்க²வே, தே³ஸெஸ்ஸாமி, தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
160. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘saṅkhārupapattiṃ 2 vo, bhikkhave, desessāmi, taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
161. ‘‘இத⁴, பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன ஸமன்னாக³தோ ஹோதி, சாகே³ன ஸமன்னாக³தோ ஹோதி, பஞ்ஞாய ஸமன்னாக³தோ ஹோதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா க²த்தியமஹாஸாலானங் 3 ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி . தஸ்ஸ தே ஸங்கா²ரா ச விஹாரா 4 ச ஏவங் பா⁴விதா ஏவங் ப³ஹுலீகதா தத்ருபபத்தியா 5 ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
161. ‘‘Idha, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa evaṃ hoti – ‘aho vatāhaṃ kāyassa bhedā paraṃ maraṇā khattiyamahāsālānaṃ 6 sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti . Tassa te saṅkhārā ca vihārā 7 ca evaṃ bhāvitā evaṃ bahulīkatā tatrupapattiyā 8 saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
162. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன ஸமன்னாக³தோ ஹோதி, சாகே³ன ஸமன்னாக³தோ ஹோதி, பஞ்ஞாய ஸமன்னாக³தோ ஹோதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ப்³ராஹ்மணமஹாஸாலானங்…பே॰… க³ஹபதிமஹாஸாலானங் 9 ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
162. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa evaṃ hoti – ‘aho vatāhaṃ kāyassa bhedā paraṃ maraṇā brāhmaṇamahāsālānaṃ…pe… gahapatimahāsālānaṃ 10 sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
163. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன ஸமன்னாக³தோ ஹோதி, சாகே³ன ஸமன்னாக³தோ ஹோதி, பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘சாதுமஹாராஜிகா 11 தே³வா தீ³கா⁴யுகா வண்ணவந்தோ ஸுக²ப³ஹுலா’தி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங் உபபஜ்ஜெய்ய’ந்தி . ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
163. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – ‘cātumahārājikā 12 devā dīghāyukā vaṇṇavanto sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā cātumahārājikānaṃ devānaṃ sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
164. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன ஸமன்னாக³தோ ஹோதி, சாகே³ன ஸமன்னாக³தோ ஹோதி, பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – தாவதிங்ஸா தே³வா…பே॰… யாமா தே³வா… துஸிதா தே³வா… நிம்மானரதீ தே³வா… பரனிம்மிதவஸவத்தீ தே³வா தீ³கா⁴யுகா வண்ணவந்தோ ஸுக²ப³ஹுலாதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா பரனிம்மிதவஸவத்தீனங் தே³வானங் ஸஹப்³யதங் உபபஜ்ஜெய்ய’ந்தி . ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
164. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – tāvatiṃsā devā…pe… yāmā devā… tusitā devā… nimmānaratī devā… paranimmitavasavattī devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā paranimmitavasavattīnaṃ devānaṃ sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
165. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன ஸமன்னாக³தோ ஹோதி, சாகே³ன ஸமன்னாக³தோ ஹோதி, பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘ஸஹஸ்ஸோ ப்³ரஹ்மா தீ³கா⁴யுகோ வண்ணவா ஸுக²ப³ஹுலோ’தி. ஸஹஸ்ஸோ, பி⁴க்க²வே, ப்³ரஹ்மா ஸஹஸ்ஸிலோகதா⁴துங் 13 ப²ரித்வா அதி⁴முச்சித்வா 14 விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. ஸெய்யதா²பி, பி⁴க்க²வே, சக்கு²மா புரிஸோ ஏகங் ஆமண்ட³ங் ஹத்தே² கரித்வா பச்சவெக்கெ²ய்ய; ஏவமேவ கோ², பி⁴க்க²வே, ஸஹஸ்ஸோ ப்³ரஹ்மா ஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ஸஹஸ்ஸஸ்ஸ ப்³ரஹ்முனோ ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
165. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – ‘sahasso brahmā dīghāyuko vaṇṇavā sukhabahulo’ti. Sahasso, bhikkhave, brahmā sahassilokadhātuṃ 15 pharitvā adhimuccitvā 16 viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, cakkhumā puriso ekaṃ āmaṇḍaṃ hatthe karitvā paccavekkheyya; evameva kho, bhikkhave, sahasso brahmā sahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā sahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
166. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – த்³விஸஹஸ்ஸோ ப்³ரஹ்மா…பே॰… திஸஹஸ்ஸோ ப்³ரஹ்மா… சதுஸஹஸ்ஸோ ப்³ரஹ்மா… பஞ்சஸஹஸ்ஸோ ப்³ரஹ்மா தீ³கா⁴யுகோ வண்ணவா ஸுக²ப³ஹுலோதி. பஞ்சஸஹஸ்ஸோ, பி⁴க்க²வே, ப்³ரஹ்மா பஞ்சஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. ஸெய்யதா²பி, பி⁴க்க²வே, சக்கு²மா புரிஸோ பஞ்ச ஆமண்டா³னி ஹத்தே² கரித்வா பச்சவெக்கெ²ய்ய; ஏவமேவ கோ², பி⁴க்க²வே, பஞ்சஸஹஸ்ஸோ ப்³ரஹ்மா பஞ்சஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா பஞ்சஸஹஸ்ஸஸ்ஸ ப்³ரஹ்முனோ ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
166. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena… cāgena… paññāya samannāgato hoti. Tassa sutaṃ hoti – dvisahasso brahmā…pe… tisahasso brahmā… catusahasso brahmā… pañcasahasso brahmā dīghāyuko vaṇṇavā sukhabahuloti. Pañcasahasso, bhikkhave, brahmā pañcasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, cakkhumā puriso pañca āmaṇḍāni hatthe karitvā paccavekkheyya; evameva kho, bhikkhave, pañcasahasso brahmā pañcasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā pañcasahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
167. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன ஸமன்னாக³தோ ஹோதி, ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘த³ஸஸஹஸ்ஸோ ப்³ரஹ்மா தீ³கா⁴யுகோ வண்ணவா ஸுக²ப³ஹுலோ’தி. த³ஸஸஹஸ்ஸோ, பி⁴க்க²வே, ப்³ரஹ்மா த³ஸஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. ஸெய்யதா²பி, பி⁴க்க²வே, மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச 17 விரோசதி ச; ஏவமேவ கோ², பி⁴க்க²வே, த³ஸஸஹஸ்ஸோ ப்³ரஹ்மா த³ஸஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா த³ஸஸஹஸ்ஸஸ்ஸ ப்³ரஹ்முனோ ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
167. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena… cāgena… paññāya samannāgato hoti. Tassa sutaṃ hoti – ‘dasasahasso brahmā dīghāyuko vaṇṇavā sukhabahulo’ti. Dasasahasso, bhikkhave, brahmā dasasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca 18 virocati ca; evameva kho, bhikkhave, dasasahasso brahmā dasasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā dasasahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
168. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘ஸதஸஹஸ்ஸோ ப்³ரஹ்மா தீ³கா⁴யுகோ வண்ணவா ஸுக²ப³ஹுலோ’தி. ஸதஸஹஸ்ஸோ, பி⁴க்க²வே, ப்³ரஹ்மா ஸதஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. ஸெய்யதா²பி, பி⁴க்க²வே, நிக்க²ங் ஜம்போ³னத³ங் 19 த³க்க²கம்மாரபுத்தஉக்காமுக²ஸுகுஸலஸம்பஹட்ட²ங் பண்டு³கம்ப³லே நிக்கி²த்தங் பா⁴ஸதே ச தபதே ச விரோசதி ச; ஏவமேவ கோ², பி⁴க்க²வே, ஸதஸஹஸ்ஸோ ப்³ரஹ்மா ஸதஸஹஸ்ஸிலோகதா⁴துங் ப²ரித்வா அதி⁴முச்சித்வா விஹரதி. யேபி தத்த² ஸத்தா உபபன்னா தேபி ப²ரித்வா அதி⁴முச்சித்வா விஹரதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ஸதஸஹஸ்ஸஸ்ஸ ப்³ரஹ்முனோ ஸஹப்³யதங் உபபஜ்ஜெய்ய’ந்தி . ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
168. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘satasahasso brahmā dīghāyuko vaṇṇavā sukhabahulo’ti. Satasahasso, bhikkhave, brahmā satasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, nikkhaṃ jambonadaṃ 20 dakkhakammāraputtaukkāmukhasukusalasampahaṭṭhaṃ paṇḍukambale nikkhittaṃ bhāsate ca tapate ca virocati ca; evameva kho, bhikkhave, satasahasso brahmā satasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā satasahassassa brahmuno sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
169. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ஆபா⁴ தே³வா…பே॰… பரித்தாபா⁴ தே³வா… அப்பமாணாபா⁴ தே³வா… ஆப⁴ஸ்ஸரா தே³வா தீ³கா⁴யுகா வண்ணவந்தோ ஸுக²ப³ஹுலாதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ஆப⁴ஸ்ஸரானங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
169. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ābhā devā…pe… parittābhā devā… appamāṇābhā devā… ābhassarā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā ābhassarānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
170. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன … ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – பரித்தஸுபா⁴ தே³வா…பே॰… அப்பமாணஸுபா⁴ தே³வா… ஸுப⁴கிண்ஹா தே³வா தீ³கா⁴யுகா வண்ணவந்தோ ஸுக²ப³ஹுலாதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ஸுப⁴கிண்ஹானங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
170. ‘‘Puna caparaṃ, bhikkhave, bhikkhu saddhāya samannāgato hoti, sīlena … sutena… cāgena… paññāya samannāgato hoti. Tassa sutaṃ hoti – parittasubhā devā…pe… appamāṇasubhā devā… subhakiṇhā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā subhakiṇhānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
171. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – வேஹப்ப²லா தே³வா…பே॰… அவிஹா தே³வா… அதப்பா தே³வா… ஸுத³ஸ்ஸா தே³வா… ஸுத³ஸ்ஸீ தே³வா… அகனிட்டா² தே³வா தீ³கா⁴யுகா வண்ணவந்தோ ஸுக²ப³ஹுலாதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா அகனிட்டா²னங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
171. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – vehapphalā devā…pe… avihā devā… atappā devā… sudassā devā… sudassī devā… akaniṭṭhā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā akaniṭṭhānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
172. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘ஆகாஸானஞ்சாயதனூபகா³ தே³வா தீ³கா⁴யுகா சிரட்டி²திகா ஸுக²ப³ஹுலா’தி . தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா ஆகாஸானஞ்சாயதனூபகா³னங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
172. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘ākāsānañcāyatanūpagā devā dīghāyukā ciraṭṭhitikā sukhabahulā’ti . Tassa evaṃ hoti – ‘aho vatāhaṃ kāyassa bhedā paraṃ maraṇā ākāsānañcāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
173. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ‘விஞ்ஞாணஞ்சாயதனூபகா³ தே³வா தீ³கா⁴யுகா சிரட்டி²திகா ஸுக²ப³ஹுலா’தி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா விஞ்ஞாணஞ்சாயதனூபகா³னங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
173. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘viññāṇañcāyatanūpagā devā dīghāyukā ciraṭṭhitikā sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā viññāṇañcāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
174. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஸுதங் ஹோதி – ஆகிஞ்சஞ்ஞாயதனூபகா³ தே³வா…பே॰… நேவஸஞ்ஞானாஸஞ்ஞாயதனூபகா³ தே³வா தீ³கா⁴யுகா சிரட்டி²திகா ஸுக²ப³ஹுலாதி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா நேவஸஞ்ஞானாஸஞ்ஞாயதனூபகா³னங் தே³வானங் ஸஹப்³யதங் உபபஜ்ஜெய்ய’ந்தி. ஸோ தங் சித்தங் த³ஹதி, தங் சித்தங் அதி⁴ட்டா²தி, தங் சித்தங் பா⁴வேதி. தஸ்ஸ தே ஸங்கா²ரா ச விஹாரா ச ஏவங் பா⁴விதா ஏவங் ப³ஹுலீகதா தத்ருபபத்தியா ஸங்வத்தந்தி. அயங், பி⁴க்க²வே, மக்³கோ³ அயங் படிபதா³ தத்ருபபத்தியா ஸங்வத்ததி.
174. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ākiñcaññāyatanūpagā devā…pe… nevasaññānāsaññāyatanūpagā devā dīghāyukā ciraṭṭhitikā sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā nevasaññānāsaññāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.
175. ‘‘புன சபரங், பி⁴க்க²வே, பி⁴க்கு² ஸத்³தா⁴ய ஸமன்னாக³தோ ஹோதி, ஸீலேன… ஸுதேன… சாகே³ன… பஞ்ஞாய ஸமன்னாக³தோ ஹோதி. தஸ்ஸ ஏவங் ஹோதி – ‘அஹோ வதாஹங் ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி. ஸோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. அயங், பி⁴க்க²வே, பி⁴க்கு² ந கத்த²சி உபபஜ்ஜதீ’’தி 21.
175. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa evaṃ hoti – ‘aho vatāhaṃ āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’nti. So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ, bhikkhave, bhikkhu na katthaci upapajjatī’’ti 22.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
Idamavoca bhagavā. Attamanā te bhikkhū bhagavato bhāsitaṃ abhinandunti.
ஸங்கா²ருபபத்திஸுத்தங் நிட்டி²தங் த³ஸமங்.
Saṅkhārupapattisuttaṃ niṭṭhitaṃ dasamaṃ.
அனுபத³வக்³கோ³ நிட்டி²தோ து³தியோ.
Anupadavaggo niṭṭhito dutiyo.
தஸ்ஸுத்³தா³னங் –
Tassuddānaṃ –
அனுபாத³-ஸோத⁴ன-போரிஸத⁴ம்மோ, ஸேவிதப்³ப³-ப³ஹுதா⁴து-விப⁴த்தி;
Anupāda-sodhana-porisadhammo, sevitabba-bahudhātu-vibhatti;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. ஸங்கா²ருபபத்திஸுத்தவண்ணனா • 10. Saṅkhārupapattisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. ஸங்கா²ருபபத்திஸுத்தவண்ணனா • 10. Saṅkhārupapattisuttavaṇṇanā
