| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. ஸங்கா²ருபபத்திஸுத்தவண்ணனா
10. Saṅkhārupapattisuttavaṇṇanā
160. ஏவங் மே ஸுதந்தி ஸங்கா²ருபபத்திஸுத்தங். தத்த² ஸங்கா²ருபபத்திந்தி ஸங்கா²ரானங்யேவ உபபத்திங், ந ஸத்தஸ்ஸ, ந போஸஸ்ஸ, புஞ்ஞாபி⁴ஸங்கா²ரேன வா ப⁴வூபக³க்க²ந்தா⁴னங் உபபத்திங்.
160.Evaṃme sutanti saṅkhārupapattisuttaṃ. Tattha saṅkhārupapattinti saṅkhārānaṃyeva upapattiṃ, na sattassa, na posassa, puññābhisaṅkhārena vā bhavūpagakkhandhānaṃ upapattiṃ.
161. ஸத்³தா⁴ய ஸமன்னாக³தோதி ஸத்³தா⁴த³யோ பஞ்ச த⁴ம்மா லோகிகா வட்டந்தி. த³ஹதீதி ட²பேதி. அதி⁴ட்டா²தீதி பதிட்டா²பேதி. ஸங்கா²ரா ச விஹாரா சாதி ஸஹ பத்த²னாய ஸத்³தா⁴த³யோவ பஞ்ச த⁴ம்மா. தத்ருபபத்தியாதி தஸ்மிங் டா²னே நிப்³ப³த்தனத்தா²ய. அயங் மக்³கோ³ அயங் படிபதா³தி ஸஹ பத்த²னாய பஞ்ச த⁴ம்மாவ. யஸ்ஸ ஹி பஞ்ச த⁴ம்மா அத்தி², ந பத்த²னா, தஸ்ஸ க³தி அனிப³த்³தா⁴. யஸ்ஸ பத்த²னா அத்தி², ந பஞ்ச த⁴ம்மா, தஸ்ஸபி அனிப³த்³தா⁴. யேஸங் உப⁴யங் அத்தி², தேஸங் க³தி நிப³த்³தா⁴. யதா² ஹி ஆகாஸே கி²த்தத³ண்டோ³ அக்³கே³ன வா மஜ்ஜே²ன வா மூலேன வா நிபதிஸ்ஸதீதி நியமோ நத்தி², ஏவங் ஸத்தானங் படிஸந்தி⁴க்³க³ஹணங் அனியதங். தஸ்மா குஸலங் கம்மங் கத்வா ஏகஸ்மிங் டா²னே பத்த²னங் காதுங் வட்டதி.
161.Saddhāya samannāgatoti saddhādayo pañca dhammā lokikā vaṭṭanti. Dahatīti ṭhapeti. Adhiṭṭhātīti patiṭṭhāpeti. Saṅkhārā ca vihārā cāti saha patthanāya saddhādayova pañca dhammā. Tatrupapattiyāti tasmiṃ ṭhāne nibbattanatthāya. Ayaṃ maggo ayaṃ paṭipadāti saha patthanāya pañca dhammāva. Yassa hi pañca dhammā atthi, na patthanā, tassa gati anibaddhā. Yassa patthanā atthi, na pañca dhammā, tassapi anibaddhā. Yesaṃ ubhayaṃ atthi, tesaṃ gati nibaddhā. Yathā hi ākāse khittadaṇḍo aggena vā majjhena vā mūlena vā nipatissatīti niyamo natthi, evaṃ sattānaṃ paṭisandhiggahaṇaṃ aniyataṃ. Tasmā kusalaṃ kammaṃ katvā ekasmiṃ ṭhāne patthanaṃ kātuṃ vaṭṭati.
165. ஆமண்ட³ந்தி ஆமலகங். யதா² தங் பரிஸுத்³த⁴சக்கு²ஸ்ஸ புரிஸஸ்ஸ ஸப்³ப³ஸோவ பாகடங் ஹோதி, ஏவங் தஸ்ஸ ப்³ரஹ்முனோ ஸத்³தி⁴ங் தத்த² நிப்³ப³த்தஸத்தேஹி ஸஹஸ்ஸீ லோகதா⁴து. ஏஸ நயோ ஸப்³ப³த்த².
165.Āmaṇḍanti āmalakaṃ. Yathā taṃ parisuddhacakkhussa purisassa sabbasova pākaṭaṃ hoti, evaṃ tassa brahmuno saddhiṃ tattha nibbattasattehi sahassī lokadhātu. Esa nayo sabbattha.
167. ஸுபோ⁴தி ஸுந்த³ரோ. ஜாதிமாதி ஆகரஸம்பன்னோ. ஸுபரிகம்மகதோதி தோ⁴வனாதீ³ஹி ஸுட்டு²கதபரிகம்மோ. பண்டு³கம்ப³லே நிக்கி²த்தோதி ரத்தகம்ப³லே ட²பிதோ.
167.Subhoti sundaro. Jātimāti ākarasampanno. Suparikammakatoti dhovanādīhi suṭṭhukataparikammo. Paṇḍukambale nikkhittoti rattakambale ṭhapito.
168. ஸதஸஹஸ்ஸோதி லோகதா⁴துஸதஸஹஸ்ஸம்ஹி ஆலோகப²ரணப்³ரஹ்மா. நிக்க²ந்தி நிக்கே²ன கதங் பிளந்த⁴னங், நிக்க²ங் நாம பஞ்சஸுவண்ணங், ஊனகனிக்கே²ன கதங் பஸாத⁴னஞ்ஹி க⁴ட்டனமஜ்ஜனக்க²மங் ந ஹோதி, அதிரேகேன கதங் க⁴ட்டனமஜ்ஜனங் க²மதி, வண்ணவந்தங் பன ந ஹோதி, ப²ருஸதா⁴துகங் கா²யதி. நிக்கே²ன கதங் க⁴ட்டனமஜ்ஜனஞ்சேவ க²மதி, வண்ணவந்தஞ்ச ஹோதி. ஜம்போ³னத³ந்தி ஜம்பு³னதி³யங் நிப்³ப³த்தங். மஹாஜம்பு³ருக்க²ஸ்ஸ ஹி ஏகேகா ஸாகா² பண்ணாஸ பண்ணாஸ யோஜனானி வட்³டி⁴தா, தாஸு மஹந்தா நதி³யோ ஸந்த³ந்தி, தாஸங் நதீ³னங் உப⁴யதீரேஸு ஜம்பு³பக்கானங் பதிதட்டா²னே ஸுவண்ணங்குரா உட்ட²ஹந்தி, தே நதீ³ஜலேன வுய்ஹமானா அனுபுப்³பே³ன மஹாஸமுத்³த³ங் பவிஸந்தி. தங் ஸந்தா⁴ய ஜம்போ³னத³ந்தி வுத்தங். த³க்க²கம்மாரபுத்தஉக்காமுக²ஸுகுஸலஸம்பஹட்ட²ந்தி த³க்கே²ன ஸுகுஸலேன கம்மாரபுத்தேன உக்காமுகே² பசித்வா ஸம்பஹட்ட²ங். உக்காமுகே²தி உத்³த⁴னே. ஸம்பஹட்ட²ந்தி தோ⁴தக⁴ட்டிதமஜ்ஜிதங். வத்தோ²பமே (ம॰ நி॰ 1.75-76) ச தா⁴துவிப⁴ங்கே³ (ம॰ நி॰ 3.357-360) ச பிண்ட³ஸோத⁴னங் வுத்தங். இமஸ்மிங் ஸுத்தே கதப⁴ண்ட³ஸோத⁴னங் வுத்தங்.
168.Satasahassoti lokadhātusatasahassamhi ālokapharaṇabrahmā. Nikkhanti nikkhena kataṃ piḷandhanaṃ, nikkhaṃ nāma pañcasuvaṇṇaṃ, ūnakanikkhena kataṃ pasādhanañhi ghaṭṭanamajjanakkhamaṃ na hoti, atirekena kataṃ ghaṭṭanamajjanaṃ khamati, vaṇṇavantaṃ pana na hoti, pharusadhātukaṃ khāyati. Nikkhena kataṃ ghaṭṭanamajjanañceva khamati, vaṇṇavantañca hoti. Jambonadanti jambunadiyaṃ nibbattaṃ. Mahājamburukkhassa hi ekekā sākhā paṇṇāsa paṇṇāsa yojanāni vaḍḍhitā, tāsu mahantā nadiyo sandanti, tāsaṃ nadīnaṃ ubhayatīresu jambupakkānaṃ patitaṭṭhāne suvaṇṇaṅkurā uṭṭhahanti, te nadījalena vuyhamānā anupubbena mahāsamuddaṃ pavisanti. Taṃ sandhāya jambonadanti vuttaṃ. Dakkhakammāraputtaukkāmukhasukusalasampahaṭṭhanti dakkhena sukusalena kammāraputtena ukkāmukhe pacitvā sampahaṭṭhaṃ. Ukkāmukheti uddhane. Sampahaṭṭhanti dhotaghaṭṭitamajjitaṃ. Vatthopame (ma. ni. 1.75-76) ca dhātuvibhaṅge (ma. ni. 3.357-360) ca piṇḍasodhanaṃ vuttaṃ. Imasmiṃ sutte katabhaṇḍasodhanaṃ vuttaṃ.
யங் பன ஸப்³ப³வாரேஸு ப²ரித்வா அதி⁴முச்சித்வாதி வுத்தங், தத்த² பஞ்சவித⁴ங் ப²ரணங் சேதோப²ரணங் கஸிணப²ரணங் தி³ப்³ப³சக்கு²ப²ரணங் ஆலோகப²ரணங் ஸரீரப²ரணந்தி. தத்த² சேதோப²ரணங் நாம லோகதா⁴துஸஹஸ்ஸே ஸத்தானங் சித்தஜானநங். கஸிணப²ரணங் நாம லோகதா⁴துஸஹஸ்ஸே கஸிணபத்த²ரணங். தி³ப்³ப³சக்கு²ப²ரணங் நாம ஆலோகங் வட்³டெ⁴த்வா தி³ப்³பே³ன சக்கு²னா ஸஹஸ்ஸலோகதா⁴துத³ஸ்ஸனங். ஆலோகப²ரணம்பி ஏததே³வ. ஸரீரப²ரணங் நாம லோகதா⁴துஸஹஸ்ஸே ஸரீரபபா⁴ய பத்த²ரணங். ஸப்³ப³த்த² இமானி பஞ்ச ப²ரணானி அவினாஸெந்தேன கதே²தப்³ப³ந்தி.
Yaṃ pana sabbavāresu pharitvā adhimuccitvāti vuttaṃ, tattha pañcavidhaṃ pharaṇaṃ cetopharaṇaṃ kasiṇapharaṇaṃ dibbacakkhupharaṇaṃ ālokapharaṇaṃ sarīrapharaṇanti. Tattha cetopharaṇaṃ nāma lokadhātusahasse sattānaṃ cittajānanaṃ. Kasiṇapharaṇaṃ nāma lokadhātusahasse kasiṇapattharaṇaṃ. Dibbacakkhupharaṇaṃ nāma ālokaṃ vaḍḍhetvā dibbena cakkhunā sahassalokadhātudassanaṃ. Ālokapharaṇampi etadeva. Sarīrapharaṇaṃ nāma lokadhātusahasse sarīrapabhāya pattharaṇaṃ. Sabbattha imāni pañca pharaṇāni avināsentena kathetabbanti.
திபிடகசூளாப⁴யத்தே²ரோ பனாஹ – ‘‘மணிஓபம்மே கஸிணப²ரணங் விய நிக்கோ²பம்மே ஸரீரப²ரணங் விய தி³ஸ்ஸதீ’’தி. தஸ்ஸ வாத³ங் விய அட்ட²கதா² நாம நத்தீ²தி படிக்கி²த்வா ஸரீரப²ரணங் ந ஸப்³ப³காலிகங், சத்தாரிமானி ப²ரணானி அவினாஸெத்வாவ கதே²தப்³ப³ந்தி வுத்தங். அதி⁴முச்சதீதி பத³ங் ப²ரணபத³ஸ்ஸேவ வேவசனங், அத² வா ப²ரதீதி பத்த²ரதி. அதி⁴முச்சதீதி ஜானாதி.
Tipiṭakacūḷābhayatthero panāha – ‘‘maṇiopamme kasiṇapharaṇaṃ viya nikkhopamme sarīrapharaṇaṃ viya dissatī’’ti. Tassa vādaṃ viya aṭṭhakathā nāma natthīti paṭikkhitvā sarīrapharaṇaṃ na sabbakālikaṃ, cattārimāni pharaṇāni avināsetvāva kathetabbanti vuttaṃ. Adhimuccatīti padaṃ pharaṇapadasseva vevacanaṃ, atha vā pharatīti pattharati. Adhimuccatīti jānāti.
169. ஆபா⁴திஆதீ³ஸு ஆபா⁴த³யோ நாம பாடியேக்கா தே³வா நத்தி², தயோ பரித்தாபா⁴த³யோ தே³வா ஆபா⁴ நாம, பரித்தாஸுபா⁴த³யோ ச. ஸுப⁴கிண்ஹாத³யோ ச ஸுபா⁴ நாம. வேஹப்ப²லாதி³வாரா பாகடாயேவ.
169.Ābhātiādīsu ābhādayo nāma pāṭiyekkā devā natthi, tayo parittābhādayo devā ābhā nāma, parittāsubhādayo ca. Subhakiṇhādayo ca subhā nāma. Vehapphalādivārā pākaṭāyeva.
இமே தாவ பஞ்ச த⁴ம்மே பா⁴வெத்வா காமாவசரேஸு நிப்³ப³த்தது. ப்³ரஹ்மலோகே நிப்³ப³த்தங் பன ஆஸவக்க²யஞ்ச கத²ங் பாபுணாதீதி? இமே பஞ்ச த⁴ம்மா ஸீலங், ஸோ இமஸ்மிங் ஸீலே பதிட்டா²ய கஸிணபரிகம்மங் கத்வா தா தா ஸமாபத்தியோ பா⁴வெத்வா ரூபீப்³ரஹ்மலோகே நிப்³ப³த்ததி, அரூபஜ்ஜா²னானி நிப்³ப³த்தெத்வா அரூபீப்³ரஹ்மலோகே, ஸமாபத்திபத³ட்டா²னங் விபஸ்ஸனங் வட்³டெ⁴த்வா அனாகா³மிப²லங் ஸச்சி²கத்வா பஞ்சஸு ஸுத்³தா⁴வாஸேஸு நிப்³ப³த்ததி. உபரிமக்³க³ங் பா⁴வெத்வா ஆஸவக்க²யங் பாபுணாதீதி.
Ime tāva pañca dhamme bhāvetvā kāmāvacaresu nibbattatu. Brahmaloke nibbattaṃ pana āsavakkhayañca kathaṃ pāpuṇātīti? Ime pañca dhammā sīlaṃ, so imasmiṃ sīle patiṭṭhāya kasiṇaparikammaṃ katvā tā tā samāpattiyo bhāvetvā rūpībrahmaloke nibbattati, arūpajjhānāni nibbattetvā arūpībrahmaloke, samāpattipadaṭṭhānaṃ vipassanaṃ vaḍḍhetvā anāgāmiphalaṃ sacchikatvā pañcasu suddhāvāsesu nibbattati. Uparimaggaṃ bhāvetvā āsavakkhayaṃ pāpuṇātīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸங்கா²ருபபத்திஸுத்தவண்ணனா நிட்டி²தா.
Saṅkhārupapattisuttavaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. ஸங்கா²ருபபத்திஸுத்தங் • 10. Saṅkhārupapattisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. ஸங்கா²ருபபத்திஸுத்தவண்ணனா • 10. Saṅkhārupapattisuttavaṇṇanā
