| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. உபோஸத²வக்³கோ³
5. Uposathavaggo
1. ஸங்கி²த்தூபோஸத²ஸுத்தங்
1. Saṅkhittūposathasuttaṃ
41. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘அட்ட²ங்க³ஸமன்னாக³தோ, பி⁴க்க²வே, உபோஸதோ² உபவுத்தோ² மஹப்ப²லோ ஹோதி மஹானிஸங்ஸோ மஹாஜுதிகோ மஹாவிப்பா²ரோ. கத²ங் உபவுத்தோ² ச, பி⁴க்க²வே, அட்ட²ங்க³ஸமன்னாக³தோ உபோஸதோ² மஹப்ப²லோ ஹோதி மஹானிஸங்ஸோ மஹாஜுதிகோ மஹாவிப்பா²ரோ? இத⁴ , பி⁴க்க²வே, அரியஸாவகோ இதி படிஸஞ்சிக்க²தி – ‘யாவஜீவங் அரஹந்தோ பாணாதிபாதங் பஹாய பாணாதிபாதா படிவிரதா நிஹிதத³ண்டா³ நிஹிதஸத்தா² லஜ்ஜீ த³யாபன்னா, ஸப்³ப³பாணபூ⁴தஹிதானுகம்பினோ விஹரந்தி. அஹங் பஜ்ஜ இமஞ்ச ரத்திங் இமஞ்ச தி³வஸங் பாணாதிபாதங் பஹாய பாணாதிபாதா படிவிரதோ நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ, ஸப்³ப³பாணபூ⁴தஹிதானுகம்பீ விஹராமி. இமினாபங்கே³ன 1 அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா பட²மேன அங்கே³ன ஸமன்னாக³தோ ஹோதி.
‘‘Aṭṭhaṅgasamannāgato, bhikkhave, uposatho upavuttho mahapphalo hoti mahānisaṃso mahājutiko mahāvipphāro. Kathaṃ upavuttho ca, bhikkhave, aṭṭhaṅgasamannāgato uposatho mahapphalo hoti mahānisaṃso mahājutiko mahāvipphāro? Idha , bhikkhave, ariyasāvako iti paṭisañcikkhati – ‘yāvajīvaṃ arahanto pāṇātipātaṃ pahāya pāṇātipātā paṭiviratā nihitadaṇḍā nihitasatthā lajjī dayāpannā, sabbapāṇabhūtahitānukampino viharanti. Ahaṃ pajja imañca rattiṃ imañca divasaṃ pāṇātipātaṃ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi. Imināpaṅgena 2 arahataṃ anukaromi, uposatho ca me upavuttho bhavissatī’ti. Iminā paṭhamena aṅgena samannāgato hoti.
‘‘‘யாவஜீவங் அரஹந்தோ அதி³ன்னாதா³னங் பஹாய அதி³ன்னாதா³னா படிவிரதா தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா விஹரந்தி. அஹங் பஜ்ஜ இமஞ்ச ரத்திங் இமஞ்ச தி³வஸங் அதி³ன்னாதா³னங் பஹாய அதி³ன்னாதா³னா படிவிரதோ தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா விஹராமி. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா து³தியேன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto adinnādānaṃ pahāya adinnādānā paṭiviratā dinnādāyī dinnapāṭikaṅkhī, athenena sucibhūtena attanā viharanti. Ahaṃ pajja imañca rattiṃ imañca divasaṃ adinnādānaṃ pahāya adinnādānā paṭivirato dinnādāyī dinnapāṭikaṅkhī, athenena sucibhūtena attanā viharāmi. Imināpaṅgena arahataṃ anukaromi, uposatho ca me upavuttho bhavissatī’ti. Iminā dutiyena aṅgena samannāgato hoti.
‘‘‘யாவஜீவங் அரஹந்தோ அப்³ரஹ்மசரியங் பஹாய ப்³ரஹ்மசாரினோ ஆராசாரினோ விரதா மேது²னா கா³மத⁴ம்மா. அஹங் பஜ்ஜ இமஞ்ச ரத்திங் இமஞ்ச தி³வஸங் அப்³ரஹ்மசரியங் பஹாய ப்³ரஹ்மசாரீ ஆராசாரீ 3 விரதோ மேது²னா கா³மத⁴ம்மா. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா ததியேன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto abrahmacariyaṃ pahāya brahmacārino ārācārino viratā methunā gāmadhammā. Ahaṃ pajja imañca rattiṃ imañca divasaṃ abrahmacariyaṃ pahāya brahmacārī ārācārī 4 virato methunā gāmadhammā. Imināpaṅgena arahataṃ anukaromi, uposatho ca me upavuttho bhavissatī’ti. Iminā tatiyena aṅgena samannāgato hoti.
‘‘‘யாவஜீவங் அரஹந்தோ முஸாவாத³ங் பஹாய முஸாவாதா³ படிவிரதா ஸச்சவாதி³னோ ஸச்சஸந்தா⁴ தே²தா பச்சயிகா அவிஸங்வாத³கோ லோகஸ்ஸ. அஹங் பஜ்ஜ இமஞ்ச ரத்திங் இமஞ்ச தி³வஸங் முஸாவாத³ங் பஹாய முஸாவாதா³ படிவிரதோ ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸங்வாத³கோ லோகஸ்ஸ. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா சதுத்தே²ன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto musāvādaṃ pahāya musāvādā paṭiviratā saccavādino saccasandhā thetā paccayikā avisaṃvādako lokassa. Ahaṃ pajja imañca rattiṃ imañca divasaṃ musāvādaṃ pahāya musāvādā paṭivirato saccavādī saccasandho theto paccayiko avisaṃvādako lokassa. Imināpaṅgena arahataṃ anukaromi, uposatho ca me upavuttho bhavissatī’ti. Iminā catutthena aṅgena samannāgato hoti.
‘‘‘யாவஜீவங் அரஹந்தோ ஸுராமேரயமஜ்ஜபமாத³ட்டா²னங் பஹாய ஸுராமேரயமஜ்ஜபமாத³ட்டா²னா படிவிரதா. அஹங் பஜ்ஜ இமஞ்ச ரத்திங் இமஞ்ச தி³வஸங் ஸுராமேரயமஜ்ஜபமாத³ட்டா²னங் பஹாய ஸுராமேரயமஜ்ஜபமாத³ட்டா²னா படிவிரதோ. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா பஞ்சமேன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto surāmerayamajjapamādaṭṭhānaṃ pahāya surāmerayamajjapamādaṭṭhānā paṭiviratā. Ahaṃ pajja imañca rattiṃ imañca divasaṃ surāmerayamajjapamādaṭṭhānaṃ pahāya surāmerayamajjapamādaṭṭhānā paṭivirato. Imināpaṅgena arahataṃ anukaromi, uposatho ca me upavuttho bhavissatī’ti. Iminā pañcamena aṅgena samannāgato hoti.
‘‘‘யாவஜீவங் அரஹந்தோ ஏகப⁴த்திகா ரத்தூபரதா விரதா விகாலபோ⁴ஜனா. அஹங் பஜ்ஜ இமஞ்ச ரத்திங் இமஞ்ச தி³வஸங் ஏகப⁴த்திகோ ரத்தூபரதோ விரதோ விகாலபோ⁴ஜனா. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா ச²ட்டே²ன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto ekabhattikā rattūparatā viratā vikālabhojanā. Ahaṃ pajja imañca rattiṃ imañca divasaṃ ekabhattiko rattūparato virato vikālabhojanā. Imināpaṅgena arahataṃ anukaromi, uposatho ca me upavuttho bhavissatī’ti. Iminā chaṭṭhena aṅgena samannāgato hoti.
‘‘‘யாவஜீவங் அரஹந்தோ நச்சகீ³தவாதி³தவிஸூகத³ஸ்ஸனமாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னங் பஹாய நச்சகீ³தவாதி³தவிஸூகத³ஸ்ஸனமாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதா. அஹங் பஜ்ஜ இமஞ்ச ரத்திங் இமஞ்ச தி³வஸங் நச்சகீ³தவாதி³தவிஸூகத³ஸ்ஸனமாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னங் பஹாய நச்சகீ³தவாதி³தவிஸூகத³ஸ்ஸனமாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ. இமினாபங்கே³ன அரஹதங் அனுகரோமி, உபோஸதோ² ச மே உபவுத்தோ² ப⁴விஸ்ஸதீ’தி. இமினா ஸத்தமேன அங்கே³ன ஸமன்னாக³தோ ஹோதி.
‘‘‘Yāvajīvaṃ arahanto naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānaṃ pahāya naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭiviratā. Ahaṃ pajja imañca rattiṃ imañca divasaṃ naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānaṃ pahāya naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭivirato. Imināpaṅgena arahataṃ anukaromi, uposatho ca me upavuttho bhavissatī’ti. Iminā sattamena aṅgena samannāgato hoti.
‘‘‘யாவஜீவங் அரஹந்தோ உச்சாஸயனமஹாஸயனங் பஹாய உச்சாஸயனமஹாஸயனா படிவிரதா நீசஸெய்யங் கப்பெந்தி – மஞ்சகே வா திணஸந்தா²ரகே வா. அஹங் பஜ்ஜ இமஞ்ச ரத்திங் இமஞ்ச தி³வஸங் உச்சாஸயனமஹாஸயனங் பஹாய உச்சாஸயனமஹாஸயனா படிவிரதோ நீசஸெய்யங் கப்பேமி – மஞ்சகே வா திணஸந்தா²ரகே வா. இமினாபங்கே³ன அரஹதங் அனுகரோமி , உபோஸதோ² ச மே உபவுத்தோ² ப⁴விஸ்ஸதீ’தி. இமினா அட்ட²மேன அங்கே³ன ஸமன்னாக³தோ ஹோதி . ஏவங் உபவுத்தோ² கோ², பி⁴க்க²வே, அட்ட²ங்க³ஸமன்னாக³தோ உபோஸதோ² மஹப்ப²லோ ஹோதி மஹானிஸங்ஸோ மஹாஜுதிகோ மஹாவிப்பா²ரோ’’தி. பட²மங்.
‘‘‘Yāvajīvaṃ arahanto uccāsayanamahāsayanaṃ pahāya uccāsayanamahāsayanā paṭiviratā nīcaseyyaṃ kappenti – mañcake vā tiṇasanthārake vā. Ahaṃ pajja imañca rattiṃ imañca divasaṃ uccāsayanamahāsayanaṃ pahāya uccāsayanamahāsayanā paṭivirato nīcaseyyaṃ kappemi – mañcake vā tiṇasanthārake vā. Imināpaṅgena arahataṃ anukaromi , uposatho ca me upavuttho bhavissatī’ti. Iminā aṭṭhamena aṅgena samannāgato hoti . Evaṃ upavuttho kho, bhikkhave, aṭṭhaṅgasamannāgato uposatho mahapphalo hoti mahānisaṃso mahājutiko mahāvipphāro’’ti. Paṭhamaṃ.
Footnotes:
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. ஸங்கி²த்தூபோஸத²ஸுத்தாதி³வண்ணனா • 1-8. Saṃkhittūposathasuttādivaṇṇanā
