| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. ஸஞ்ஞானானத்தஸுத்தவண்ணனா
7. Saññānānattasuttavaṇṇanā
91. ஆபாதே² பதிதந்தி சக்கு²ஸ்ஸ ஆபாத²க³தங் ஸாடகவேட²னாதி³ஸஞ்ஞிதங் பூ⁴தஸங்கா⁴தங் ஸம்மா நிஸ்ஸிதங். சக்கு²த்³வாரே ஸம்படிச்ச²னாதி³ஸம்பயுத்தஸஞ்ஞானங் ஸங்கப்பக³திகத்தா, சக்கு²விஞ்ஞாணஸம்பயுத்தஸஞ்ஞாக³ஹணேனேவ வா க³ஹேதப்³ப³தோ ‘‘ரூபஸஞ்ஞாதி சக்கு²விஞ்ஞாணஸம்பயுத்தா ஸஞ்ஞா’’தி வுத்தங் தத்த² ஸஞ்ஞாய ஏவ லப்³ப⁴னதோ. ஏதேனேவ ஹி தங்ஸம்பயுத்தோ ஸங்கப்போதி இத³ம்பி ஸங்வண்ணிதந்தி த³ட்ட²ப்³ப³ங். தேனாஹ ‘‘ஸஞ்ஞாஸங்கப்பச²ந்தா³ ஏகஜவனவாரேபி நானாஜவனவாரேபி லப்³ப⁴ந்தீ’’தி. ஜவனஸம்பயுத்தஸ்ஸ விதக்கஸ்ஸ ச²ந்த³க³திகத்தா வுத்தங் ‘‘தீஹி சித்தேஹி ஸம்பயுத்தோ ஸங்கப்போ’’தி. ச²ந்தி³கதட்டே²னாதி ச²ந்த³கரணட்டே²ன, இச்சி²தட்டே²னாதி அத்தோ². அனுட³ஹனட்டே²னாதி பரிட³ஹனட்டே²ன. ஸன்னிஸ்ஸயடா³ஹரஸா ஹி ராக³க்³கி³ஆத³யோ ‘‘ரூபே’’தி பன தஸ்ஸ ஆரம்மணத³ஸ்ஸனமேதங். பரிளாஹோதி பரிளாஹஸீஸேன அபெக்க²ங் வத³தி. தேனாஹ ‘‘பரிளாஹே உப்பன்னே’’திஆதி³. ‘‘பரிளாஹோ’’தி த³ள்ஹஜ்ஜோ²ஸானா ப³லவாகாரப்பத்தா வுத்தாதி ஆஹ ‘‘பரிளாஹபரியேஸனா பன நானாஜவனவாரேயேவ லப்³ப⁴ந்தீ’’தி. தாஸங் லத்³தூ⁴பனிஸ்ஸயபா⁴வதோதி த³ஸ்ஸேதி. இமினா நயேனாதி ‘‘உப்பஜ்ஜதி ஸஞ்ஞானானத்த’’ந்தி எத்த² வுத்தனயேன அத்தோ² வேதி³தப்³போ³. ‘‘ரூபஸஞ்ஞாதி³னானாஸபா⁴வங் ஸஞ்ஞங் படிச்ச காமஸங்கப்பாதி³னானாஸபா⁴வோ ஸங்கப்போ உப்பஜ்ஜதீ’’திஆதி³னா நயேன வேதி³தப்³போ³.
91.Āpāthe patitanti cakkhussa āpāthagataṃ sāṭakaveṭhanādisaññitaṃ bhūtasaṅghātaṃ sammā nissitaṃ. Cakkhudvāre sampaṭicchanādisampayuttasaññānaṃ saṅkappagatikattā, cakkhuviññāṇasampayuttasaññāgahaṇeneva vā gahetabbato ‘‘rūpasaññāti cakkhuviññāṇasampayuttā saññā’’ti vuttaṃ tattha saññāya eva labbhanato. Eteneva hi taṃsampayutto saṅkappoti idampi saṃvaṇṇitanti daṭṭhabbaṃ. Tenāha ‘‘saññāsaṅkappachandā ekajavanavārepi nānājavanavārepi labbhantī’’ti. Javanasampayuttassa vitakkassa chandagatikattā vuttaṃ ‘‘tīhi cittehi sampayutto saṅkappo’’ti. Chandikataṭṭhenāti chandakaraṇaṭṭhena, icchitaṭṭhenāti attho. Anuḍahanaṭṭhenāti pariḍahanaṭṭhena. Sannissayaḍāharasā hi rāgaggiādayo ‘‘rūpe’’ti pana tassa ārammaṇadassanametaṃ. Pariḷāhoti pariḷāhasīsena apekkhaṃ vadati. Tenāha ‘‘pariḷāhe uppanne’’tiādi. ‘‘Pariḷāho’’ti daḷhajjhosānā balavākārappattā vuttāti āha ‘‘pariḷāhapariyesanā pana nānājavanavāreyeva labbhantī’’ti. Tāsaṃ laddhūpanissayabhāvatoti dasseti. Iminā nayenāti ‘‘uppajjati saññānānatta’’nti ettha vuttanayena attho veditabbo. ‘‘Rūpasaññādinānāsabhāvaṃ saññaṃ paṭicca kāmasaṅkappādinānāsabhāvo saṅkappo uppajjatī’’tiādinā nayena veditabbo.
ஸஞ்ஞானானத்தஸுத்தவண்ணனா நிட்டி²தா.
Saññānānattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. ஸஞ்ஞானானத்தஸுத்தங் • 7. Saññānānattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. ஸஞ்ஞானானத்தஸுத்தவண்ணனா • 7. Saññānānattasuttavaṇṇanā
