| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૪. સન્નિટ્ઠાપકત્થેરઅપદાનવણ્ણના
4. Sanniṭṭhāpakattheraapadānavaṇṇanā
અરઞ્ઞે કુટિકં કત્વાતિઆદિકં આયસ્મતો સન્નિટ્ઠાપકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરબન્ધનેન બદ્ધો ઘરાવાસે આદીનવં દિસ્વા વત્થુકામકિલેસકામે પહાય હિમવન્તસ્સ અવિદૂરે પબ્બતન્તરે અરઞ્ઞવાસં કપ્પેસિ. તસ્મિં કાલે પદુમુત્તરો ભગવા વિવેકકામતાય તં ઠાનં પાપુણિ. અથ સો તાપસો ભગવન્તં દિસ્વા પસન્નમાનસો વન્દિત્વા નિસીદનત્થાય તિણસન્થરં પઞ્ઞાપેત્વા અદાસિ. તત્થ નિસિન્નં ભગવન્તં અનેકેહિ મધુરેહિ તિણ્ડુકાદીહિ ફલાફલેહિ સન્તપ્પેસિ. સો તેન પુઞ્ઞકમ્મેન તતો ચુતો દેવેસુ ચ મનુસ્સેસુ ચ અપરાપરં સંસરન્તો દ્વે સમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો સદ્ધાસમ્પન્નો પબ્બજિતો વિપસ્સનં વડ્ઢેત્વા નચિરસ્સેવ અરહા અહોસિ. ખુરગ્ગે અરહત્તફલપ્પત્તિયં વિય નિરુસ્સાહેનેવ સન્તિપદસઙ્ખાતે નિબ્બાને સુટ્ઠુ ઠિતત્તા સન્નિટ્ઠાપકત્થેરોતિ પાકટો.
Araññekuṭikaṃ katvātiādikaṃ āyasmato sanniṭṭhāpakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharabandhanena baddho gharāvāse ādīnavaṃ disvā vatthukāmakilesakāme pahāya himavantassa avidūre pabbatantare araññavāsaṃ kappesi. Tasmiṃ kāle padumuttaro bhagavā vivekakāmatāya taṃ ṭhānaṃ pāpuṇi. Atha so tāpaso bhagavantaṃ disvā pasannamānaso vanditvā nisīdanatthāya tiṇasantharaṃ paññāpetvā adāsi. Tattha nisinnaṃ bhagavantaṃ anekehi madhurehi tiṇḍukādīhi phalāphalehi santappesi. So tena puññakammena tato cuto devesu ca manussesu ca aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto saddhāsampanno pabbajito vipassanaṃ vaḍḍhetvā nacirasseva arahā ahosi. Khuragge arahattaphalappattiyaṃ viya nirussāheneva santipadasaṅkhāte nibbāne suṭṭhu ṭhitattā sanniṭṭhāpakattheroti pākaṭo.
૭૦. અરહા પન હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અરઞ્ઞે કુટિકં કત્વાતિઆદિમાહ. તત્થ અરઞ્ઞેતિ સીહબ્યગ્ઘાદીનં ભયેન મનુસ્સા એત્થ ન રજ્જન્તિ ન રમન્તિ ન અલ્લીયન્તીતિ અરઞ્ઞં, તસ્મિં અરઞ્ઞે. કુટિકન્તિ તિણચ્છદનકુટિકં કત્વા પબ્બતન્તરે વસામિ વાસં કપ્પેસિન્તિ અત્થો. લાભેન ચ અલાભેન ચ યસેન ચ અયસેન ચ સન્તુટ્ઠો વિહાસિન્તિ સમ્બન્ધો.
70. Arahā pana hutvā attano pubbakammaṃ saritvā somanassajāto pubbacaritāpadānaṃ pakāsento araññe kuṭikaṃ katvātiādimāha. Tattha araññeti sīhabyagghādīnaṃ bhayena manussā ettha na rajjanti na ramanti na allīyantīti araññaṃ, tasmiṃ araññe. Kuṭikanti tiṇacchadanakuṭikaṃ katvā pabbatantare vasāmi vāsaṃ kappesinti attho. Lābhena ca alābhena ca yasena ca ayasena ca santuṭṭho vihāsinti sambandho.
૭૨. જલજુત્તમનામકન્તિ જલે જાતં જલજં, પદુમં, જલજં ઉત્તમં જલજુત્તમં, જલજુત્તમેન સમાનં નામં યસ્સ સો જલજુત્તમનામકો, તં જલજુત્તમનામકં બુદ્ધન્તિ અત્થો. સેસં પાળિનયાનુયોગેન સુવિઞ્ઞેય્યમેવાતિ.
72.Jalajuttamanāmakanti jale jātaṃ jalajaṃ, padumaṃ, jalajaṃ uttamaṃ jalajuttamaṃ, jalajuttamena samānaṃ nāmaṃ yassa so jalajuttamanāmako, taṃ jalajuttamanāmakaṃ buddhanti attho. Sesaṃ pāḷinayānuyogena suviññeyyamevāti.
સન્નિટ્ઠાપકત્થેરઅપદાનવણ્ણના સમત્તા.
Sanniṭṭhāpakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૪. સન્નિટ્ઠાપકત્થેરઅપદાનં • 4. Sanniṭṭhāpakattheraapadānaṃ
