| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
4. ஸந்ததரஸுத்தவண்ணனா
4. Santatarasuttavaṇṇanā
73. சதுத்தே² ரூபேஹீதி ரூபாவசரத⁴ம்மேஹி. ஸந்ததராதி அதிஸயேன ஸந்தா. ரூபாவசரத⁴ம்மா ஹி கிலேஸவிக்க²ம்ப⁴னதோ விதக்காதி³ஓளாரிகங்க³ப்பஹானதோ ஸமாதி⁴பூ⁴மிபா⁴வதோ ச ஸந்தா நாம, ஆருப்பா பன தேஹிபி அங்க³ஸந்ததாய சேவ ஆரம்மணஸந்ததாய ச அதிஸயேன ஸந்தவுத்திகா, தேன ஸந்ததராதி வுத்தா. நிரோதோ⁴தி நிப்³பா³னங். ஸங்கா²ராவஸேஸஸுகு²மபா⁴வப்பத்திதோபி ஹி சதுத்தா²ருப்பதோ ப²லஸமாபத்தியோவ ஸந்ததரா கிலேஸத³ரத²படிபஸ்ஸத்³தி⁴தோ நிப்³பா³னாரம்மணதோ ச, கிமங்க³ங் பன ஸப்³ப³ஸங்கா²ரஸமதோ² நிப்³பா³னங். தேன வுத்தங் ‘‘ஆருப்பேஹி நிரோதோ⁴ ஸந்ததரோ’’தி.
73. Catutthe rūpehīti rūpāvacaradhammehi. Santatarāti atisayena santā. Rūpāvacaradhammā hi kilesavikkhambhanato vitakkādioḷārikaṅgappahānato samādhibhūmibhāvato ca santā nāma, āruppā pana tehipi aṅgasantatāya ceva ārammaṇasantatāya ca atisayena santavuttikā, tena santatarāti vuttā. Nirodhoti nibbānaṃ. Saṅkhārāvasesasukhumabhāvappattitopi hi catutthāruppato phalasamāpattiyova santatarā kilesadarathapaṭipassaddhito nibbānārammaṇato ca, kimaṅgaṃ pana sabbasaṅkhārasamatho nibbānaṃ. Tena vuttaṃ ‘‘āruppehi nirodho santataro’’ti.
கா³தா²ஸு ரூபூபகா³தி ரூபப⁴வூபகா³. ரூபப⁴வோ ஹி இத⁴ ரூபந்தி வுத்தோ, ‘‘ரூபூபபத்தியா மக்³க³ங் பா⁴வேதீ’’திஆதீ³ஸு விய. அரூபட்டா²யினோதி அரூபாவசரா. நிரோத⁴ங் அப்பஜானந்தா, ஆக³ந்தாரோ புனப்³ப⁴வந்தி ஏதேன ரூபாரூபாவசரத⁴ம்மேஹி நிரோத⁴ஸ்ஸ ஸந்தபா⁴வமேவ த³ஸ்ஸேதி. அரூபேஸு அஸண்டி²தாதி அரூபராகே³ன அரூபப⁴வேஸு அப்பதிட்ட²ஹந்தா, தேபி பரிஜானந்தாதி அத்தோ². நிரோதே⁴ யே விமுச்சந்தீதி எத்த² யேதி நிபாதமத்தங். ஸேஸங் ஹெட்டா² வுத்தனயமேவ.
Gāthāsu rūpūpagāti rūpabhavūpagā. Rūpabhavo hi idha rūpanti vutto, ‘‘rūpūpapattiyā maggaṃ bhāvetī’’tiādīsu viya. Arūpaṭṭhāyinoti arūpāvacarā. Nirodhaṃ appajānantā, āgantāro punabbhavanti etena rūpārūpāvacaradhammehi nirodhassa santabhāvameva dasseti. Arūpesu asaṇṭhitāti arūparāgena arūpabhavesu appatiṭṭhahantā, tepi parijānantāti attho. Nirodhe ye vimuccantīti ettha yeti nipātamattaṃ. Sesaṃ heṭṭhā vuttanayameva.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 4. ஸந்ததரஸுத்தங் • 4. Santatarasuttaṃ
