| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ஸந்தவிமொக்க²ஸுத்தங்
9. Santavimokkhasuttaṃ
9. ‘‘ஸத்³தோ⁴ ச, பி⁴க்க²வே, பி⁴க்கு² ஹோதி, நோ ச ஸீலவா…பே॰… ஸீலவா ச, நோ ச ப³ஹுஸ்ஸுதோ… ப³ஹுஸ்ஸுதோ ச, நோ ச த⁴ம்மகதி²கோ… த⁴ம்மகதி²கோ ச, நோ ச பரிஸாவசரோ… பரிஸாவசரோ ச, நோ ச விஸாரதோ³ பரிஸாய த⁴ம்மங் தே³ஸேதி… விஸாரதோ³ ச பரிஸாய த⁴ம்மங் தே³ஸேதி, நோ ச வினயத⁴ரோ… வினயத⁴ரோ ச, நோ ச ஆரஞ்ஞிகோ பந்தஸேனாஸனோ… ஆரஞ்ஞிகோ ச பந்தஸேனாஸனோ, நோ ச யே தே ஸந்தா விமொக்கா² அதிக்கம்ம ரூபே ஆருப்பா தே காயேன பு²ஸித்வா விஹரதி… யே தே ஸந்தா விமொக்கா² அதிக்கம்ம ரூபே ஆருப்பா தே ச காயேன பு²ஸித்வா விஹரதி, நோ ச ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – ‘கிந்தாஹங் ஸத்³தோ⁴ ச அஸ்ஸங், ஸீலவா ச, ப³ஹுஸ்ஸுதோ ச, த⁴ம்மகதி²கோ ச, பரிஸாவசரோ ச, விஸாரதோ³ ச பரிஸாய த⁴ம்மங் தே³ஸெய்யங், வினயத⁴ரோ ச, ஆரஞ்ஞிகோ ச பந்தஸேனாஸனோ, யே தே ஸந்தா விமொக்கா² அதிக்கம்ம ரூபே ஆருப்பா தே ச காயேன பு²ஸித்வா விஹரெய்யங், ஆஸவானஞ்ச க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி.
9. ‘‘Saddho ca, bhikkhave, bhikkhu hoti, no ca sīlavā…pe… sīlavā ca, no ca bahussuto… bahussuto ca, no ca dhammakathiko… dhammakathiko ca, no ca parisāvacaro… parisāvacaro ca, no ca visārado parisāya dhammaṃ deseti… visārado ca parisāya dhammaṃ deseti, no ca vinayadharo… vinayadharo ca, no ca āraññiko pantasenāsano… āraññiko ca pantasenāsano, no ca ye te santā vimokkhā atikkamma rūpe āruppā te kāyena phusitvā viharati… ye te santā vimokkhā atikkamma rūpe āruppā te ca kāyena phusitvā viharati, no ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ so tenaṅgena aparipūro hoti. Tena taṃ aṅgaṃ paripūretabbaṃ – ‘kintāhaṃ saddho ca assaṃ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseyyaṃ, vinayadharo ca, āraññiko ca pantasenāsano, ye te santā vimokkhā atikkamma rūpe āruppā te ca kāyena phusitvā vihareyyaṃ, āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’nti.
‘‘யதோ ச கோ², பி⁴க்க²வே, பி⁴க்கு² ஸத்³தோ⁴ ச ஹோதி, ஸீலவா ச, ப³ஹுஸ்ஸுதோ ச, த⁴ம்மகதி²கோ ச, பரிஸாவசரோ ச, விஸாரதோ³ ச பரிஸாய த⁴ம்மங் தே³ஸேதி, வினயத⁴ரோ ச, ஆரஞ்ஞிகோ ச பந்தஸேனாஸனோ, யே தே ஸந்தா விமொக்கா² அதிக்கம்ம ரூபே ஆருப்பா தே ச காயேன பு²ஸித்வா விஹரதி, ஆஸவானஞ்ச க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி; ஏவங் ஸோ தேனங்கே³ன பரிபூரோ ஹோதி. இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ பி⁴க்கு² ஸமந்தபாஸாதி³கோ ச ஹோதி ஸப்³பா³காரபரிபூரோ சா’’தி. நவமங்.
‘‘Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseti, vinayadharo ca, āraññiko ca pantasenāsano, ye te santā vimokkhā atikkamma rūpe āruppā te ca kāyena phusitvā viharati, āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; evaṃ so tenaṅgena paripūro hoti. Imehi kho, bhikkhave, dasahi dhammehi samannāgato bhikkhu samantapāsādiko ca hoti sabbākāraparipūro cā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ஸந்தவிமொக்க²ஸுத்தவண்ணனா • 9. Santavimokkhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. அவிஜ்ஜாஸுத்தாதி³வண்ணனா • 1-7. Avijjāsuttādivaṇṇanā
