| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஸப்பஸுத்தவண்ணனா
6. Sappasuttavaṇṇanā
142. ஸுராகாரகானந்தி பிட்ட²ஸுராயோஜனகானங். கோஸலானங் இஸ்ஸரோதி கோஸலோ, கோஸலராஜஸ்ஸ அயந்தி கோஸலிகா. பரிபோ⁴க³பாதீதி ப⁴த்தபரிபோ⁴ஜனத்தா²ய பாதி பரிபோ⁴க³பாதி. கம்மாருத்³த⁴னபணாளியாதி கம்மாருத்³த⁴னபணாளிமுகே². த⁴மமானாயாதி த⁴மியமானாய. தங் பன யஸ்மா ப⁴ஸ்தவாதேஹி பூரிதங் நாம ஹோதி, தஸ்மா ‘‘ப⁴ஸ்தவாதேன பூரியமானாயா’’தி வுத்தங். நியாமபூ⁴மியந்தி ப⁴க³வதோ படிஸல்லானட்டா²னே ஸஞ்சரந்தங் மாரங் மங்ஸசக்கு²னாவ தி³ஸ்வா. தேனாஹ ‘‘விஜ்ஜுலதாலோகேனா’’தி.
142.Surākārakānanti piṭṭhasurāyojanakānaṃ. Kosalānaṃ issaroti kosalo, kosalarājassa ayanti kosalikā. Paribhogapātīti bhattaparibhojanatthāya pāti paribhogapāti. Kammāruddhanapaṇāḷiyāti kammāruddhanapaṇāḷimukhe. Dhamamānāyāti dhamiyamānāya. Taṃ pana yasmā bhastavātehi pūritaṃ nāma hoti, tasmā ‘‘bhastavātena pūriyamānāyā’’ti vuttaṃ. Niyāmabhūmiyanti bhagavato paṭisallānaṭṭhāne sañcarantaṃ māraṃ maṃsacakkhunāva disvā. Tenāha ‘‘vijjulatālokenā’’ti.
ஸெய்யத்தா²யாதி ஸெய்யானிஸங்ஸாய. தேனாஹ ‘‘ட²ஸ்ஸாமீ’’திஆதி³. அத்தஸஞ்ஞதோதி அத்தபா⁴வேன ஸங்யதோ. தேனாஹ ‘‘ஸங்யதத்தபா⁴வோ’’தி. தங்ஸண்டி²தஸ்ஸாதி தஸ்மிங் ஹத்த²பாத³குக்குச்சரஹிதே பு³த்³த⁴முனிஸ்மிங் அவட்டி²தஸ்ஸ. வொஸ்ஸஜ்ஜ சரெய்ய தத்த² ஸோதி இமினா ப⁴க³வா தங் ப்³யாகரமானோ விபி⁴ங்ஸிதா பு³த்³தா⁴னங் கிங் கரிஸ்ஸதி ப⁴யாபா⁴வதோ? கேவலங் பன அனட்ட²வலிகங் உப்பீளெந்தோ விய த்வமேவ ஆயாஸங் ஆபஜ்ஜிஸ்ஸஸீதி மாரங் ஸந்தஜ்ஜேதி.
Seyyatthāyāti seyyānisaṃsāya. Tenāha ‘‘ṭhassāmī’’tiādi. Attasaññatoti attabhāvena saṃyato. Tenāha ‘‘saṃyatattabhāvo’’ti. Taṃsaṇṭhitassāti tasmiṃ hatthapādakukkuccarahite buddhamunismiṃ avaṭṭhitassa. Vossajja careyya tattha soti iminā bhagavā taṃ byākaramāno vibhiṃsitā buddhānaṃ kiṃ karissati bhayābhāvato? Kevalaṃ pana anaṭṭhavalikaṃ uppīḷento viya tvameva āyāsaṃ āpajjissasīti māraṃ santajjeti.
பே⁴ரவாதி அவீதராகா³னங் ப⁴யஜனகா. தத்தா²தி தங்னிமித்தங். ப²லெய்யாதி பி⁴ஜ்ஜெய்ய. ஸத்திஸல்லந்தி ஸத்திஸங்கா²தங் புது²ஸல்லங். உரஸ்மிங் சாரயெய்யுந்தி பா²ஸுங் விஜ்ஜி²துங் ட²பெய்யுங் உக்³கி³ரெய்யுங். க²ந்து⁴பதீ⁴ஸூதி க²ந்த⁴ஸங்கா²தேஸு உபதீ⁴ஸு. தாணங் கரொந்தி நாமாதி ததோ ப⁴யனிமித்ததோ அத்தனோ தாணங் கரொந்தி நாம.
Bheravāti avītarāgānaṃ bhayajanakā. Tatthāti taṃnimittaṃ. Phaleyyāti bhijjeyya. Sattisallanti sattisaṅkhātaṃ puthusallaṃ. Urasmiṃ cārayeyyunti phāsuṃ vijjhituṃ ṭhapeyyuṃ uggireyyuṃ. Khandhupadhīsūti khandhasaṅkhātesu upadhīsu. Tāṇaṃ karonti nāmāti tato bhayanimittato attano tāṇaṃ karonti nāma.
ஸப்பஸுத்தவண்ணனா நிட்டி²தா.
Sappasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸப்பஸுத்தங் • 6. Sappasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஸப்பஸுத்தவண்ணனா • 6. Sappasuttavaṇṇanā
