| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. ஸப்புரிஸத⁴ம்மஸுத்தவண்ணனா
3. Sappurisadhammasuttavaṇṇanā
105. ஏவங் மே ஸுதந்தி ஸப்புரிஸத⁴ம்மஸுத்தங். தத்த² ஸப்புரிஸத⁴ம்மந்தி ஸப்புரிஸானங் த⁴ம்மங். அஸப்புரிஸத⁴ம்மந்தி பாபபுரிஸானங் த⁴ம்மங். ஏவங் மாதிகங் ட²பெத்வாபி புன யதா² நாம மக்³க³குஸலோ புரிஸோ வாமங் முஞ்சித்வா த³க்கி²ணங் க³ண்ஹாதி. பட²மங் முஞ்சிதப்³ப³ங் கதே²தி, ஏவங் பஹாதப்³ப³ங் த⁴ம்மங் பட²மங் தே³ஸெந்தோ கதமோ ச, பி⁴க்க²வே, அஸப்புரிஸத⁴ம்மோதிஆதி³மாஹ. தத்த² உச்சாகுலாதி க²த்தியகுலா வா ப்³ராஹ்மணகுலா வா. ஏததே³வ ஹி குலத்³வயங் ‘‘உச்சாகுல’’ந்தி வுச்சதி. ஸோ தத்த² புஜ்ஜோதி ஸோ பி⁴க்கு² தேஸு பி⁴க்கூ²ஸு பூஜாரஹோ. அந்தரங் கரித்வாதி அப்³ப⁴ந்தரங் கத்வா.
105.Evaṃme sutanti sappurisadhammasuttaṃ. Tattha sappurisadhammanti sappurisānaṃ dhammaṃ. Asappurisadhammanti pāpapurisānaṃ dhammaṃ. Evaṃ mātikaṃ ṭhapetvāpi puna yathā nāma maggakusalo puriso vāmaṃ muñcitvā dakkhiṇaṃ gaṇhāti. Paṭhamaṃ muñcitabbaṃ katheti, evaṃ pahātabbaṃ dhammaṃ paṭhamaṃ desento katamo ca, bhikkhave, asappurisadhammotiādimāha. Tattha uccākulāti khattiyakulā vā brāhmaṇakulā vā. Etadeva hi kuladvayaṃ ‘‘uccākula’’nti vuccati. So tattha pujjoti so bhikkhu tesu bhikkhūsu pūjāraho. Antaraṃ karitvāti abbhantaraṃ katvā.
மஹாகுலாதி க²த்தியகுலா வா ப்³ராஹ்மணகுலா வா வெஸ்ஸகுலா வா. இத³மேவ ஹி குலத்தயங் ‘‘மஹாகுல’’ந்தி வுச்சதி. மஹாபோ⁴க³குலாதி மஹந்தேஹி போ⁴கே³ஹி ஸமன்னாக³தா குலா. உளாரபோ⁴க³குலாதி உளாரேஹி பணீதேஹி போ⁴கே³ஹி ஸம்பன்னகுலா. இமஸ்மிங் பத³த்³வயே சத்தாரிபி குலானி லப்³ப⁴ந்தி. யத்த² கத்த²சி குலே ஜாதோ ஹி புஞ்ஞப³லேஹி மஹாபோ⁴கோ³பி உளாரபோ⁴கோ³பி ஹோதியேவ.
Mahākulāti khattiyakulā vā brāhmaṇakulā vā vessakulā vā. Idameva hi kulattayaṃ ‘‘mahākula’’nti vuccati. Mahābhogakulāti mahantehi bhogehi samannāgatā kulā. Uḷārabhogakulāti uḷārehi paṇītehi bhogehi sampannakulā. Imasmiṃ padadvaye cattāripi kulāni labbhanti. Yattha katthaci kule jāto hi puññabalehi mahābhogopi uḷārabhogopi hotiyeva.
106. யஸஸ்ஸீதி பரிவாரஸம்பன்னோ. அப்பஞ்ஞாதாதி ரத்திங் கி²த்தஸரா விய ஸங்க⁴மஜ்ஜா²தீ³ஸு ந பஞ்ஞாயந்தி. அப்பேஸக்கா²தி அப்பபரிவாரா.
106.Yasassīti parivārasampanno. Appaññātāti rattiṃ khittasarā viya saṅghamajjhādīsu na paññāyanti. Appesakkhāti appaparivārā.
107. ஆரஞ்ஞிகோதி ஸமாதி³ன்னஆரஞ்ஞிகது⁴தங்கோ³. ஸேஸது⁴தங்கே³ஸுபி ஏஸேவ நயோ. இமஸ்மிஞ்ச ஸுத்தே பாளியங் நவேவ து⁴தங்கா³னி ஆக³தானி, வித்தா²ரேன பனேதானி தேரஸ ஹொந்தி. தேஸு யங் வத்தப்³ப³ங், தங் ஸப்³ப³ங் ஸப்³பா³காரேன விஸுத்³தி⁴மக்³கே³ து⁴தங்க³னித்³தே³ஸே வுத்தமேவ.
107.Āraññikoti samādinnaāraññikadhutaṅgo. Sesadhutaṅgesupi eseva nayo. Imasmiñca sutte pāḷiyaṃ naveva dhutaṅgāni āgatāni, vitthārena panetāni terasa honti. Tesu yaṃ vattabbaṃ, taṃ sabbaṃ sabbākārena visuddhimagge dhutaṅganiddese vuttameva.
108. அதம்மயதாதி தம்மயதா வுச்சதி தண்ஹா, நித்தண்ஹாதி அத்தோ². அதம்மயதஞ்ஞேவ அந்தரங் கரித்வாதி நித்தண்ஹதங்யேவ காரணங் கத்வா அப்³ப⁴ந்தரங் வா கத்வா, சித்தே உப்பாதெ³த்வாதி அத்தோ².
108.Atammayatāti tammayatā vuccati taṇhā, nittaṇhāti attho. Atammayataññeva antaraṃ karitvāti nittaṇhataṃyeva kāraṇaṃ katvā abbhantaraṃ vā katvā, citte uppādetvāti attho.
நிரோத⁴வாரே யஸ்மா அனாகா³மிகீ²ணாஸவாவ தங் ஸமாபத்திங் ஸமாபஜ்ஜந்தி, புது²ஜ்ஜனஸ்ஸ ஸா நத்தி², தஸ்மா அஸப்புரிஸவாரோ பரிஹீனோ. ந கஞ்சி மஞ்ஞதீதி கஞ்சி புக்³க³லங் தீஹி மஞ்ஞனாஹி ந மஞ்ஞதி. ந குஹிஞ்சி மஞ்ஞதீதி கிஸ்மிஞ்சி ஓகாஸே ந மஞ்ஞதி. ந கேனசி மஞ்ஞதீதி கேனசி வத்து²னாபி தங் புக்³க³லங் ந மஞ்ஞதி. ஸேஸங் ஸப்³ப³த்த² உத்தானமேவாதி.
Nirodhavāre yasmā anāgāmikhīṇāsavāva taṃ samāpattiṃ samāpajjanti, puthujjanassa sā natthi, tasmā asappurisavāro parihīno. Na kañci maññatīti kañci puggalaṃ tīhi maññanāhi na maññati. Nakuhiñci maññatīti kismiñci okāse na maññati. Na kenaci maññatīti kenaci vatthunāpi taṃ puggalaṃ na maññati. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸப்புரிஸத⁴ம்மஸுத்தவண்ணனா நிட்டி²தா.
Sappurisadhammasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. ஸப்புரிஸஸுத்தங் • 3. Sappurisasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. ஸப்புரிஸத⁴ம்மஸுத்தவண்ணனா • 3. Sappurisadhammasuttavaṇṇanā
