| Library / Tipiṭaka / તિપિટક • Tipiṭaka / જાતક-અટ્ઠકથા • Jātaka-aṭṭhakathā |
[૮૮] ૮. સારમ્ભજાતકવણ્ણના
[88] 8. Sārambhajātakavaṇṇanā
કલ્યાણિમેવ મુઞ્ચેય્યાતિ ઇદં સત્થા જેતવને વિહરન્તો ઓમસવાદસિક્ખાપદં (પાચિ॰ ૧૫) આરબ્ભ કથેસિ. દ્વેપિ વત્થૂનિ હેટ્ઠા નન્દિવિસાલજાતકે વુત્તસદિસાનેવ. ઇમસ્મિં પન જાતકે બોધિસત્તો ગન્ધારરટ્ઠે તક્કસિલાયં અઞ્ઞતરસ્સ બ્રાહ્મણસ્સ સારમ્ભો નામ બલિબદ્દો અહોસિ. સત્થા ઇદં અતીતવત્થું કથેત્વા અભિસમ્બુદ્ધો હુત્વા ઇમં ગાથમાહ –
Kalyāṇimeva muñceyyāti idaṃ satthā jetavane viharanto omasavādasikkhāpadaṃ (pāci. 15) ārabbha kathesi. Dvepi vatthūni heṭṭhā nandivisālajātake vuttasadisāneva. Imasmiṃ pana jātake bodhisatto gandhāraraṭṭhe takkasilāyaṃ aññatarassa brāhmaṇassa sārambho nāma balibaddo ahosi. Satthā idaṃ atītavatthuṃ kathetvā abhisambuddho hutvā imaṃ gāthamāha –
૮૮.
88.
‘‘કલ્યાણિમેવ મુઞ્ચેય્ય, ન હિ મુઞ્ચેય્ય પાપિકં;
‘‘Kalyāṇimeva muñceyya, na hi muñceyya pāpikaṃ;
મોક્ખો કલ્યાણિયા સાધુ, મુત્વા તપ્પતિ પાપિક’’ન્તિ.
Mokkho kalyāṇiyā sādhu, mutvā tappati pāpika’’nti.
તત્થ કલ્યાણિમેવ મુઞ્ચેય્યાતિ ચતુદોસવિનિમુત્તં કલ્યાણિં સુન્દરં અનવજ્જં વાચમેવ મુઞ્ચેય્ય વિસ્સજ્જેય્ય કથેય્ય. ન હિ મુઞ્ચેય્ય પાપિકન્તિ પાપિકં લામિકં પરેસં અપ્પિયં અમનાપં ન મુઞ્ચેય્ય ન કથેય્ય. મોક્ખો કલ્યાણિયા સાધૂતિ કલ્યાણવાચાય વિસ્સજ્જનમેવ ઇમસ્મિં લોકે સાધુ સુન્દરં ભદ્દકં. મુત્વા તપ્પતિ પાપિકન્તિ પાપિકં ફરુસવાચં મુઞ્ચિત્વા વિસ્સજ્જેત્વા કથેત્વા સો પુગ્ગલો તપ્પતિ સોચતિ કિલમતીતિ.
Tattha kalyāṇimeva muñceyyāti catudosavinimuttaṃ kalyāṇiṃ sundaraṃ anavajjaṃ vācameva muñceyya vissajjeyya katheyya. Na hi muñceyya pāpikanti pāpikaṃ lāmikaṃ paresaṃ appiyaṃ amanāpaṃ na muñceyya na katheyya. Mokkhokalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tappati pāpikanti pāpikaṃ pharusavācaṃ muñcitvā vissajjetvā kathetvā so puggalo tappati socati kilamatīti.
એવં સત્થા ઇમં ધમ્મદેસનં આહરિત્વા જાતકં સમોધાનેસિ – ‘‘તદા બ્રાહ્મણો આનન્દો અહોસિ, બ્રાહ્મણી ઉપ્પલવણ્ણા, સારમ્ભો પન અહમેવ અહોસિ’’ન્તિ.
Evaṃ satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, brāhmaṇī uppalavaṇṇā, sārambho pana ahameva ahosi’’nti.
સારમ્ભજાતકવણ્ણના અટ્ઠમા.
Sārambhajātakavaṇṇanā aṭṭhamā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / જાતકપાળિ • Jātakapāḷi / ૮૮. સારમ્ભજાતકં • 88. Sārambhajātakaṃ
