| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૩. સરણગમનિયત્થેરઅપદાનવણ્ણના
3. Saraṇagamaniyattheraapadānavaṇṇanā
ઉભિન્નં દેવરાજૂનન્ત્યાદિકં આયસ્મતો સરણગમનિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો ઉપ્પન્નુપ્પન્નભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરે ભગવતિ ઉપ્પન્ને અયં હિમવન્તે દેવરાજા હુત્વા નિબ્બત્તિ, તસ્મિં અપરેન યક્ખદેવરઞ્ઞા સદ્ધિં સઙ્ગામત્થાય ઉપટ્ઠિતે દ્વે અનેકયક્ખસહસ્સપરિવારા ફલકાવુધાદિહત્થા સઙ્ગામત્થાય સમુપબ્યૂળ્હા અહેસું. તદા પદુમુત્તરો ભગવા તેસુ સત્તેસુ કારુઞ્ઞં ઉપ્પાદેત્વા આકાસેન તત્થ ગન્ત્વા સપરિવારાનં દ્વિન્નં દેવરાજૂનં ધમ્મં દેસેસિ. તદા તે સબ્બે ફલકાવુધાનિ છડ્ડેત્વા ભગવન્તં ગારવબહુમાનેન વન્દિત્વા સરણમગમંસુ. તેસં અયં પઠમં સરણમગમાસિ. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સત્થરિ પસન્નો પબ્બજિત્વા નચિરસ્સેવ અરહા અહોસિ.
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
૨૦. સો અપરભાગે પુબ્બકુસલં સરિત્વા સોમનસ્સજાતો પુબ્બચરિતાપદાનં પકાસેન્તો ઉભિન્નં દેવરાજૂનન્તિઆદિમાહ. તત્થ સુચિલોમખરલોમઆળવકકુમ્ભીરકુવેરાદયો વિય નામગોત્તેન અપાકટા દ્વે યક્ખરાજાનો અઞ્ઞાપદેસેન દસ્સેન્તો ‘‘ઉભિન્નં દેવરાજૂન’’ન્તિઆદિમાહ. સઙ્ગામો સમુપટ્ઠિતોતિ સં સુટ્ઠુ ગામો કલહત્થાય ઉપગમનન્તિ સઙ્ગામો, સો સઙ્ગામો સં સુટ્ઠુ ઉપટ્ઠિતો, એકટ્ઠાને ઉપગન્ત્વા ઠિતોતિ અત્થો. અહોસિ સમુપબ્યૂળ્હોતિ સં સુટ્ઠુ ઉપસમીપે રાસિભૂતોતિ અત્થો.
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
૨૧. સંવેજેસિ મહાજનન્તિ તેસં રાસિભૂતાનં યક્ખાનં આકાસે નિસિન્નો ભગવા ચતુસચ્ચધમ્મદેસનાય સં સુટ્ઠુ વેજેસિ, આદીનવદસ્સનેન ગણ્હાપેસિ વિઞ્ઞાપેસિ બોધેસીતિ અત્થો. સેસં સબ્બત્થ ઉત્તાનમેવાતિ.
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
સરણગમનિયત્થેરઅપદાનવણ્ણના સમત્તા.
Saraṇagamaniyattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૩. સરણગમનિયત્થેરઅપદાનં • 3. Saraṇagamaniyattheraapadānaṃ
