| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
4. ஸாரிபுத்தஸுத்தவண்ணனா
4. Sāriputtasuttavaṇṇanā
24. சதுத்தே² பரிமுக²ங் ஸதிங் உபட்ட²பெத்வாதி ஆரம்மணாபி⁴முக²ங் ஸதிங் ட²பயித்வா முக²ஸமீபே கத்வா. ததா² ஹி விப⁴ங்கே³ வுத்தங் –
24. Catutthe parimukhaṃ satiṃ upaṭṭhapetvāti ārammaṇābhimukhaṃ satiṃ ṭhapayitvā mukhasamīpe katvā. Tathā hi vibhaṅge vuttaṃ –
‘‘அயங் ஸதி உபட்டி²தா ஹோதி ஸுபட்டி²தா நாஸிகக்³கே³ வா முக²னிமித்தே வா, தேன வுச்சதி பரிமுக²ங் ஸதிங் உபட்ட²பெத்வா’’தி (விப⁴॰ 537).
‘‘Ayaṃ sati upaṭṭhitā hoti supaṭṭhitā nāsikagge vā mukhanimitte vā, tena vuccati parimukhaṃ satiṃ upaṭṭhapetvā’’ti (vibha. 537).
அத² வா ‘‘பரீதி பரிக்³க³ஹட்டோ², முக²ந்தி நிய்யானட்டோ², ஸதீதி உபட்டா²னட்டோ², தேன வுச்சதி ‘பரிமுக²ங் ஸதி’’’ந்தி. ஏவங் படிஸம்பி⁴தா³யங் (படி॰ ம॰ 1.164) வுத்தனயேனபெத்த² அத்தோ² வேதி³தப்³போ³. தத்ராயங் ஸங்கே²பத்தோ² – பரிக்³க³ஹிதனிய்யானஸதிங் கத்வாதி. நிய்யானந்தி ச ஸதியா ஓகா³ஹிதப்³ப³ங் ஆரம்மணங் த³ட்ட²ப்³ப³ங். எத்த² ச புரிமோ பச்சி²மோ ச அத்தோ² ஸப்³ப³ஸங்கா³ஹகவஸேன, இதரோ ஸமாபத்தியா புப்³ப³பா⁴க³ஸமன்னாஹாரவஸேன த³ட்ட²ப்³போ³. ஸதீதி வா ஸதிஸீஸேன ஜா²னங் வுத்தங் ‘‘யே காயக³தாஸதிங் பரிபு⁴ஞ்ஜந்தீ’’திஆதீ³ஸு (அ॰ நி॰ 1.600) விய. கதமங் பன தங் ஜா²னந்தி? ரூபாவசரசதுத்த²ஜ்ஜா²னங் பாத³கங் கத்வா ஸமாபன்னங் அரஹத்தப²லஜ்ஜா²னங். கத²ங் பனேதங் ஜானிதப்³ப³ந்தி? ஆனேஞ்ஜஸமாதி⁴யோகே³ன தே²ரஸ்ஸ ஸவிஸேஸங் நிச்சலபா⁴வங் கேனசி அகம்பனீயதஞ்ச பப்³ப³தோபமாய பகாஸெந்தோ ப⁴க³வா இமங் உதா³னங் அபா⁴ஸீதி கா³தா²ய ஏவ அயமத்தோ² விஞ்ஞாயதி. ந சாயங் நிஸஜ்ஜா தே²ரஸ்ஸ ஸச்சப்படிவேதா⁴ய, அத² கோ² தி³ட்ட²த⁴ம்மஸுக²விஹாராய. புப்³பே³யேவ ஹி ஸூகரக²தலேணே (ம॰ நி॰ 2.201) அத்தனோ பா⁴கி³னெய்யஸ்ஸ தீ³க⁴னக²பரிப்³பா³ஜகஸ்ஸ ப⁴க³வதி த⁴ம்மங் தே³ஸெந்தே அயங் மஹாதே²ரோ ஸச்சப்படிவேத⁴கிச்சங் மத்த²கங் பாபேஸீதி.
Atha vā ‘‘parīti pariggahaṭṭho, mukhanti niyyānaṭṭho, satīti upaṭṭhānaṭṭho, tena vuccati ‘parimukhaṃ sati’’’nti. Evaṃ paṭisambhidāyaṃ (paṭi. ma. 1.164) vuttanayenapettha attho veditabbo. Tatrāyaṃ saṅkhepattho – pariggahitaniyyānasatiṃ katvāti. Niyyānanti ca satiyā ogāhitabbaṃ ārammaṇaṃ daṭṭhabbaṃ. Ettha ca purimo pacchimo ca attho sabbasaṅgāhakavasena, itaro samāpattiyā pubbabhāgasamannāhāravasena daṭṭhabbo. Satīti vā satisīsena jhānaṃ vuttaṃ ‘‘ye kāyagatāsatiṃ paribhuñjantī’’tiādīsu (a. ni. 1.600) viya. Katamaṃ pana taṃ jhānanti? Rūpāvacaracatutthajjhānaṃ pādakaṃ katvā samāpannaṃ arahattaphalajjhānaṃ. Kathaṃ panetaṃ jānitabbanti? Āneñjasamādhiyogena therassa savisesaṃ niccalabhāvaṃ kenaci akampanīyatañca pabbatopamāya pakāsento bhagavā imaṃ udānaṃ abhāsīti gāthāya eva ayamattho viññāyati. Na cāyaṃ nisajjā therassa saccappaṭivedhāya, atha kho diṭṭhadhammasukhavihārāya. Pubbeyeva hi sūkarakhataleṇe (ma. ni. 2.201) attano bhāgineyyassa dīghanakhaparibbājakassa bhagavati dhammaṃ desente ayaṃ mahāthero saccappaṭivedhakiccaṃ matthakaṃ pāpesīti.
ஏதமத்த²ந்தி ஏதங் தே²ரஸ்ஸ ஆனேஞ்ஜஸமாதி⁴யோகே³ன தாதி³பா⁴வப்பத்தியா ச கேனசி அகம்பனீயதாஸங்கா²தங் அத்த²ங் ஸப்³பா³காரதோ விதி³த்வா தத³த்த²விபா⁴வனங் இமங் உதா³னங் உதா³னேஸி.
Etamatthanti etaṃ therassa āneñjasamādhiyogena tādibhāvappattiyā ca kenaci akampanīyatāsaṅkhātaṃ atthaṃ sabbākārato viditvā tadatthavibhāvanaṃ imaṃ udānaṃ udānesi.
தத்த² யதா²பி பப்³ப³தோ ஸேலோதி யதா² ஸிலாமயோ ஏகக்³க⁴னஸிலாபப்³ப³தோ, ந பங்ஸுபப்³ப³தோ ந மிஸ்ஸகபப்³ப³தோதி அத்தோ². அசலோ ஸுப்பதிட்டி²தோதி ஸுப்பதிட்டி²தமூலோ பகதிவாதேஹி அசலோ அகம்பனீயோ ஹோதி. ஏவங் மோஹக்க²யா பி⁴க்கு², பப்³ப³தோவ ந வேத⁴தீதி மோஹஸ்ஸ அனவஸேஸப்பஹானா மோஹமூலகத்தா ச ஸப்³பா³குஸலானங் பஹீனஸப்³பா³குஸலோ பி⁴க்கு², யதா² ஸோ பப்³ப³தோ பகதிவாதேஹி, ஏவங் லோகத⁴ம்மேஹி ந வேத⁴தி ந கம்பதி. மோஹக்க²யோதி வா யஸ்மா நிப்³பா³னங் அரஹத்தஞ்ச வுச்சதி, தஸ்மா மோஹக்க²யஸ்ஸ ஹேது நிப்³பா³னஸ்ஸ அரஹத்தஸ்ஸ வா அதி⁴க³தத்தா சதூஸு அரியஸச்சேஸு ஸுப்பதிட்டி²தோ அஸமாபன்னகாலேபி யதா²வுத்தபப்³ப³தோ விய ந கேனசி வேத⁴தி, பகே³வ ஸமாபன்னகாலேதி அதி⁴ப்பாயோ.
Tattha yathāpi pabbato seloti yathā silāmayo ekagghanasilāpabbato, na paṃsupabbato na missakapabbatoti attho. Acalo suppatiṭṭhitoti suppatiṭṭhitamūlo pakativātehi acalo akampanīyo hoti. Evaṃ mohakkhayā bhikkhu, pabbatova na vedhatīti mohassa anavasesappahānā mohamūlakattā ca sabbākusalānaṃ pahīnasabbākusalo bhikkhu, yathā so pabbato pakativātehi, evaṃ lokadhammehi na vedhati na kampati. Mohakkhayoti vā yasmā nibbānaṃ arahattañca vuccati, tasmā mohakkhayassa hetu nibbānassa arahattassa vā adhigatattā catūsu ariyasaccesu suppatiṭṭhito asamāpannakālepi yathāvuttapabbato viya na kenaci vedhati, pageva samāpannakāleti adhippāyo.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 4. ஸாரிபுத்தஸுத்தங் • 4. Sāriputtasuttaṃ
