| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஸாரிபுத்தஸுத்தவண்ணனா
6. Sāriputtasuttavaṇṇanā
214. வாக்கரணசாதுரியதோ வசனகு³ணஹேதூனங் பூரியா பூரே ப⁴வாதி போரீ, தாய போரியா. தேனாஹ ‘‘அக்க²ராதி³பரிபுண்ணாயா’’தி. அவிப³த்³தா⁴யாதி பித்தாதீ³ஹி ந விப³த்³தா⁴ய அனுபத்³து³தாய. தேனாஹ ‘‘அபலிபு³த்³தா⁴யா’’திஆதி³. நித்³தோ³ஸாயாதி அத்த²தோ ப்³யஞ்ஜனதோ விக³ததோ³ஸாய. அக்க²லிதபத³ப்³யஞ்ஜனாயாதி அக³லிதபத³ப்³யஞ்ஜனாய, அத்த²ஸ்ஸ விஞ்ஞாபனியாதி தி³ட்ட²த⁴ம்மிகாதி³அத்த²ஸ்ஸ போ³த⁴னே பரியத்தாய. பி⁴க்கு²னந்தி கா³தா²ஸுக²த்த²ங் ரஸ்ஸங் கத்வா வுத்தங்.
214. Vākkaraṇacāturiyato vacanaguṇahetūnaṃ pūriyā pūre bhavāti porī, tāya poriyā. Tenāha ‘‘akkharādiparipuṇṇāyā’’ti. Avibaddhāyāti pittādīhi na vibaddhāya anupaddutāya. Tenāha ‘‘apalibuddhāyā’’tiādi. Niddosāyāti atthato byañjanato vigatadosāya. Akkhalitapadabyañjanāyāti agalitapadabyañjanāya, atthassa viññāpaniyāti diṭṭhadhammikādiatthassa bodhane pariyattāya. Bhikkhunanti gāthāsukhatthaṃ rassaṃ katvā vuttaṃ.
‘‘ஸங்கி²த்தேனபி தே³ஸேதி, வித்தா²ரேனபி பா⁴ஸதீ’’தி நயித³ங் பட²மங் உத்³தி³ஸித்வா தஸ்ஸ அத்த²ஸ்ஸ கித்தனவஸேன பவத்திதங் வசனங் ஸந்தா⁴ய வுத்தங். ஸா ஹி வித்தா²ரதே³ஸனா ஏவ ஹோதி. யா பன தே³ஸனா கதா³சி த⁴ம்மபடிக்³கா³ஹகானங் அஜ்ஜா²ஸயவஸேன ஸங்கி²த்தேனேவ த³ஸ்ஸெத்வா நிக்கி²பதி, யா ச கதா³சி வித்தா²ரேன, தது³ப⁴யங் ஸந்தா⁴ய வுத்தங். தேனாஹ ‘‘சத்தாரிமானீ’’திஆதி³. ஸபா⁴வமது⁴ரோ பச்சயவஸேன மது⁴ரதரோ ஹோதீதி த³ஸ்ஸேதுங் ‘‘யதா²’’திஆதி³ வுத்தங். விவிதா⁴காரங் கத்வா த⁴ம்மங் கதே²துங் படிபா⁴தீதி படிபா⁴னங், தே³ஸனாபகாரஞாணங். தேனாஹ ‘‘ஸமுத்³த³தோ’’திஆதி³. ஓத³ஹந்தீதி அவஜானநவஸேன க³மெந்தி.
‘‘Saṃkhittenapi deseti, vitthārenapi bhāsatī’’ti nayidaṃ paṭhamaṃ uddisitvā tassa atthassa kittanavasena pavattitaṃ vacanaṃ sandhāya vuttaṃ. Sā hi vitthāradesanā eva hoti. Yā pana desanā kadāci dhammapaṭiggāhakānaṃ ajjhāsayavasena saṃkhitteneva dassetvā nikkhipati, yā ca kadāci vitthārena, tadubhayaṃ sandhāya vuttaṃ. Tenāha ‘‘cattārimānī’’tiādi. Sabhāvamadhuro paccayavasena madhurataro hotīti dassetuṃ ‘‘yathā’’tiādi vuttaṃ. Vividhākāraṃ katvā dhammaṃ kathetuṃ paṭibhātīti paṭibhānaṃ, desanāpakārañāṇaṃ. Tenāha ‘‘samuddato’’tiādi. Odahantīti avajānanavasena gamenti.
ஸாரிபுத்தஸுத்தவண்ணனா நிட்டி²தா.
Sāriputtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸாரிபுத்தஸுத்தங் • 6. Sāriputtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஸாரிபுத்தஸுத்தவண்ணனா • 6. Sāriputtasuttavaṇṇanā
