| Library / Tipiṭaka / તિપિટક • Tipiṭaka / પઞ્ચપકરણ-અટ્ઠકથા • Pañcapakaraṇa-aṭṭhakathā |
૨૧. એકવીસતિમવગ્ગો
21. Ekavīsatimavaggo
૧. સાસનકથાવણ્ણના
1. Sāsanakathāvaṇṇanā
૮૭૮. ઇદાનિ સાસનકથા નામ હોતિ. તત્થ તિસ્સો સઙ્ગીતિયો સન્ધાય ‘‘સાસનં નવં કત’’ન્તિ ચ ‘‘અત્થિ કોચિ તથાગતસ્સ સાસનં નવં કરોતી’’તિ ચ ‘‘લબ્ભા તથાગતસ્સ સાસનં નવં કાતુ’’ન્તિ ચ યેસં લદ્ધિ, સેય્યથાપિ એકચ્ચાનં ઉત્તરાપથકાનં; તે સન્ધાય તીસુપિ કથાસુ પુચ્છા સકવાદિસ્સ, પટિઞ્ઞા ઇતરસ્સ. સતિપટ્ઠાનાતિઆદિ સાસનં નામ સતિપટ્ઠાનાદયો ચેવ અરિયધમ્મા, કુસલાદીનઞ્ચ દેસના. તત્થ યેસં ભગવતા દેસિતા સતિપટ્ઠાનાદયો, ઠપેત્વા તે અઞ્ઞેસં વા સતિપટ્ઠાનાદીનં કરણેન અકુસલાદીનં વા કુસલાદિભાવકરણેન સાસનં નવંકતં નામ ભવેય્ય, કિં તં એવં કતં કેનચિ, અત્થિ વા કોચિ એવં કરોતિ, લબ્ભા વા એવં કાતુન્તિ તીસુપિ પુચ્છાસુ ચોદનત્થં વુત્તં. સેસં સબ્બત્થ યથાપાળિમેવ નિય્યાતીતિ.
878. Idāni sāsanakathā nāma hoti. Tattha tisso saṅgītiyo sandhāya ‘‘sāsanaṃ navaṃ kata’’nti ca ‘‘atthi koci tathāgatassa sāsanaṃ navaṃ karotī’’ti ca ‘‘labbhā tathāgatassa sāsanaṃ navaṃ kātu’’nti ca yesaṃ laddhi, seyyathāpi ekaccānaṃ uttarāpathakānaṃ; te sandhāya tīsupi kathāsu pucchā sakavādissa, paṭiññā itarassa. Satipaṭṭhānātiādi sāsanaṃ nāma satipaṭṭhānādayo ceva ariyadhammā, kusalādīnañca desanā. Tattha yesaṃ bhagavatā desitā satipaṭṭhānādayo, ṭhapetvā te aññesaṃ vā satipaṭṭhānādīnaṃ karaṇena akusalādīnaṃ vā kusalādibhāvakaraṇena sāsanaṃ navaṃkataṃ nāma bhaveyya, kiṃ taṃ evaṃ kataṃ kenaci, atthi vā koci evaṃ karoti, labbhā vā evaṃ kātunti tīsupi pucchāsu codanatthaṃ vuttaṃ. Sesaṃ sabbattha yathāpāḷimeva niyyātīti.
સાસનકથાવણ્ણના.
Sāsanakathāvaṇṇanā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / કથાવત્થુપાળિ • Kathāvatthupāḷi / (૨૦૦) ૧. સાસનકથા • (200) 1. Sāsanakathā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૧. સાસનકથાવણ્ણના • 1. Sāsanakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૧. સાસનકથાવણ્ણના • 1. Sāsanakathāvaṇṇanā
