| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૫૫. સાતચ્ચમૂલકસપ્પાયકારીસુત્તં
55. Sātaccamūlakasappāyakārīsuttaṃ
૭૧૬. સાવત્થિનિદાનં. ‘‘ચતારોમે, ભિક્ખવે, ઝાયી. કતમે ચત્તારો? ઇધ, ભિક્ખવે , એકચ્ચો ઝાયી સમાધિસ્મિં સાતચ્ચકારી હોતિ, ન સમાધિસ્મિં સપ્પાયકારી. ઇધ પન, ભિક્ખવે, એકચ્ચો ઝાયી સમાધિસ્મિં સપ્પાયકારી હોતિ, ન સમાધિસ્મિં સાતચ્ચકારી. ઇધ પન, ભિક્ખવે, એકચ્ચો ઝાયી નેવ સમાધિસ્મિં સાતચ્ચકારી હોતિ, ન ચ સમાધિસ્મિં સપ્પાયકારી. ઇધ પન, ભિક્ખવે, એકચ્ચો ઝાયી સમાધિસ્મિં સાતચ્ચકારી ચ હોતિ, સમાધિસ્મિં સપ્પાયકારી ચ. તત્ર, ભિક્ખવે, ય્વાયં ઝાયી સમાધિસ્મિં સાતચ્ચકારી ચ હોતિ સમાધિસ્મિં સપ્પાયકારી ચ અયં ઇમેસં ચતુન્નં ઝાયીનં અગ્ગો ચ સેટ્ઠો ચ મોક્ખો ચ ઉત્તમો ચ પવરો ચ. સેય્યથાપિ, ભિક્ખવે, ગવા ખીરં, ખીરમ્હા દધિ, દધિમ્હા નવનીતં, નવનીતમ્હા સપ્પિ, સપ્પિમ્હા સપ્પિમણ્ડો તત્ર અગ્ગમક્ખાયતિ; એવમેવ ખો, ભિક્ખવે, ય્વાયં ઝાયી સમાધિસ્મિં સાતચ્ચકારી ચ હોતિ, સમાધિસ્મિં સપ્પાયકારી અયં ઇમેસં ચતુન્નં ઝાયીનં અગ્ગો ચ સેટ્ઠો ચ મોક્ખો ચ ઉત્તમો ચ પવરો ચા’’તિ. ઇદમવોચ ભગવા. અત્તમના તે ભિક્ખૂ ભગવતો ભાસિતં અભિનન્દુન્તિ. પઞ્ચપઞ્ઞાસમં. (યથા પઞ્ચપઞ્ઞાસં વેય્યાકરણાનિ હોન્તિ તથા વિત્થારેતબ્બાનિ.)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
તસ્સુદ્દાનં –
Tassuddānaṃ –
સમાધિ સમાપત્તિ ઠિતિ ચ, વુટ્ઠાનં કલ્લિતારમ્મણેન ચ;
Samādhi samāpatti ṭhiti ca, vuṭṭhānaṃ kallitārammaṇena ca;
ગોચરા અભિનીહારો સક્કચ્ચ, સાતચ્ચ અથોપિ સપ્પાયન્તિ.
Gocarā abhinīhāro sakkacca, sātacca athopi sappāyanti.
ખન્ધવગ્ગો તતિયો.
Khandhavaggo tatiyo.
તસ્સુદ્દાનં –
Tassuddānaṃ –
કિલેસ સારિપુત્તા ચ, નાગા સુપણ્ણ ગન્ધબ્બા;
Kilesa sāriputtā ca, nāgā supaṇṇa gandhabbā;
વલાહ વચ્છઝાનન્તિ , ખન્ધવગ્ગમ્હિ તેરસાતિ.
Valāha vacchajhānanti , khandhavaggamhi terasāti.
ખન્ધવગ્ગસંયુત્તપાળિ નિટ્ઠિતા.
Khandhavaggasaṃyuttapāḷi niṭṭhitā.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨-૫૫. સમાધિમૂલકઠિતિસુત્તાદિવણ્ણના • 2-55. Samādhimūlakaṭhitisuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨-૫૫. સમાધિમૂલકઠિતિસુત્તાદિવણ્ણના • 2-55. Samādhimūlakaṭhitisuttādivaṇṇanā
