| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૮. સતિપટ્ઠાનકથા
8. Satipaṭṭhānakathā
૩૦૧. સબ્બે ધમ્મા સતિપટ્ઠાનાતિ? આમન્તા. સબ્બે ધમ્મા સતિ સતિન્દ્રિયં સતિબલં સમ્માસતિ સતિસમ્બોજ્ઝઙ્ગો એકાયનમગ્ગો ખયગામી બોધગામી અપચયગામી અનાસવા અસંયોજનિયા અગન્થનિયા અનોઘનિયા અયોગનિયા અનીવરણિયા અપરામટ્ઠા અનુપાદાનિયા અસંકિલેસિકા, સબ્બે ધમ્મા બુદ્ધાનુસ્સતિ ધમ્માનુસ્સતિ સઙ્ઘાનુસ્સતિ સીલાનુસ્સતિ ચાગાનુસ્સતિ દેવતાનુસ્સતિ આનાપાનસ્સતિ મરણાનુસ્સતિ કાયગતાસતિ ઉપસમાનુસ્સતીતિ? ન હેવં વત્તબ્બે…પે॰….
301. Sabbe dhammā satipaṭṭhānāti? Āmantā. Sabbe dhammā sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavā asaṃyojaniyā aganthaniyā anoghaniyā ayoganiyā anīvaraṇiyā aparāmaṭṭhā anupādāniyā asaṃkilesikā, sabbe dhammā buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe….
સબ્બે ધમ્મા સતિપટ્ઠાનાતિ? આમન્તા. ચક્ખાયતનં સતિપટ્ઠાનન્તિ? ન હેવં વત્તબ્બે…પે॰… ચક્ખાયતનં સતિપટ્ઠાનન્તિ ? આમન્તા. ચક્ખાયતનં સતિ સતિન્દ્રિયં સતિબલં સમ્માસતિ સતિસમ્બોજ્ઝઙ્ગો એકાયનમગ્ગો ખયગામી બોધગામી અપચયગામી અનાસવં અસંયોજનિયં…પે॰… અસંકિલેસિકં, ચક્ખાયતનં બુદ્ધાનુસ્સતિ ધમ્માનુસ્સતિ સઙ્ઘાનુસ્સતિ સીલાનુસ્સતિ ચાગાનુસ્સતિ દેવતાનુસ્સતિ આનાપાનસ્સતિ મરણાનુસ્સતિ કાયગતાસતિ ઉપસમાનુસ્સતીતિ? ન હેવં વત્તબ્બે…પે॰… સોતાયતનં… ઘાનાયતનં… જિવ્હાયતનં… કાયાયતનં… રૂપાયતનં… સદ્દાયતનં… ગન્ધાયતનં… રસાયતનં… ફોટ્ઠબ્બાયતનં… રાગો… દોસો… મોહો… માનો… દિટ્ઠિ… વિચિકિચ્છા… થિનં… ઉદ્ધચ્ચં… અહિરિકં… અનોત્તપ્પં સતિપટ્ઠાનન્તિ? ન હેવં વત્તબ્બે…પે॰… અનોત્તપ્પં સતિપટ્ઠાનન્તિ? આમન્તા. અનોત્તપ્પં સતિ સતિન્દ્રિયં સતિબલં સમ્માસતિ…પે॰… કાયગતાસતિ ઉપસમાનુસ્સતીતિ? ન હેવં વત્તબ્બે…પે॰….
Sabbe dhammā satipaṭṭhānāti? Āmantā. Cakkhāyatanaṃ satipaṭṭhānanti? Na hevaṃ vattabbe…pe… cakkhāyatanaṃ satipaṭṭhānanti ? Āmantā. Cakkhāyatanaṃ sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavaṃ asaṃyojaniyaṃ…pe… asaṃkilesikaṃ, cakkhāyatanaṃ buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe… sotāyatanaṃ… ghānāyatanaṃ… jivhāyatanaṃ… kāyāyatanaṃ… rūpāyatanaṃ… saddāyatanaṃ… gandhāyatanaṃ… rasāyatanaṃ… phoṭṭhabbāyatanaṃ… rāgo… doso… moho… māno… diṭṭhi… vicikicchā… thinaṃ… uddhaccaṃ… ahirikaṃ… anottappaṃ satipaṭṭhānanti? Na hevaṃ vattabbe…pe… anottappaṃ satipaṭṭhānanti? Āmantā. Anottappaṃ sati satindriyaṃ satibalaṃ sammāsati…pe… kāyagatāsati upasamānussatīti? Na hevaṃ vattabbe…pe….
સતિ સતિપટ્ઠાના, સા ચ સતીતિ? આમન્તા. ચક્ખાયતનં સતિપટ્ઠાનં, તઞ્ચ સતીતિ? ન હેવં વત્તબ્બે…પે॰… સતિ સતિપટ્ઠાના, સા ચ સતીતિ? આમન્તા. સોતાયતનં…પે॰… કાયાયતનં… રૂપાયતનં…પે॰… ફોટ્ઠબ્બાયતનં… રાગો… દોસો… મોહો…પે॰… અનોત્તપ્પં સતિપટ્ઠાનં, તઞ્ચ સતીતિ? ન હેવં વત્તબ્બે…પે॰….
Sati satipaṭṭhānā, sā ca satīti? Āmantā. Cakkhāyatanaṃ satipaṭṭhānaṃ, tañca satīti? Na hevaṃ vattabbe…pe… sati satipaṭṭhānā, sā ca satīti? Āmantā. Sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo… doso… moho…pe… anottappaṃ satipaṭṭhānaṃ, tañca satīti? Na hevaṃ vattabbe…pe….
ચક્ખાયતનં સતિપટ્ઠાનં, તઞ્ચ ન સતીતિ? આમન્તા. સતિ સતિપટ્ઠાના, સા ચ ન સતીતિ? ન હેવં વત્તબ્બે…પે॰… સોતાયતનં…પે॰… કાયાયતનં… રૂપાયતનં…પે॰… ફોટ્ઠબ્બાયતનં… રાગો … દોસો… મોહો…પે॰… અનોત્તપ્પં સતિપટ્ઠાનં, તઞ્ચ ન સતીતિ? આમન્તા . સતિ સતિપટ્ઠાના, સા ચ ન સતીતિ? ન હેવં વત્તબ્બે…પે॰….
Cakkhāyatanaṃ satipaṭṭhānaṃ, tañca na satīti? Āmantā. Sati satipaṭṭhānā, sā ca na satīti? Na hevaṃ vattabbe…pe… sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo … doso… moho…pe… anottappaṃ satipaṭṭhānaṃ, tañca na satīti? Āmantā . Sati satipaṭṭhānā, sā ca na satīti? Na hevaṃ vattabbe…pe….
૩૦૨. ન વત્તબ્બં – ‘‘સબ્બે ધમ્મા સતિપટ્ઠાના’’તિ? આમન્તા. નનુ સબ્બે ધમ્મે આરબ્ભ સતિ સન્તિટ્ઠતીતિ? આમન્તા. હઞ્ચિ સબ્બે ધમ્મે આરબ્ભ સતિ સન્તિટ્ઠતીતિ, તેન વત રે વત્તબ્બે – ‘‘સબ્બે ધમ્મા સતિપટ્ઠાના’’તિ.
302. Na vattabbaṃ – ‘‘sabbe dhammā satipaṭṭhānā’’ti? Āmantā. Nanu sabbe dhamme ārabbha sati santiṭṭhatīti? Āmantā. Hañci sabbe dhamme ārabbha sati santiṭṭhatīti, tena vata re vattabbe – ‘‘sabbe dhammā satipaṭṭhānā’’ti.
સબ્બં ધમ્મં આરબ્ભ સતિ સન્તિટ્ઠતીતિ સબ્બે ધમ્મા સતિપટ્ઠાનાતિ? આમન્તા. સબ્બં ધમ્મં આરબ્ભ ફસ્સો સન્તિટ્ઠતીતિ સબ્બે ધમ્મા ફસ્સપટ્ઠાનાતિ? ન હેવં વત્તબ્બે…પે॰….
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha phasso santiṭṭhatīti sabbe dhammā phassapaṭṭhānāti? Na hevaṃ vattabbe…pe….
સબ્બં ધમ્મં આરબ્ભ સતિ સન્તિટ્ઠતીતિ સબ્બે ધમ્મા સતિપટ્ઠાનાતિ? આમન્તા. સબ્બં ધમ્મં આરબ્ભ વેદના સન્તિટ્ઠતિ… સઞ્ઞા સન્તિટ્ઠતિ… ચેતના સન્તિટ્ઠતિ… ચિત્તં સન્તિટ્ઠતીતિ સબ્બે ધમ્મા ચિત્તપટ્ઠાનાતિ? ન હેવં વત્તબ્બે…પે॰….
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha vedanā santiṭṭhati… saññā santiṭṭhati… cetanā santiṭṭhati… cittaṃ santiṭṭhatīti sabbe dhammā cittapaṭṭhānāti? Na hevaṃ vattabbe…pe….
સબ્બે ધમ્મા સતિપટ્ઠાનાતિ? આમન્તા. સબ્બે સત્તા ઉપટ્ઠિતસતિનો સતિયા સમન્નાગતા સતિયા સમોહિતા; સબ્બેસં સત્તાનં સતિ પચ્ચુપટ્ઠિતાતિ? ન હેવં વત્તબ્બે…પે॰….
Sabbe dhammā satipaṭṭhānāti? Āmantā. Sabbe sattā upaṭṭhitasatino satiyā samannāgatā satiyā samohitā; sabbesaṃ sattānaṃ sati paccupaṭṭhitāti? Na hevaṃ vattabbe…pe….
૩૦૩. સબ્બે ધમ્મા સતિપટ્ઠાનાતિ? આમન્તા. નનુ વુત્તં ભગવતા – ‘‘અમતં તે, ભિક્ખવે, ન પરિભુઞ્જન્તિ યે કાયગતાસતિં ન પરિભુઞ્જન્તિ. અમતં તે, ભિક્ખવે, પરિભુઞ્જન્તિ યે કાયગતાસતિં પરિભુઞ્જન્તી’’તિ 1. અત્થેવ સુત્તન્તોતિ? આમન્તા. સબ્બે સત્તા કાયગતાસતિં પરિભુઞ્જન્તિ પટિલભન્તિ આસેવન્તિ ભાવેન્તિ બહુલીકરોન્તીતિ? ન હેવં વત્તબ્બે…પે॰….
303. Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘amataṃ te, bhikkhave, na paribhuñjanti ye kāyagatāsatiṃ na paribhuñjanti. Amataṃ te, bhikkhave, paribhuñjanti ye kāyagatāsatiṃ paribhuñjantī’’ti 2. Attheva suttantoti? Āmantā. Sabbe sattā kāyagatāsatiṃ paribhuñjanti paṭilabhanti āsevanti bhāventi bahulīkarontīti? Na hevaṃ vattabbe…pe….
સબ્બે ધમ્મા સતિપટ્ઠાનાતિ? આમન્તા. નનુ વુત્તં ભગવતા – ‘‘એકાયનો અયં, ભિક્ખવે, મગ્ગો સત્તાનં વિસુદ્ધિયા સોકપરિદેવાનં સમતિક્કમાય દુક્ખદોમનસ્સાનં અત્થઙ્ગમાય ઞાયસ્સ અધિગમાય નિબ્બાનસ્સ સચ્છિકિરિયાય યદિદં ચત્તારો સતિપટ્ઠાના’’તિ 3! અત્થેવ સુત્તન્તોતિ? આમન્તા? સબ્બે ધમ્મા એકાયનમગ્ગોતિ? ન હેવં વત્તબ્બે…પે॰….
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘ekāyano ayaṃ, bhikkhave, maggo sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya yadidaṃ cattāro satipaṭṭhānā’’ti 4! Attheva suttantoti? Āmantā? Sabbe dhammā ekāyanamaggoti? Na hevaṃ vattabbe…pe….
સબ્બે ધમ્મા સતિપટ્ઠાનાતિ? આમન્તા. નનુ વુત્તં ભગવતા – ‘‘રઞ્ઞો, ભિક્ખવે, ચક્કવત્તિસ્સ પાતુભાવા સત્તન્નં રતનાનં પાતુભાવો હોતિ. કતમેસં સત્તન્નં? ચક્કરતનસ્સ પાતુભાવો હોતિ, હત્થિરતનસ્સ પાતુભાવો હોતિ, અસ્સરતનસ્સ… મણિરતનસ્સ… ઇત્થિરતનસ્સ … ગહપતિરતનસ્સ… પરિણાયકરતનસ્સ પાતુભાવો હોતિ . રઞ્ઞો, ભિક્ખવે, ચક્કવત્તિસ્સ પાતુભાવા ઇમેસં સત્તન્નં રતનાનં પાતુભાવો હોતિ.
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘rañño, bhikkhave, cakkavattissa pātubhāvā sattannaṃ ratanānaṃ pātubhāvo hoti. Katamesaṃ sattannaṃ? Cakkaratanassa pātubhāvo hoti, hatthiratanassa pātubhāvo hoti, assaratanassa… maṇiratanassa… itthiratanassa … gahapatiratanassa… pariṇāyakaratanassa pātubhāvo hoti . Rañño, bhikkhave, cakkavattissa pātubhāvā imesaṃ sattannaṃ ratanānaṃ pātubhāvo hoti.
‘‘તથાગતસ્સ, ભિક્ખવે, પાતુભાવા અરહતો સમ્માસમ્બુદ્ધસ્સ સત્તન્નં બોજ્ઝઙ્ગરતનાનં પાતુભાવો હોતિ. કતમેસં સત્તન્નં? સતિસમ્બોજ્ઝઙ્ગરતનસ્સ પાતુભાવો હોતિ, ધમ્મવિચયસમ્બોજ્ઝઙ્ગરતનસ્સ પાતુભાવો હોતિ, વીરિયસમ્બોજ્ઝઙ્ગરતનસ્સ પાતુભાવો હોતિ, પીતિસમ્બોજ્ઝઙ્ગરતનસ્સ પાતુભાવો હોતિ, પસ્સદ્ધિસમ્બોજ્ઝઙ્ગરતનસ્સ પાતુભાવો હોતિ, સમાધિસમ્બોજ્ઝઙ્ગરતનસ્સ પાતુભાવો હોતિ, ઉપેક્ખાસમ્બોજ્ઝઙ્ગરતનસ્સ પાતુભાવો હોતિ. તથાગતસ્સ, ભિક્ખવે, પાતુભાવા અરહતો સમ્માસમ્બુદ્ધસ્સ ઇમેસં સત્તન્નં બોજ્ઝઙ્ગરતનાનં પાતુભાવો હોતી’’તિ 5. અત્થેવ સુત્તન્તોતિ? આમન્તા. તથાગતસ્સ પાતુભાવા અરહતો સમ્માસમ્બુદ્ધસ્સ સબ્બે ધમ્મા સતિસમ્બોજ્ઝઙ્ગરતનાવ હોન્તીતિ? ન હેવં વત્તબ્બે…પે॰… સબ્બે ધમ્મા સતિપટ્ઠાનાતિ? આમન્તા. સબ્બે ધમ્મા સમ્મપ્પધાના… ઇદ્ધિપાદા… ઇન્દ્રિયા… બલા… બોજ્ઝઙ્ગાતિ? ન હેવં વત્તબ્બે…પે॰….
‘‘Tathāgatassa, bhikkhave, pātubhāvā arahato sammāsambuddhassa sattannaṃ bojjhaṅgaratanānaṃ pātubhāvo hoti. Katamesaṃ sattannaṃ? Satisambojjhaṅgaratanassa pātubhāvo hoti, dhammavicayasambojjhaṅgaratanassa pātubhāvo hoti, vīriyasambojjhaṅgaratanassa pātubhāvo hoti, pītisambojjhaṅgaratanassa pātubhāvo hoti, passaddhisambojjhaṅgaratanassa pātubhāvo hoti, samādhisambojjhaṅgaratanassa pātubhāvo hoti, upekkhāsambojjhaṅgaratanassa pātubhāvo hoti. Tathāgatassa, bhikkhave, pātubhāvā arahato sammāsambuddhassa imesaṃ sattannaṃ bojjhaṅgaratanānaṃ pātubhāvo hotī’’ti 6. Attheva suttantoti? Āmantā. Tathāgatassa pātubhāvā arahato sammāsambuddhassa sabbe dhammā satisambojjhaṅgaratanāva hontīti? Na hevaṃ vattabbe…pe… sabbe dhammā satipaṭṭhānāti? Āmantā. Sabbe dhammā sammappadhānā… iddhipādā… indriyā… balā… bojjhaṅgāti? Na hevaṃ vattabbe…pe….
સતિપટ્ઠાનકથા નિટ્ઠિતા.
Satipaṭṭhānakathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૮. સતિપટ્ઠાનકથાવણ્ણના • 8. Satipaṭṭhānakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૮. સતિપટ્ઠાનકથાવણ્ણના • 8. Satipaṭṭhānakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૮. સતિપટ્ઠાનકથાવણ્ણના • 8. Satipaṭṭhānakathāvaṇṇanā
