| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(9) 4. ஸதிவக்³கோ³
(9) 4. Sativaggo
1. ஸதிஸம்பஜஞ்ஞஸுத்தங்
1. Satisampajaññasuttaṃ
81. ‘‘ஸதிஸம்பஜஞ்ஞே , பி⁴க்க²வே, அஸதி ஸதிஸம்பஜஞ்ஞவிபன்னஸ்ஸ ஹதூபனிஸங் ஹோதி ஹிரொத்தப்பங். ஹிரொத்தப்பே அஸதி ஹிரொத்தப்பவிபன்னஸ்ஸ ஹதூபனிஸோ ஹோதி இந்த்³ரியஸங்வரோ. இந்த்³ரியஸங்வரே அஸதி இந்த்³ரியஸங்வரவிபன்னஸ்ஸ ஹதூபனிஸங் ஹோதி ஸீலங். ஸீலே அஸதி ஸீலவிபன்னஸ்ஸ ஹதூபனிஸோ ஹோதி ஸம்மாஸமாதி⁴. ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸங் ஹோதி யதா²பூ⁴தஞாணத³ஸ்ஸனங். யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸோ ஹோதி நிப்³பி³தா³விராகோ³. நிப்³பி³தா³விராகே³ அஸதி நிப்³பி³தா³விராக³விபன்னஸ்ஸ ஹதூபனிஸங் ஹோதி விமுத்திஞாணத³ஸ்ஸனங். ஸெய்யதா²பி, பி⁴க்க²வே, ருக்கோ² ஸாகா²பலாஸவிபன்னோ. தஸ்ஸ பபடிகாபி ந பாரிபூரிங் க³ச்ச²தி, தசோபி… பெ²க்³கு³பி… ஸாரோபி ந பாரிபூரிங் க³ச்ச²தி. ஏவமேவங் கோ², பி⁴க்க²வே, ஸதிஸம்பஜஞ்ஞே அஸதி ஸதிஸம்பஜஞ்ஞவிபன்னஸ்ஸ ஹதூபனிஸங் ஹோதி ஹிரொத்தப்பங்; ஹிரொத்தப்பே அஸதி ஹிரொத்தப்பவிபன்னஸ்ஸ ஹதூபனிஸோ ஹோதி…பே॰… விமுத்திஞாணத³ஸ்ஸனங்.
81. ‘‘Satisampajaññe , bhikkhave, asati satisampajaññavipannassa hatūpanisaṃ hoti hirottappaṃ. Hirottappe asati hirottappavipannassa hatūpaniso hoti indriyasaṃvaro. Indriyasaṃvare asati indriyasaṃvaravipannassa hatūpanisaṃ hoti sīlaṃ. Sīle asati sīlavipannassa hatūpaniso hoti sammāsamādhi. Sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ. Yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo. Nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṃ gacchati, tacopi… pheggupi… sāropi na pāripūriṃ gacchati. Evamevaṃ kho, bhikkhave, satisampajaññe asati satisampajaññavipannassa hatūpanisaṃ hoti hirottappaṃ; hirottappe asati hirottappavipannassa hatūpaniso hoti…pe… vimuttiñāṇadassanaṃ.
‘‘ஸதிஸம்பஜஞ்ஞே, பி⁴க்க²வே, ஸதி ஸதிஸம்பஜஞ்ஞஸம்பன்னஸ்ஸ உபனிஸஸம்பன்னங் ஹோதி ஹிரொத்தப்பங். ஹிரொத்தப்பே ஸதி ஹிரொத்தப்பஸம்பன்னஸ்ஸ உபனிஸஸம்பன்னோ ஹோதி இந்த்³ரியஸங்வரோ. இந்த்³ரியஸங்வரே ஸதி இந்த்³ரியஸங்வரஸம்பன்னஸ்ஸ உபனிஸஸம்பன்னங் ஹோதி ஸீலங். ஸீலே ஸதி ஸீலஸம்பன்னஸ்ஸ உபனிஸஸம்பன்னோ ஹோதி ஸம்மாஸமாதி⁴. ஸம்மாஸமாதி⁴ம்ஹி ஸதி ஸம்மாஸமாதி⁴ஸம்பன்னஸ்ஸ உபனிஸஸம்பன்னங் ஹோதி யதா²பூ⁴தஞாணத³ஸ்ஸனங். யதா²பூ⁴தஞாணத³ஸ்ஸனே ஸதி யதா²பூ⁴தஞாணத³ஸ்ஸனஸம்பன்னஸ்ஸ உபனிஸஸம்பன்னோ ஹோதி நிப்³பி³தா³விராகோ³ . நிப்³பி³தா³விராகே³ ஸதி நிப்³பி³தா³விராக³ஸம்பன்னஸ்ஸ உபனிஸஸம்பன்னங் ஹோதி விமுத்திஞாணத³ஸ்ஸனங். ஸெய்யதா²பி, பி⁴க்க²வே, ருக்கோ² ஸாகா²பலாஸஸம்பன்னோ. தஸ்ஸ பபடிகாபி பாரிபூரிங் க³ச்ச²தி, தசோபி… பெ²க்³கு³பி… ஸாரோபி பாரிபூரிங் க³ச்ச²தி. ஏவமேவங் கோ², பி⁴க்க²வே, ஸதிஸம்பஜஞ்ஞே ஸதி ஸதிஸம்பஜஞ்ஞஸம்பன்னஸ்ஸ உபனிஸஸம்பன்னங் ஹோதி ஹிரொத்தப்பங்; ஹிரொத்தப்பே ஸதி ஹிரொத்தப்பஸம்பன்னஸ்ஸ உபனிஸஸம்பன்னோ ஹோதி…பே॰… விமுத்திஞாணத³ஸ்ஸன’’ந்தி. பட²மங்.
‘‘Satisampajaññe, bhikkhave, sati satisampajaññasampannassa upanisasampannaṃ hoti hirottappaṃ. Hirottappe sati hirottappasampannassa upanisasampanno hoti indriyasaṃvaro. Indriyasaṃvare sati indriyasaṃvarasampannassa upanisasampannaṃ hoti sīlaṃ. Sīle sati sīlasampannassa upanisasampanno hoti sammāsamādhi. Sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ. Yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo . Nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṃ gacchati, tacopi… pheggupi… sāropi pāripūriṃ gacchati. Evamevaṃ kho, bhikkhave, satisampajaññe sati satisampajaññasampannassa upanisasampannaṃ hoti hirottappaṃ; hirottappe sati hirottappasampannassa upanisasampanno hoti…pe… vimuttiñāṇadassana’’nti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-2. ஸதிஸம்பஜஞ்ஞஸுத்தவண்ணனா • 1-2. Satisampajaññasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸத்³தா⁴ஸுத்தாதி³வண்ணனா • 1-10. Saddhāsuttādivaṇṇanā
