| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૨. દુતિયવગ્ગો
2. Dutiyavaggo
૧. સત્તધાતુસુત્તં
1. Sattadhātusuttaṃ
૯૫. સાવત્થિયં વિહરતિ…પે॰… ‘‘સત્તિમા , ભિક્ખવે, ધાતુયો. કતમા સત્ત? આભાધાતુ, સુભધાતુ, આકાસાનઞ્ચાયતનધાતુ, વિઞ્ઞાણઞ્ચાયતનધાતુ, આકિઞ્ચઞ્ઞાયતનધાતુ, નેવસઞ્ઞાનાસઞ્ઞાયતનધાતુ, સઞ્ઞાવેદયિતનિરોધધાતુ – ઇમા ખો, ભિક્ખવે, સત્ત ધાતુયો’’તિ.
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
એવં વુત્તે, અઞ્ઞતરો ભિક્ખુ ભગવન્તં એતદવોચ – ‘‘યા ચાયં, ભન્તે, આભાધાતુ યા ચ સુભધાતુ યા ચ આકાસાનઞ્ચાયતનધાતુ યા ચ વિઞ્ઞાણઞ્ચાયતનધાતુ યા ચ આકિઞ્ચઞ્ઞાયતનધાતુ યા ચ નેવસઞ્ઞાનાસઞ્ઞાયતનધાતુ યા ચ સઞ્ઞાવેદયિતનિરોધધાતુ – ઇમા નુ ખો, ભન્તે, ધાતુયો કિં પટિચ્ચ પઞ્ઞાયન્તી’’તિ?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘યાયં, ભિક્ખુ, આભાધાતુ – અયં ધાતુ અન્ધકારં પટિચ્ચ પઞ્ઞાયતિ. યાયં, ભિક્ખુ, સુભધાતુ – અયં ધાતુ અસુભં પટિચ્ચ પઞ્ઞાયતિ. યાયં, ભિક્ખુ, આકાસાનઞ્ચાયતનધાતુ – અયં ધાતુ રૂપં પટિચ્ચ પઞ્ઞાયતિ. યાયં, ભિક્ખુ, વિઞ્ઞાણઞ્ચાયતનધાતુ – અયં ધાતુ આકાસાનઞ્ચાયતનં પટિચ્ચ પઞ્ઞાયતિ. યાયં, ભિક્ખુ, આકિઞ્ચઞ્ઞાયતનધાતુ – અયં ધાતુ વિઞ્ઞાણઞ્ચાયતનં પટિચ્ચ પઞ્ઞાયતિ. યાયં, ભિક્ખુ, નેવસઞ્ઞાનાસઞ્ઞાયતનધાતુ – અયં ધાતુ આકિઞ્ચઞ્ઞાયતનં પટિચ્ચ પઞ્ઞાયતિ. યાયં, ભિક્ખુ, સઞ્ઞાવેદયિતનિરોધધાતુ – અયં ધાતુ નિરોધં પટિચ્ચ પઞ્ઞાયતી’’તિ.
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘યા ચાયં , ભન્તે, આભાધાતુ યા ચ સુભધાતુ યા ચ આકાસાનઞ્ચાયતનધાતુ યા ચ વિઞ્ઞાણઞ્ચાયતનધાતુ યા ચ આકિઞ્ચઞ્ઞાયતનધાતુ યા ચ નેવસઞ્ઞાનાસઞ્ઞાયતનધાતુ યા ચ સઞ્ઞાવેદયિતનિરોધધાતુ – ઇમા નુ ખો, ભન્તે, ધાતુયો કથં સમાપત્તિ પત્તબ્બા’’તિ?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘યા ચાયં, ભિક્ખુ, આભાધાતુ યા ચ સુભધાતુ યા ચ આકાસાનઞ્ચાયતનધાતુ યા ચ વિઞ્ઞાણઞ્ચાયતનધાતુ યા ચ આકિઞ્ચઞ્ઞાયતનધાતુ – ઇમા ધાતુયો સઞ્ઞાસમાપત્તિ પત્તબ્બા. યાયં, ભિક્ખુ, નેવસઞ્ઞાનાસઞ્ઞાયતનધાતુ – અયં ધાતુ સઙ્ખારાવસેસસમાપત્તિ પત્તબ્બા . યાયં, ભિક્ખુ, સઞ્ઞાવેદયિતનિરોધધાતુ – અયં ધાતુ નિરોધસમાપત્તિ પત્તબ્બા’’તિ. પઠમં.
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. સત્તધાતુસુત્તવણ્ણના • 1. Sattadhātusuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. સત્તધાતુસુત્તવણ્ણના • 1. Sattadhātusuttavaṇṇanā
