| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. து³தியவக்³கோ³
2. Dutiyavaggo
1. ஸத்ததா⁴துஸுத்தவண்ணனா
1. Sattadhātusuttavaṇṇanā
95. ஆபா⁴தீதி ஆபா⁴, ஆலோகபா⁴வேன நிப்ப²ஜ்ஜதி, உபட்டா²தீதி வா அத்தோ². ஸோ ஏவ நிஜ்ஜீவட்டே²ன தா⁴தூதி ஆபா⁴தா⁴து. ஆலோகஸ்ஸாதி ஆலோககஸிணஸ்ஸ. ஸுட்டு², ஸோப⁴னங் வா பா⁴தீதி ஸுப⁴ங். கஸிணஸஹசரணதோ ஜா²னங் ஸுப⁴ங். ஸேஸங் வுத்தனயமேவ. ஸுபரிஸுத்³த⁴வண்ணங் கஸிணங். ஆகாஸானஞ்சாத³யோபி ஸுபா⁴ரம்மணங் ஏவாதி கேசி. தே³ஸனங் நிட்டா²பேஸீதி தே³ஸனங் உத்³தே³ஸமத்தே ஏவ ட²பேஸி. பாளியங் ‘‘அந்த⁴காரங் படிச்ச பஞ்ஞாயதீ’’தி எத்தா²பி ஆரம்மணமேவ க³ஹிதங், ததா² ‘‘அயங் தா⁴து அஸுப⁴ங் படிச்ச பஞ்ஞாயதீ’’தி எத்தா²பி. யதா² ஹி இத⁴ ஸுவண்ணங் கஸிணங் ஸுப⁴ந்தி அதி⁴ப்பேதங், ஏவங் து³ப்³ப³ண்ணங் அஸுப⁴ந்தி.
95. Ābhātīti ābhā, ālokabhāvena nipphajjati, upaṭṭhātīti vā attho. So eva nijjīvaṭṭhena dhātūti ābhādhātu. Ālokassāti ālokakasiṇassa. Suṭṭhu, sobhanaṃ vā bhātīti subhaṃ. Kasiṇasahacaraṇato jhānaṃ subhaṃ. Sesaṃ vuttanayameva. Suparisuddhavaṇṇaṃ kasiṇaṃ. Ākāsānañcādayopi subhārammaṇaṃ evāti keci. Desanaṃ niṭṭhāpesīti desanaṃ uddesamatte eva ṭhapesi. Pāḷiyaṃ ‘‘andhakāraṃ paṭicca paññāyatī’’ti etthāpi ārammaṇameva gahitaṃ, tathā ‘‘ayaṃ dhātu asubhaṃ paṭicca paññāyatī’’ti etthāpi. Yathā hi idha suvaṇṇaṃ kasiṇaṃ subhanti adhippetaṃ, evaṃ dubbaṇṇaṃ asubhanti.
அந்த⁴காரங் படிச்சாதி அந்த⁴காரங் படிச்சா²த³கபச்சயங் படிச்ச. பஞ்ஞாயதீதி பாகடோ ஹோதி. தேனாஹ ‘‘அந்த⁴காரோ ஹீ’’திஆதி³. ஆலோகோபி, அந்த⁴காரேன பரிச்சி²ன்னோ ஹோதீதி யோஜனா. அந்த⁴காரோ தாவ ஆலோகேன பரிச்சி²ன்னோ ஹோது ‘‘யத்த² ஆலோகோ நத்தி², தத்த² அந்த⁴காரோ’’தி ஆலோகோ கத²ங் அந்த⁴காரேன பரிச்சி²ன்னோ ஹோதீதி ஆஹ ‘‘அந்த⁴காரேன ஹி ஸோ பாகடோ ஹோதீ’’தி. பரிச்சே²த³லேகா²ய விய சித்தரூபங் அந்த⁴காரேன ஹி பரிதோ பரிச்சி²ன்னோ ஹுத்வா பஞ்ஞாயதி, யதா² தங் சா²யாய ஆதபோ. ஏஸேவ நயோதி அஸுப⁴ஸுபா⁴னங் அஞ்ஞமஞ்ஞபரிச்சி²ன்னதங் அதிதி³ஸித்வா தத்த² அதி⁴ப்பேதமேவ த³ஸ்ஸெந்தோ ‘‘அஸுபே⁴ ஸதி ஸுப⁴ங் பஞ்ஞாயதீ’’தி ஆஹ. ஏவமாஹாதி ‘‘அஸுப⁴ங் படிச்ச ஸுப⁴ங் பஞ்ஞாயதீ’’தி அவோச. ‘‘ரூபீ ரூபானி பஸ்ஸதீ’’திஆதீ³ஸு விய உத்தரபத³லோபேனாயங் நித்³தே³ஸோதி ஆஹ ‘‘ரூபங் படிச்சாதி ரூபாவசரஸமாபத்திங் படிச்சா’’தி. தாய ஹி ஸதி அதி⁴க³தாய. ரூபஸமதிக்கமா வா ஹோதீதி ஸபா⁴வாரம்மணானங் ரூபஜ்ஜா²னானங் ஸமதிக்கமா ஆகாஸானஞ்சாயதனஸமாபத்தி நாம ஹோதீதி அத்தோ². ஏஸேவ நயோதி இமினா ‘‘ஆகாஸானஞ்சாயதனஸமதிக்கமா விஞ்ஞாணஞ்சாயதனஸமாபத்தி நாம ஹோதீ’’திஆதி³னா த்³வேபி பகாரே அதிதி³ஸதி. படிஸங்கா²தி படிஸங்கா²ஞாணேன. அப்பவத்திந்தி யதா²பரிச்சி²ன்னகாலங் அப்பவத்தனங். ஏதேன க²ணனிரோதா⁴தி³ங் படிக்கி²பதி.
Andhakāraṃ paṭiccāti andhakāraṃ paṭicchādakapaccayaṃ paṭicca. Paññāyatīti pākaṭo hoti. Tenāha ‘‘andhakāro hī’’tiādi. Ālokopi, andhakārena paricchinno hotīti yojanā. Andhakāro tāva ālokena paricchinno hotu ‘‘yattha āloko natthi, tattha andhakāro’’ti āloko kathaṃ andhakārena paricchinno hotīti āha ‘‘andhakārena hi so pākaṭo hotī’’ti. Paricchedalekhāya viya cittarūpaṃ andhakārena hi parito paricchinno hutvā paññāyati, yathā taṃ chāyāya ātapo. Eseva nayoti asubhasubhānaṃ aññamaññaparicchinnataṃ atidisitvā tattha adhippetameva dassento ‘‘asubhe sati subhaṃ paññāyatī’’ti āha. Evamāhāti ‘‘asubhaṃ paṭicca subhaṃ paññāyatī’’ti avoca. ‘‘Rūpī rūpāni passatī’’tiādīsu viya uttarapadalopenāyaṃ niddesoti āha ‘‘rūpaṃ paṭiccāti rūpāvacarasamāpattiṃ paṭiccā’’ti. Tāya hi sati adhigatāya. Rūpasamatikkamā vā hotīti sabhāvārammaṇānaṃ rūpajjhānānaṃ samatikkamā ākāsānañcāyatanasamāpatti nāma hotīti attho. Eseva nayoti iminā ‘‘ākāsānañcāyatanasamatikkamā viññāṇañcāyatanasamāpatti nāma hotī’’tiādinā dvepi pakāre atidisati. Paṭisaṅkhāti paṭisaṅkhāñāṇena. Appavattinti yathāparicchinnakālaṃ appavattanaṃ. Etena khaṇanirodhādiṃ paṭikkhipati.
கத²ங் ஸமாபத்தி பத்தப்³பா³தி இமாஸு ஸத்தஸு தா⁴தூஸு கா பகாரா ஸஞ்ஞாஸமாபத்தி நானா ஹுத்வா ஸமாபஜ்ஜிதப்³பா³. தேனாஹ ‘‘கீதி³ஸா ஸமாபத்தியோ’’திஆதி³. ஸஞ்ஞாய அத்தி²பா⁴வேனாதி படுகிச்சாய ஸஞ்ஞாய அத்தி²பா⁴வேன. ஸுகு²மஸங்கா²ரானங் தத்த² ஸமாபத்தியங் அவஸிஸ்ஸதாய. நிரோதோ⁴வாதி ஸங்கா²ரானங் நிரோதோ⁴ ஏவ.
Kathaṃ samāpatti pattabbāti imāsu sattasu dhātūsu kā pakārā saññāsamāpatti nānā hutvā samāpajjitabbā. Tenāha ‘‘kīdisā samāpattiyo’’tiādi. Saññāya atthibhāvenāti paṭukiccāya saññāya atthibhāvena. Sukhumasaṅkhārānaṃ tattha samāpattiyaṃ avasissatāya. Nirodhovāti saṅkhārānaṃ nirodho eva.
ஸத்ததா⁴துஸுத்தவண்ணனா நிட்டி²தா.
Sattadhātusuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸத்ததா⁴துஸுத்தங் • 1. Sattadhātusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸத்ததா⁴துஸுத்தவண்ணனா • 1. Sattadhātusuttavaṇṇanā
