| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. து³தியவக்³கோ³
2. Dutiyavaggo
1. ஸத்தஜடிலஸுத்தவண்ணனா
1. Sattajaṭilasuttavaṇṇanā
122. புப்³பா³ராமஸங்கா²தேதி ஸாவத்தி²னக³ரஸ்ஸ புப்³ப³தி³ஸாய கதத்தா புப்³பா³ராமேதி ஸங்க²ங் க³தே. தத்ராதி ‘‘மிகா³ரமாதுயா பாஸாதே³’’தி தஸ்மிங் ஸங்கி²த்தவசனே. அயங் இதா³னி வுச்சமானா அனுபுப்³பி³கதா² ஆதி³தோ பட்டா²ய அனுக்கமகதா². பத்த²னங் அகாஸி தஸ்ஸ ப⁴க³வதோ அக்³கு³பட்டா²யிகங் ஏகங் உபாஸிகங் தி³ஸ்வா தங் டா²னந்தரங் ஆகங்க²ந்தீ. மெண்ட³கபுத்தஸ்ஸாதி மெண்ட³கஸெட்டி²புத்தஸ்ஸ. மாதிட்டா²னே ட²பேஸி தஸ்ஸா உபகாரங் க³ருபா⁴வஞ்ச தி³ஸ்வா. தாய காரிதே பாஸாதே³தி தாய மஹாஉபாஸிகாய மஹாலதாபஸாத⁴னங் விஸ்ஸஜ்ஜெத்வா நவஹி கோடீஹி கரீஸமத்தே பூ⁴மிபா⁴கே³ காரிதே ஸஹஸ்ஸக³ப்³ப⁴படிமண்டி³தே பாஸாதே³.
122.Pubbārāmasaṅkhāteti sāvatthinagarassa pubbadisāya katattā pubbārāmeti saṅkhaṃ gate. Tatrāti ‘‘migāramātuyā pāsāde’’ti tasmiṃ saṃkhittavacane. Ayaṃ idāni vuccamānā anupubbikathā ādito paṭṭhāya anukkamakathā. Patthanaṃ akāsi tassa bhagavato aggupaṭṭhāyikaṃ ekaṃ upāsikaṃ disvā taṃ ṭhānantaraṃ ākaṅkhantī. Meṇḍakaputtassāti meṇḍakaseṭṭhiputtassa. Mātiṭṭhāneṭhapesi tassā upakāraṃ garubhāvañca disvā. Tāya kārite pāsādeti tāya mahāupāsikāya mahālatāpasādhanaṃ vissajjetvā navahi koṭīhi karīsamatte bhūmibhāge kārite sahassagabbhapaṭimaṇḍite pāsāde.
பரூள்ஹகச்சா²தி பரூள்ஹகச்ச²லோமா. கமண்ட³லுக⁴டிகாதி³ங் பப்³ப³ஜிதபரிக்கா²ரங். நக்³க³பொ⁴க்³க³னிஸ்ஸிரிகானந்தி நக்³கா³னஞ்சேவ பொ⁴க்³கா³னஞ்ச நிஸ்ஸிரிகானஞ்ச. தே ஹி அனிவத்த²வத்த²தாய நக்³கா³ சேவ, அசேலகவதாதி³னா பொ⁴க்³க³ஸரீரதாய பொ⁴க்³கா³, ஸோபா⁴ரஹிததாய நிஸ்ஸிரிகா ச. அத்தனா தி³ட்ட²ஸுதங் படிச்சா²தெ³த்வா ந கதெ²ய்யுந்தி அகாரணமேதங் தேஸங் ரஞ்ஞா பயுத்தசரபுரிஸபா⁴வதோ. ஏவங் கதே பன தே ‘‘அஞ்ஞேபி பப்³ப³ஜிதா அத்தீ²தி அயங் ஜானாதீ’’தி மஞ்ஞெய்யுந்தி கோஹஞ்ஞசித்தோ ஏவங் அகாஸீதி ஸக்கா விஞ்ஞாதுங். ததா² ஹி தேனத்தே²ன அபரிதோஸமானோ ‘‘அபிசா’’திஆதி³மாஹ.
Parūḷhakacchāti parūḷhakacchalomā. Kamaṇḍalughaṭikādiṃ pabbajitaparikkhāraṃ. Naggabhogganissirikānanti naggānañceva bhoggānañca nissirikānañca. Te hi anivatthavatthatāya naggā ceva, acelakavatādinā bhoggasarīratāya bhoggā, sobhārahitatāya nissirikā ca. Attanā diṭṭhasutaṃpaṭicchādetvā na katheyyunti akāraṇametaṃ tesaṃ raññā payuttacarapurisabhāvato. Evaṃ kate pana te ‘‘aññepi pabbajitā atthīti ayaṃ jānātī’’ti maññeyyunti kohaññacitto evaṃ akāsīti sakkā viññātuṃ. Tathā hi tenatthena aparitosamāno ‘‘apicā’’tiādimāha.
காஸிகசந்த³னந்தி உஜ்ஜலசந்த³னங். தங் கிர வண்ணவஸேன ஸமுஜ்ஜலங் ஹோதி பப⁴ஸ்ஸரங், தத³த்த²மேவ நங் ஸண்ஹதரங் கரொந்தி. தேனாஹ ‘‘காஸிகசந்த³னந்தி ஸண்ஹசந்த³ன’’ந்தி. வண்ணக³ந்த⁴த்தா²யாதி வண்ணஸோப⁴த்த²ஞ்சேவ ஸுக³ந்த⁴பா⁴வத்த²ஞ்ச. வண்ணக³ந்த⁴த்தா²யாதி ச²விராக³கரணத்த²ஞ்சேவ ஸுக³ந்த⁴த்தா²ய ச. ‘‘கி³ஹினா’’திஆதீ³ஹி பதே³ஹி ஏவங் பமாத³விஹாரினா தயா அரஹந்தோ து³விஞ்ஞெய்யாதி த³ஸ்ஸேதி.
Kāsikacandananti ujjalacandanaṃ. Taṃ kira vaṇṇavasena samujjalaṃ hoti pabhassaraṃ, tadatthameva naṃ saṇhataraṃ karonti. Tenāha ‘‘kāsikacandananti saṇhacandana’’nti. Vaṇṇagandhatthāyāti vaṇṇasobhatthañceva sugandhabhāvatthañca. Vaṇṇagandhatthāyāti chavirāgakaraṇatthañceva sugandhatthāya ca. ‘‘Gihinā’’tiādīhi padehi evaṃ pamādavihārinā tayā arahanto duviññeyyāti dasseti.
ஸங்வாஸோ நாம இத⁴ காலேன உபஸங்கமனந்தி த³ஸ்ஸெந்தோ ‘‘உபஸங்கமந்தேனா’’தி ஆஹ. காயவாசாஹி அஸங்யதேனபி ஸங்யதாகாரோ, அஸங்வுதிந்த்³ரியேனபி ஸங்வுதிந்த்³ரியாகாரோ. பரிக்³க³ஹெஸ்ஸாமீதி வீமங்ஸிஸ்ஸாமி ‘‘பரிஸுத்³த⁴ங் நு கோ², நோ’’தி. ஸப்பஞ்ஞேனாதி ஸீலபரிக்³க³ண்ஹனபஞ்ஞாய ஸப்பஞ்ஞேன. ஜானிதுங் ந ஸக்கோதி ஸபா⁴வஸ்ஸ ஸதோ ஸீலஸ்ஸ அனுபதா⁴ரணதோ.
Saṃvāso nāma idha kālena upasaṅkamananti dassento ‘‘upasaṅkamantenā’’ti āha. Kāyavācāhi asaṃyatenapi saṃyatākāro, asaṃvutindriyenapi saṃvutindriyākāro. Pariggahessāmīti vīmaṃsissāmi ‘‘parisuddhaṃ nu kho, no’’ti. Sappaññenāti sīlapariggaṇhanapaññāya sappaññena. Jānituṃ na sakkoti sabhāvassa sato sīlassa anupadhāraṇato.
கத²னேனாதி அபராபரங் கத²னேன. ததா² ஹி வக்க²தி ‘‘ஏகச்சஸ்ஸ ஹீ’’திஆதி³. அரியவோஹாரோதி தி³ட்டா²தி³லக்க²ணேன வோஹரிதோ ‘‘தி³ட்ட²ங் அதி³ட்ட²’’ந்திஆதி³னா பவுத்தஸத்³த³வோஹாரோ. தஸ்ஸ பன காரணமேவ க³ண்ஹந்தோ ‘‘எத்த² சேதனா’’தி ஆஹ. ஏஸ நயோ அனரியவோஹாரேபி. பரமத்த²தோ ஹி ஸச்சவாசாத³யோ முஸாவாதா³த³யோ சேதனாலக்க²ணாதி. பஞ்ஞத்திவோஹாரோ ததா² ததா² வோஹரிதப்³ப³தோ ஏவமாஹ ‘‘ஸங்வோஹாரேன கோ², மஹாராஜ, ஸோசெய்யங் வேதி³தப்³ப³’’ந்தி.
Kathanenāti aparāparaṃ kathanena. Tathā hi vakkhati ‘‘ekaccassa hī’’tiādi. Ariyavohāroti diṭṭhādilakkhaṇena voharito ‘‘diṭṭhaṃ adiṭṭha’’ntiādinā pavuttasaddavohāro. Tassa pana kāraṇameva gaṇhanto ‘‘ettha cetanā’’ti āha. Esa nayo anariyavohārepi. Paramatthato hi saccavācādayo musāvādādayo cetanālakkhaṇāti. Paññattivohāro tathā tathā voharitabbato evamāha ‘‘saṃvohārena kho, mahārāja, soceyyaṃ veditabba’’nti.
ஞாணதா²மோதி ஞாணகு³ணப³லங், யேன டா²னுப்பத்திகபடிபா⁴னாதி³னா அச்சாயிககிச்சகரணீயானி நிட்டா²பேதி. ஸங்கதா²யாதி அத்த²வீமங்ஸனவஸேன பவத்தாய ஸம்மாகதா²ய. உப்பிலவதி லஹுகபா⁴வதோ. ஹெட்டா²சரகாதி அவசரகா. யே அனுபவிஸித்வா பரேஸங் ரஹஸ்ஸவீமங்ஸனவஸேன பவத்தா, தேஸு ஓசரகவோஹாரோதி வுத்தங் ‘‘சரா ஹீ’’திஆதி³.
Ñāṇathāmoti ñāṇaguṇabalaṃ, yena ṭhānuppattikapaṭibhānādinā accāyikakiccakaraṇīyāni niṭṭhāpeti. Saṃkathāyāti atthavīmaṃsanavasena pavattāya sammākathāya. Uppilavati lahukabhāvato. Heṭṭhācarakāti avacarakā. Ye anupavisitvā paresaṃ rahassavīmaṃsanavasena pavattā, tesu ocarakavohāroti vuttaṃ ‘‘carā hī’’tiādi.
வண்ணஸண்டா²னேனாதி வண்ணேன வா ஸண்டா²னேன வா வண்ணபொக்க²ரதாய வா ஸண்டா²னஸம்பத்தியா வா. ஸுஜானோ பேஸலோ விஸ்ஸஸேதி யோஜனா. லஹுகத³ஸ்ஸனேனாதி பரித்தத³ஸ்ஸனேன விஜ்ஜுகேன விய. பரிக்கா²ரப⁴ண்ட³கேனாதி பப்³ப³ஜிதபரிக்கா²ரபூ⁴தேன ப⁴ண்ட³கேன. லோஹட்³ட⁴மாஸோதி லோஹமயோ உபட்³ட⁴க்³க⁴னகமாஸோ.
Vaṇṇasaṇṭhānenāti vaṇṇena vā saṇṭhānena vā vaṇṇapokkharatāya vā saṇṭhānasampattiyā vā. Sujāno pesalo vissaseti yojanā. Lahukadassanenāti parittadassanena vijjukena viya. Parikkhārabhaṇḍakenāti pabbajitaparikkhārabhūtena bhaṇḍakena. Lohaḍḍhamāsoti lohamayo upaḍḍhagghanakamāso.
ஸத்தஜடிலஸுத்தவண்ணனா நிட்டி²தா.
Sattajaṭilasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸத்தஜடிலஸுத்தங் • 1. Sattajaṭilasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸத்தஜடிலஸுத்தவண்ணனா • 1. Sattajaṭilasuttavaṇṇanā
