| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஸத்தவஸ்ஸானுப³ந்த⁴ஸுத்தவண்ணனா
4. Sattavassānubandhasuttavaṇṇanā
160. யஸ்மா கபிலவத்து²தோ நிக்க²ந்தகாலதோ பட்டா²ய மாரோ ஓதாராபெக்கோ² லோகனாத²ங் அனுப³ந்தி⁴துங் ஆரத்³தோ⁴, தஸ்மா வுத்தங் ‘‘புரே போ³தி⁴யா ச²ப்³ப³ஸ்ஸானீ’’தி. அதிக³ஹெத்வாதி அனுக³ந்த்வா தஸ்ஸ யதா²ருசி படிபத்திங் அனுவத்தோ விய ஹுத்வா.
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
அவஜ்ஜா²யந்தோதி பஜ்ஜா²யந்தோ. ஜிதோ வித்தபராஜிதோ அஸி நு. பமாணாதிக்கந்தந்தி க³ருதரங்.
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
க²னித்வா உம்மூலெத்வா. காமாஸவாதீ³னி பஜஹந்தோ அனாஸவோ.
Khanitvā ummūletvā. Kāmāsavādīni pajahanto anāsavo.
பேஹீதி அபேஹி. பாரகா³மினோதி பாரங்க³மனஸீலா. தேகாலிகோ அயங் கா³மி-ஸத்³தோ³தி ஆஹ ‘‘யேபீ’’திஆதி³.
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
மாரவிஸூகானீதி மாரகண்டகானி கண்டகஸதி³ஸானி மாரஸ்ஸ து³ராசாரானி. விருத்³த⁴ஸேவிதானி விரோத⁴வஸேன தாஸங்யேவ வேவசனானி. தானி ஸரூபதோ த³ஸ்ஸேதுங் ‘‘அப்பமாயூ’’திஆதி³ வுத்தங். நிப்³பே³ஜனீயாதி நிப்³பே³த³தா³யிகா. உக்கண்ட²னீயாதி உக்கண்ட²வஹா.
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
விகப்பவஸேன வேதி³தப்³போ³ ஓபம்மபரிகப்பவிஸயத்தா தஸ்ஸ கிரியாபத³ஸ்ஸ. தேனாஹ ‘‘அனுபரிக³ச்செ²ய்யா’’தி. எத்தா²தி ஏதஸ்மிங் மேத³வண்ணவத்து²ஸ்மிங். முது³ந்தி முது³மது⁴ரஸங் விந்தெ³ய்யாம படிலபெ⁴ய்யாம. அஸ்ஸாதோ³தி அஸ்ஸாதே³தப்³போ³.
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
ஸத்தவஸ்ஸானுப³ந்த⁴ஸுத்தவண்ணனா நிட்டி²தா.
Sattavassānubandhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஸத்தவஸ்ஸானுப³ந்த⁴ஸுத்தங் • 4. Sattavassānubandhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ஸத்தவஸ்ஸானுப³ந்த⁴ஸுத்தவண்ணனா • 4. Sattavassānubandhasuttavaṇṇanā
