| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. ஸத்தா²ரவந்த³னாஸுத்தவண்ணனா
9. Satthāravandanāsuttavaṇṇanā
265. ப்³ரஹ்மஜாணுகோதி த³க்கி²ணஜாணுமண்ட³லங் பத²வியங் ட²பெத்வா வந்த³மானோ ப்³ரஹ்மஜாணுகோ நாம ததா²பூ⁴தோ ஹுத்வா. யஜிதப்³ப³தோ யக்கோ², பூஜனீயோ. ஏவங் பூஜாவிஸேஸயோக³தோ ஸக்கோதி ஆஹ ‘‘ஸோ யக்கோ²தி ஸோ ஸக்கோ’’தி. ஸக்கஸ்ஸ நமக்காரபா⁴ஜனபூ⁴தஞ்ஹி புச்ச²ந்தோ மாதலி ‘‘கோ நாம ஸோ யக்கோ²’’தி ஆஹ. கு³ணனேமித்தகேஹீதி கு³ணஹேதுகேஹி அனந்தானி ஹி பு³த்³தா⁴னங் நாமானி, தானி ச கோ² ஸப்³பா³னிபி கு³ணனேமித்தகானேவ. அனந்தகு³ணத்தா. வுத்தஞ்ஹேதங் –
265.Brahmajāṇukoti dakkhiṇajāṇumaṇḍalaṃ pathaviyaṃ ṭhapetvā vandamāno brahmajāṇuko nāma tathābhūto hutvā. Yajitabbato yakkho, pūjanīyo. Evaṃ pūjāvisesayogato sakkoti āha ‘‘so yakkhoti so sakko’’ti. Sakkassa namakkārabhājanabhūtañhi pucchanto mātali ‘‘ko nāma so yakkho’’ti āha. Guṇanemittakehīti guṇahetukehi anantāni hi buddhānaṃ nāmāni, tāni ca kho sabbānipi guṇanemittakāneva. Anantaguṇattā. Vuttañhetaṃ –
‘‘அஸங்க்²யெய்யானி நாமானி, ஸகு³ணேன மஹேஸினோ;
‘‘Asaṅkhyeyyāni nāmāni, saguṇena mahesino;
கு³ணேன நாமமுத்³தெ⁴ய்யங், அபி நாமஸஹஸ்ஸதோ’’தி. –
Guṇena nāmamuddheyyaṃ, api nāmasahassato’’ti. –
தஸ்மா அனோமனாமந்தி பரிபுண்ணகு³ணனாமந்தி அத்தோ². ஸமதிக்கமேனாதி ஸம்மா ஸமுச்சி²ந்த³னவஸேன அதிக்கமனேன. கிலேஸாரீனங் அபேதசயோதி அபசயோ, ஸோ ஆரமிதப்³ப³ட்டே²ன ஆராமோ ஏதேஸந்தி அபசயாராமா. தேனாஹ ‘‘வட்டவித்³த⁴ங்ஸனே ரதா’’தி.
Tasmā anomanāmanti paripuṇṇaguṇanāmanti attho. Samatikkamenāti sammā samucchindanavasena atikkamanena. Kilesārīnaṃ apetacayoti apacayo, so āramitabbaṭṭhena ārāmo etesanti apacayārāmā. Tenāha ‘‘vaṭṭaviddhaṃsane ratā’’ti.
ஸத்தா²ரவந்த³னாஸுத்தவண்ணனா நிட்டி²தா.
Satthāravandanāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. ஸத்தா²ரவந்த³னாஸுத்தங் • 9. Satthāravandanāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. ஸத்தா²ரவந்த³னாஸுத்தவண்ணனா • 9. Satthāravandanāsuttavaṇṇanā
