| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૩. સયનદાયકત્થેરઅપદાનવણ્ણના
3. Sayanadāyakattheraapadānavaṇṇanā
પદુમુત્તરબુદ્ધસ્સાતિઆદિકં આયસ્મતો સયનદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે એકસ્મિં કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા સુખમનુભવન્તો સત્થુ ધમ્મદેસનં સુત્વા સત્થરિ પસન્નો દન્તસુવણ્ણરજતમુત્તમણિમયં મહારહં મઞ્ચં કારાપેત્વા ચીનપટ્ટકમ્બલાદીનિ અત્થરિત્વા સયનત્થાય ભગવતો અદાસિ. ભગવા તસ્સ અનુગ્ગહં કરોન્તો તત્થ સયિ . સો તેન પુઞ્ઞકમ્મેન દેવમનુસ્સેસુ સંસરન્તો તદનુરૂપં આકાસગમનસુખસેય્યાદિસુખં અનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલે નિબ્બત્તિત્વા વિઞ્ઞુતં પાપુણિત્વા સત્થુ ધમ્મદેસનં સુત્વા પસન્નમાનસો પબ્બજિત્વા વિપસ્સન્તો નચિરસ્સેવ અરહા અહોસિ.
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
૨૦. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરબુદ્ધસ્સાતિઆદિમાહ. તં હેટ્ઠા વુત્તત્થમેવ.
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
૨૧. સુખેત્તે બીજસમ્પદાતિ યથા તિણકચવરરહિતે કદ્દમાદિસમ્પન્ને સુખેત્તે વુત્તબીજાનિ સાદુફલાનિ નિપ્ફાદેન્તિ, એવમેવ રાગદોસાદિદિયડ્ઢસહસ્સકિલેસસઙ્ખાતતિણકચવરરહિતે સુદ્ધસન્તાને પુઞ્ઞક્ખેત્તે વુત્તદાનાનિ અપ્પાનિપિ સમાનાનિ મહપ્ફલાનિ હોન્તીતિ અત્થો. સેસં સુવિઞ્ઞેય્યમેવાતિ.
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
સયનદાયકત્થેરઅપદાનવણ્ણના સમત્તા.
Sayanadāyakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૩. સયનદાયકત્થેરઅપદાનં • 3. Sayanadāyakattheraapadānaṃ
