| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. நாத²வக்³கோ³
2. Nāthavaggo
1. ஸேனாஸனஸுத்தங்
1. Senāsanasuttaṃ
11. ‘‘பஞ்சங்க³ஸமன்னாக³தோ , பி⁴க்க²வே, பி⁴க்கு² பஞ்சங்க³ஸமன்னாக³தங் ஸேனாஸனங் ஸேவமானோ ப⁴ஜமானோ நசிரஸ்ஸேவ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய.
11. ‘‘Pañcaṅgasamannāgato , bhikkhave, bhikkhu pañcaṅgasamannāgataṃ senāsanaṃ sevamāno bhajamāno nacirasseva āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya.
‘‘கத²ஞ்ச, பி⁴க்க²வே, பி⁴க்கு² பஞ்சங்க³ஸமன்னாக³தோ ஹோதி? இத⁴, பி⁴க்க²வே, பி⁴க்கு² ஸத்³தோ⁴ ஹோதி; ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா…பே॰… ப⁴க³வா’தி; அப்பாபா³தோ⁴ ஹோதி அப்பாதங்கோ, ஸமவேபாகினியா க³ஹணியா ஸமன்னாக³தோ நாதிஸீதாய நாச்சுண்ஹாய மஜ்ஜி²மாய பதா⁴னக்க²மாய; அஸடோ² ஹோதி அமாயாவீ, யதா²பூ⁴தங் அத்தானங் ஆவிகத்தா ஸத்த²ரி வா விஞ்ஞூஸு வா ஸப்³ரஹ்மசாரீஸு; ஆரத்³த⁴வீரியோ விஹரதி, அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய; தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு; பஞ்ஞவா ஹோதி, உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. ஏவங் கோ², பி⁴க்க²வே, பி⁴க்கு² பஞ்சங்க³ஸமன்னாக³தோ ஹோதி.
‘‘Kathañca, bhikkhave, bhikkhu pañcaṅgasamannāgato hoti? Idha, bhikkhave, bhikkhu saddho hoti; saddahati tathāgatassa bodhiṃ – ‘itipi so bhagavā…pe… bhagavā’ti; appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya; asaṭho hoti amāyāvī, yathābhūtaṃ attānaṃ āvikattā satthari vā viññūsu vā sabrahmacārīsu; āraddhavīriyo viharati, akusalānaṃ dhammānaṃ pahānāya, kusalānaṃ dhammānaṃ upasampadāya; thāmavā daḷhaparakkamo anikkhittadhuro kusalesu dhammesu; paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. Evaṃ kho, bhikkhave, bhikkhu pañcaṅgasamannāgato hoti.
‘‘கத²ஞ்ச, பி⁴க்க²வே, ஸேனாஸனங் பஞ்சங்க³ஸமன்னாக³தங் ஹோதி? இத⁴, பி⁴க்க²வே, ஸேனாஸனங் நாதிதூ³ரங் ஹோதி நாச்சாஸன்னங் க³மனாக³மனஸம்பன்னங் தி³வா அப்பாகிண்ணங் ரத்திங் அப்பஸத்³த³ங் அப்பனிக்³கோ⁴ஸங் அப்பட³ங்ஸமகஸவாதாதபஸரீஸபஸம்ப²ஸ்ஸங் 1; தஸ்மிங் கோ² பன ஸேனாஸனே விஹரந்தஸ்ஸ அப்பகஸிரேன உப்பஜ்ஜந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா; தஸ்மிங் கோ² பன ஸேனாஸனே தே²ரா பி⁴க்கூ² விஹரந்தி ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா; தே காலேன காலங் உபஸங்கமித்வா பரிபுச்ச²தி பரிபஞ்ஹதி – ‘இத³ங், ப⁴ந்தே, கத²ங், இமஸ்ஸ கோ அத்தோ²’தி; தஸ்ஸ தே ஆயஸ்மந்தோ அவிவடஞ்சேவ விவரந்தி அனுத்தானீகதஞ்ச உத்தானிங் கரொந்தி அனேகவிஹிதேஸு ச கங்கா²டா²னியேஸு த⁴ம்மேஸு கங்க²ங் படிவினோதெ³ந்தி. ஏவங் கோ², பி⁴க்க²வே, ஸேனாஸனங் பஞ்சங்க³ஸமன்னாக³தங் ஹோதி. பஞ்சங்க³ஸமன்னாக³தோ கோ², பி⁴க்க²வே, பி⁴க்கு² பஞ்சங்க³ஸமன்னாக³தங் ஸேனாஸனங் ஸேவமானோ ப⁴ஜமானோ நசிரஸ்ஸேவ ஆஸவானங் க²யா…பே॰… ஸச்சி²கத்வா உபஸம்பஜ்ஜ விஹரெய்யா’’தி. பட²மங்.
‘‘Kathañca, bhikkhave, senāsanaṃ pañcaṅgasamannāgataṃ hoti? Idha, bhikkhave, senāsanaṃ nātidūraṃ hoti nāccāsannaṃ gamanāgamanasampannaṃ divā appākiṇṇaṃ rattiṃ appasaddaṃ appanigghosaṃ appaḍaṃsamakasavātātapasarīsapasamphassaṃ 2; tasmiṃ kho pana senāsane viharantassa appakasirena uppajjanti cīvarapiṇḍapātasenāsanagilānapaccayabhesajjaparikkhārā; tasmiṃ kho pana senāsane therā bhikkhū viharanti bahussutā āgatāgamā dhammadharā vinayadharā mātikādharā; te kālena kālaṃ upasaṅkamitvā paripucchati paripañhati – ‘idaṃ, bhante, kathaṃ, imassa ko attho’ti; tassa te āyasmanto avivaṭañceva vivaranti anuttānīkatañca uttāniṃ karonti anekavihitesu ca kaṅkhāṭhāniyesu dhammesu kaṅkhaṃ paṭivinodenti. Evaṃ kho, bhikkhave, senāsanaṃ pañcaṅgasamannāgataṃ hoti. Pañcaṅgasamannāgato kho, bhikkhave, bhikkhu pañcaṅgasamannāgataṃ senāsanaṃ sevamāno bhajamāno nacirasseva āsavānaṃ khayā…pe… sacchikatvā upasampajja vihareyyā’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸேனாஸனஸுத்தவண்ணனா • 1. Senāsanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. அவிஜ்ஜாஸுத்தாதி³வண்ணனா • 1-7. Avijjāsuttādivaṇṇanā
