| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. ஸேரீஸுத்தவண்ணனா
3. Serīsuttavaṇṇanā
104. யங் தா³னங் தே³மீதி யங் தெ³ய்யத⁴ம்மங் பரஸ்ஸ தே³மி. தஸ்ஸ பதி ஹுத்வாதி தப்³பி³ஸயங் லோப⁴ங் ஸுட்டு² அபி⁴ப⁴வந்தோ தஸ்ஸ அதி⁴பதி ஹுத்வா தே³மி தேன அனாகட்³ட⁴னீயத்தா. ‘‘ந தா³ஸோ ந ஸஹாயோ’’தி வத்வா தது³ப⁴யங் அன்வயதோ ப்³யதிரேகதோ த³ஸ்ஸேதுங் ‘‘யோ ஹீ’’திஆதி³ வுத்தங். தா³ஸோ ஹுத்வா தே³தி தண்ஹாய தா³ஸப்³யஸ்ஸ உபக³தத்தா. ஸஹாயோ ஹுத்வா தே³தி தஸ்ஸ பியபா⁴வாவிஸ்ஸஜ்ஜனதோ. ஸாமீ ஹுத்வா தே³தி தண்ஹாதா³ஸப்³யதோ அத்தானங் மோசெத்வா அபி⁴பு⁴ய்ய பவத்தனதோ. ஸாமிபரிபோ⁴க³ஸதி³ஸா ஹேதஸ்ஸாயங் பவத்ததீதி.
104.Yaṃdānaṃ demīti yaṃ deyyadhammaṃ parassa demi. Tassa pati hutvāti tabbisayaṃ lobhaṃ suṭṭhu abhibhavanto tassa adhipati hutvā demi tena anākaḍḍhanīyattā. ‘‘Na dāso na sahāyo’’ti vatvā tadubhayaṃ anvayato byatirekato dassetuṃ ‘‘yo hī’’tiādi vuttaṃ. Dāso hutvā deti taṇhāya dāsabyassa upagatattā. Sahāyo hutvā deti tassa piyabhāvāvissajjanato. Sāmī hutvā deti taṇhādāsabyato attānaṃ mocetvā abhibhuyya pavattanato. Sāmiparibhogasadisā hetassāyaṃ pavattatīti.
அத² வா யோ தா³னஸீலதாய தா³யகோ புக்³க³லோ, ஸோ தா³னே பவத்திபே⁴தே³ன தா³னதா³ஸோ தா³னஸஹாயோ தா³னபதீதி திப்பகாரோ ஹோதீதி த³ஸ்ஸேதி. தத³ஸ்ஸ திப்பகாரதங் விப⁴ஜித்வா த³ஸ்ஸேதுங் ‘‘யோ ஹீ’’திஆதி³ வுத்தங். தா³தப்³ப³ட்டே²ன தா³னங், அன்னபானாதி³. தத்த² யங் அத்தனா பரிபு⁴ஞ்ஜதி தண்ஹாதி⁴பன்னதாய, தஸ்ஸ வஸே வத்தனதோ தா³ஸோ விய ஹோதி. யங் பரேஸங் தீ³யதி, தத்த²பி அன்னபானஸாமஞ்ஞேன இத³ங் வுத்தங் ‘‘தா³னஸங்கா²தஸ்ஸ தெ³ய்யத⁴ம்மஸ்ஸ தா³ஸோ ஹுத்வா தே³தீ’’தி. ஸஹாயோ ஹுத்வா தே³தி அத்தனா பரிபு⁴ஞ்ஜிதப்³ப³ஸ்ஸ பரேஸங் தா³தப்³ப³ஸ்ஸ ச ஸமஸமட்ட²பனேன. பதி ஹுத்வா தே³தி ஸயங் தெ³ய்யத⁴ம்மஸ்ஸ வஸே அவத்தித்வா தஸ்ஸ அத்தனோ வஸே வத்தாபனதோ.
Atha vā yo dānasīlatāya dāyako puggalo, so dāne pavattibhedena dānadāso dānasahāyo dānapatīti tippakāro hotīti dasseti. Tadassa tippakārataṃ vibhajitvā dassetuṃ ‘‘yo hī’’tiādi vuttaṃ. Dātabbaṭṭhena dānaṃ, annapānādi. Tattha yaṃ attanā paribhuñjati taṇhādhipannatāya, tassa vase vattanato dāso viya hoti. Yaṃ paresaṃ dīyati, tatthapi annapānasāmaññena idaṃ vuttaṃ ‘‘dānasaṅkhātassa deyyadhammassa dāso hutvā detī’’ti. Sahāyo hutvā deti attanā paribhuñjitabbassa paresaṃ dātabbassa ca samasamaṭṭhapanena. Pati hutvā deti sayaṃ deyyadhammassa vase avattitvā tassa attano vase vattāpanato.
அபரோ நயோ – யோ அத்தனா பணீதங் பரிபு⁴ஞ்ஜித்வா பரேஸங் நிஹீனங் தே³தி, ஸோ தா³னதா³ஸோ நாம தன்னிமித்தனிஹீனபா⁴வாபத்திதோ. யோ யாதி³ஸங் அத்தனா பரிபு⁴ஞ்ஜதி, தாதி³ஸமேவ பரேஸங் தே³தி, ஸோ தா³னஸஹாயோ நாம தன்னிமித்தனிஹீனாதி⁴கபா⁴வவிஸ்ஸஜ்ஜனேன ஸதி³ஸபா⁴வாபத்திதோ. யோ அத்தனா நிஹீனங் பரிபு⁴ஞ்ஜித்வா பரேஸங் பணீதங் தே³தி, ஸோ தா³னபதி நாம தன்னிமித்தஸெட்ட²பா⁴வப்பத்திதோ. கம்மஸரிக்க²கோ ஹி விபாகோ, தஸ்மா தே³வபுத்தோ ‘‘தா³னபதீ’’தி வத³ந்தோ ‘‘அஹங் தாதி³ஸோ அஹோஸி’’ந்தி த³ஸ்ஸேதி.
Aparo nayo – yo attanā paṇītaṃ paribhuñjitvā paresaṃ nihīnaṃ deti, so dānadāso nāma tannimittanihīnabhāvāpattito. Yo yādisaṃ attanā paribhuñjati, tādisameva paresaṃ deti, so dānasahāyo nāma tannimittanihīnādhikabhāvavissajjanena sadisabhāvāpattito. Yo attanā nihīnaṃ paribhuñjitvā paresaṃ paṇītaṃ deti, so dānapati nāma tannimittaseṭṭhabhāvappattito. Kammasarikkhako hi vipāko, tasmā devaputto ‘‘dānapatī’’ti vadanto ‘‘ahaṃ tādiso ahosi’’nti dasseti.
‘‘சதூஸு த்³வாரேஸு தா³னங் தீ³யித்தா²’’தி பாளியங் ஸங்கே²பதோ வுத்தமத்த²ங் வித்தா²ரெத்வா த³ஸ்ஸேதுங் ‘‘தஸ்ஸ கிரா’’திஆதி³ வுத்தங். தா³னந்தி யிட்ட²ங், தஞ்ச கோ² ஸப்³ப³ஸாதா⁴ரணவஸேன கதந்தி ஆஹ ‘‘ஸமண …பே॰… யாசகான’’ந்தி. பப்³ப³ஜ்ஜூபக³தாதி யங் கிஞ்சி பப்³ப³ஜ்ஜங் உபக³தா. போ⁴வாதி³னோதி ஜாதிமத்தப்³ராஹ்மணே வத³தி. நாலத்த² பு³த்³த⁴ஸுஞ்ஞத்தா ததா³ லோகஸ்ஸ. து³க்³க³தாதி து³க்க²ஜீவிககப்பகா கஸிரவுத்திகா. தேனாஹ ‘‘த³லித்³த³மனுஸ்ஸா’’தி. கஸிவாணிஜ்ஜாதி³ஜீவிகங் அனுட்டா²துங் அஸமத்தா² இத⁴ ‘‘கபணா’’தி அதி⁴ப்பேதாதி ஆஹ ‘‘காணகுணிஆத³யோ’’தி. பதா²வினோதி அத்³தி⁴கா. வனிப்³ப³காதி தா³யகானங் கு³ணகித்தனகம்மப²லகித்தனவஸேன யாசகா ஸெய்யதா²பி நக்³கா³த³யோ. தேனாஹ ‘‘இட்ட²ங் தி³ன்ன’’ந்திஆதி³. பஸதமத்தந்தி வீஹிதண்டு³லாதி³வஸேன வுத்தங். ஸராவமத்தந்தி யாகு³ப⁴த்தாதி³வஸேன. யதா² கா³மலாபோ⁴ கா³மே உப்பஜ்ஜனகோ ஆயலாபோ⁴, ஏவங் தத்த² த்³வாரலாபோ⁴தி ஆஹ ‘‘தத்த² உப்பஜ்ஜனகஸதஸஹஸ்ஸே’’தி. மஹந்ததரங் தா³னங் அத³ங்ஸு அஞ்ஞஸ்ஸபி த⁴னஸ்ஸ வினியோக³ங் க³தத்தா. தங் ஸந்தா⁴யாதி தங் மஹந்ததரங் தா³னங் கதங் ஸந்தா⁴ய. ரஞ்ஞோ ஹி தத்த² தா³னங் இத்தா²கா³ரஸ்ஸ தா³னேன மஹதா அபி⁴பூ⁴தங் விய படினிவத்தங் ஹோதீதி ஆஹ ‘‘படினிவத்தீ’’தி. கோசீதி பு⁴ம்மத்தே² பச்சத்தவசனங். தேனாஹ ‘‘கத்த²சீ’’தி. அனேகவஸ்ஸஸஹஸ்ஸாயுககாலே தஸ்ஸ உப்பன்னத்தா அஸீதிவஸ்ஸஸஹஸ்ஸானி ஸோ ராஜா தா³னமதா³ஸீதி.
‘‘Catūsu dvāresu dānaṃ dīyitthā’’ti pāḷiyaṃ saṅkhepato vuttamatthaṃ vitthāretvā dassetuṃ ‘‘tassa kirā’’tiādi vuttaṃ. Dānanti yiṭṭhaṃ, tañca kho sabbasādhāraṇavasena katanti āha ‘‘samaṇa…pe… yācakāna’’nti. Pabbajjūpagatāti yaṃ kiñci pabbajjaṃ upagatā. Bhovādinoti jātimattabrāhmaṇe vadati. Nālattha buddhasuññattā tadā lokassa. Duggatāti dukkhajīvikakappakā kasiravuttikā. Tenāha ‘‘daliddamanussā’’ti. Kasivāṇijjādijīvikaṃ anuṭṭhātuṃ asamatthā idha ‘‘kapaṇā’’ti adhippetāti āha ‘‘kāṇakuṇiādayo’’ti. Pathāvinoti addhikā. Vanibbakāti dāyakānaṃ guṇakittanakammaphalakittanavasena yācakā seyyathāpi naggādayo. Tenāha ‘‘iṭṭhaṃ dinna’’ntiādi. Pasatamattanti vīhitaṇḍulādivasena vuttaṃ. Sarāvamattanti yāgubhattādivasena. Yathā gāmalābho gāme uppajjanako āyalābho, evaṃ tattha dvāralābhoti āha ‘‘tattha uppajjanakasatasahasse’’ti. Mahantataraṃ dānaṃ adaṃsu aññassapi dhanassa viniyogaṃ gatattā. Taṃ sandhāyāti taṃ mahantataraṃ dānaṃ kataṃ sandhāya. Rañño hi tattha dānaṃ itthāgārassa dānena mahatā abhibhūtaṃ viya paṭinivattaṃ hotīti āha ‘‘paṭinivattī’’ti. Kocīti bhummatthe paccattavacanaṃ. Tenāha ‘‘katthacī’’ti. Anekavassasahassāyukakāle tassa uppannattā asītivassasahassāni so rājā dānamadāsīti.
ஸேரீஸுத்தவண்ணனா நிட்டி²தா.
Serīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸேரீஸுத்தங் • 3. Serīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-4. ஸேரீஸுத்தாதி³வண்ணனா • 3-4. Serīsuttādivaṇṇanā
