| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. ஸேவிதப்³பா³ஸேவிதப்³ப³ஸுத்தவண்ணனா
4. Sevitabbāsevitabbasuttavaṇṇanā
109. ஏவங் மே ஸுதந்தி ஸேவிதப்³பா³ஸேவிதப்³ப³ஸுத்தங். தத்த² தஞ்ச அஞ்ஞமஞ்ஞங் காயஸமாசாரந்தி அஞ்ஞங் ஸேவிதப்³ப³ங் காயஸமாசாரங், அஞ்ஞங் அஸேவிதப்³ப³ங் வதா³மி, ஸேவிதப்³ப³மேவ கேனசி பரியாயேன அஸேவிதப்³ப³ந்தி, அஸேவிதப்³ப³ங் வா ஸேவிதப்³ப³ந்தி ச ந வதா³மீதி அத்தோ². வசீஸமாசாராதீ³ஸு ஏஸேவ நயோ. இதி ப⁴க³வா ஸத்தஹி பதே³ஹி மாதிகங் ட²பெத்வா வித்தா²ரதோ அவிப⁴ஜித்வாவ தே³ஸனங் நிட்டா²பேஸி. கஸ்மா? ஸாரிபுத்தத்தே²ரஸ்ஸ ஓகாஸகரணத்த²ங்.
109.Evaṃme sutanti sevitabbāsevitabbasuttaṃ. Tattha tañca aññamaññaṃ kāyasamācāranti aññaṃ sevitabbaṃ kāyasamācāraṃ, aññaṃ asevitabbaṃ vadāmi, sevitabbameva kenaci pariyāyena asevitabbanti, asevitabbaṃ vā sevitabbanti ca na vadāmīti attho. Vacīsamācārādīsu eseva nayo. Iti bhagavā sattahi padehi mātikaṃ ṭhapetvā vitthārato avibhajitvāva desanaṃ niṭṭhāpesi. Kasmā? Sāriputtattherassa okāsakaraṇatthaṃ.
113. மனோஸமாசாரே மிச்சா²தி³ட்டி²ஸம்மாதி³ட்டி²யோ தி³ட்டி²படிலாப⁴வஸேன விஸுங் அங்க³ங் ஹுத்வா டி²தாதி ந க³ஹிதா.
113.Manosamācāre micchādiṭṭhisammādiṭṭhiyo diṭṭhipaṭilābhavasena visuṃ aṅgaṃ hutvā ṭhitāti na gahitā.
114. சித்துப்பாதே³ அகம்மபத²ப்பத்தா அபி⁴ஜ்ஜா²த³யோ வேதி³தப்³பா³.
114.Cittuppāde akammapathappattā abhijjhādayo veditabbā.
115. ஸஞ்ஞாபடிலாப⁴வாரே அபி⁴ஜ்ஜா²ஸஹக³தாய ஸஞ்ஞாயாதிஆதீ³னி காமஸஞ்ஞாதீ³னங் த³ஸ்ஸனத்த²ங் வுத்தானி.
115. Saññāpaṭilābhavāre abhijjhāsahagatāya saññāyātiādīni kāmasaññādīnaṃ dassanatthaṃ vuttāni.
117. ஸப்³யாப³ஜ்ஜ²ந்தி ஸது³க்க²ங். அபரினிட்டி²தபா⁴வாயாதி ப⁴வானங் அபரினிட்டி²தபா⁴வாய. எத்த² ச ஸப்³யாப³ஜ்ஜ²த்தபா⁴வா நாம சத்தாரோ ஹொந்தி. புது²ஜ்ஜனோபி ஹி யோ தேனத்தபா⁴வேன ப⁴வங் பரினிட்டா²பேதுங் ந ஸக்கோதி, தஸ்ஸ படிஸந்தி⁴தோ பட்டா²ய அகுஸலா த⁴ம்மா வட்³ட⁴ந்தி, குஸலா த⁴ம்மா ச பரிஹாயந்தி, ஸது³க்க²மேவ அத்தபா⁴வங் அபி⁴னிப்³ப³த்தேதி நாம. ததா² ஸோதாபன்னஸகதா³கா³மிஅனாகா³மினோ. புது²ஜ்ஜனாத³யோ தாவ ஹொந்து, அனாகா³மீ கத²ங் ஸப்³யாப³ஜ்ஜ²ங் அத்தபா⁴வங் அபி⁴னிப்³ப³த்தேதி, கத²ஞ்சஸ்ஸ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீதி. அனாகா³மீபி ஹி ஸுத்³தா⁴வாஸே நிப்³ப³த்தோ உய்யானவிமானகப்பருக்கே² ஓலோகெத்வா ‘‘அஹோ ஸுக²ங் அஹோ ஸுக²’’ந்தி உதா³னங் உதா³னேதி, அனாகா³மினோ ப⁴வலோபோ⁴ ப⁴வதண்ஹா அப்பஹீனாவ ஹொந்தி, தஸ்ஸ அப்பஹீனதண்ஹதாய அகுஸலா வட்³ட⁴ந்தி நாம, குஸலா பரிஹாயந்தி நாம, ஸது³க்க²மேவ அத்தபா⁴வங் அபி⁴னிப்³ப³த்தேதி, அபரினிட்டி²தப⁴வோயேவ ஹோதீதி வேதி³தப்³போ³.
117.Sabyābajjhanti sadukkhaṃ. Apariniṭṭhitabhāvāyāti bhavānaṃ apariniṭṭhitabhāvāya. Ettha ca sabyābajjhattabhāvā nāma cattāro honti. Puthujjanopi hi yo tenattabhāvena bhavaṃ pariniṭṭhāpetuṃ na sakkoti, tassa paṭisandhito paṭṭhāya akusalā dhammā vaḍḍhanti, kusalā dhammā ca parihāyanti, sadukkhameva attabhāvaṃ abhinibbatteti nāma. Tathā sotāpannasakadāgāmianāgāmino. Puthujjanādayo tāva hontu, anāgāmī kathaṃ sabyābajjhaṃ attabhāvaṃ abhinibbatteti, kathañcassa akusalā dhammā abhivaḍḍhanti, kusalā dhammā parihāyantīti. Anāgāmīpi hi suddhāvāse nibbatto uyyānavimānakapparukkhe oloketvā ‘‘aho sukhaṃ aho sukha’’nti udānaṃ udāneti, anāgāmino bhavalobho bhavataṇhā appahīnāva honti, tassa appahīnataṇhatāya akusalā vaḍḍhanti nāma, kusalā parihāyanti nāma, sadukkhameva attabhāvaṃ abhinibbatteti, apariniṭṭhitabhavoyeva hotīti veditabbo.
அப்³யாப³ஜ்ஜ²ந்தி அது³க்க²ங். அயம்பி சதுன்னங் ஜனானங் வஸேன வேதி³தப்³போ³. யோ ஹி புது²ஜ்ஜனோபி தேனத்தபா⁴வேன ப⁴வங் பரினிட்டா²பேதுங் ஸக்கோதி, புன படிஸந்தி⁴ங் ந க³ண்ஹாதி, தஸ்ஸ படிஸந்தி⁴க்³க³ஹணதோ பட்டா²ய அகுஸலா பரிஹாயந்தி, குஸலாயேவ வட்³ட⁴ந்தி, அது³க்க²மேவ அத்தபா⁴வங் நிப்³ப³த்தேதி, பரினிட்டி²தப⁴வோயேவ நாம ஹோதி. ததா² ஸோதாபன்னஸகதா³கா³மிஅனாகா³மினோ. ஸோதாபன்னாத³யோ தாவ ஹொந்து, புது²ஜ்ஜனோ கத²ங் அப்³யாப³ஜ்ஜ²அத்தபா⁴வங் நிப்³ப³த்தேதி, கத²ஞ்சஸ்ஸ அகுஸலபரிஹானிஆதீ³னி ஹொந்தீதி. புது²ஜ்ஜனோபி பச்சி²மப⁴விகோ தேனத்தபா⁴வேன ப⁴வங் பரினிட்டா²பேதுங் ஸமத்தோ² ஹோதி. தஸ்ஸ அங்கு³லிமாலஸ்ஸ விய ஏகேனூனபாணஸஹஸ்ஸங் கா⁴தெந்தஸ்ஸாபி அத்தபா⁴வோ அப்³யாப³ஜ்ஜோ²யேவ நாம, ப⁴வங் பரினிட்டா²பேதியேவ நாம. அகுஸலமேவ ஹாயதி, விபஸ்ஸனமேவ க³ப்³ப⁴ங் க³ண்ஹாபேதி நாம.
Abyābajjhanti adukkhaṃ. Ayampi catunnaṃ janānaṃ vasena veditabbo. Yo hi puthujjanopi tenattabhāvena bhavaṃ pariniṭṭhāpetuṃ sakkoti, puna paṭisandhiṃ na gaṇhāti, tassa paṭisandhiggahaṇato paṭṭhāya akusalā parihāyanti, kusalāyeva vaḍḍhanti, adukkhameva attabhāvaṃ nibbatteti, pariniṭṭhitabhavoyeva nāma hoti. Tathā sotāpannasakadāgāmianāgāmino. Sotāpannādayo tāva hontu, puthujjano kathaṃ abyābajjhaattabhāvaṃ nibbatteti, kathañcassa akusalaparihāniādīni hontīti. Puthujjanopi pacchimabhaviko tenattabhāvena bhavaṃ pariniṭṭhāpetuṃ samattho hoti. Tassa aṅgulimālassa viya ekenūnapāṇasahassaṃ ghātentassāpi attabhāvo abyābajjhoyeva nāma, bhavaṃ pariniṭṭhāpetiyeva nāma. Akusalameva hāyati, vipassanameva gabbhaṃ gaṇhāpeti nāma.
119. சக்கு²விஞ்ஞெய்யந்திஆதீ³ஸு யஸ்மா ஏகச்சஸ்ஸ தஸ்மிங்யேவ ரூபே ராகா³த³யோ உப்பஜ்ஜந்தி, அபி⁴னந்த³தி அஸ்ஸாதே³தி, அபி⁴னந்த³ந்தோ அஸ்ஸாதெ³ந்தோ அனயப்³யஸனங் பாபுணாதி, ஏகச்சஸ்ஸ நுப்பஜ்ஜந்தி, நிப்³பி³ந்த³தி விரஜ்ஜதி, நிப்³பி³ந்த³ந்தோ விரஜ்ஜந்தோ நிப்³பு³திங் பாபுணாதி, தஸ்மா ‘‘தஞ்ச அஞ்ஞமஞ்ஞ’’ந்தி ந வுத்தங். ஏஸ நயோ ஸப்³ப³த்த².
119.Cakkhuviññeyyantiādīsu yasmā ekaccassa tasmiṃyeva rūpe rāgādayo uppajjanti, abhinandati assādeti, abhinandanto assādento anayabyasanaṃ pāpuṇāti, ekaccassa nuppajjanti, nibbindati virajjati, nibbindanto virajjanto nibbutiṃ pāpuṇāti, tasmā ‘‘tañca aññamañña’’nti na vuttaṃ. Esa nayo sabbattha.
ஏவங் வித்தா²ரேன அத்த²ங் ஆஜானெய்யுந்தி எத்த² கே ப⁴க³வதோ இமஸ்ஸ பா⁴ஸிதஸ்ஸ அத்த²ங் ஆஜானந்தி, கே ந ஆஜானந்தீதி? யே தாவ இமஸ்ஸ ஸுத்தஸ்ஸ பாளிஞ்ச அட்ட²கத²ஞ்ச உக்³க³ண்ஹித்வா தக்கரா ந ஹொந்தி, யதா²வுத்தங் அனுலோமபடிபத³ங் ந படிபஜ்ஜந்தி, தே ந ஆஜானந்தி நாம. யே பன தக்கரா ஹொந்தி, யதா²வுத்தங் அனுலோமபடிபத³ங் படிபஜ்ஜந்தி, தே ஆஜானந்தி நாம. ஏவங் ஸந்தேபி ஸபடிஸந்தி⁴கானங் தாவ தீ³க⁴ரத்தங் ஹிதாய ஸுகா²ய ஹோது, அப்படிஸந்தி⁴கானங் கத²ங் ஹோதீதி. அப்படிஸந்தி⁴கா அனுபாதா³னா விய ஜாதவேதா³ பரினிப்³பா³யந்தி, கப்பஸதஸஹஸ்ஸானம்பி அச்சயேன தேஸங் புன து³க்க²ங் நாம நத்தி². இதி ஏகங்ஸேன தேஸங்யேவ தீ³க⁴ரத்தங் ஹிதாய ஸுகா²ய ஹோதி. ஸேஸங் ஸப்³ப³த்த² உத்தானமேவாதி.
Evaṃ vitthārena atthaṃ ājāneyyunti ettha ke bhagavato imassa bhāsitassa atthaṃ ājānanti, ke na ājānantīti? Ye tāva imassa suttassa pāḷiñca aṭṭhakathañca uggaṇhitvā takkarā na honti, yathāvuttaṃ anulomapaṭipadaṃ na paṭipajjanti, te na ājānanti nāma. Ye pana takkarā honti, yathāvuttaṃ anulomapaṭipadaṃ paṭipajjanti, te ājānanti nāma. Evaṃ santepi sapaṭisandhikānaṃ tāva dīgharattaṃ hitāya sukhāya hotu, appaṭisandhikānaṃ kathaṃ hotīti. Appaṭisandhikā anupādānā viya jātavedā parinibbāyanti, kappasatasahassānampi accayena tesaṃ puna dukkhaṃ nāma natthi. Iti ekaṃsena tesaṃyeva dīgharattaṃ hitāya sukhāya hoti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸேவிதப்³பா³ஸேவிதப்³ப³ஸுத்தவண்ணனா நிட்டி²தா.
Sevitabbāsevitabbasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. ஸேவிதப்³பா³ஸேவிதப்³ப³ஸுத்தங் • 4. Sevitabbāsevitabbasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. ஸேவிதப்³பா³ஸேவிதப்³ப³ஸுத்தவண்ணனா • 4. Sevitabbāsevitabbasuttavaṇṇanā
