| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஸேவிதப்³ப³ஸுத்தங்
6. Sevitabbasuttaṃ
26. ‘‘தயோமே , பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே தயோ? அத்தி², பி⁴க்க²வே, புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. அத்தி², பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. அத்தி², பி⁴க்க²வே, புக்³க³லோ ஸக்கத்வா க³ருங் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³. கதமோ ச, பி⁴க்க²வே, புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ ஹீனோ ஹோதி ஸீலேன ஸமாதி⁴னா பஞ்ஞாய. ஏவரூபோ, பி⁴க்க²வே, புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³ அஞ்ஞத்ர அனுத்³த³யா அஞ்ஞத்ர அனுகம்பா.
26. ‘‘Tayome , bhikkhave, puggalā santo saṃvijjamānā lokasmiṃ. Katame tayo? Atthi, bhikkhave, puggalo na sevitabbo na bhajitabbo na payirupāsitabbo. Atthi, bhikkhave, puggalo sevitabbo bhajitabbo payirupāsitabbo. Atthi, bhikkhave, puggalo sakkatvā garuṃ katvā sevitabbo bhajitabbo payirupāsitabbo. Katamo ca, bhikkhave, puggalo na sevitabbo na bhajitabbo na payirupāsitabbo? Idha, bhikkhave, ekacco puggalo hīno hoti sīlena samādhinā paññāya. Evarūpo, bhikkhave, puggalo na sevitabbo na bhajitabbo na payirupāsitabbo aññatra anuddayā aññatra anukampā.
‘‘கதமோ ச, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ ஸதி³ஸோ ஹோதி ஸீலேன ஸமாதி⁴னா பஞ்ஞாய. ஏவரூபோ, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. தங் கிஸ்ஸ ஹேது? ஸீலஸாமஞ்ஞக³தானங் ஸதங் ஸீலகதா² ச நோ ப⁴விஸ்ஸதி, ஸா ச நோ பவத்தினீ 1 ப⁴விஸ்ஸதி, ஸா ச நோ பா²ஸு ப⁴விஸ்ஸதி. ஸமாதி⁴ஸாமஞ்ஞக³தானங் ஸதங் ஸமாதி⁴கதா² ச நோ ப⁴விஸ்ஸதி, ஸா ச நோ பவத்தினீ ப⁴விஸ்ஸதி, ஸா ச நோ பா²ஸு ப⁴விஸ்ஸதி. பஞ்ஞாஸாமஞ்ஞக³தானங் ஸதங் பஞ்ஞாகதா² ச நோ ப⁴விஸ்ஸதி, ஸா ச நோ பவத்தினீ ப⁴விஸ்ஸதி, ஸா ச நோ பா²ஸு ப⁴விஸ்ஸதீதி. தஸ்மா ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³.
‘‘Katamo ca, bhikkhave, puggalo sevitabbo bhajitabbo payirupāsitabbo? Idha, bhikkhave, ekacco puggalo sadiso hoti sīlena samādhinā paññāya. Evarūpo, bhikkhave, puggalo sevitabbo bhajitabbo payirupāsitabbo. Taṃ kissa hetu? Sīlasāmaññagatānaṃ sataṃ sīlakathā ca no bhavissati, sā ca no pavattinī 2 bhavissati, sā ca no phāsu bhavissati. Samādhisāmaññagatānaṃ sataṃ samādhikathā ca no bhavissati, sā ca no pavattinī bhavissati, sā ca no phāsu bhavissati. Paññāsāmaññagatānaṃ sataṃ paññākathā ca no bhavissati, sā ca no pavattinī bhavissati, sā ca no phāsu bhavissatīti. Tasmā evarūpo puggalo sevitabbo bhajitabbo payirupāsitabbo.
‘‘கதமோ ச, பி⁴க்க²வே, புக்³க³லோ ஸக்கத்வா க³ருங் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³? இத⁴, பி⁴க்க²வே , ஏகச்சோ புக்³க³லோ அதி⁴கோ ஹோதி ஸீலேன ஸமாதி⁴னா பஞ்ஞாய. ஏவரூபோ, பி⁴க்க²வே, புக்³க³லோ ஸக்கத்வா க³ருங் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³. தங் கிஸ்ஸ ஹேது? இதி அபரிபூரங் வா ஸீலக்க²ந்த⁴ங் பரிபூரெஸ்ஸாமி, பரிபூரங் வா ஸீலக்க²ந்த⁴ங் தத்த² தத்த² பஞ்ஞாய அனுக்³க³ஹெஸ்ஸாமி; அபரிபூரங் வா ஸமாதி⁴க்க²ந்த⁴ங் பரிபூரெஸ்ஸாமி, பரிபூரங் வா ஸமாதி⁴க்க²ந்த⁴ங் தத்த² தத்த² பஞ்ஞாய அனுக்³க³ஹெஸ்ஸாமி; அபரிபூரங் வா பஞ்ஞாக்க²ந்த⁴ங் பரிபூரெஸ்ஸாமி, பரிபூரங் வா பஞ்ஞாக்க²ந்த⁴ங் தத்த² தத்த² பஞ்ஞாய அனுக்³க³ஹெஸ்ஸாமீதி. தஸ்மா ஏவரூபோ புக்³க³லோ ஸக்கத்வா க³ருங் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³. இமே கோ², பி⁴க்க²வே, தயோ புக்³க³லா ஸந்தோ ஸங்விஜ்ஜமானா லோகஸ்மி’’ந்தி.
‘‘Katamo ca, bhikkhave, puggalo sakkatvā garuṃ katvā sevitabbo bhajitabbo payirupāsitabbo? Idha, bhikkhave , ekacco puggalo adhiko hoti sīlena samādhinā paññāya. Evarūpo, bhikkhave, puggalo sakkatvā garuṃ katvā sevitabbo bhajitabbo payirupāsitabbo. Taṃ kissa hetu? Iti aparipūraṃ vā sīlakkhandhaṃ paripūressāmi, paripūraṃ vā sīlakkhandhaṃ tattha tattha paññāya anuggahessāmi; aparipūraṃ vā samādhikkhandhaṃ paripūressāmi, paripūraṃ vā samādhikkhandhaṃ tattha tattha paññāya anuggahessāmi; aparipūraṃ vā paññākkhandhaṃ paripūressāmi, paripūraṃ vā paññākkhandhaṃ tattha tattha paññāya anuggahessāmīti. Tasmā evarūpo puggalo sakkatvā garuṃ katvā sevitabbo bhajitabbo payirupāsitabbo. Ime kho, bhikkhave, tayo puggalā santo saṃvijjamānā lokasmi’’nti.
‘‘நிஹீயதி புரிஸோ நிஹீனஸேவீ,
‘‘Nihīyati puriso nihīnasevī,
ந ச ஹாயேத² கதா³சி துல்யஸேவீ;
Na ca hāyetha kadāci tulyasevī;
ஸெட்ட²முபனமங் உதே³தி கி²ப்பங்,
Seṭṭhamupanamaṃ udeti khippaṃ,
தஸ்மா அத்தனோ உத்தரிங் ப⁴ஜேதா²’’தி. ச²ட்ட²ங்;
Tasmā attano uttariṃ bhajethā’’ti. chaṭṭhaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸேவிதப்³ப³ஸுத்தவண்ணனா • 6. Sevitabbasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸேவிதப்³ப³ஸுத்தவண்ணனா • 6. Sevitabbasuttavaṇṇanā
