| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. ஸீலப்³ப³தஸுத்தங்
8. Sīlabbatasuttaṃ
79. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஆனந்த³ங் ப⁴க³வா ஏதத³வோச – ‘‘ஸப்³ப³ங் நு கோ², ஆனந்த³, ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாரங் ஸப²ல’’ந்தி? ‘‘ந க்²வெத்த², ப⁴ந்தே, ஏகங்ஸேனா’’தி. ‘‘தேன ஹானந்த³, விப⁴ஜஸ்ஸூ’’தி.
79. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘sabbaṃ nu kho, ānanda, sīlabbataṃ jīvitaṃ brahmacariyaṃ upaṭṭhānasāraṃ saphala’’nti? ‘‘Na khvettha, bhante, ekaṃsenā’’ti. ‘‘Tena hānanda, vibhajassū’’ti.
‘‘யஞ்ஹிஸ்ஸ 1, ப⁴ந்தே, ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாரங் ஸேவதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தி, ஏவரூபங் ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாரங் அப²லங். யஞ்ச க்²வாஸ்ஸ 2, ப⁴ந்தே, ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாரங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி, ஏவரூபங் ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாரங் ஸப²ல’’ந்தி. இத³மவோச ஆயஸ்மா ஆனந்தோ³; ஸமனுஞ்ஞோ ஸத்தா² அஹோஸி.
‘‘Yañhissa 3, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā abhivaḍḍhanti kusalā dhammā parihāyanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ aphalaṃ. Yañca khvāssa 4, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā parihāyanti, kusalā dhammā abhivaḍḍhanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ saphala’’nti. Idamavoca āyasmā ānando; samanuñño satthā ahosi.
அத² கோ² ஆயஸ்மா ஆனந்தோ³ ‘‘ஸமனுஞ்ஞோ மே ஸத்தா²’’தி, உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா அசிரபக்கந்தே ஆயஸ்மந்தே ஆனந்தே³ பி⁴க்கூ² ஆமந்தேஸி – ‘‘ஸேகோ², பி⁴க்க²வே, ஆனந்தோ³; ந ச பனஸ்ஸ ஸுலப⁴ரூபோ ஸமஸமோ பஞ்ஞாயா’’தி. அட்ட²மங்.
Atha kho āyasmā ānando ‘‘samanuñño me satthā’’ti, uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā acirapakkante āyasmante ānande bhikkhū āmantesi – ‘‘sekho, bhikkhave, ānando; na ca panassa sulabharūpo samasamo paññāyā’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ஸீலப்³ப³தஸுத்தவண்ணனா • 8. Sīlabbatasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. ஸீலப்³ப³தஸுத்தவண்ணனா • 8. Sīlabbatasuttavaṇṇanā
