| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. ஸீலஸம்பன்னஸுத்தவண்ணனா
5. Sīlasampannasuttavaṇṇanā
104. பஞ்சமே ஸீலஸம்பன்னாதி எத்த² ஸீலங் நாம கீ²ணாஸவானங் லோகியலோகுத்தரஸீலங், தேன ஸம்பன்னா ஸமன்னாக³தாதி ஸீலஸம்பன்னா. ஸமாதி⁴பஞ்ஞாஸுபி ஏஸேவ நயோ. விமுத்தி பன ப²லவிமுத்தியேவ, விமுத்திஞாணத³ஸ்ஸனங் பச்சவெக்க²ணஞாணங். ஏவமெத்த² ஸீலாத³யோ தயோ லோகியலோகுத்தரா, விமுத்தி லோகுத்தராவ, விமுத்திஞாணத³ஸ்ஸனங் லோகியமேவ. தி³ட்ட²த⁴ம்மிகஸம்பராயிகபரமத்தே²ஹி யதா²ரஹங் பரே ஓவத³ந்தி அனுஸாஸந்தீதி ஓவாத³கா. விஞ்ஞாபகாதி கம்மானி கம்மப²லானி ச, விஞ்ஞாபகா, தத்த² ச ‘‘இமே த⁴ம்மா குஸலா, இமே த⁴ம்மா அகுஸலா. இமே த⁴ம்மா ஸாவஜ்ஜா, இமே த⁴ம்மா அனவஜ்ஜா’’திஆதி³னா குஸலாதி³விபா⁴க³தோ க²ந்தா⁴தி³விபா⁴க³தோ ஸலக்க²ணதோ ஸாமஞ்ஞலக்க²ணதோதி விவிதே⁴ஹி நயேஹி த⁴ம்மானங் ஞாபகா அவபோ³த⁴கா . ஸந்த³ஸ்ஸகாதி தேயேவ த⁴ம்மே ஹத்தே²ன க³ஹெத்வா விய பரஸ்ஸ பச்சக்க²தோ த³ஸ்ஸேதாரோ. ஸமாத³பகாதி யங் ஸீலாதி³ யேஹி அஸமாதி³ன்னங், தஸ்ஸ ஸமாதா³பேதாரோ, தத்த² தே பதிட்டா²பேதாரோ. ஸமுத்தேஜகாதி ஏவங் குஸலத⁴ம்மேஸு பதிட்டி²தானங் உபரி அதி⁴சித்தானுயோகே³ நியோஜனவஸேன சித்தஸ்ஸ ஸம்மா உத்தேஜகா, யதா² விஸேஸாதி⁴க³மோ ஹோதி, ஏவங் நிஸாமனவஸேன தேஜகா. ஸம்பஹங்ஸகாதி தேஸங் யதா²லத்³தே⁴ஹி உபரிலத்³த⁴ப்³பே³ஹி ச கு³ணவிஸேஸேஹி சித்தஸ்ஸ ஸம்மா பஹங்ஸகா, லத்³த⁴ஸ்ஸாத³வஸேன ஸுட்டு² தோஸகா. அலங்ஸமக்கா²தாரோதி அலங் பரியத்தங் யதா²வுத்தங் அபரிஹாபெத்வா ஸம்மதே³வ அனுக்³க³ஹாதி⁴ப்பாயேன அக்கா²தாரோ.
104. Pañcame sīlasampannāti ettha sīlaṃ nāma khīṇāsavānaṃ lokiyalokuttarasīlaṃ, tena sampannā samannāgatāti sīlasampannā. Samādhipaññāsupi eseva nayo. Vimutti pana phalavimuttiyeva, vimuttiñāṇadassanaṃ paccavekkhaṇañāṇaṃ. Evamettha sīlādayo tayo lokiyalokuttarā, vimutti lokuttarāva, vimuttiñāṇadassanaṃ lokiyameva. Diṭṭhadhammikasamparāyikaparamatthehi yathārahaṃ pare ovadanti anusāsantīti ovādakā. Viññāpakāti kammāni kammaphalāni ca, viññāpakā, tattha ca ‘‘ime dhammā kusalā, ime dhammā akusalā. Ime dhammā sāvajjā, ime dhammā anavajjā’’tiādinā kusalādivibhāgato khandhādivibhāgato salakkhaṇato sāmaññalakkhaṇatoti vividhehi nayehi dhammānaṃ ñāpakā avabodhakā . Sandassakāti teyeva dhamme hatthena gahetvā viya parassa paccakkhato dassetāro. Samādapakāti yaṃ sīlādi yehi asamādinnaṃ, tassa samādāpetāro, tattha te patiṭṭhāpetāro. Samuttejakāti evaṃ kusaladhammesu patiṭṭhitānaṃ upari adhicittānuyoge niyojanavasena cittassa sammā uttejakā, yathā visesādhigamo hoti, evaṃ nisāmanavasena tejakā. Sampahaṃsakāti tesaṃ yathāladdhehi upariladdhabbehi ca guṇavisesehi cittassa sammā pahaṃsakā, laddhassādavasena suṭṭhu tosakā. Alaṃsamakkhātāroti alaṃ pariyattaṃ yathāvuttaṃ aparihāpetvā sammadeva anuggahādhippāyena akkhātāro.
அத² வா ஸந்த³ஸ்ஸகாதி த⁴ம்மங் தே³ஸெந்தா பவத்தினிவத்தியோ ஸபா⁴வஸரஸலக்க²ணதோ ஸம்மதே³வ த³ஸ்ஸேதாரோ. ஸமாத³பகாதி சித்தே பதிட்டா²பனவஸேன தஸ்ஸேவ அத்த²ஸ்ஸ கா³ஹாபகா. ஸமுத்தேஜகாதி தத³த்த²க்³க³ஹணே உஸ்ஸாஹஜனநேன ஸம்மதே³வ வோத³பகா ஜோதகா வா. ஸம்பஹங்ஸகாதி தத³த்த²படிபத்தியங் ஆனிஸங்ஸத³ஸ்ஸனேன ஸம்மதே³வ பஹங்ஸகா தோஸகா. அலங்ஸமக்கா²தாரோதி ஸமத்தா² ஹுத்வா வுத்தனயேன ஸமக்கா²தாரோ. ஸத்³த⁴ம்மஸ்ஸாதி படிவேத⁴ஸத்³த⁴ம்மஸ்ஸ, திவித⁴ஸ்ஸாபி வா ஸத்³த⁴ம்மஸ்ஸ தே³ஸேதாரோ.
Atha vā sandassakāti dhammaṃ desentā pavattinivattiyo sabhāvasarasalakkhaṇato sammadeva dassetāro. Samādapakāti citte patiṭṭhāpanavasena tasseva atthassa gāhāpakā. Samuttejakāti tadatthaggahaṇe ussāhajananena sammadeva vodapakā jotakā vā. Sampahaṃsakāti tadatthapaṭipattiyaṃ ānisaṃsadassanena sammadeva pahaṃsakā tosakā. Alaṃsamakkhātāroti samatthā hutvā vuttanayena samakkhātāro. Saddhammassāti paṭivedhasaddhammassa, tividhassāpi vā saddhammassa desetāro.
த³ஸ்ஸனம்பஹந்தி த³ஸ்ஸனம்பி அஹங். தங் பனேதங் சக்கு²த³ஸ்ஸனங் ஞாணத³ஸ்ஸனந்தி து³வித⁴ங். தத்த² பஸன்னேஹி சக்கூ²ஹி அரியானங் ஓலோகனங் சக்கு²த³ஸ்ஸனங் நாம. அரியபா⁴வகரானங் பன த⁴ம்மானங் அரியபா⁴வஸ்ஸ ச விபஸ்ஸனாமக்³க³ப²லேஹி அதி⁴க³மோ ஞாணத³ஸ்ஸனங் நாம. இமஸ்மிங் பனத்தே² சக்கு²த³ஸ்ஸனங் அதி⁴ப்பேதங். அரியானஞ்ஹி பஸன்னேஹி சக்கூ²ஹி ஓலோகனம்பி ஸத்தானங் ப³ஹூபகாரமேவ. ஸவனந்தி ‘‘அஸுகோ நாம கீ²ணாஸவோ அஸுகஸ்மிங் நாம ரட்டே² வா ஜனபதே³ வா கா³மே வா நிக³மே வா விஹாரே வா லேணே வா வஸதீ’’தி கதெ²ந்தானங் ஸோதேன ஸவனங், ஏதம்பி ப³ஹூபகாரமேவ. உபஸங்கமனந்தி ‘‘தா³னங் வா த³ஸ்ஸாமி, பஞ்ஹங் வா புச்சி²ஸ்ஸாமி, த⁴ம்மங் வா ஸொஸ்ஸாமி, ஸக்காரங் வா கரிஸ்ஸாமீ’’தி ஏவரூபேன சித்தேன அரியானங் உபஸங்கமனங். பயிருபாஸனந்தி பஞ்ஹபயிருபாஸனங், அரியானங் கு³ணே ஸுத்வா தே உபஸங்கமித்வா நிமந்தெத்வா தா³னங் வா த³த்வா வத்தங் வா கத்வா ‘‘கிங், ப⁴ந்தே, குஸல’’ந்திஆதி³னா நயேன பஞ்ஹபுச்ச²னந்தி அத்தோ². வெய்யாவச்சாதி³கரணங் பயிருபாஸனங்யேவ. அனுஸ்ஸரணந்தி ரத்திட்டா²னதி³வாட்டா²னேஸு நிஸின்னஸ்ஸ ‘‘இதா³னி அரியா கு³ம்ப³லேணமண்ட³பாதீ³ஸு ஜா²னவிபஸ்ஸனாமக்³க³ப²லஸுகே²ஹி வீதினாமெந்தீ’’தி தேஸங் தி³ப்³ப³விஹாராதி³கு³ணவிஸேஸாரம்மணங் அனுஸ்ஸரணங். யோ வா தேஸங் ஸந்திகா ஓவாதோ³ லத்³தோ⁴ ஹோதி, தங் ஆவஜ்ஜித்வா ‘‘இமஸ்மிங் டா²னே ஸீலங் கதி²தங், இமஸ்மிங் ஸமாதி⁴, இமஸ்மிங் விபஸ்ஸனா, இமஸ்மிங் மக்³கோ³, இமஸ்மிங் ப²ல’’ந்தி ஏவங் அனுஸ்ஸரணங்.
Dassanampahanti dassanampi ahaṃ. Taṃ panetaṃ cakkhudassanaṃ ñāṇadassananti duvidhaṃ. Tattha pasannehi cakkhūhi ariyānaṃ olokanaṃ cakkhudassanaṃ nāma. Ariyabhāvakarānaṃ pana dhammānaṃ ariyabhāvassa ca vipassanāmaggaphalehi adhigamo ñāṇadassanaṃ nāma. Imasmiṃ panatthe cakkhudassanaṃ adhippetaṃ. Ariyānañhi pasannehi cakkhūhi olokanampi sattānaṃ bahūpakārameva. Savananti ‘‘asuko nāma khīṇāsavo asukasmiṃ nāma raṭṭhe vā janapade vā gāme vā nigame vā vihāre vā leṇe vā vasatī’’ti kathentānaṃ sotena savanaṃ, etampi bahūpakārameva. Upasaṅkamananti ‘‘dānaṃ vā dassāmi, pañhaṃ vā pucchissāmi, dhammaṃ vā sossāmi, sakkāraṃ vā karissāmī’’ti evarūpena cittena ariyānaṃ upasaṅkamanaṃ. Payirupāsananti pañhapayirupāsanaṃ, ariyānaṃ guṇe sutvā te upasaṅkamitvā nimantetvā dānaṃ vā datvā vattaṃ vā katvā ‘‘kiṃ, bhante, kusala’’ntiādinā nayena pañhapucchananti attho. Veyyāvaccādikaraṇaṃ payirupāsanaṃyeva. Anussaraṇanti rattiṭṭhānadivāṭṭhānesu nisinnassa ‘‘idāni ariyā gumbaleṇamaṇḍapādīsu jhānavipassanāmaggaphalasukhehi vītināmentī’’ti tesaṃ dibbavihārādiguṇavisesārammaṇaṃ anussaraṇaṃ. Yo vā tesaṃ santikā ovādo laddho hoti, taṃ āvajjitvā ‘‘imasmiṃ ṭhāne sīlaṃ kathitaṃ, imasmiṃ samādhi, imasmiṃ vipassanā, imasmiṃ maggo, imasmiṃ phala’’nti evaṃ anussaraṇaṃ.
அனுபப்³ப³ஜ்ஜந்தி அரியேஸு சித்தங் பஸாதெ³த்வா க⁴ரா நிக்க²ம்ம தேஸங் ஸந்திகே பப்³ப³ஜ்ஜங். அரியேஸு ஹி சித்தங் பஸாதெ³த்வா தேஸங்யேவ ஸந்திகே பப்³ப³ஜித்வா தேஸங்யேவ ஓவாதா³னுஸாஸனிங் பச்சாஸீஸமானஸ்ஸ சரதோபி பப்³ப³ஜ்ஜா அனுபப்³ப³ஜ்ஜா நாம, அஞ்ஞேஸங் ஸந்திகே ஓவாதா³னுஸாஸனிங் பச்சாஸீஸமானஸ்ஸ சரதோபி பப்³ப³ஜ்ஜா அனுபப்³ப³ஜ்ஜா நாம, அரியேஸு பஸாதே³ன அஞ்ஞத்த² பப்³ப³ஜித்வா அரியானங் ஸந்திகே ஓவாதா³னுஸாஸனிங் பச்சாஸீஸமானஸ்ஸ சரதோபி பப்³ப³ஜ்ஜா அனுபப்³ப³ஜ்ஜாவ. அஞ்ஞேஸு பன பஸாதே³ன அஞ்ஞேஸங்யேவ ஸந்திகே பப்³ப³ஜித்வா அஞ்ஞேஸங்யேவ ஓவாதா³னுஸாஸனிங் பச்சாஸீஸமானஸ்ஸ சரதோ பப்³ப³ஜ்ஜா அனுபப்³ப³ஜ்ஜா நாம ந ஹோதி. வுத்தனயேன பப்³ப³ஜிதேஸு பன மஹாகஸ்ஸபத்தே²ரஸ்ஸ தாவ அனுபப்³ப³ஜ்ஜங் பப்³ப³ஜிதா ஸதஸஹஸ்ஸமத்தா அஹேஸுங், ததா² தே²ரஸ்ஸேவ ஸத்³தி⁴விஹாரிகஸ்ஸ சந்த³கு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ ஸூரியகு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ அஸ்ஸகு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ யோனகத⁴ம்மரக்கி²தத்தே²ரஸ்ஸ. தஸ்ஸ பன ஸத்³தி⁴விஹாரிகோ அஸோகரஞ்ஞோ கனிட்ட²பா⁴தா திஸ்ஸத்தே²ரோ நாம அஹோஸி. தஸ்ஸ அனுபப்³ப³ஜ்ஜங் பப்³ப³ஜிதா அட்³ட⁴தெய்யகோடிஸங்கா² அஹேஸுங். தீ³பப்பஸாத³கமஹாமஹிந்த³த்தே²ரஸ்ஸ பன அனுபப்³ப³ஜிதானங் க³ணனபரிச்சே²தோ³ நத்தி². யாவஜ்ஜதி³வஸா லங்காதீ³பே ஸத்த²ரி பஸாதே³ன பப்³ப³ஜந்தா மஹாமஹிந்த³த்தே²ரஸ்ஸேவ அனுபப்³ப³ஜ்ஜந்தி நாம.
Anupabbajjanti ariyesu cittaṃ pasādetvā gharā nikkhamma tesaṃ santike pabbajjaṃ. Ariyesu hi cittaṃ pasādetvā tesaṃyeva santike pabbajitvā tesaṃyeva ovādānusāsaniṃ paccāsīsamānassa caratopi pabbajjā anupabbajjā nāma, aññesaṃ santike ovādānusāsaniṃ paccāsīsamānassa caratopi pabbajjā anupabbajjā nāma, ariyesu pasādena aññattha pabbajitvā ariyānaṃ santike ovādānusāsaniṃ paccāsīsamānassa caratopi pabbajjā anupabbajjāva. Aññesu pana pasādena aññesaṃyeva santike pabbajitvā aññesaṃyeva ovādānusāsaniṃ paccāsīsamānassa carato pabbajjā anupabbajjā nāma na hoti. Vuttanayena pabbajitesu pana mahākassapattherassa tāva anupabbajjaṃ pabbajitā satasahassamattā ahesuṃ, tathā therasseva saddhivihārikassa candaguttattherassa, tassāpi saddhivihārikassa sūriyaguttattherassa, tassāpi saddhivihārikassa assaguttattherassa, tassāpi saddhivihārikassa yonakadhammarakkhitattherassa. Tassa pana saddhivihāriko asokarañño kaniṭṭhabhātā tissatthero nāma ahosi. Tassa anupabbajjaṃ pabbajitā aḍḍhateyyakoṭisaṅkhā ahesuṃ. Dīpappasādakamahāmahindattherassa pana anupabbajitānaṃ gaṇanaparicchedo natthi. Yāvajjadivasā laṅkādīpe satthari pasādena pabbajantā mahāmahindattherasseva anupabbajjanti nāma.
இதா³னி யேன காரணேன தேஸங் அரியானங் த³ஸ்ஸனாதி³ ப³ஹூபகாரந்தி வுத்தங், தங் த³ஸ்ஸேதுங் ‘‘ததா²ரூபே’’திஆதி³மாஹ. தத்த² ததா²ரூபேதி தாதி³ஸே ஸீலாதி³கு³ணஸம்பன்னே அரியே. யஸ்மா த³ஸ்ஸனஸவனானுஸ்ஸரணானி உபஸங்கமனபயிருபாஸனட்டா²னானி, தஸ்மா தானி அனாமஸித்வா உபஸங்கமனபயிருபாஸனானியேவ த³ஸ்ஸேதுங் ‘‘ஸேவதோ ப⁴ஜதோ பயிருபாஸதோ’’தி வுத்தங் . த³ஸ்ஸனஸவனானுஸ்ஸரணதோ ஹி அரியேஸு உப்பன்னஸத்³தோ⁴ தே உபஸங்கமித்வா பயிருபாஸித்வா பஞ்ஹங் புச்சி²த்வா லத்³த⁴ஸவனானுத்தரியோ அபரிபூரே ஸீலாதி³கு³ணே பரிபூரெஸ்ஸதீதி. ததா² ஹி வுத்தங் ‘‘ஸத்³தா⁴ஜாதோ உபஸங்கமதி, உபஸங்கமந்தோ பயிருபாஸதீ’’திஆதி³ (ம॰ நி॰ 2.183).
Idāni yena kāraṇena tesaṃ ariyānaṃ dassanādi bahūpakāranti vuttaṃ, taṃ dassetuṃ ‘‘tathārūpe’’tiādimāha. Tattha tathārūpeti tādise sīlādiguṇasampanne ariye. Yasmā dassanasavanānussaraṇāni upasaṅkamanapayirupāsanaṭṭhānāni, tasmā tāni anāmasitvā upasaṅkamanapayirupāsanāniyeva dassetuṃ ‘‘sevato bhajato payirupāsato’’ti vuttaṃ . Dassanasavanānussaraṇato hi ariyesu uppannasaddho te upasaṅkamitvā payirupāsitvā pañhaṃ pucchitvā laddhasavanānuttariyo aparipūre sīlādiguṇe paripūressatīti. Tathā hi vuttaṃ ‘‘saddhājāto upasaṅkamati, upasaṅkamanto payirupāsatī’’tiādi (ma. ni. 2.183).
தத்த² ஸேவதோதி வத்தபடிவத்தகரணவஸேன காலேன காலங் உபஸங்கமதோ. ப⁴ஜதோதி ஸம்பியாயனப⁴த்திவஸேன ப⁴ஜதோ. பயிருபாஸதோதி பஞ்ஹபுச்ச²னேன படிபத்திஅனுகரணேன ச பயிருபாஸதோதி திண்ணங் பதா³னங் அத்த²விபா⁴கோ³ தீ³பேதப்³போ³. விமுத்திஞாணத³ஸ்ஸனஸ்ஸ பாரிபூரி ஏகூனவீஸதிமஸ்ஸ பச்சவெக்க²ணஞாணஸ்ஸ உப்பத்தியா வேதி³தப்³பா³.
Tattha sevatoti vattapaṭivattakaraṇavasena kālena kālaṃ upasaṅkamato. Bhajatoti sampiyāyanabhattivasena bhajato. Payirupāsatoti pañhapucchanena paṭipattianukaraṇena ca payirupāsatoti tiṇṇaṃ padānaṃ atthavibhāgo dīpetabbo. Vimuttiñāṇadassanassa pāripūri ekūnavīsatimassa paccavekkhaṇañāṇassa uppattiyā veditabbā.
ஏவரூபா ச தே, பி⁴க்க²வே, பி⁴க்கூ²திஆதீ³ஸு யே யதா²வுத்தகு³ணஸமன்னாக³மேன ஏவரூபா ஏதி³ஸா பி⁴ன்னஸப்³ப³கிலேஸா பி⁴க்கூ², தே தி³ட்ட²த⁴ம்மிகாதி³ஹிதேஸு ஸத்தானங் நியோஜனவஸேன அனுஸாஸனதோ ஸத்தா²ரோதிபி வுச்சந்தி. ஜாதிகந்தாராதி³னித்த²ரணதோ ஸத்த²வாஹாதிபி, ராகா³தி³ரணானங் ஜஹனதோ ஜஹாபனதோ ச ரணஞ்ஜஹாதிபி, அவிஜ்ஜாதமஸ்ஸ வினோத³னதோ வினோதா³பனதோ ச தமோனுதா³திபி, ஸபரஸந்தானேஸு பஞ்ஞாஆலோகபஞ்ஞாஓபா⁴ஸபஞ்ஞாபஜ்ஜோதானங் கரணேன நிப்³ப³த்தனேன ஆலோகாதி³கராதிபி, ததா² ஞாணுக்காஞாணப்பபா⁴த⁴ம்முக்காத⁴ம்மப்பபா⁴னங் தா⁴ரணேன கரணேன ச உக்காதா⁴ராதிபி, பப⁴ங்கராதிபி, ஆரகத்தா கிலேஸேஹி, அனயே ந இரியனதோ, அயே ச இரியனதோ பரேஸங் ததா²பா⁴வஹேதுபா⁴வதோ, ஸதே³வகேன லோகேன அரணீயதோ அரியாதிபி, பஞ்ஞாசக்கு²த⁴ம்மசக்கூ²னங் ஸாதிஸயபடிலாபே⁴ன சக்கு²மந்தோதிபி வுச்சந்தி.
Evarūpāca te, bhikkhave, bhikkhūtiādīsu ye yathāvuttaguṇasamannāgamena evarūpā edisā bhinnasabbakilesā bhikkhū, te diṭṭhadhammikādihitesu sattānaṃ niyojanavasena anusāsanato satthārotipi vuccanti. Jātikantārādinittharaṇato satthavāhātipi, rāgādiraṇānaṃ jahanato jahāpanato ca raṇañjahātipi, avijjātamassa vinodanato vinodāpanato ca tamonudātipi, saparasantānesu paññāālokapaññāobhāsapaññāpajjotānaṃ karaṇena nibbattanena ālokādikarātipi, tathā ñāṇukkāñāṇappabhādhammukkādhammappabhānaṃ dhāraṇena karaṇena ca ukkādhārātipi, pabhaṅkarātipi, ārakattā kilesehi, anaye na iriyanato, aye ca iriyanato paresaṃ tathābhāvahetubhāvato, sadevakena lokena araṇīyato ariyātipi, paññācakkhudhammacakkhūnaṃ sātisayapaṭilābhena cakkhumantotipi vuccanti.
கா³தா²ஸு பாமோஜ்ஜகரணங் டா²னந்தி நிராமிஸஸ்ஸ பமோத³ஸ்ஸ நிப்³ப³த்தகங் டா²னங் காரணங். ஏதந்தி இதா³னி வத்தப்³ப³னித³ஸ்ஸனங் ஸந்தா⁴ய வத³தி. விஜானதந்தி ஸங்கிலேஸவோதா³னே யாதா²வதோ ஜானந்தானங். பா⁴விதத்தானந்தி பா⁴விதஸபா⁴வானங், காயபா⁴வனாதீ³ஹி பா⁴விதஸந்தானானந்தி அத்தோ². த⁴ம்மஜீவினந்தி மிச்சா²ஜீவங் பஹாய த⁴ம்மேன ஞாயேன ஜீவிககப்பனதோ, த⁴ம்மேன வா ஞாயேன அத்தபா⁴வஸ்ஸ பவத்தனதோ, ஸமாபத்திப³ஹுலதாய வா அக்³க³ப²லத⁴ம்மேன ஜீவனதோ த⁴ம்மஜீவினங். அயஞ்ஹெத்த² ஸங்கே²பத்தோ² – யதி³த³ங் பா⁴விதத்தானங் பரினிட்டி²தஸமாதி⁴பஞ்ஞாபா⁴வனானங் ததோ ஏவ த⁴ம்மஜீவினங் அரியானங் த³ஸ்ஸனங் . ஏதங் அவிப்படிஸாரனிமித்தானங் ஸீலாதீ³னங் பாரிபூரிஹேதுபா⁴வதோ விஜானதங் ஸப்பஞ்ஞஜாதிகானங் ஏகந்தேனேவ பீதிபாமோஜ்ஜகாரணந்தி.
Gāthāsu pāmojjakaraṇaṃ ṭhānanti nirāmisassa pamodassa nibbattakaṃ ṭhānaṃ kāraṇaṃ. Etanti idāni vattabbanidassanaṃ sandhāya vadati. Vijānatanti saṃkilesavodāne yāthāvato jānantānaṃ. Bhāvitattānanti bhāvitasabhāvānaṃ, kāyabhāvanādīhi bhāvitasantānānanti attho. Dhammajīvinanti micchājīvaṃ pahāya dhammena ñāyena jīvikakappanato, dhammena vā ñāyena attabhāvassa pavattanato, samāpattibahulatāya vā aggaphaladhammena jīvanato dhammajīvinaṃ. Ayañhettha saṅkhepattho – yadidaṃ bhāvitattānaṃ pariniṭṭhitasamādhipaññābhāvanānaṃ tato eva dhammajīvinaṃ ariyānaṃ dassanaṃ . Etaṃ avippaṭisāranimittānaṃ sīlādīnaṃ pāripūrihetubhāvato vijānataṃ sappaññajātikānaṃ ekanteneva pītipāmojjakāraṇanti.
இதா³னி தங் தஸ்ஸ காரணபா⁴வங் த³ஸ்ஸேதுங் ‘‘தே ஜோதயந்தீ’’தி ஓஸானகா³தா²த்³வயமாஹ. தத்த² தேதி தே பா⁴விதத்தா த⁴ம்மஜீவினோ அரியா. ஜோதயந்தீதி பகாஸயந்தி. பா⁴ஸயந்தீதி ஸத்³த⁴ம்மோபா⁴ஸேன லோகங் பபா⁴ஸயந்தி, த⁴ம்மங் தே³ஸெந்தீதி அத்தோ². யேஸந்தி யேஸங் அரியானங். ஸாஸனந்தி ஓவாத³ங். ஸம்மத³ஞ்ஞாயாதி புப்³ப³பா⁴க³ஞாணேஹி ஸம்மதே³வ ஜானித்வா. ஸேஸங் வுத்தனயமேவ.
Idāni taṃ tassa kāraṇabhāvaṃ dassetuṃ ‘‘te jotayantī’’ti osānagāthādvayamāha. Tattha teti te bhāvitattā dhammajīvino ariyā. Jotayantīti pakāsayanti. Bhāsayantīti saddhammobhāsena lokaṃ pabhāsayanti, dhammaṃ desentīti attho. Yesanti yesaṃ ariyānaṃ. Sāsananti ovādaṃ. Sammadaññāyāti pubbabhāgañāṇehi sammadeva jānitvā. Sesaṃ vuttanayameva.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. ஸீலஸம்பன்னஸுத்தங் • 5. Sīlasampannasuttaṃ
