| Library / Tipiṭaka / திபிடக • Tipiṭaka / உதா³னபாளி • Udānapāḷi |
9. ஸிப்பஸுத்தங்
9. Sippasuttaṃ
29. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலானங் பி⁴க்கூ²னங் பச்சா²ப⁴த்தங் பிண்ட³பாதபடிக்கந்தானங் மண்ட³லமாளே ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘‘கோ நு கோ², ஆவுஸோ, ஸிப்பங் ஜானாதி? கோ கிங் ஸிப்பங் ஸிக்கி²? கதரங் ஸிப்பங் ஸிப்பானங் அக்³க³’’ந்தி?
29. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘ko nu kho, āvuso, sippaṃ jānāti? Ko kiṃ sippaṃ sikkhi? Kataraṃ sippaṃ sippānaṃ agga’’nti?
தத்தே²கச்சே ஏவமாஹங்ஸு – ‘‘ஹத்தி²ஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘அஸ்ஸஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘ரத²ஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘த⁴னுஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘த²ருஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘முத்³தா³ஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘க³ணனாஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘ஸங்கா²னஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘லேகா²ஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘காவெய்யஸிப்பங் 1 ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘லோகாயதஸிப்பங் ஸிப்பானங் அக்³க³’’ந்தி. ஏகச்சே ஏவமாஹங்ஸு – ‘‘க²த்தவிஜ்ஜாஸிப்பங் ஸிப்பானங் அக்³க³’’ந்தி. அயஞ்சரஹி தேஸங் பி⁴க்கூ²னங் அந்தராகதா² ஹோதி விப்பகதா.
Tatthekacce evamāhaṃsu – ‘‘hatthisippaṃ sippānaṃ agga’’nti. Ekacce evamāhaṃsu – ‘‘assasippaṃ sippānaṃ agga’’nti. Ekacce evamāhaṃsu – ‘‘rathasippaṃ sippānaṃ agga’’nti. Ekacce evamāhaṃsu – ‘‘dhanusippaṃ sippānaṃ agga’’nti. Ekacce evamāhaṃsu – ‘‘tharusippaṃ sippānaṃ agga’’nti. Ekacce evamāhaṃsu – ‘‘muddāsippaṃ sippānaṃ agga’’nti. Ekacce evamāhaṃsu – ‘‘gaṇanāsippaṃ sippānaṃ agga’’nti. Ekacce evamāhaṃsu – ‘‘saṅkhānasippaṃ sippānaṃ agga’’nti. Ekacce evamāhaṃsu – ‘‘lekhāsippaṃ sippānaṃ agga’’nti. Ekacce evamāhaṃsu – ‘‘kāveyyasippaṃ 2 sippānaṃ agga’’nti. Ekacce evamāhaṃsu – ‘‘lokāyatasippaṃ sippānaṃ agga’’nti. Ekacce evamāhaṃsu – ‘‘khattavijjāsippaṃ sippānaṃ agga’’nti. Ayañcarahi tesaṃ bhikkhūnaṃ antarākathā hoti vippakatā.
அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன மண்ட³லமாளோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி?
Atha kho bhagavā sāyanhasamayaṃ paṭisallānā vuṭṭhito yena maṇḍalamāḷo tenupasaṅkami; upasaṅkamitvā paññatte āsane nisīdi. Nisajja kho bhagavā bhikkhū āmantesi – ‘‘kāya nuttha, bhikkhave, etarahi kathāya sannisinnā, kā ca pana vo antarākathā vippakatā’’ti?
‘‘இத⁴, ப⁴ந்தே, அம்ஹாகங் பச்சா²ப⁴த்தங் பிண்ட³பாதபடிக்கந்தானங் மண்ட³லமாளே ஸன்னிஸின்னானங் அயமந்தராகதா² உத³பாதி³ – ‘கோ நு கோ², ஆவுஸோ, ஸிப்பங் ஜானாதி? கோ கிங் ஸிப்பங் ஸிக்கி²? கதரங் ஸிப்பங் ஸிப்பானங் அக்³க³’ந்தி?
‘‘Idha, bhante, amhākaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ ayamantarākathā udapādi – ‘ko nu kho, āvuso, sippaṃ jānāti? Ko kiṃ sippaṃ sikkhi? Kataraṃ sippaṃ sippānaṃ agga’nti?
‘‘தத்தே²கச்சே ஏவமாஹங்ஸு – ‘ஹத்தி²ஸிப்பங் ஸிப்பானங் அக்³க³’ந்தி. ஏகச்சே ஏவமாஹங்ஸு – ‘அஸ்ஸஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘ரத²ஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘த⁴னுஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘த²ருஸிப்பங் ஸிப்பானங் அக்³க³’ந்தி, ஏகச்சே ஏவமாஹங்ஸு – ‘முத்³தா³ஸிப்பங் ஸிப்பானங் அக்³க³’ந்தி ஏகச்சே ஏவமாஹங்ஸு – ‘க³ணனாஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘ஸங்கா²னஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘லேகா²ஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘காவெய்யஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘லோகாயதஸிப்பங் ஸிப்பானங் அக்³க³’ந்தி; ஏகச்சே ஏவமாஹங்ஸு – ‘க²த்தவிஜ்ஜாஸிப்பங் ஸிப்பானங் அக்³க³’ந்தி. அயங் கோ² நோ, ப⁴ந்தே, அந்தராகதா² ஹோதி விப்பகதா, அத² ப⁴க³வா அனுப்பத்தோ’’தி.
‘‘Tatthekacce evamāhaṃsu – ‘hatthisippaṃ sippānaṃ agga’nti. Ekacce evamāhaṃsu – ‘assasippaṃ sippānaṃ agga’nti; ekacce evamāhaṃsu – ‘rathasippaṃ sippānaṃ agga’nti; ekacce evamāhaṃsu – ‘dhanusippaṃ sippānaṃ agga’nti; ekacce evamāhaṃsu – ‘tharusippaṃ sippānaṃ agga’nti, ekacce evamāhaṃsu – ‘muddāsippaṃ sippānaṃ agga’nti ekacce evamāhaṃsu – ‘gaṇanāsippaṃ sippānaṃ agga’nti; ekacce evamāhaṃsu – ‘saṅkhānasippaṃ sippānaṃ agga’nti; ekacce evamāhaṃsu – ‘lekhāsippaṃ sippānaṃ agga’nti; ekacce evamāhaṃsu – ‘kāveyyasippaṃ sippānaṃ agga’nti; ekacce evamāhaṃsu – ‘lokāyatasippaṃ sippānaṃ agga’nti; ekacce evamāhaṃsu – ‘khattavijjāsippaṃ sippānaṃ agga’nti. Ayaṃ kho no, bhante, antarākathā hoti vippakatā, atha bhagavā anuppatto’’ti.
‘‘ந க்²வேதங், பி⁴க்க²வே, தும்ஹாகங் பதிரூபங் குலபுத்தானங் ஸத்³தா⁴ அகா³ரஸ்மா அனகா³ரியங் பப்³ப³ஜிதானங் யங் தும்ஹே ஏவரூபிங் கத²ங் கதெ²ய்யாத². ஸன்னிபதிதானங் வோ, பி⁴க்க²வே, த்³வயங் கரணீயங் – த⁴ம்மீ வா கதா² அரியோ வா துண்ஹீபா⁴வோ’’தி.
‘‘Na khvetaṃ, bhikkhave, tumhākaṃ patirūpaṃ kulaputtānaṃ saddhā agārasmā anagāriyaṃ pabbajitānaṃ yaṃ tumhe evarūpiṃ kathaṃ katheyyātha. Sannipatitānaṃ vo, bhikkhave, dvayaṃ karaṇīyaṃ – dhammī vā kathā ariyo vā tuṇhībhāvo’’ti.
அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘அஸிப்பஜீவீ லஹு அத்த²காமோ,
‘‘Asippajīvī lahu atthakāmo,
யதிந்த்³ரியோ ஸப்³ப³தி⁴ விப்பமுத்தோ;
Yatindriyo sabbadhi vippamutto;
அனோகஸாரீ அமமோ நிராஸோ,
Anokasārī amamo nirāso,
ஹித்வா மானங் ஏகசரோ ஸ பி⁴க்கூ²’’தி. நவமங்;
Hitvā mānaṃ ekacaro sa bhikkhū’’ti. navamaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / உதா³ன-அட்ட²கதா² • Udāna-aṭṭhakathā / 9. ஸிப்பஸுத்தவண்ணனா • 9. Sippasuttavaṇṇanā
