| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ஸீஸுபசாலாஸுத்தவண்ணனா
8. Sīsupacālāsuttavaṇṇanā
169. ஸமணிஸதி³ஸாதி ஸமணலிங்க³ஸ்ஸ தா⁴ரணேன ஸமணிஸதி³ஸா, கஸ்ஸசிபி பாஸண்ட³ஸ்ஸ அருச்சனதோ மோனமக்³க³ஸ்ஸ அப்படிபஜ்ஜனதோ தவ ஸமணிபா⁴வங் நானுபஸ்ஸாமீதி அதி⁴ப்பாயோ. பாஸங் டெ³ந்தீதி பாஸங் ஸஜ்ஜெந்தி, யதா² தத்த² தி³ட்டி²பாஸே ஸத்தானங் சித்தங் படிமுக்கங் ஹோதி, ஏவங் ஸஜ்ஜெந்தீதி அத்தோ². ததா²பூ⁴தா ச தே ஸத்தானங் சித்தே கி²த்தா விய ஹொந்தீதி ஆஹ ‘‘சித்தேஸு தி³ட்டி²பாஸங் கி²பந்தீதி அத்தோ²’’தி. பாஸே மோசேதீதி தி³ட்டி²பாஸே ஸத்தானங் சித்தஸந்தானதோ நீஹரதி த⁴ம்மஸுத⁴ம்மதாய. தஸ்மாதி பாஸமோசனதோ பாஸண்டோ³தி ந வுச்சதி. ‘‘இதோ ப³ஹித்³தா⁴யேவ பாஸண்டா³ ஹொந்தீ’’தி வுத்தஸ்ஸ அத்த²ஸ்ஸ நிக³மனங். ஏவஞ்ச கத்வா ஸப்³பே³பி பா³ஹிரகஸமயே ஸந்தா⁴ய சூளஸீஹனாத³ஸுத்தே ‘‘ச²ன்னவுதி பாஸண்டா³’’தி வுத்தங். பஸீத³ந்தீதி தி³ட்டி²பங்கே ஸங்ஸாரபங்கே ச பகாரேஹி அகா³தா⁴ ஓஸீத³ந்தி.
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
அபி⁴ப⁴வித்வாதி ஸப்³ப³ஸங்கிலேஸப்பஹானேன அபி⁴பு⁴ய்ய அதிக்கமித்வா. அஜிதோதி அஜினி அவிஜயத்தா. ஸப்³பா³னி அகுஸலகம்மானி குஸலகம்மானி ச கீ²ணானி எத்தா²தி ஸப்³ப³கம்மக்க²யோ, அரஹத்தங். உபத⁴யோ ஸம்மதே³வ கீ²யந்தி எத்தா²தி உபதி⁴ஸங்க²யோ, நிப்³பா³னங்.
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
ஸீஸுபசாலாஸுத்தவண்ணனா நிட்டி²தா.
Sīsupacālāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஸீஸுபசாலாஸுத்தங் • 8. Sīsupacālāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸீஸுபசாலாஸுத்தவண்ணனா • 8. Sīsupacālāsuttavaṇṇanā
