| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૮. સીસુપચાલાસુત્તવણ્ણના
8. Sīsupacālāsuttavaṇṇanā
૧૬૯. સમણિસદિસાતિ સમણલિઙ્ગસ્સ ધારણેન સમણિસદિસા, કસ્સચિપિ પાસણ્ડસ્સ અરુચ્ચનતો મોનમગ્ગસ્સ અપ્પટિપજ્જનતો તવ સમણિભાવં નાનુપસ્સામીતિ અધિપ્પાયો. પાસં ડેન્તીતિ પાસં સજ્જેન્તિ, યથા તત્થ દિટ્ઠિપાસે સત્તાનં ચિત્તં પટિમુક્કં હોતિ, એવં સજ્જેન્તીતિ અત્થો. તથાભૂતા ચ તે સત્તાનં ચિત્તે ખિત્તા વિય હોન્તીતિ આહ ‘‘ચિત્તેસુ દિટ્ઠિપાસં ખિપન્તીતિ અત્થો’’તિ. પાસે મોચેતીતિ દિટ્ઠિપાસે સત્તાનં ચિત્તસન્તાનતો નીહરતિ ધમ્મસુધમ્મતાય. તસ્માતિ પાસમોચનતો પાસણ્ડોતિ ન વુચ્ચતિ. ‘‘ઇતો બહિદ્ધાયેવ પાસણ્ડા હોન્તી’’તિ વુત્તસ્સ અત્થસ્સ નિગમનં. એવઞ્ચ કત્વા સબ્બેપિ બાહિરકસમયે સન્ધાય ચૂળસીહનાદસુત્તે ‘‘છન્નવુતિ પાસણ્ડા’’તિ વુત્તં. પસીદન્તીતિ દિટ્ઠિપઙ્કે સંસારપઙ્કે ચ પકારેહિ અગાધા ઓસીદન્તિ.
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
અભિભવિત્વાતિ સબ્બસંકિલેસપ્પહાનેન અભિભુય્ય અતિક્કમિત્વા. અજિતોતિ અજિનિ અવિજયત્તા. સબ્બાનિ અકુસલકમ્માનિ કુસલકમ્માનિ ચ ખીણાનિ એત્થાતિ સબ્બકમ્મક્ખયો, અરહત્તં. ઉપધયો સમ્મદેવ ખીયન્તિ એત્થાતિ ઉપધિસઙ્ખયો, નિબ્બાનં.
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
સીસુપચાલાસુત્તવણ્ણના નિટ્ઠિતા.
Sīsupacālāsuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૮. સીસુપચાલાસુત્તં • 8. Sīsupacālāsuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. સીસુપચાલાસુત્તવણ્ણના • 8. Sīsupacālāsuttavaṇṇanā
