| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. அட்ட²ஸதபரியாயவக்³கோ³
3. Aṭṭhasatapariyāyavaggo
1. ஸீவகஸுத்தவண்ணனா
1. Sīvakasuttavaṇṇanā
269. சூளா பன அஸ்ஸ மஹதீ அத்தி² ஸவிஸேஸா, தஸ்மா ‘‘மோளியஸீவகோ’’தி வுச்சதி. ச²ன்னபரிப்³பா³ஜகோதி கம்ப³லாதி³னா கோபீனபடிச்சா²த³கபரிப்³பா³ஜகோ. பித்தபச்சயானீதி பித்தஹேதுகானி . ‘‘திஸ்ஸோ வேத³னா’’தி வத்வா தாஸங் ஸம்ப⁴வங் த³ஸ்ஸேதுங் ‘‘கத²’’ந்திஆதி³ வுத்தங். குஸலவேத³னா உப்பஜ்ஜதி பித்தபச்சயா. பித்தபே⁴ஸஜ்ஜங் கரிஸ்ஸாமீதி பே⁴ஸஜ்ஜஸம்ப⁴ரணத்த²ஞ்சேவ தத³த்த²ங் ஆமிஸகிஞ்ஜக்க²ஸம்ப⁴ரணத்த²ஞ்ச பாணங் ஹனதீதி யோஜனா. மஜ்ஜ²த்தோ பே⁴ஸஜ்ஜகரணே உதா³ஸீனோ.
269. Cūḷā pana assa mahatī atthi savisesā, tasmā ‘‘moḷiyasīvako’’ti vuccati. Channaparibbājakoti kambalādinā kopīnapaṭicchādakaparibbājako. Pittapaccayānīti pittahetukāni . ‘‘Tisso vedanā’’ti vatvā tāsaṃ sambhavaṃ dassetuṃ ‘‘katha’’ntiādi vuttaṃ. Kusalavedanā uppajjati pittapaccayā. Pittabhesajjaṃ karissāmīti bhesajjasambharaṇatthañceva tadatthaṃ āmisakiñjakkhasambharaṇatthañca pāṇaṃ hanatīti yojanā. Majjhatto bhesajjakaraṇe udāsīno.
தஸ்மாதி யஸ்மா பித்தாதி³பச்சயஹேதுகந்தி அத்தனோ ச லோகஸ்ஸ ச பச்சக்க²ங் அதிதா⁴வந்தி யே ஸமணா வா ப்³ராஹ்மணா வா, தஸ்மா தேஸங் மிச்சா². பித்தாதீ³னங் திண்ணம்பி ஸமோதா⁴னஸன்னிபாதே ஜாதானி ஸன்னிபாதிகானி. புரிமஉதுனோ விஸதி³ஸோ உதுவிபரிணாமோதி ஆஹ ‘‘விஸபா⁴க³உதுதோ ஜாதானீ’’தி . அனுத³கோ த²த்³த⁴லூக²பூ⁴மிவிபா⁴கோ³ ஜங்க³லதே³ஸோ, வுத்தவிபரியாயேன அனுபதே³ஸோ வேதி³தப்³போ³. மலயங் ஹிமஸீதப³ஹுலோ, இதரோ உண்ஹப³ஹுலோ.
Tasmāti yasmā pittādipaccayahetukanti attano ca lokassa ca paccakkhaṃ atidhāvanti ye samaṇā vā brāhmaṇā vā, tasmā tesaṃ micchā. Pittādīnaṃ tiṇṇampi samodhānasannipāte jātāni sannipātikāni. Purimautuno visadiso utuvipariṇāmoti āha ‘‘visabhāgaututo jātānī’’ti . Anudako thaddhalūkhabhūmivibhāgo jaṅgaladeso, vuttavipariyāyena anupadeso veditabbo. Malayaṃ himasītabahulo, itaro uṇhabahulo.
அத்தனோ பகதிசரியானங் விஸமங் காயஸ்ஸ பரிஹரணவஸேன, ஜாதானி பன அஸய்ஹஸஹனஅதே³ஸஅகாலசரணாதி³னா வேதி³தப்³பா³னீதி ஆஹ ‘‘மஹாபா⁴ரவஹனா’’திஆதி³. பரஸ்ஸ உபக்கமதோ நிப்³ப³த்தானி ஓபக்கமிகானீதி ஆஹ – ‘‘அயங் சோரோ வா’’திஆதி³. கேவலந்தி பா³ஹிரபச்சயங் அனபெக்கி²த்வா கேவலங் தேனேவ. தேனாஹ ‘‘கம்மவிபாகதோவ ஜாதானீ’’தி. ஸக்கா படிபா³ஹிதுங் பதீகாரேன. லோகவோஹாரோ நாம கதி²தோ பித்தஸமுட்டா²னாதி³ஸமஞ்ஞாய லோகஸித்³த⁴த்தா. காமங் ஸரீரஸன்னிஸ்ஸிதா வேத³னா கம்மனிப்³ப³த்தாவ, தஸ்ஸா பன பச்சுப்பன்னபச்சயவஸேன ஏவமயங் லோகவோஹாரோதி வுத்தஞ்சேவ க³ஹெத்வா பரவாத³படிஸேதோ⁴ கதோதி த³ட்ட²ப்³ப³ங்.
Attano pakaticariyānaṃ visamaṃ kāyassa pariharaṇavasena, jātāni pana asayhasahanaadesaakālacaraṇādinā veditabbānīti āha ‘‘mahābhāravahanā’’tiādi. Parassa upakkamato nibbattāni opakkamikānīti āha – ‘‘ayaṃ coro vā’’tiādi. Kevalanti bāhirapaccayaṃ anapekkhitvā kevalaṃ teneva. Tenāha ‘‘kammavipākatova jātānī’’ti. Sakkā paṭibāhituṃ patīkārena. Lokavohāro nāma kathito pittasamuṭṭhānādisamaññāya lokasiddhattā. Kāmaṃ sarīrasannissitā vedanā kammanibbattāva, tassā pana paccuppannapaccayavasena evamayaṃ lokavohāroti vuttañceva gahetvā paravādapaṭisedho katoti daṭṭhabbaṃ.
ஸீவகஸுத்தவண்ணனா நிட்டி²தா.
Sīvakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸீவகஸுத்தங் • 1. Sīvakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸீவகஸுத்தவண்ணனா • 1. Sīvakasuttavaṇṇanā
