| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ஸிவதி²கஸுத்தங்
9. Sivathikasuttaṃ
249. ‘‘பஞ்சிமே, பி⁴க்க²வே, ஆதீ³னவா ஸிவதி²காய 1. கதமே பஞ்ச? அஸுசி, து³க்³க³ந்தா⁴, ஸப்படிப⁴யா, வாளானங் அமனுஸ்ஸானங் ஆவாஸோ, ப³ஹுனோ ஜனஸ்ஸ ஆரோத³னா – இமே கோ², பி⁴க்க²வே, பஞ்ச ஆதீ³னவா ஸிவதி²காய.
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘ஏவமேவங் கோ², பி⁴க்க²வே, பஞ்சிமே ஆதீ³னவா ஸிவதி²கூபமே புக்³க³லே. கதமே பஞ்ச? இத⁴ , பி⁴க்க²வே, ஏகச்சோ புக்³க³லோ அஸுசினா காயகம்மேன ஸமன்னாக³தோ ஹோதி; அஸுசினா வசீகம்மேன ஸமன்னாக³தோ ஹோதி; அஸுசினா மனோகம்மேன ஸமன்னாக³தோ ஹோதி. இத³மஸ்ஸ அஸுசிதாய வதா³மி. ஸெய்யதா²பி ஸா, பி⁴க்க²வே, ஸிவதி²கா அஸுசி; ததூ²பமாஹங், பி⁴க்க²வே, இமங் புக்³க³லங் வதா³மி.
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘தஸ்ஸ அஸுசினா காயகம்மேன ஸமன்னாக³தஸ்ஸ, அஸுசினா வசீகம்மேன ஸமன்னாக³தஸ்ஸ, அஸுசினா மனோகம்மேன ஸமன்னாக³தஸ்ஸ பாபகோ கித்திஸத்³தோ³ அப்³பு⁴க்³க³ச்ச²தி. இத³மஸ்ஸ து³க்³க³ந்த⁴தாய வதா³மி. ஸெய்யதா²பி ஸா, பி⁴க்க²வே, ஸிவதி²கா து³க்³க³ந்தா⁴; ததூ²பமாஹங், பி⁴க்க²வே, இமங் புக்³க³லங் வதா³மி.
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘தமேனங் அஸுசினா காயகம்மேன ஸமன்னாக³தங், அஸுசினா வசீகம்மேன ஸமன்னாக³தங், அஸுசினா மனோகம்மேன ஸமன்னாக³தங் பேஸலா ஸப்³ரஹ்மசாரீ ஆரகா பரிவஜ்ஜந்தி. இத³மஸ்ஸ ஸப்படிப⁴யஸ்மிங் வதா³மி. ஸெய்யதா²பி ஸா, பி⁴க்க²வே, ஸிவதி²கா ஸப்படிப⁴யா; ததூ²பமாஹங், பி⁴க்க²வே, இமங் புக்³க³லங் வதா³மி.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘ஸோ அஸுசினா காயகம்மேன ஸமன்னாக³தோ, அஸுசினா வசீகம்மேன ஸமன்னாக³தோ , அஸுசினா மனோகம்மேன ஸமன்னாக³தோ ஸபா⁴கே³ஹி புக்³க³லேஹி ஸத்³தி⁴ங் ஸங்வஸதி. இத³மஸ்ஸ வாளாவாஸஸ்மிங் வதா³மி. ஸெய்யதா²பி ஸா , பி⁴க்க²வே, ஸிவதி²கா வாளானங் அமனுஸ்ஸானங் ஆவாஸோ; ததூ²பமாஹங், பி⁴க்க²வே, இமங் புக்³க³லங் வதா³மி.
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘தமேனங் அஸுசினா காயகம்மேன ஸமன்னாக³தங், அஸுசினா வசீகம்மேன ஸமன்னாக³தங், அஸுசினா மனோகம்மேன ஸமன்னாக³தங் பேஸலா ஸப்³ரஹ்மசாரீ தி³ஸ்வா கீ²யத⁴ம்மங் 3 ஆபஜ்ஜந்தி – ‘அஹோ வத நோ து³க்க²ங் யே மயங் ஏவரூபேஹி புக்³க³லேஹி ஸத்³தி⁴ங் ஸங்வஸாமா’தி! இத³மஸ்ஸ ஆரோத³னாய வதா³மி. ஸெய்யதா²பி ஸா, பி⁴க்க²வே, ஸிவதி²கா ப³ஹுனோ ஜனஸ்ஸ ஆரோத³னா; ததூ²பமாஹங், பி⁴க்க²வே, இமங் புக்³க³லங் வதா³மி. இமே கோ², பி⁴க்க²வே, பஞ்ச ஆதீ³னவா ஸிவதி²கூபமே புக்³க³லே’’தி. நவமங்.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ஸிவதி²கஸுத்தவண்ணனா • 9. Sivathikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. பட²மதீ³க⁴சாரிகஸுத்தாதி³வண்ணனா • 1-10. Paṭhamadīghacārikasuttādivaṇṇanā
