| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஸோகு²ம்மஸுத்தங்
6. Sokhummasuttaṃ
16. ‘‘சத்தாரிமானி, பி⁴க்க²வே, ஸோகு²ம்மானி. கதமானி சத்தாரி? இத⁴, பி⁴க்க²வே, பி⁴க்கு² ரூபஸோகு²ம்மேன ஸமன்னாக³தோ ஹோதி பரமேன; தேன ச ரூபஸோகு²ம்மேன அஞ்ஞங் ரூபஸோகு²ம்மங் உத்தரிதரங் வா பணீததரங் வா ந ஸமனுபஸ்ஸதி; தேன ச ரூபஸோகு²ம்மேன அஞ்ஞங் ரூபஸோகு²ம்மங் உத்தரிதரங் வா பணீததரங் வா ந பத்தே²தி. வேத³னாஸோகு²ம்மேன ஸமன்னாக³தோ ஹோதி பரமேன; தேன ச வேத³னாஸோகு²ம்மேன அஞ்ஞங் வேத³னாஸோகு²ம்மங் உத்தரிதரங் வா பணீததரங் வா ந ஸமனுபஸ்ஸதி; தேன ச வேத³னாஸோகு²ம்மேன அஞ்ஞங் வேத³னாஸோகு²ம்மங் உத்தரிதரங் வா பணீததரங் வா ந பத்தே²தி. ஸஞ்ஞாஸோகு²ம்மேன ஸமன்னாக³தோ ஹோதி பரமேன; தேன ச ஸஞ்ஞாஸோகு²ம்மேன அஞ்ஞங் ஸஞ்ஞாஸோகு²ம்மங் உத்தரிதரங் வா பணீததரங் வா ந ஸமனுபஸ்ஸதி; தேன ச ஸஞ்ஞாஸோகு²ம்மேன அஞ்ஞங் ஸஞ்ஞாஸோகு²ம்மங் உத்தரிதரங் வா பணீததரங் வா ந பத்தே²தி. ஸங்கா²ரஸோகு²ம்மேன ஸமன்னாக³தோ ஹோதி பரமேன; தேன ச ஸங்கா²ரஸோகு²ம்மேன அஞ்ஞங் ஸங்கா²ரஸோகு²ம்மங் உத்தரிதரங் வா பணீததரங் வா ந ஸமனுபஸ்ஸதி; தேன ச ஸங்கா²ரஸோகு²ம்மேன அஞ்ஞங் ஸங்கா²ரஸோகு²ம்மங் உத்தரிதரங் வா பணீததரங் வா ந பத்தே²தி. இமானி கோ², பி⁴க்க²வே, சத்தாரி ஸோகு²ம்மானீ’’தி.
16. ‘‘Cattārimāni, bhikkhave, sokhummāni. Katamāni cattāri? Idha, bhikkhave, bhikkhu rūpasokhummena samannāgato hoti paramena; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na samanupassati; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na pattheti. Vedanāsokhummena samannāgato hoti paramena; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na samanupassati; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na pattheti. Saññāsokhummena samannāgato hoti paramena; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na samanupassati; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na pattheti. Saṅkhārasokhummena samannāgato hoti paramena; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na samanupassati; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na pattheti. Imāni kho, bhikkhave, cattāri sokhummānī’’ti.
‘‘ரூபஸோகு²ம்மதங் ஞத்வா, வேத³னானஞ்ச ஸம்ப⁴வங்;
‘‘Rūpasokhummataṃ ñatvā, vedanānañca sambhavaṃ;
ஸஞ்ஞா யதோ ஸமுதே³தி, அத்த²ங் க³ச்ச²தி யத்த² ச;
Saññā yato samudeti, atthaṃ gacchati yattha ca;
ஸங்கா²ரே பரதோ ஞத்வா, து³க்க²தோ நோ ச அத்ததோ.
Saṅkhāre parato ñatvā, dukkhato no ca attato.
‘‘ஸ வே ஸம்மத்³த³ஸோ பி⁴க்கு², ஸந்தோ ஸந்திபதே³ ரதோ;
‘‘Sa ve sammaddaso bhikkhu, santo santipade rato;
தா⁴ரேதி அந்திமங் தே³ஹங், ஜெத்வா மாரங் ஸவாஹினி’’ந்தி. ச²ட்ட²ங்;
Dhāreti antimaṃ dehaṃ, jetvā māraṃ savāhini’’nti. chaṭṭhaṃ;
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸோகு²ம்மஸுத்தவண்ணனா • 6. Sokhummasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸோகு²ம்மஸுத்தவண்ணனா • 6. Sokhummasuttavaṇṇanā
