| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
10. ஸோமனஸ்ஸஸுத்தவண்ணனா
10. Somanassasuttavaṇṇanā
37. த³ஸமே ஸுக²ஸோமனஸ்ஸப³ஹுலோதி எத்த² ஸுக²ந்தி காயிகங் ஸுக²ங், ஸோமனஸ்ஸந்தி சேதஸிகங். தஸ்மா யஸ்ஸ காயிகங் சேதஸிகஞ்ச ஸுக²ங் அபி⁴ண்ஹங் பவத்ததி, ஸோ ஸுக²ஸோமனஸ்ஸப³ஹுலோதி வுத்தோ. யோனீதி ‘‘சதஸ்ஸோ கோ² இமா, ஸாரிபுத்த, யோனியோ’’திஆதீ³ஸு (ம॰ நி॰ 1.152) க²ந்த⁴கொட்டா²ஸோ யோனீதி ஆக³தோ. ‘‘யோனி ஹேஸா, பூ⁴மிஜ, ப²லஸ்ஸ அதி⁴க³மாயா’’திஆதீ³ஸு (ம॰ நி॰ 3.226) காரணங்.
37. Dasame sukhasomanassabahuloti ettha sukhanti kāyikaṃ sukhaṃ, somanassanti cetasikaṃ. Tasmā yassa kāyikaṃ cetasikañca sukhaṃ abhiṇhaṃ pavattati, so sukhasomanassabahuloti vutto. Yonīti ‘‘catasso kho imā, sāriputta, yoniyo’’tiādīsu (ma. ni. 1.152) khandhakoṭṭhāso yonīti āgato. ‘‘Yoni hesā, bhūmija, phalassa adhigamāyā’’tiādīsu (ma. ni. 3.226) kāraṇaṃ.
‘‘ந சாஹங் ப்³ராஹ்மணங் ப்³ரூமி, யோனிஜங் மத்திஸம்ப⁴வ’’ந்தி ச. (ம॰ நி॰ 2.457; த⁴॰ ப॰ 396; ஸு॰ நி॰ 625);
‘‘Na cāhaṃ brāhmaṇaṃ brūmi, yonijaṃ mattisambhava’’nti ca. (ma. ni. 2.457; dha. pa. 396; su. ni. 625);
‘‘தமேனங் கம்மஜா வாதா நிப்³ப³த்தித்வா உத்³த⁴ங்பாத³ங் அதோ⁴ஸிரங் ஸம்பரிவத்தெத்வா மாது யோனிமுகே² ஸம்படிபாதெ³ந்தீ’’தி ச ஆதீ³ஸு பஸ்ஸாவமக்³கோ³. இத⁴ பன காரணங் அதி⁴ப்பேதங். அஸ்ஸாதி அனேன. ஆரத்³தா⁴தி பட்ட²பிதா பக்³க³ஹிதா பரிபுண்ணா ஸம்பாதி³தா வா.
‘‘Tamenaṃ kammajā vātā nibbattitvā uddhaṃpādaṃ adhosiraṃ samparivattetvā mātu yonimukhe sampaṭipādentī’’ti ca ādīsu passāvamaggo. Idha pana kāraṇaṃ adhippetaṃ. Assāti anena. Āraddhāti paṭṭhapitā paggahitā paripuṇṇā sampāditā vā.
ஆஸவானங் க²யாயாதி எத்த² ஆஸவந்தீதி ஆஸவா, சக்கு²தோபி…பே॰… மனதோபி ஸவந்தி பவத்தந்தீதி வுத்தங் ஹோதி. த⁴ம்மதோ யாவ கொ³த்ரபூ⁴, ஓகாஸதோ யாவ ப⁴வக்³கா³ ஸவந்தீதி வா ஆஸவா. ஏதே த⁴ம்மே ஏதஞ்ச ஓகாஸங் அந்தோ கரித்வா பவத்தந்தீதி அத்தோ². அந்தோகரணத்தோ² ஹி அயங் ஆகாரோ. சிரபாரிவாஸியட்டே²ன மதி³ராத³யோ ஆஸவா வியாதிபி ஆஸவா. லோகே ஹி சிரபாரிவாஸிகா மதி³ராத³யோ ஆஸவாதி வுச்சந்தி. யதி³ ச சிரபாரிவாஸியட்டே²ன ஆஸவா, ஏதே ஏவ ப⁴விதுங் அரஹந்தி. வுத்தங் ஹேதங் – ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸீ’’திஆதி³ (அ॰ நி॰ 10.61). ஆயதங் ஸங்ஸாரது³க்க²ங் ஸவந்தி பஸவந்தீதிபி ஆஸவா. புரிமானி செத்த² நிப்³ப³சனானி யத்த² கிலேஸா ஆஸவாதி ஆக³தா, தத்த² யுஜ்ஜந்தி; பச்சி²மங் கம்மேபி. ந கேவலஞ்ச கம்மகிலேஸா ஏவ ஆஸவா, அபிச கோ² நானப்பகாரா உபத்³த³வாபி. அபி⁴த⁴ம்மே ஹி ‘‘சத்தாரோ ஆஸவா – காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ’’தி (த⁴॰ ஸ॰ 1102) காமராகா³த³யோ கிலேஸா ஆஸவாதி ஆக³தா. ஸுத்தேபி ‘‘நாஹங், சுந்த³, தி³ட்ட²த⁴ம்மிகானங்யேவ ஆஸவானங் ஸங்வராய த⁴ம்மங் தே³ஸேமீ’’தி (தீ³॰ நி॰ 3.182) எத்த² விவாத³மூலபூ⁴தா கிலேஸா ஆஸவாதி ஆக³தா.
Āsavānaṃkhayāyāti ettha āsavantīti āsavā, cakkhutopi…pe… manatopi savanti pavattantīti vuttaṃ hoti. Dhammato yāva gotrabhū, okāsato yāva bhavaggā savantīti vā āsavā. Ete dhamme etañca okāsaṃ anto karitvā pavattantīti attho. Antokaraṇattho hi ayaṃ ākāro. Cirapārivāsiyaṭṭhena madirādayo āsavā viyātipi āsavā. Loke hi cirapārivāsikā madirādayo āsavāti vuccanti. Yadi ca cirapārivāsiyaṭṭhena āsavā, ete eva bhavituṃ arahanti. Vuttaṃ hetaṃ – ‘‘purimā, bhikkhave, koṭi na paññāyati avijjāya, ito pubbe avijjā nāhosī’’tiādi (a. ni. 10.61). Āyataṃ saṃsāradukkhaṃ savanti pasavantītipi āsavā. Purimāni cettha nibbacanāni yattha kilesā āsavāti āgatā, tattha yujjanti; pacchimaṃ kammepi. Na kevalañca kammakilesā eva āsavā, apica kho nānappakārā upaddavāpi. Abhidhamme hi ‘‘cattāro āsavā – kāmāsavo, bhavāsavo, diṭṭhāsavo, avijjāsavo’’ti (dha. sa. 1102) kāmarāgādayo kilesā āsavāti āgatā. Suttepi ‘‘nāhaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemī’’ti (dī. ni. 3.182) ettha vivādamūlabhūtā kilesā āsavāti āgatā.
‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;
‘‘Yena devūpapatyassa, gandhabbo vā vihaṅgamo;
யக்க²த்தங் யேன க³ச்செ²ய்ய, மனுஸ்ஸத்தஞ்ச அப்³ப³ஜே;
Yakkhattaṃ yena gaccheyya, manussattañca abbaje;
தே மய்ஹங், ஆஸவா கீ²ணா, வித்³த⁴ஸ்தா வினளீகதா’’தி. (அ॰ நி॰ 4.36) –
Te mayhaṃ, āsavā khīṇā, viddhastā vinaḷīkatā’’ti. (a. ni. 4.36) –
எத்த² தேபூ⁴மகங் கம்மங் அவஸேஸா ச அகுஸலா த⁴ம்மா. ‘‘தி³ட்ட²த⁴ம்மிகானங் ஆஸவானங் ஸங்வராய ஸம்பராயிகானங் ஆஸவானங் படிகா⁴தாயா’’தி (பாரா॰ 39) எத்த² பரூபகா⁴தவிப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா நானப்பகாரா உபத்³த³வா ச.
Ettha tebhūmakaṃ kammaṃ avasesā ca akusalā dhammā. ‘‘Diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti (pārā. 39) ettha parūpaghātavippaṭisāravadhabandhādayo ceva apāyadukkhabhūtā nānappakārā upaddavā ca.
தே பனேதே ஆஸவா வினயே ‘‘தி³ட்ட²த⁴ம்மிகானங் ஆஸவானங் ஸங்வராய, ஸம்பராயிகானங் ஆஸவானங் படிகா⁴தாயா’’தி த்³வேதா⁴ ஆக³தா. ஸளாயதனே ‘‘தயோமே, ஆவுஸோ, ஆஸவா – காமாஸவோ, ப⁴வாஸவோ, அவிஜ்ஜாஸவோ’’தி (ஸங்॰ நி॰ 4.321) திதா⁴ ஆக³தா. ததா² அஞ்ஞேஸு ஸுத்தந்தேஸு. அபி⁴த⁴ம்மே தேயேவ தி³ட்டா²ஸவேன ஸத்³தி⁴ங் சதுதா⁴ ஆக³தா. நிப்³பே³தி⁴கபரியாயே பன ‘‘அத்தி², பி⁴க்க²வே, ஆஸவா நிரயக³மனீயா, அத்தி² ஆஸவா திரச்சா²னயோனிக³மனீயா, அத்தி² ஆஸவா பெத்திவிஸயக³மனீயா, அத்தி² ஆஸவா மனுஸ்ஸலோகக³மனீயா, அத்தி² ஆஸவா தே³வலோகக³மனீயா’’தி (அ॰ நி॰ 6.63) பஞ்சதா⁴ ஆக³தா. கம்மமேவ செத்த² ஆஸவாதி அதி⁴ப்பேதங். ச²க்கனிபாதே ‘‘அத்தி², பி⁴க்க²வே, ஆஸவா ஸங்வரா பஹாதப்³பா³’’திஆதி³னா (அ॰ நி॰ 6.58) நயேன ச²தா⁴ ஆக³தா. ஸப்³பா³ஸவபரியாயே தேயேவ த³ஸ்ஸனபஹாதப்³பே³ஹி த⁴ம்மேஹி ஸத்³தி⁴ங் ஸத்ததா⁴ ஆக³தா. இத⁴ பன அபி⁴த⁴ம்மபரியாயேன சத்தாரோ ஆஸவா அதி⁴ப்பேதாதி வேதி³தப்³பா³.
Te panete āsavā vinaye ‘‘diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāyā’’ti dvedhā āgatā. Saḷāyatane ‘‘tayome, āvuso, āsavā – kāmāsavo, bhavāsavo, avijjāsavo’’ti (saṃ. ni. 4.321) tidhā āgatā. Tathā aññesu suttantesu. Abhidhamme teyeva diṭṭhāsavena saddhiṃ catudhā āgatā. Nibbedhikapariyāye pana ‘‘atthi, bhikkhave, āsavā nirayagamanīyā, atthi āsavā tiracchānayonigamanīyā, atthi āsavā pettivisayagamanīyā, atthi āsavā manussalokagamanīyā, atthi āsavā devalokagamanīyā’’ti (a. ni. 6.63) pañcadhā āgatā. Kammameva cettha āsavāti adhippetaṃ. Chakkanipāte ‘‘atthi, bhikkhave, āsavā saṃvarā pahātabbā’’tiādinā (a. ni. 6.58) nayena chadhā āgatā. Sabbāsavapariyāye teyeva dassanapahātabbehi dhammehi saddhiṃ sattadhā āgatā. Idha pana abhidhammapariyāyena cattāro āsavā adhippetāti veditabbā.
க²யாயாதி எத்த² பன ‘‘யோ ஆஸவானங் க²யோ வயோ பே⁴தோ³ பரிபே⁴தோ³ அனிச்சதா அந்தரதா⁴ன’’ந்தி ஆஸவானங் ஸரஸபே⁴தோ³ ஆஸவானங் க²யோதி வுத்தோ. ‘‘ஜானதோ அஹங், பி⁴க்க²வே, பஸ்ஸதோ ஆஸவானங் க²யங் வதா³மீ’’தி (ம॰ நி॰ 1.15) எத்த² ஆஸவானங் கீ²ணாகாரோ நத்தி²பா⁴வோ அச்சந்தங் அஸமுப்பாதோ³ ஆஸவக்க²யோதி வுத்தோ.
Khayāyāti ettha pana ‘‘yo āsavānaṃ khayo vayo bhedo paribhedo aniccatā antaradhāna’’nti āsavānaṃ sarasabhedo āsavānaṃ khayoti vutto. ‘‘Jānato ahaṃ, bhikkhave, passato āsavānaṃ khayaṃ vadāmī’’ti (ma. ni. 1.15) ettha āsavānaṃ khīṇākāro natthibhāvo accantaṃ asamuppādo āsavakkhayoti vutto.
‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;
‘‘Sekhassa sikkhamānassa, ujumaggānusārino;
க²யஸ்மிங் பட²மங் ஞாணங், ததோ அஞ்ஞா அனந்தரா’’தி. (இதிவு॰ 62) –
Khayasmiṃ paṭhamaṃ ñāṇaṃ, tato aññā anantarā’’ti. (itivu. 62) –
எத்த² அரியமக்³கோ³ ஆஸவக்க²யோதி வுத்தோ. ‘‘ஆஸவானங் க²யா ஸமணோ ஹோதீ’’தி (ம॰ நி॰ 1.438) எத்த² ப²லங்.
Ettha ariyamaggo āsavakkhayoti vutto. ‘‘Āsavānaṃ khayā samaṇo hotī’’ti (ma. ni. 1.438) ettha phalaṃ.
‘‘பரவஜ்ஜானுபஸ்ஸிஸ்ஸ, நிச்சங் உஜ்ஜா²னஸஞ்ஞினோ;
‘‘Paravajjānupassissa, niccaṃ ujjhānasaññino;
ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴॰ ப॰ 253) –
Āsavā tassa vaḍḍhanti, ārā so āsavakkhayā’’ti. (dha. pa. 253) –
எத்த² நிப்³பா³னங். இத⁴ பன ப²லங் ஸந்தா⁴ய ‘‘ஆஸவானங் க²யாயா’’தி வுத்தங், அரஹத்தப²லத்தா²யாதி அத்தோ².
Ettha nibbānaṃ. Idha pana phalaṃ sandhāya ‘‘āsavānaṃ khayāyā’’ti vuttaṃ, arahattaphalatthāyāti attho.
ஸங்வேஜனீயேஸு டா²னேஸூதி ஸங்வேக³ஜனகேஸு ஜாதிஆதீ³ஸு ஸங்வேக³வத்தூ²ஸு. ஜாதி, ஜரா, ப்³யாதி⁴, மரணங், அபாயது³க்க²ங், அதீதே வட்டமூலகங் து³க்க²ங், அனாக³தே வட்டமூலகங் து³க்க²ங் , பச்சுப்பன்னே ஆஹாரபரியெட்டி²மூலகங் து³க்க²ந்தி இமானி ஹி ஸங்வேக³வத்தூ²னி ஸங்வேஜனீயட்டா²னானி நாம. அபிச ‘‘ஆதி³த்தோ லோகஸன்னிவாஸோ உய்யுத்தோ பயாதோ கும்மக்³க³ப்படிபன்னோ, உபனீயதி லோகோ அத்³து⁴வோ, அதாணோ லோகோ அனபி⁴ஸ்ஸரோ, அஸ்ஸகோ லோகோ, ஸப்³ப³ங் பஹாய க³மனீயங், ஊனோ லோகோ அதித்தோ தண்ஹாதா³ஸோ’’திஏவமாதீ³னி (படி॰ ம॰ 1.117) செத்த² ஸங்வேஜனீயட்டா²னானீதி வேதி³தப்³பா³னி. ஸங்வேஜனேனாதி ஜாதிஆதி³ஸங்வேக³வத்தூ²னி படிச்ச உப்பன்னப⁴யஸங்கா²தேன ஸங்வேஜனேன. அத்த²தோ பன ஸஹொத்தப்பஞாணங் ஸங்வேகோ³ நாம.
Saṃvejanīyesu ṭhānesūti saṃvegajanakesu jātiādīsu saṃvegavatthūsu. Jāti, jarā, byādhi, maraṇaṃ, apāyadukkhaṃ, atīte vaṭṭamūlakaṃ dukkhaṃ, anāgate vaṭṭamūlakaṃ dukkhaṃ , paccuppanne āhārapariyeṭṭhimūlakaṃ dukkhanti imāni hi saṃvegavatthūni saṃvejanīyaṭṭhānāni nāma. Apica ‘‘āditto lokasannivāso uyyutto payāto kummaggappaṭipanno, upanīyati loko addhuvo, atāṇo loko anabhissaro, assako loko, sabbaṃ pahāya gamanīyaṃ, ūno loko atitto taṇhādāso’’tievamādīni (paṭi. ma. 1.117) cettha saṃvejanīyaṭṭhānānīti veditabbāni. Saṃvejanenāti jātiādisaṃvegavatthūni paṭicca uppannabhayasaṅkhātena saṃvejanena. Atthato pana sahottappañāṇaṃ saṃvego nāma.
ஸங்விக்³க³ஸ்ஸாதி க³ப்³போ⁴க்கந்திகாதி³வஸேன அனேகவிதே⁴ஹி ஜாதிஆதி³து³க்கே²ஹி ஸங்வேக³ஜாதஸ்ஸ. ‘‘ஸங்வேஜித்வா’’தி ச பட²ந்தி. யோனிஸோ பதா⁴னேனாதி உபாயபதா⁴னேன, ஸம்மாவாயாமேனாதி அத்தோ². ஸோ ஹி யதா² அகுஸலா த⁴ம்மா பஹீயந்தி, குஸலா த⁴ம்மா பா⁴வனாபாரிபூரிங் க³ச்ச²ந்தி, ஏவங் பத³ஹனதோ உத்தமபா⁴வஸாத⁴னதோ ச ‘‘பதா⁴ன’’ந்தி வுச்சதி. தத்த² ஸங்வேகே³ன ப⁴வாதீ³ஸு கிஞ்சி தாணங் லேணங் படிஸரணங் அபஸ்ஸந்தோ தத்த² அனோலீயந்தோ அலக்³க³மானஸோ தப்படிபக்கே²ன ச வினிவத்திதவிஸஞ்ஞிதோ அஞ்ஞத³த்து² நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ. ஸோ கல்யாணமித்தஸன்னிஸ்ஸயேன யோனிஸோமனஸிகாரப³ஹுலோ விஸுத்³தா⁴ஸயப்பயோகோ³ ஸமத²விபஸ்ஸனாஸு யுத்தப்பயுத்தோ ஸப்³ப³ஸ்மிம்பி ஸங்கா²ரக³தே நிப்³பி³ந்த³தி விரஜ்ஜதி, விபஸ்ஸனங் உஸ்ஸுக்காபேதி. தத்த² யதி³த³ங் யோனிஸோமனஸிகாரப³ஹுலோ விஸுத்³தா⁴ஸயப்பயோகோ³ ஸமத²விபஸ்ஸனாஸு யுத்தப்பயுத்தோ, தேனஸ்ஸ தி³ட்டே²வ த⁴ம்மே ஸுக²ஸோமனஸ்ஸப³ஹுலதா வேதி³தப்³பா³. யங் பனாயங் ஸமதே² பதிட்டி²தோ விபஸ்ஸனாய யுத்தப்பயுத்தோ ஸப்³ப³ஸ்மிம்பி ஸங்கா²ரக³தே நிப்³பி³ந்த³தி விரஜ்ஜதி, விபஸ்ஸனங் உஸ்ஸுக்காபேதி, தேனஸ்ஸ யோனி ஆரத்³தா⁴ ஆஸவானங் க²யாயாதி வேதி³தப்³ப³ங்.
Saṃviggassāti gabbhokkantikādivasena anekavidhehi jātiādidukkhehi saṃvegajātassa. ‘‘Saṃvejitvā’’ti ca paṭhanti. Yoniso padhānenāti upāyapadhānena, sammāvāyāmenāti attho. So hi yathā akusalā dhammā pahīyanti, kusalā dhammā bhāvanāpāripūriṃ gacchanti, evaṃ padahanato uttamabhāvasādhanato ca ‘‘padhāna’’nti vuccati. Tattha saṃvegena bhavādīsu kiñci tāṇaṃ leṇaṃ paṭisaraṇaṃ apassanto tattha anolīyanto alaggamānaso tappaṭipakkhena ca vinivattitavisaññito aññadatthu nibbānaninno hoti nibbānapoṇo nibbānapabbhāro. So kalyāṇamittasannissayena yonisomanasikārabahulo visuddhāsayappayogo samathavipassanāsu yuttappayutto sabbasmimpi saṅkhāragate nibbindati virajjati, vipassanaṃ ussukkāpeti. Tattha yadidaṃ yonisomanasikārabahulo visuddhāsayappayogo samathavipassanāsu yuttappayutto, tenassa diṭṭheva dhamme sukhasomanassabahulatā veditabbā. Yaṃ panāyaṃ samathe patiṭṭhito vipassanāya yuttappayutto sabbasmimpi saṅkhāragate nibbindati virajjati, vipassanaṃ ussukkāpeti, tenassa yoni āraddhā āsavānaṃ khayāyāti veditabbaṃ.
கா³தா²ஸு ஸங்விஜ்ஜேதே²வாதி ஸங்விஜ்ஜெய்ய ஏவ ஸங்வேக³ங் கரெய்ய ஏவ. ‘‘ஸங்விஜ்ஜித்வானா’’தி ச பட²ந்தி. வுத்தனயேன ஸங்விக்³கோ³ ஹுத்வாதி அத்தோ². பண்டி³தோதி ஸப்பஞ்ஞோ, திஹேதுகபடிஸந்தீ⁴தி வுத்தங் ஹோதி. பஞ்ஞாய ஸமவெக்கி²யாதி ஸங்வேக³வத்தூ²னி ஸங்விஜ்ஜனவஸேன பஞ்ஞாய ஸம்மா அவெக்கி²ய. அத² வா பஞ்ஞாய ஸம்மா அவெக்கி²த்வாதி. ஸேஸங் ஸப்³ப³த்த² உத்தானத்த²மேவ.
Gāthāsu saṃvijjethevāti saṃvijjeyya eva saṃvegaṃ kareyya eva. ‘‘Saṃvijjitvānā’’ti ca paṭhanti. Vuttanayena saṃviggo hutvāti attho. Paṇḍitoti sappañño, tihetukapaṭisandhīti vuttaṃ hoti. Paññāya samavekkhiyāti saṃvegavatthūni saṃvijjanavasena paññāya sammā avekkhiya. Atha vā paññāya sammā avekkhitvāti. Sesaṃ sabbattha uttānatthameva.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
இதி பரமத்த²தீ³பனியா இதிவுத்தக-அட்ட²கதா²ய
Iti paramatthadīpaniyā itivuttaka-aṭṭhakathāya
து³கனிபாதே பட²மவக்³க³வண்ணனா நிட்டி²தா.
Dukanipāte paṭhamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 10. ஸோமனஸ்ஸஸுத்தங் • 10. Somanassasuttaṃ
