| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. து³தியபண்ணாஸகங்
2. Dutiyapaṇṇāsakaṃ
6. மஹாவக்³கோ³
6. Mahāvaggo
1. ஸோணஸுத்தங்
1. Soṇasuttaṃ
55. 1 ஏவங் , மே ஸுதங் – ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. தேன கோ² பன ஸமயேன ஆயஸ்மா ஸோணோ ராஜக³ஹே விஹரதி ஸீதவனஸ்மிங். அத² கோ² ஆயஸ்மதோ ஸோணஸ்ஸ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘யே கோ² கேசி ப⁴க³வதோ ஸாவகா ஆரத்³த⁴வீரியா விஹரந்தி, அஹங் தேஸங் அஞ்ஞதரோ. அத² ச பன மே ந அனுபாதா³ய ஆஸவேஹி சித்தங் விமுச்சதி, ஸங்விஜ்ஜந்தி கோ² பன மே குலே போ⁴கா³, ஸக்கா போ⁴கா³ ச பு⁴ஞ்ஜிதுங் புஞ்ஞானி ச காதுங். யங்னூனாஹங் ஸிக்க²ங் பச்சக்கா²ய ஹீனாயாவத்தித்வா போ⁴கே³ ச பு⁴ஞ்ஜெய்யங் புஞ்ஞானி ச கரெய்ய’’ந்தி.
55.2 Evaṃ , me sutaṃ – ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmā soṇo rājagahe viharati sītavanasmiṃ. Atha kho āyasmato soṇassa rahogatassa paṭisallīnassa evaṃ cetaso parivitakko udapādi – ‘‘ye kho keci bhagavato sāvakā āraddhavīriyā viharanti, ahaṃ tesaṃ aññataro. Atha ca pana me na anupādāya āsavehi cittaṃ vimuccati, saṃvijjanti kho pana me kule bhogā, sakkā bhogā ca bhuñjituṃ puññāni ca kātuṃ. Yaṃnūnāhaṃ sikkhaṃ paccakkhāya hīnāyāvattitvā bhoge ca bhuñjeyyaṃ puññāni ca kareyya’’nti.
அத² கோ² ப⁴க³வா ஆயஸ்மதோ ஸோணஸ்ஸ சேதஸா சேதோபரிவிதக்கமஞ்ஞாய – ஸெய்யதா²பி நாம ப³லவா புரிஸோ ஸம்மிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸம்மிஞ்ஜெய்ய, ஏவமேவங் கோ² – கி³ஜ்ஜ²கூடே பப்³ப³தே அந்தரஹிதோ ஸீதவனே ஆயஸ்மதோ ஸோணஸ்ஸ ஸம்முகே² பாதுரஹோஸி. நிஸீதி³ ப⁴க³வா பஞ்ஞத்தே ஆஸனே. ஆயஸ்மாபி கோ² ஸோணோ ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஸோணங் ப⁴க³வா ஏதத³வோச –
Atha kho bhagavā āyasmato soṇassa cetasā cetoparivitakkamaññāya – seyyathāpi nāma balavā puriso sammiñjitaṃ vā bāhaṃ pasāreyya, pasāritaṃ vā bāhaṃ sammiñjeyya, evamevaṃ kho – gijjhakūṭe pabbate antarahito sītavane āyasmato soṇassa sammukhe pāturahosi. Nisīdi bhagavā paññatte āsane. Āyasmāpi kho soṇo bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ soṇaṃ bhagavā etadavoca –
‘‘நனு தே, ஸோண, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘யே கோ² கேசி ப⁴க³வதோ ஸாவகா ஆரத்³த⁴வீரியா விஹரந்தி, அஹங் தேஸங் அஞ்ஞதரோ. அத² ச பன மே ந அனுபாதா³ய ஆஸவேஹி சித்தங் விமுச்சதி, ஸங்விஜ்ஜந்தி கோ² பன மே குலே போ⁴கா³, ஸக்கா போ⁴கா³ 3 ச பு⁴ஞ்ஜிதுங் புஞ்ஞானி ச காதுங். யங்னூனாஹங் ஸிக்க²ங் பச்சக்கா²ய ஹீனாயாவத்தித்வா போ⁴கே³ ச பு⁴ஞ்ஜெய்யங் புஞ்ஞானி ச கரெய்ய’’’ந்தி? ‘‘ஏவங், ப⁴ந்தே’’.
‘‘Nanu te, soṇa, rahogatassa paṭisallīnassa evaṃ cetaso parivitakko udapādi – ‘ye kho keci bhagavato sāvakā āraddhavīriyā viharanti, ahaṃ tesaṃ aññataro. Atha ca pana me na anupādāya āsavehi cittaṃ vimuccati, saṃvijjanti kho pana me kule bhogā, sakkā bhogā 4 ca bhuñjituṃ puññāni ca kātuṃ. Yaṃnūnāhaṃ sikkhaṃ paccakkhāya hīnāyāvattitvā bhoge ca bhuñjeyyaṃ puññāni ca kareyya’’’nti? ‘‘Evaṃ, bhante’’.
‘‘தங் கிங் மஞ்ஞஸி, ஸோண, குஸலோ த்வங் புப்³பே³ அகா³ரியபூ⁴தோ 5 வீணாய தந்திஸ்ஸரே’’தி? ‘‘ஏவங், ப⁴ந்தே’’. ‘‘தங் கிங் மஞ்ஞஸி, ஸோண, யதா³ தே வீணாய தந்தியோ அச்சாயதா ஹொந்தி, அபி நு தே வீணா தஸ்மிங் ஸமயே ஸரவதீ வா ஹோதி கம்மஞ்ஞா வா’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, soṇa, kusalo tvaṃ pubbe agāriyabhūto 6 vīṇāya tantissare’’ti? ‘‘Evaṃ, bhante’’. ‘‘Taṃ kiṃ maññasi, soṇa, yadā te vīṇāya tantiyo accāyatā honti, api nu te vīṇā tasmiṃ samaye saravatī vā hoti kammaññā vā’’ti? ‘‘No hetaṃ, bhante’’.
‘‘தங் கிங் மஞ்ஞஸி, ஸோண, யதா³ தே வீணாய தந்தியோ அதிஸிதி²லா ஹொந்தி, அபி நு தே வீணா தஸ்மிங் ஸமயே ஸரவதீ வா ஹோதி கம்மஞ்ஞா வா’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, soṇa, yadā te vīṇāya tantiyo atisithilā honti, api nu te vīṇā tasmiṃ samaye saravatī vā hoti kammaññā vā’’ti? ‘‘No hetaṃ, bhante’’.
‘‘யதா³ பன தே, ஸோண, வீணாய தந்தியோ ந அச்சாயதா ஹொந்தி நாதிஸிதி²லா ஸமே கு³ணே பதிட்டி²தா, அபி நு தே வீணா தஸ்மிங் ஸமயே ஸரவதீ வா ஹோதி கம்மஞ்ஞா வா’’தி? ‘‘ஏவங், ப⁴ந்தே’’.
‘‘Yadā pana te, soṇa, vīṇāya tantiyo na accāyatā honti nātisithilā same guṇe patiṭṭhitā, api nu te vīṇā tasmiṃ samaye saravatī vā hoti kammaññā vā’’ti? ‘‘Evaṃ, bhante’’.
‘‘ஏவமேவங் கோ², ஸோண, அச்சாரத்³த⁴வீரியங் உத்³த⁴ச்சாய ஸங்வத்ததி, அதிஸிதி²லவீரியங் கோஸஜ்ஜாய ஸங்வத்ததி. தஸ்மாதிஹ த்வங், ஸோண, வீரியஸமத²ங் அதி⁴ட்ட²ஹங், இந்த்³ரியானஞ்ச ஸமதங் படிவிஜ்ஜ², தத்த² ச நிமித்தங் க³ண்ஹாஹீ’’தி. ‘‘ஏவங், ப⁴ந்தே’’தி கோ² ஆயஸ்மா ஸோணோ ப⁴க³வதோ பச்சஸ்ஸோஸி. அத² கோ² ப⁴க³வா ஆயஸ்மந்தங் ஸோணங் இமினா ஓவாதே³ன ஓவதி³த்வா – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவங் கோ² – ஸீதவனே அந்தரஹிதோ கி³ஜ்ஜ²கூடே பப்³ப³தே பாதுரஹோஸி.
‘‘Evamevaṃ kho, soṇa, accāraddhavīriyaṃ uddhaccāya saṃvattati, atisithilavīriyaṃ kosajjāya saṃvattati. Tasmātiha tvaṃ, soṇa, vīriyasamathaṃ adhiṭṭhahaṃ, indriyānañca samataṃ paṭivijjha, tattha ca nimittaṃ gaṇhāhī’’ti. ‘‘Evaṃ, bhante’’ti kho āyasmā soṇo bhagavato paccassosi. Atha kho bhagavā āyasmantaṃ soṇaṃ iminā ovādena ovaditvā – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ kho – sītavane antarahito gijjhakūṭe pabbate pāturahosi.
அத² கோ² ஆயஸ்மா ஸோணோ அபரேன ஸமயேன வீரியஸமத²ங் அதி⁴ட்டா²ஸி, இந்த்³ரியானஞ்ச ஸமதங் படிவிஜ்ஜி², தத்த² ச நிமித்தங் அக்³க³ஹேஸி. அத² கோ² ஆயஸ்மா ஸோணோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனாகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா ஸோணோ அரஹதங் அஹோஸி.
Atha kho āyasmā soṇo aparena samayena vīriyasamathaṃ adhiṭṭhāsi, indriyānañca samataṃ paṭivijjhi, tattha ca nimittaṃ aggahesi. Atha kho āyasmā soṇo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anāgāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā soṇo arahataṃ ahosi.
அத² கோ² ஆயஸ்மதோ ஸோணஸ்ஸ அரஹத்தப்பத்தஸ்ஸ ஏதத³ஹோஸி – ‘‘யங்னூனாஹங் யேன ப⁴க³வா தேனுபஸங்கமெய்யங்; உபஸங்கமித்வா ப⁴க³வதோ ஸந்திகே அஞ்ஞங் ப்³யாகரெய்ய’’ந்தி. அத² கோ² ஆயஸ்மா ஸோணோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸோணோ ப⁴க³வந்தங் ஏதத³வோச –
Atha kho āyasmato soṇassa arahattappattassa etadahosi – ‘‘yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike aññaṃ byākareyya’’nti. Atha kho āyasmā soṇo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā soṇo bhagavantaṃ etadavoca –
‘‘யோ ஸோ, ப⁴ந்தே, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, ஸோ ச² டா²னானி அதி⁴முத்தோ ஹோதி – நெக்க²ம்மாதி⁴முத்தோ ஹோதி, பவிவேகாதி⁴முத்தோ ஹோதி, அப்³யாபஜ்ஜாதி⁴முத்தோ 7 ஹோதி, தண்ஹாக்க²யாதி⁴முத்தோ ஹோதி, உபாதா³னக்க²யாதி⁴முத்தோ ஹோதி, அஸம்மோஹாதி⁴முத்தோ ஹோதி.
‘‘Yo so, bhante, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto, so cha ṭhānāni adhimutto hoti – nekkhammādhimutto hoti, pavivekādhimutto hoti, abyāpajjādhimutto 8 hoti, taṇhākkhayādhimutto hoti, upādānakkhayādhimutto hoti, asammohādhimutto hoti.
‘‘ஸியா கோ² பன, ப⁴ந்தே, இதே⁴கச்சஸ்ஸ ஆயஸ்மதோ ஏவமஸ்ஸ – ‘கேவலங்ஸத்³தா⁴மத்தகங் நூன அயமாயஸ்மா நிஸ்ஸாய நெக்க²ம்மாதி⁴முத்தோ’தி . ந கோ² பனேதங், ப⁴ந்தே, ஏவங் த³ட்ட²ப்³ப³ங். கீ²ணாஸவோ, ப⁴ந்தே, பி⁴க்கு² வுஸிதவா கதகரணீயோ கரணீயங் அத்தனோ அஸமனுபஸ்ஸந்தோ கதஸ்ஸ வா படிசயங் க²யா ராக³ஸ்ஸ வீதராக³த்தா நெக்க²ம்மாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா நெக்க²ம்மாதி⁴முத்தோ ஹோதி, க²யா மோஹஸ்ஸ வீதமோஹத்தா நெக்க²ம்மாதி⁴முத்தோ ஹோதி.
‘‘Siyā kho pana, bhante, idhekaccassa āyasmato evamassa – ‘kevalaṃsaddhāmattakaṃ nūna ayamāyasmā nissāya nekkhammādhimutto’ti . Na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu vusitavā katakaraṇīyo karaṇīyaṃ attano asamanupassanto katassa vā paṭicayaṃ khayā rāgassa vītarāgattā nekkhammādhimutto hoti, khayā dosassa vītadosattā nekkhammādhimutto hoti, khayā mohassa vītamohattā nekkhammādhimutto hoti.
‘‘ஸியா கோ² பன, ப⁴ந்தே, இதே⁴கச்சஸ்ஸ ஆயஸ்மதோ ஏவமஸ்ஸ – ‘லாப⁴ஸக்காரஸிலோகங் நூன அயமாயஸ்மா நிகாமயமானோ பவிவேகாதி⁴முத்தோ’தி. ந கோ² பனேதங், ப⁴ந்தே, ஏவங் த³ட்ட²ப்³ப³ங். கீ²ணாஸவோ, ப⁴ந்தே, பி⁴க்கு² வுஸிதவா கதகரணீயோ கரணீயங் அத்தனோ அஸமனுபஸ்ஸந்தோ கதஸ்ஸ வா படிசயங் க²யா ராக³ஸ்ஸ வீதராக³த்தா பவிவேகாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா பவிவேகாதி⁴முத்தோ ஹோதி, க²யா மோஹஸ்ஸ வீதமோஹத்தா பவிவேகாதி⁴முத்தோ ஹோதி.
‘‘Siyā kho pana, bhante, idhekaccassa āyasmato evamassa – ‘lābhasakkārasilokaṃ nūna ayamāyasmā nikāmayamāno pavivekādhimutto’ti. Na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu vusitavā katakaraṇīyo karaṇīyaṃ attano asamanupassanto katassa vā paṭicayaṃ khayā rāgassa vītarāgattā pavivekādhimutto hoti, khayā dosassa vītadosattā pavivekādhimutto hoti, khayā mohassa vītamohattā pavivekādhimutto hoti.
‘‘ஸியா கோ² பன, ப⁴ந்தே, இதே⁴கச்சஸ்ஸ ஆயஸ்மதோ ஏவமஸ்ஸ – ‘ஸீலப்³ப³தபராமாஸங் நூன அயமாயஸ்மா ஸாரதோ பச்சாக³ச்ச²ந்தோ அப்³யாபஜ்ஜாதி⁴முத்தோ’தி. ந கோ² பனேதங், ப⁴ந்தே, ஏவங் த³ட்ட²ப்³ப³ங். கீ²ணாஸவோ, ப⁴ந்தே, பி⁴க்கு² வுஸிதவா கதகரணீயோ கரணீயங் அத்தனோ அஸமனுபஸ்ஸந்தோ கதஸ்ஸ வா படிசயங் க²யா ராக³ஸ்ஸ வீதராக³த்தா அப்³யாபஜ்ஜாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா அப்³யாபஜ்ஜாதி⁴முத்தோ ஹோதி, க²யா மோஹஸ்ஸ வீதமோஹத்தா அப்³யாபஜ்ஜாதி⁴முத்தோ ஹோதி.
‘‘Siyā kho pana, bhante, idhekaccassa āyasmato evamassa – ‘sīlabbataparāmāsaṃ nūna ayamāyasmā sārato paccāgacchanto abyāpajjādhimutto’ti. Na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu vusitavā katakaraṇīyo karaṇīyaṃ attano asamanupassanto katassa vā paṭicayaṃ khayā rāgassa vītarāgattā abyāpajjādhimutto hoti, khayā dosassa vītadosattā abyāpajjādhimutto hoti, khayā mohassa vītamohattā abyāpajjādhimutto hoti.
‘‘க²யா ராக³ஸ்ஸ வீதராக³த்தா தண்ஹாக்க²யாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா தண்ஹாக்க²யாதி⁴முத்தோ ஹோதி, க²யா மோஹஸ்ஸ வீதமோஹத்தா தண்ஹாக்க²யாதி⁴முத்தோ ஹோதி.
‘‘Khayā rāgassa vītarāgattā taṇhākkhayādhimutto hoti, khayā dosassa vītadosattā taṇhākkhayādhimutto hoti, khayā mohassa vītamohattā taṇhākkhayādhimutto hoti.
‘‘க²யா ராக³ஸ்ஸ வீதராக³த்தா உபாதா³னக்க²யாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா உபாதா³னக்க²யாதி⁴முத்தோ ஹோதி, க²யா மோஹஸ்ஸ வீதமோஹத்தா உபாதா³னக்க²யாதி⁴முத்தோ ஹோதி.
‘‘Khayā rāgassa vītarāgattā upādānakkhayādhimutto hoti, khayā dosassa vītadosattā upādānakkhayādhimutto hoti, khayā mohassa vītamohattā upādānakkhayādhimutto hoti.
‘‘க²யா ராக³ஸ்ஸ வீதராக³த்தா அஸம்மோஹாதி⁴முத்தோ ஹோதி, க²யா தோ³ஸஸ்ஸ வீததோ³ஸத்தா அஸம்மோஹாதி⁴முத்தோ ஹோதி, க²யா மோஹஸ்ஸ வீதமோஹத்தா அஸம்மோஹாதி⁴முத்தோ ஹோதி.
‘‘Khayā rāgassa vītarāgattā asammohādhimutto hoti, khayā dosassa vītadosattā asammohādhimutto hoti, khayā mohassa vītamohattā asammohādhimutto hoti.
‘‘ஏவங் ஸம்மா விமுத்தசித்தஸ்ஸ, ப⁴ந்தே, பி⁴க்கு²னோ பு⁴ஸா சேபி சக்கு²விஞ்ஞெய்யா ரூபா சக்கு²ஸ்ஸ ஆபாத²ங் 9 ஆக³ச்ச²ந்தி, நேவஸ்ஸ சித்தங் பரியாதி³யந்தி. அமிஸ்ஸீகதமேவஸ்ஸ சித்தங் ஹோதி டி²தங் ஆனேஞ்ஜப்பத்தங் வயஞ்சஸ்ஸானுபஸ்ஸதி . பு⁴ஸா சேபி ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³… மனோவிஞ்ஞெய்யா த⁴ம்மா மனஸ்ஸ ஆபாத²ங் ஆக³ச்ச²ந்தி, நேவஸ்ஸ சித்தங் பரியாதி³யந்தி. அமிஸ்ஸீகதமேவஸ்ஸ சித்தங் ஹோதி டி²தங் ஆனேஞ்ஜப்பத்தங் வயஞ்சஸ்ஸானுபஸ்ஸதி. ஸெய்யதா²பி, ப⁴ந்தே, ஸேலோ பப்³ப³தோ அச்சி²த்³தோ³ அஸுஸிரோ ஏகக்³க⁴னோ. அத² புரத்தி²மாய சேபி தி³ஸாய ஆக³ச்செ²ய்ய பு⁴ஸா வாதவுட்டி² நேவ நங் ஸங்கம்பெய்ய ந ஸம்பகம்பெய்ய ந ஸம்பவேதெ⁴ய்ய, அத² பச்சி²மாய சேபி தி³ஸாய ஆக³ச்செ²ய்ய பு⁴ஸா வாதவுட்டி²…பே॰… அத² உத்தராய சேபி தி³ஸாய ஆக³ச்செ²ய்ய பு⁴ஸா வாதவுட்டி²… அத² த³க்கி²ணாய சேபி தி³ஸாய ஆக³ச்செ²ய்ய பு⁴ஸா வாதவுட்டி² நேவ நங் ஸங்கம்பெய்ய ந ஸம்பகம்பெய்ய ந ஸம்பவேதெ⁴ய்ய; ஏவமேவங் கோ², ப⁴ந்தே, ஏவங் ஸம்மாவிமுத்தசித்தஸ்ஸ பி⁴க்கு²னோ பு⁴ஸா சேபி சக்கு²விஞ்ஞெய்யா ரூபா சக்கு²ஸ்ஸ ஆபாத²ங் ஆக³ச்ச²ந்தி, நேவஸ்ஸ சித்தங் பரியாதி³யந்தி. அமிஸ்ஸீகதமேவஸ்ஸ சித்தங் ஹோதி டி²தங் ஆனேஞ்ஜப்பத்தங் வயஞ்சஸ்ஸானுபஸ்ஸதி. பு⁴ஸா சேபி ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³… மனோவிஞ்ஞெய்யா த⁴ம்மா மனஸ்ஸ ஆபாத²ங் ஆக³ச்ச²ந்தி, நேவஸ்ஸ சித்தங் பரியாதி³யந்தி. அமிஸ்ஸீகதமேவஸ்ஸ சித்தங் ஹோதி டி²தங் ஆனேஞ்ஜப்பத்தங் வயஞ்சஸ்ஸானுபஸ்ஸதீ’’தி.
‘‘Evaṃ sammā vimuttacittassa, bhante, bhikkhuno bhusā cepi cakkhuviññeyyā rūpā cakkhussa āpāthaṃ 10 āgacchanti, nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ vayañcassānupassati . Bhusā cepi sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā manassa āpāthaṃ āgacchanti, nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ vayañcassānupassati. Seyyathāpi, bhante, selo pabbato acchiddo asusiro ekagghano. Atha puratthimāya cepi disāya āgaccheyya bhusā vātavuṭṭhi neva naṃ saṅkampeyya na sampakampeyya na sampavedheyya, atha pacchimāya cepi disāya āgaccheyya bhusā vātavuṭṭhi…pe… atha uttarāya cepi disāya āgaccheyya bhusā vātavuṭṭhi… atha dakkhiṇāya cepi disāya āgaccheyya bhusā vātavuṭṭhi neva naṃ saṅkampeyya na sampakampeyya na sampavedheyya; evamevaṃ kho, bhante, evaṃ sammāvimuttacittassa bhikkhuno bhusā cepi cakkhuviññeyyā rūpā cakkhussa āpāthaṃ āgacchanti, nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ vayañcassānupassati. Bhusā cepi sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā manassa āpāthaṃ āgacchanti, nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ vayañcassānupassatī’’ti.
‘‘நெக்க²ம்மங் அதி⁴முத்தஸ்ஸ, பவிவேகஞ்ச சேதஸோ;
‘‘Nekkhammaṃ adhimuttassa, pavivekañca cetaso;
அப்³யாபஜ்ஜாதி⁴முத்தஸ்ஸ, உபாதா³னக்க²யஸ்ஸ ச.
Abyāpajjādhimuttassa, upādānakkhayassa ca.
‘‘தண்ஹாக்க²யாதி⁴முத்தஸ்ஸ , அஸம்மோஹஞ்ச சேதஸோ;
‘‘Taṇhākkhayādhimuttassa , asammohañca cetaso;
தி³ஸ்வா ஆயதனுப்பாத³ங், ஸம்மா சித்தங் விமுச்சதி.
Disvā āyatanuppādaṃ, sammā cittaṃ vimuccati.
‘‘தஸ்ஸ ஸம்மா விமுத்தஸ்ஸ, ஸந்தசித்தஸ்ஸ பி⁴க்கு²னோ;
‘‘Tassa sammā vimuttassa, santacittassa bhikkhuno;
கதஸ்ஸ படிசயோ நத்தி², கரணீயங் ந விஜ்ஜதி.
Katassa paṭicayo natthi, karaṇīyaṃ na vijjati.
‘‘ஸேலோ யதா² ஏகக்³க⁴னோ, வாதேன ந ஸமீரதி;
‘‘Selo yathā ekagghano, vātena na samīrati;
ஏவங் ரூபா ரஸா ஸத்³தா³, க³ந்தா⁴ ப²ஸ்ஸா ச கேவலா.
Evaṃ rūpā rasā saddā, gandhā phassā ca kevalā.
‘‘இட்டா² த⁴ம்மா அனிட்டா² ச, நப்பவேதெ⁴ந்தி தாதி³னோ;
‘‘Iṭṭhā dhammā aniṭṭhā ca, nappavedhenti tādino;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸோணஸுத்தவண்ணனா • 1. Soṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ஸோணஸுத்தவண்ணனா • 1. Soṇasuttavaṇṇanā
