| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
6. ஸோணஸுத்தவண்ணனா
6. Soṇasuttavaṇṇanā
46. ச²ட்டே² அவந்தீஸூதி அவந்திரட்டே². குரரக⁴ரேதி ஏவங்னாமகே நக³ரே. பவத்தே பப்³ப³தேதி பவத்தனாமகே பப்³ப³தே. ‘‘பபாதே பப்³ப³தே’’திபி பட²ந்தி. ஸோணோ உபாஸகோ குடிகண்ணோதி நாமேன ஸோணோ நாம, தீஹி ஸரணக³மனேஹி உபாஸகபா⁴வப்படிவேத³னேன உபாஸகோ, கோடிஅக்³க⁴னகஸ்ஸ கண்ணபிளந்த⁴னஸ்ஸ தா⁴ரணேன ‘‘கோடிகண்ணோ’’தி வத்தப்³பே³ ‘‘குடிகண்ணோ’’தி ஏவங் அபி⁴ஞ்ஞாதோ, ந ஸுகு²மாலஸோணோதி அதி⁴ப்பாயோ . அயஞ்ஹி ஆயஸ்மதோ மஹாகச்சாயனஸ்ஸ ஸந்திகே த⁴ம்மங் ஸுத்வா ஸாஸனே அபி⁴ப்பஸன்னோ, ஸரணேஸு ச ஸீலேஸு ச பதிட்டி²தோ பவத்தே பப்³ப³தே சா²யூத³கஸம்பன்னே டா²னே விஹாரங் காரெத்வா தே²ரங் தத்த² வஸாபெத்வா சதூஹி பச்சயேஹி உபட்டா²தி. தேன வுத்தங் – ‘‘ஆயஸ்மதோ மஹாகச்சானஸ்ஸ உபட்டா²கோ ஹோதீ’’தி.
46. Chaṭṭhe avantīsūti avantiraṭṭhe. Kuraraghareti evaṃnāmake nagare. Pavatte pabbateti pavattanāmake pabbate. ‘‘Papāte pabbate’’tipi paṭhanti. Soṇo upāsako kuṭikaṇṇoti nāmena soṇo nāma, tīhi saraṇagamanehi upāsakabhāvappaṭivedanena upāsako, koṭiagghanakassa kaṇṇapiḷandhanassa dhāraṇena ‘‘koṭikaṇṇo’’ti vattabbe ‘‘kuṭikaṇṇo’’ti evaṃ abhiññāto, na sukhumālasoṇoti adhippāyo . Ayañhi āyasmato mahākaccāyanassa santike dhammaṃ sutvā sāsane abhippasanno, saraṇesu ca sīlesu ca patiṭṭhito pavatte pabbate chāyūdakasampanne ṭhāne vihāraṃ kāretvā theraṃ tattha vasāpetvā catūhi paccayehi upaṭṭhāti. Tena vuttaṃ – ‘‘āyasmato mahākaccānassa upaṭṭhāko hotī’’ti.
ஸோ காலேன காலங் தே²ரஸ்ஸ உபட்டா²னங் க³ச்ச²தி. தே²ரோ சஸ்ஸ த⁴ம்மங் தே³ஸேதி. தேன ஸங்வேக³ப³ஹுலோ த⁴ம்மசரியாய உஸ்ஸாஹஜாதோ விஹரதி. ஸோ ஏகதா³ ஸத்தே²ன ஸத்³தி⁴ங் வாணிஜ்ஜத்தா²ய உஜ்ஜேனிங் க³ச்ச²ந்தோ அந்தராமக்³கே³ அடவியங் ஸத்தே² நிவிட்டே² ரத்தியங் ஜனஸம்பா³த⁴ப⁴யேன ஏகமந்தங் அபக்கம்ம நித்³த³ங் உபக³ஞ்சி². ஸத்தோ² பச்சூஸவேலாயங் உட்டா²ய க³தோ, ந ஏகோபி ஸோணங் பபோ³தே⁴ஸி, ஸப்³பே³பி விஸரித்வா அக³மங்ஸு. ஸோ பபா⁴தாய ரத்தியா பபு³ஜ்ஜி²த்வா உட்டா²ய கஞ்சி அபஸ்ஸந்தோ ஸத்தே²னேவ க³தமக்³க³ங் க³ஹெத்வா ஸீக⁴ங் ஸீக⁴ங் க³ச்ச²ந்தோ ஏகங் வடருக்க²ங் உபக³ஞ்சி². தத்த² அத்³த³ஸ ஏகங் மஹாகாயங் விரூபத³ஸ்ஸனங் க³ச்ச²ந்தங் புரிஸங் அட்டி²தோ முத்தானி அத்தனோ மங்ஸானி ஸயமேவ கா²த³ந்தங், தி³ஸ்வான ‘‘கோஸி த்வ’’ந்தி புச்சி². ‘‘பேதொம்ஹி, ப⁴ந்தே’’தி. ‘‘கஸ்மா ஏவங் கரோஸீ’’தி. ‘‘அத்தனோ புப்³ப³கம்மேனா’’தி. ‘‘கிங் பன தங் கம்ம’’ந்தி. ‘‘அஹங் புப்³பே³ பா⁴ருகச்ச²னக³ரவாஸீ கூடவாணிஜோ ஹுத்வா பரேஸங் ஸந்தகங் வஞ்செத்வா கா²தி³ங், ஸமணே ச பி⁴க்கா²ய உபக³தே ‘தும்ஹாகங் மங்ஸங் கா²த³தா²’தி அக்கோஸிங், தேன கம்மேன ஏதரஹி இமங் து³க்க²ங் அனுப⁴வாமீ’’தி. தங் ஸுத்வா ஸோணோ அதிவிய ஸங்வேக³ங் படிலபி⁴.
So kālena kālaṃ therassa upaṭṭhānaṃ gacchati. Thero cassa dhammaṃ deseti. Tena saṃvegabahulo dhammacariyāya ussāhajāto viharati. So ekadā satthena saddhiṃ vāṇijjatthāya ujjeniṃ gacchanto antarāmagge aṭaviyaṃ satthe niviṭṭhe rattiyaṃ janasambādhabhayena ekamantaṃ apakkamma niddaṃ upagañchi. Sattho paccūsavelāyaṃ uṭṭhāya gato, na ekopi soṇaṃ pabodhesi, sabbepi visaritvā agamaṃsu. So pabhātāya rattiyā pabujjhitvā uṭṭhāya kañci apassanto sattheneva gatamaggaṃ gahetvā sīghaṃ sīghaṃ gacchanto ekaṃ vaṭarukkhaṃ upagañchi. Tattha addasa ekaṃ mahākāyaṃ virūpadassanaṃ gacchantaṃ purisaṃ aṭṭhito muttāni attano maṃsāni sayameva khādantaṃ, disvāna ‘‘kosi tva’’nti pucchi. ‘‘Petomhi, bhante’’ti. ‘‘Kasmā evaṃ karosī’’ti. ‘‘Attano pubbakammenā’’ti. ‘‘Kiṃ pana taṃ kamma’’nti. ‘‘Ahaṃ pubbe bhārukacchanagaravāsī kūṭavāṇijo hutvā paresaṃ santakaṃ vañcetvā khādiṃ, samaṇe ca bhikkhāya upagate ‘tumhākaṃ maṃsaṃ khādathā’ti akkosiṃ, tena kammena etarahi imaṃ dukkhaṃ anubhavāmī’’ti. Taṃ sutvā soṇo ativiya saṃvegaṃ paṭilabhi.
ததோ பரங் க³ச்ச²ந்தோ முக²தோ பக்³க⁴ரிதகாளலோஹிதே த்³வே பேததா³ரகே பஸ்ஸித்வா ததே²வ புச்சி². தேபிஸ்ஸ அத்தனோ கம்மங் கதே²ஸுங். தே கிர பா⁴ருகச்ச²னக³ரே தா³ரககாலே க³ந்த⁴வாணிஜ்ஜாய ஜீவிகங் கப்பெந்தா அத்தனோ மாதரி கீ²ணாஸவே நிமந்தெத்வா போ⁴ஜெந்தியா கே³ஹங் க³ந்த்வா ‘‘அம்ஹாகங் ஸந்தகங் கஸ்மா ஸமணானங் தே³ஸி, தயா தி³ன்னங் போ⁴ஜனங் பு⁴ஞ்ஜனகஸமணானங் முக²தோ காளலோஹிதங் பக்³க⁴ரதூ’’தி அக்கோஸிங்ஸு. தே தேன கம்மேன நிரயே பச்சித்வா தஸ்ஸ விபாகாவஸேஸேன பேதயோனியங் நிப்³ப³த்தித்வா ததா³ இமங் து³க்க²ங் அனுப⁴வந்தி. தம்பி ஸுத்வா ஸோணோ அதிவிய ஸங்வேக³ஜாதோ அஹோஸி.
Tato paraṃ gacchanto mukhato paggharitakāḷalohite dve petadārake passitvā tatheva pucchi. Tepissa attano kammaṃ kathesuṃ. Te kira bhārukacchanagare dārakakāle gandhavāṇijjāya jīvikaṃ kappentā attano mātari khīṇāsave nimantetvā bhojentiyā gehaṃ gantvā ‘‘amhākaṃ santakaṃ kasmā samaṇānaṃ desi, tayā dinnaṃ bhojanaṃ bhuñjanakasamaṇānaṃ mukhato kāḷalohitaṃ paggharatū’’ti akkosiṃsu. Te tena kammena niraye paccitvā tassa vipākāvasesena petayoniyaṃ nibbattitvā tadā imaṃ dukkhaṃ anubhavanti. Tampi sutvā soṇo ativiya saṃvegajāto ahosi.
ஸோ உஜ்ஜேனிங் க³ந்த்வா தங் கரணீயங் தீரெத்வா குலக⁴ரங் பச்சாக³தோ தே²ரங் உபஸங்கமித்வா கதபடிஸந்தா²ரோ தே²ரஸ்ஸ தமத்த²ங் ஆரோசேஸி. தே²ரோபிஸ்ஸ பவத்தினிவத்தீஸு ஆதீ³னவானிஸங்ஸே விபா⁴வெந்தோ த⁴ம்மங் தே³ஸேஸி. ஸோ தே²ரங் வந்தி³த்வா கே³ஹங் க³தோ ஸாயமாஸங் பு⁴ஞ்ஜித்வா ஸயனங் உபக³தோ தோ²கங்யேவ நித்³தா³யித்வா பபு³ஜ்ஜி²த்வா ஸயனதலே நிஸஜ்ஜ யதா²ஸுதங் த⁴ம்மங் பச்சவெக்கி²துங் ஆரத்³தோ⁴. தஸ்ஸ தங் த⁴ம்மங் பச்சவெக்க²தோ, தே ச பேதத்தபா⁴வே அனுஸ்ஸரதோ ஸங்ஸாரது³க்க²ங் அதிவிய ப⁴யானகங் ஹுத்வா உபட்டா²ஸி, பப்³ப³ஜ்ஜாய சித்தங் நமி. ஸோ விபா⁴தாய ரத்தியா ஸரீரபடிஜக்³க³னங் கத்வா தே²ரங் உபஸங்கமித்வா அத்தனோ அஜ்ஜா²ஸயங் ஆரோசெத்வா பப்³ப³ஜ்ஜங் யாசி. தேன வுத்தங் – ‘‘அத² கோ² ஸோணஸ்ஸ உபாஸகஸ்ஸ குடிகண்ணஸ்ஸ ரஹோக³தஸ்ஸ…பே॰… பப்³பா³ஜேது மங், ப⁴ந்தே, அய்யோ மஹாகச்சானோ’’தி.
So ujjeniṃ gantvā taṃ karaṇīyaṃ tīretvā kulagharaṃ paccāgato theraṃ upasaṅkamitvā katapaṭisanthāro therassa tamatthaṃ ārocesi. Theropissa pavattinivattīsu ādīnavānisaṃse vibhāvento dhammaṃ desesi. So theraṃ vanditvā gehaṃ gato sāyamāsaṃ bhuñjitvā sayanaṃ upagato thokaṃyeva niddāyitvā pabujjhitvā sayanatale nisajja yathāsutaṃ dhammaṃ paccavekkhituṃ āraddho. Tassa taṃ dhammaṃ paccavekkhato, te ca petattabhāve anussarato saṃsāradukkhaṃ ativiya bhayānakaṃ hutvā upaṭṭhāsi, pabbajjāya cittaṃ nami. So vibhātāya rattiyā sarīrapaṭijagganaṃ katvā theraṃ upasaṅkamitvā attano ajjhāsayaṃ ārocetvā pabbajjaṃ yāci. Tena vuttaṃ – ‘‘atha kho soṇassa upāsakassa kuṭikaṇṇassa rahogatassa…pe… pabbājetu maṃ, bhante, ayyo mahākaccāno’’ti.
தத்த² யதா² யதா²திஆதீ³னங் பதா³னங் அயங் ஸங்கே²பத்தோ² – யேன யேன ஆகாரேன அய்யோ மஹாகச்சானோ த⁴ம்மங் தே³ஸேதி ஆசிக்க²தி பஞ்ஞபேதி பட்ட²பேதி விவரதி விப⁴ஜதி உத்தானீகரோதி பகாஸேதி, தேன தேன மே உபபரிக்க²தோ ஏவங் ஹோதி, யதே³தங் ஸிக்க²த்தயப்³ரஹ்மசரியங் ஏகம்பி தி³வஸங் அக்க²ண்ட³ங் கத்வா சரிமகசித்தங் பாபேதப்³ப³தாய ஏகந்தபரிபுண்ணங். ஏகதி³வஸம்பி கிலேஸமலேன அமலினங் கத்வா சரிமகசித்தங் பாபேதப்³ப³தாய ஏகந்தபரிஸுத்³த⁴ங். ஸங்க²லிகி²தந்தி லிகி²தஸங்க²ஸதி³ஸங் தோ⁴தஸங்க²ஸப்படிபா⁴க³ங் சரிதப்³ப³ங். இத³ங் ந ஸுகரங் அகா³ரங் அஜ்ஜா²வஸதா அகா³ரமஜ்ஜே² வஸந்தேன ஏகந்த பரிபுண்ணங்…பே॰… சரிதுங் யங்னூனாஹங் கேஸே சேவ மஸ்ஸூனி ச ஓஹாரெத்வா வோரோபெத்வா காஸாயரஸபீததாய காஸாயானி ப்³ரஹ்மசரியங் சரந்தானங் அனுச்ச²விகானி வத்தா²னி அச்சா²தெ³த்வா நிவாஸெத்வா சேவ பாருபித்வா ச அகா³ரஸ்மா நிக்க²மித்வா அனகா³ரியங் பப்³ப³ஜெய்யங் . யஸ்மா அகா³ரஸ்ஸ ஹிதங் கஸிவாணிஜ்ஜாதி³கம்மங் அகா³ரியந்தி வுச்சதி, தஞ்ச பப்³ப³ஜ்ஜாய நத்தி², தஸ்மா பப்³ப³ஜ்ஜா அனகா³ரியா நாம. தங் அனகா³ரியங் பப்³ப³ஜ்ஜங் பப்³ப³ஜெய்யங் உபக³ச்செ²ய்யங், படிபஜ்ஜெய்யந்தி அத்தோ².
Tattha yathā yathātiādīnaṃ padānaṃ ayaṃ saṅkhepattho – yena yena ākārena ayyo mahākaccāno dhammaṃ deseti ācikkhati paññapeti paṭṭhapeti vivarati vibhajati uttānīkaroti pakāseti, tena tena me upaparikkhato evaṃ hoti, yadetaṃ sikkhattayabrahmacariyaṃ ekampi divasaṃ akkhaṇḍaṃ katvā carimakacittaṃ pāpetabbatāya ekantaparipuṇṇaṃ. Ekadivasampi kilesamalena amalinaṃ katvā carimakacittaṃ pāpetabbatāya ekantaparisuddhaṃ. Saṅkhalikhitanti likhitasaṅkhasadisaṃ dhotasaṅkhasappaṭibhāgaṃ caritabbaṃ. Idaṃ nasukaraṃ agāraṃ ajjhāvasatā agāramajjhe vasantena ekanta paripuṇṇaṃ…pe… carituṃ yaṃnūnāhaṃ kese ceva massūni ca ohāretvā voropetvā kāsāyarasapītatāya kāsāyāni brahmacariyaṃ carantānaṃ anucchavikāni vatthāni acchādetvā nivāsetvā ceva pārupitvā ca agārasmā nikkhamitvā anagāriyaṃ pabbajeyyaṃ. Yasmā agārassa hitaṃ kasivāṇijjādikammaṃ agāriyanti vuccati, tañca pabbajjāya natthi, tasmā pabbajjā anagāriyā nāma. Taṃ anagāriyaṃ pabbajjaṃ pabbajeyyaṃ upagaccheyyaṃ, paṭipajjeyyanti attho.
ஏவங் அத்தனா ரஹோவிதக்கிதங் ஸோணோ உபாஸகோ தே²ரஸ்ஸ ஆரோசெத்வா தங் படிபஜ்ஜிதுகாமோ ‘‘பப்³பா³ஜேது மங், ப⁴ந்தே, அய்யோ மஹாகச்சானோ’’தி ஆஹ. தே²ரோ பன ‘‘தாவஸ்ஸ ஞாணபரிபாகங் கத²’’ந்தி உபதா⁴ரெத்வா ஞாணபரிபாகங் ஆக³மயமானோ ‘‘து³க்கரங் கோ²’’திஆதி³னா பப்³ப³ஜ்ஜாச²ந்த³ங் நிவாரேஸி.
Evaṃ attanā rahovitakkitaṃ soṇo upāsako therassa ārocetvā taṃ paṭipajjitukāmo ‘‘pabbājetu maṃ, bhante, ayyo mahākaccāno’’ti āha. Thero pana ‘‘tāvassa ñāṇaparipākaṃ katha’’nti upadhāretvā ñāṇaparipākaṃ āgamayamāno ‘‘dukkaraṃ kho’’tiādinā pabbajjāchandaṃ nivāresi.
தத்த² ஏகப⁴த்தந்தி ‘‘ஏகப⁴த்திகோ ஹோதி ரத்தூபரதோ விரதோ விகாலபோ⁴ஜனா’’தி (தீ³॰ நி॰ 1.194; அ॰ நி॰ 3.71) ஏவங் வுத்தங் விகாலபோ⁴ஜனவிரதிங் ஸந்தா⁴ய வத³தி. ஏகஸெய்யந்தி அது³தியஸெய்யங். எத்த² ச ஸெய்யாஸீஸேன ‘‘ஏகோ திட்ட²தி, ஏகோ க³ச்ச²தி, ஏகோ நிஸீத³தீ’’திஆதி³னா (மஹானி॰ 7; 49) நயேன வுத்தேஸு சதூஸு இரியாபதே²ஸு காயவிவேகங் தீ³பேதி, ந ஏகாகினா ஹுத்வா ஸயனமத்தங். ப்³ரஹ்மசரியந்தி மேது²னவிரதிப்³ரஹ்மசரியங், ஸிக்க²த்தயானுயோக³ஸங்கா²தங் ஸாஸனப்³ரஹ்மசரியங் வா. இங்கா⁴தி சோத³னத்தே² நிபாதோ. தத்தே²வாதி கே³ஹேயேவ. பு³த்³தா⁴னங் ஸாஸனங் அனுயுஞ்ஜாதி நிச்சஸீலஉபோஸத²ஸீலாதி³பே⁴த³ங் பஞ்சங்க³அட்ட²ங்க³த³ஸங்க³ஸீலங், தத³னுரூபஞ்ச ஸமாதி⁴பஞ்ஞாபா⁴வனங் அனுயுஞ்ஜ. ஏதஞ்ஹி உபாஸகேன புப்³ப³பா⁴கே³ அனுயுஞ்ஜிதப்³ப³ங் பு³த்³த⁴ஸாஸனங் நாம. தேனாஹ – ‘‘காலயுத்தங் ஏகப⁴த்தங் ஏகஸெய்யங் ப்³ரஹ்மரிய’’ந்தி.
Tattha ekabhattanti ‘‘ekabhattiko hoti rattūparato virato vikālabhojanā’’ti (dī. ni. 1.194; a. ni. 3.71) evaṃ vuttaṃ vikālabhojanaviratiṃ sandhāya vadati. Ekaseyyanti adutiyaseyyaṃ. Ettha ca seyyāsīsena ‘‘eko tiṭṭhati, eko gacchati, eko nisīdatī’’tiādinā (mahāni. 7; 49) nayena vuttesu catūsu iriyāpathesu kāyavivekaṃ dīpeti, na ekākinā hutvā sayanamattaṃ. Brahmacariyanti methunaviratibrahmacariyaṃ, sikkhattayānuyogasaṅkhātaṃ sāsanabrahmacariyaṃ vā. Iṅghāti codanatthe nipāto. Tatthevāti geheyeva. Buddhānaṃ sāsanaṃ anuyuñjāti niccasīlauposathasīlādibhedaṃ pañcaṅgaaṭṭhaṅgadasaṅgasīlaṃ, tadanurūpañca samādhipaññābhāvanaṃ anuyuñja. Etañhi upāsakena pubbabhāge anuyuñjitabbaṃ buddhasāsanaṃ nāma. Tenāha – ‘‘kālayuttaṃ ekabhattaṃ ekaseyyaṃ brahmariya’’nti.
தத்த² காலயுத்தந்தி சாதுத்³த³ஸீபஞ்சத³ஸீஅட்ட²மீபாடிஹாரியபக்க²ஸங்கா²தேன காலேன யுத்தங், யதா²வுத்தகாலே வா துய்ஹங் அனுயுஞ்ஜந்தஸ்ஸ யுத்தங் பதிரூபங் ஸக்குணெய்யங், ந ஸப்³ப³காலங் பப்³ப³ஜ்ஜாதி அதி⁴ப்பாயோ. ஸப்³ப³மேதங் ஞாணஸ்ஸ அபரிபக்கத்தா தஸ்ஸ காமானங் து³ப்பஹானதாய ஸம்மாபடிபத்தியங் யொக்³யங் காராபேதுங் வத³தி, ந பப்³ப³ஜ்ஜாச²ந்த³ங் நிவாரேதுங். பப்³ப³ஜ்ஜாபி⁴ஸங்கா²ரோதி பப்³ப³ஜிதுங் ஆரம்போ⁴ உஸ்ஸாஹோ. படிபஸ்ஸம்பீ⁴தி இந்த்³ரியானங் அபரிபக்கத்தா, ஸங்வேக³ஸ்ஸ ச நாதிதிக்க²பா⁴வதோ வூபஸமி. கிஞ்சாபி படிபஸ்ஸம்பி⁴, தே²ரேன வுத்தவிதி⁴ங் பன அனுதிட்ட²ந்தோ காலேன காலங் தே²ரங் உபஸங்கமித்வா பயிருபாஸந்தோ த⁴ம்மங் ஸுணாதி. தஸ்ஸ வுத்தனயேனேவ து³தியங் பப்³ப³ஜ்ஜாய சித்தங் உப்பஜ்ஜி, தே²ரஸ்ஸ ச ஆரோசேஸி. து³தியம்பி தே²ரோ படிக்கி²பி. ததியவாரே பன ஞாணஸ்ஸ பரிபக்கபா⁴வங் ஞத்வா ‘‘இதா³னி நங் பப்³பா³ஜேதுங் காலோ’’தி தே²ரோ பப்³பா³ஜேஸி, பப்³ப³ஜிதஞ்ச தங் தீணி ஸங்வச்ச²ரானி அதிக்கமித்வா க³ணங் பரியேஸித்வா உபஸம்பாதே³ஸி. தங் ஸந்தா⁴ய வுத்தங் – ‘‘து³தியம்பி கோ² ஸோணோ…பே॰… உபஸம்பாதே³ஸீ’’தி.
Tattha kālayuttanti cātuddasīpañcadasīaṭṭhamīpāṭihāriyapakkhasaṅkhātena kālena yuttaṃ, yathāvuttakāle vā tuyhaṃ anuyuñjantassa yuttaṃ patirūpaṃ sakkuṇeyyaṃ, na sabbakālaṃ pabbajjāti adhippāyo. Sabbametaṃ ñāṇassa aparipakkattā tassa kāmānaṃ duppahānatāya sammāpaṭipattiyaṃ yogyaṃ kārāpetuṃ vadati, na pabbajjāchandaṃ nivāretuṃ. Pabbajjābhisaṅkhāroti pabbajituṃ ārambho ussāho. Paṭipassambhīti indriyānaṃ aparipakkattā, saṃvegassa ca nātitikkhabhāvato vūpasami. Kiñcāpi paṭipassambhi, therena vuttavidhiṃ pana anutiṭṭhanto kālena kālaṃ theraṃ upasaṅkamitvā payirupāsanto dhammaṃ suṇāti. Tassa vuttanayeneva dutiyaṃ pabbajjāya cittaṃ uppajji, therassa ca ārocesi. Dutiyampi thero paṭikkhipi. Tatiyavāre pana ñāṇassa paripakkabhāvaṃ ñatvā ‘‘idāni naṃ pabbājetuṃ kālo’’ti thero pabbājesi, pabbajitañca taṃ tīṇi saṃvaccharāni atikkamitvā gaṇaṃ pariyesitvā upasampādesi. Taṃ sandhāya vuttaṃ – ‘‘dutiyampi kho soṇo…pe… upasampādesī’’ti.
தத்த² அப்பபி⁴க்கு²கோதி கதிபயபி⁴க்கு²கோ. ததா³ கிர பி⁴க்கூ² யேபு⁴ய்யேன மஜ்ஜி²மதே³ஸே ஏவ வஸிங்ஸு. தஸ்மா தத்த² கதிபயா ஏவ அஹேஸுங் , தே ச ஏகஸ்மிங் நிக³மே ஏகோ, ஏகஸ்மிங் த்³வேதி ஏவங் விஸுங் விஸுங் வஸிங்ஸு. கிச்சே²னாதி து³க்கே²ன. கஸிரேனாதி ஆயாஸேன. ததோ ததோதி தஸ்மா தஸ்மா கா³மனிக³மாதி³தோ. தே²ரேன ஹி கதிபயே பி⁴க்கூ² ஆனெத்வா அஞ்ஞேஸு ஆனீயமானேஸு புப்³பே³ ஆனீதா கேனசிதே³வ கரணீயேன பக்கமிங்ஸு, கிஞ்சி காலங் ஆக³மெத்வா புன தேஸு ஆனீயமானேஸு இதரே பக்கமிங்ஸு. ஏவங் புனப்புனங் ஆனயனேன ஸன்னிபாதோ சிரேனேவ அஹோஸி, தே²ரோ ச ததா³ ஏகவிஹாரீ அஹோஸி. த³ஸவக்³க³ங் பி⁴க்கு²ஸங்க⁴ங் ஸன்னிபாதெத்வாதி ததா³ ப⁴க³வதா பச்சந்ததே³ஸேபி த³ஸவக்³கே³னேவ ஸங்கே⁴ன உபஸம்பதா³ அனுஞ்ஞாதா. இதோனிதா³னஞ்ஹி தே²ரேன யாசிதோ பஞ்சவக்³கே³ன ஸங்கே⁴ன பச்சந்ததே³ஸே உபஸம்பத³ங் அனுஜானி. தேன வுத்தங் – ‘‘திண்ணங் வஸ்ஸானங்…பே॰… ஸன்னிபாதெத்வா’’தி.
Tattha appabhikkhukoti katipayabhikkhuko. Tadā kira bhikkhū yebhuyyena majjhimadese eva vasiṃsu. Tasmā tattha katipayā eva ahesuṃ , te ca ekasmiṃ nigame eko, ekasmiṃ dveti evaṃ visuṃ visuṃ vasiṃsu. Kicchenāti dukkhena. Kasirenāti āyāsena. Tato tatoti tasmā tasmā gāmanigamādito. Therena hi katipaye bhikkhū ānetvā aññesu ānīyamānesu pubbe ānītā kenacideva karaṇīyena pakkamiṃsu, kiñci kālaṃ āgametvā puna tesu ānīyamānesu itare pakkamiṃsu. Evaṃ punappunaṃ ānayanena sannipāto cireneva ahosi, thero ca tadā ekavihārī ahosi. Dasavaggaṃ bhikkhusaṅghaṃ sannipātetvāti tadā bhagavatā paccantadesepi dasavaggeneva saṅghena upasampadā anuññātā. Itonidānañhi therena yācito pañcavaggena saṅghena paccantadese upasampadaṃ anujāni. Tena vuttaṃ – ‘‘tiṇṇaṃ vassānaṃ…pe… sannipātetvā’’ti.
வஸ்ஸங்வுட்ட²ஸ்ஸாதி உபஸம்பஜ்ஜித்வா பட²மவஸ்ஸங் உபக³ந்த்வா வுஸிதவதோ. ஈதி³ஸோ ச ஈதி³ஸோ சாதி ஏவரூபோ ச ஏவரூபோ ச, ஏவரூபாய நாமகாயரூபகாயஸம்பத்தியா ஸமன்னாக³தோ, ஏவரூபாய த⁴ம்மகாயஸம்பத்தியா ஸமன்னாக³தோதி ஸுதோயேவ மே ஸோ ப⁴க³வா. ந கோ² மே ஸோ ப⁴க³வா ஸம்முகா² தி³ட்டோ²தி ஏதேன புது²ஜ்ஜனஸத்³தா⁴ய ஏவங் ஆயஸ்மா ஸோணோ ப⁴க³வந்தங் த³ட்டு²காமோ அஹோஸி. அபரபா⁴கே³ பன ஸத்தா²ரா ஸத்³தி⁴ங் ஏகக³ந்த⁴குடியங் வஸித்வா பச்சூஸஸமயங் அஜ்ஜி²ட்டோ² ஸோளஸ அட்ட²கவக்³கி³கானி ஸத்து² ஸம்முகா² அட்டி²ங் கத்வா மனஸி கத்வா ஸப்³ப³ங் சேதஸோ ஸமன்னாஹரித்வா அத்த²த⁴ம்மப்படிஸங்வேதீ³ ஹுத்வா ப⁴ணந்தோ த⁴ம்மூபஸஞ்ஹிதபாமோஜ்ஜாதி³முகே²ன ஸமாஹிதோ ஸரப⁴ஞ்ஞபரியோஸானே விபஸ்ஸனங் பட்ட²பெத்வா ஸங்கா²ரே ஸம்மஸந்தோ அனுபுப்³பே³ன அரஹத்தங் பாபுணி. ஏதத³த்த²மேவ ஹிஸ்ஸ ப⁴க³வதா அத்தனா ஸத்³தி⁴ங் ஏகக³ந்த⁴குடியங் வாஸோ ஆணத்தோதி வத³ந்தி.
Vassaṃvuṭṭhassāti upasampajjitvā paṭhamavassaṃ upagantvā vusitavato. Īdiso ca īdiso cāti evarūpo ca evarūpo ca, evarūpāya nāmakāyarūpakāyasampattiyā samannāgato, evarūpāya dhammakāyasampattiyā samannāgatoti sutoyeva me so bhagavā. Na kho me so bhagavā sammukhā diṭṭhoti etena puthujjanasaddhāya evaṃ āyasmā soṇo bhagavantaṃ daṭṭhukāmo ahosi. Aparabhāge pana satthārā saddhiṃ ekagandhakuṭiyaṃ vasitvā paccūsasamayaṃ ajjhiṭṭho soḷasa aṭṭhakavaggikāni satthu sammukhā aṭṭhiṃ katvā manasi katvā sabbaṃ cetaso samannāharitvā atthadhammappaṭisaṃvedī hutvā bhaṇanto dhammūpasañhitapāmojjādimukhena samāhito sarabhaññapariyosāne vipassanaṃ paṭṭhapetvā saṅkhāre sammasanto anupubbena arahattaṃ pāpuṇi. Etadatthameva hissa bhagavatā attanā saddhiṃ ekagandhakuṭiyaṃ vāso āṇattoti vadanti.
கேசி பனாஹு – ‘‘ந கோ² மே ஸோ ப⁴க³வா ஸம்முகா² தி³ட்டோ²’’தி இத³ங் ரூபகாயத³ஸ்ஸனமேவ ஸந்தா⁴ய வுத்தந்தி. ஆயஸ்மா ஹி ஸோணோ பப்³ப³ஜித்வாவ தே²ரஸ்ஸ ஸந்திகே கம்மட்டா²னங் க³ஹெத்வா க⁴டெந்தோ வாயமந்தோ அனுபஸம்பன்னோவ ஸோதாபன்னோ ஹுத்வா உபஸம்பஜ்ஜித்வா ‘‘உபாஸகாபி ஸோதாபன்னா ஹொந்தி, அஹம்பி ஸோதாபன்னோ, கிமெத்த² சித்த’’ந்தி உபரிமக்³க³த்தா²ய விபஸ்ஸனங் வட்³டெ⁴த்வா அந்தோவஸ்ஸேயேவ ச²ளபி⁴ஞ்ஞோ ஹுத்வா விஸுத்³தி⁴பவாரணாய பவாரேஸி . அரியஸச்சத³ஸ்ஸனேன ஹி ப⁴க³வதோ த⁴ம்மகாயோ தி³ட்டோ² நாம ஹோதி. வுத்தஞ்ஹேதங் –
Keci panāhu – ‘‘na kho me so bhagavā sammukhā diṭṭho’’ti idaṃ rūpakāyadassanameva sandhāya vuttanti. Āyasmā hi soṇo pabbajitvāva therassa santike kammaṭṭhānaṃ gahetvā ghaṭento vāyamanto anupasampannova sotāpanno hutvā upasampajjitvā ‘‘upāsakāpi sotāpannā honti, ahampi sotāpanno, kimettha citta’’nti uparimaggatthāya vipassanaṃ vaḍḍhetvā antovasseyeva chaḷabhiñño hutvā visuddhipavāraṇāya pavāresi . Ariyasaccadassanena hi bhagavato dhammakāyo diṭṭho nāma hoti. Vuttañhetaṃ –
‘‘யோ கோ², வக்கலி, த⁴ம்மங் பஸ்ஸதி, ஸோ மங் பஸ்ஸதி. யோ மங் பஸ்ஸதி, ஸோ த⁴ம்மங் பஸ்ஸதீ’’தி (ஸங்॰ நி॰ 3.87).
‘‘Yo kho, vakkali, dhammaṃ passati, so maṃ passati. Yo maṃ passati, so dhammaṃ passatī’’ti (saṃ. ni. 3.87).
தஸ்மாஸ்ஸ த⁴ம்மகாயத³ஸ்ஸனங் பகே³வ ஸித்³த⁴ங், பவாரெத்வா பன ரூபகாயங் த³ட்டு²காமோ அஹோஸீதி.
Tasmāssa dhammakāyadassanaṃ pageva siddhaṃ, pavāretvā pana rūpakāyaṃ daṭṭhukāmo ahosīti.
‘‘ஸசே மங் உபஜ்ஜா²யோ அனுஜானாதீ’’திபி பாடோ². ‘‘ப⁴ந்தே’’தி பன லிக²ந்தி. ததா² ‘‘ஸாது⁴ ஸாது⁴, ஆவுஸோ ஸோண, க³ச்ச² த்வங், ஆவுஸோ ஸோணா’’திபி பாடோ². ‘‘ஆவுஸோ’’தி பன கேஸுசி பொத்த²கேஸு நத்தி². ததா² ‘‘ஏவமாவுஸோதி கோ² ஆயஸ்மா ஸோணோ’’திபி பாடோ². ஆவுஸோவாதோ³யேவ ஹி அஞ்ஞமஞ்ஞங் பி⁴க்கூ²னங் ப⁴க³வதோ த⁴ரமானகாலே ஆசிண்ணோ. ப⁴க³வந்தங் பாஸாதி³கந்திஆதீ³னங் பதா³னங் அத்தோ² ஹெட்டா² வுத்தோயேவ.
‘‘Sace maṃ upajjhāyo anujānātī’’tipi pāṭho. ‘‘Bhante’’ti pana likhanti. Tathā ‘‘sādhu sādhu, āvuso soṇa, gaccha tvaṃ, āvuso soṇā’’tipi pāṭho. ‘‘Āvuso’’ti pana kesuci potthakesu natthi. Tathā ‘‘evamāvusoti kho āyasmā soṇo’’tipi pāṭho. Āvusovādoyeva hi aññamaññaṃ bhikkhūnaṃ bhagavato dharamānakāle āciṇṇo. Bhagavantaṃ pāsādikantiādīnaṃ padānaṃ attho heṭṭhā vuttoyeva.
கச்சி பி⁴க்கு² க²மனீயந்தி பி⁴க்கு² இத³ங் துய்ஹங் சதுசக்கங் நவத்³வாரங் ஸரீரயந்தங் கச்சி க²மனீயங், கிங் ஸக்கா க²மிதுங் ஸஹிதுங் பரிஹரிதுங், கிங் து³க்க²பா⁴ரோ நாபி⁴ப⁴வதி. கச்சி யாபனீயந்தி கிங் தங்தங்கிச்சேஸு யாபேதுங் க³மேதுங் ஸக்கா, ந கஞ்சி அந்தராயந்தி த³ஸ்ஸேதி. கச்சிஸி அப்பகிலமதே²னாதி அனாயாஸேன இமங் எத்தகங் அத்³தா⁴னங் கச்சி ஆக³தோஸி.
Kacci bhikkhu khamanīyanti bhikkhu idaṃ tuyhaṃ catucakkaṃ navadvāraṃ sarīrayantaṃ kacci khamanīyaṃ, kiṃ sakkā khamituṃ sahituṃ pariharituṃ, kiṃ dukkhabhāro nābhibhavati. Kacci yāpanīyanti kiṃ taṃtaṃkiccesu yāpetuṃ gametuṃ sakkā, na kañci antarāyanti dasseti. Kaccisi appakilamathenāti anāyāsena imaṃ ettakaṃ addhānaṃ kacci āgatosi.
ஏதத³ஹோஸீதி பு³த்³தா⁴சிண்ணங் அனுஸ்ஸரந்தஸ்ஸ ஆயஸ்மதோ ஆனந்த³ஸ்ஸ ஏதங் ‘‘யஸ்ஸ கோ² மங் ப⁴க³வா’’திஆதி³னா இதா³னி வுச்சமானங் சித்தே ஆசிண்ணங் அஹோஸி. ஏகவிஹாரேதி ஏகக³ந்த⁴குடியங். க³ந்த⁴குடி ஹி இத⁴ விஹாரோதி அதி⁴ப்பேதா. வத்து²ந்தி வஸிதுங்.
Etadahosīti buddhāciṇṇaṃ anussarantassa āyasmato ānandassa etaṃ ‘‘yassa kho maṃ bhagavā’’tiādinā idāni vuccamānaṃ citte āciṇṇaṃ ahosi. Ekavihāreti ekagandhakuṭiyaṃ. Gandhakuṭi hi idha vihāroti adhippetā. Vatthunti vasituṃ.
நிஸஜ்ஜாய வீதினாமெத்வாதி எத்த² யஸ்மா ப⁴க³வா ஆயஸ்மதோ ஸோணஸ்ஸ ஸமாபத்திஸமாபஜ்ஜனே படிஸந்தா²ரங் கரொந்தோ ஸாவகஸாதா⁴ரணா ஸப்³பா³ ஸமாபத்தியோ அனுலோமபடிலோமங் ஸமாபஜ்ஜந்தோ ப³ஹுதே³வ ரத்திங்…பே॰… விஹாரங் பாவிஸி, தஸ்மா ஆயஸ்மாபி ஸோணோ ப⁴க³வதோ அதி⁴ப்பாயங் ஞத்வா தத³னுரூபங் ஸப்³பா³ தா ஸமாபத்தியோ ஸமாபஜ்ஜந்தோ ‘‘ப³ஹுதே³வ ரத்திங்…பே॰… விஹாரங் பாவிஸீ’’தி கேசி வத³ந்தி. பவிஸித்வா ச ப⁴க³வதா அனுஞ்ஞாதோ சீவரங் திரோகரணீயங் கத்வாபி ப⁴க³வதோ பாத³பஸ்ஸே நிஸஜ்ஜாய வீதினாமேஸி. அஜ்ஜே²ஸீதி ஆணாபேஸி. படிபா⁴து தங் பி⁴க்கு² த⁴ம்மோ பா⁴ஸிதுந்தி பி⁴க்கு² துய்ஹங் த⁴ம்மோ பா⁴ஸிதுங் உபட்டா²து ஞாணமுகே² ஆக³ச்ச²து, யதா²ஸுதங் யதா²பரியத்தங் த⁴ம்மங் ப⁴ணாஹீதி அத்தோ².
Nisajjāya vītināmetvāti ettha yasmā bhagavā āyasmato soṇassa samāpattisamāpajjane paṭisanthāraṃ karonto sāvakasādhāraṇā sabbā samāpattiyo anulomapaṭilomaṃ samāpajjanto bahudeva rattiṃ…pe… vihāraṃ pāvisi, tasmā āyasmāpi soṇo bhagavato adhippāyaṃ ñatvā tadanurūpaṃ sabbā tā samāpattiyo samāpajjanto ‘‘bahudeva rattiṃ…pe… vihāraṃ pāvisī’’ti keci vadanti. Pavisitvā ca bhagavatā anuññāto cīvaraṃ tirokaraṇīyaṃ katvāpi bhagavato pādapasse nisajjāya vītināmesi. Ajjhesīti āṇāpesi. Paṭibhātu taṃ bhikkhu dhammo bhāsitunti bhikkhu tuyhaṃ dhammo bhāsituṃ upaṭṭhātu ñāṇamukhe āgacchatu, yathāsutaṃ yathāpariyattaṃ dhammaṃ bhaṇāhīti attho.
ஸோளஸ அட்ட²கவக்³கி³கானீதி அட்ட²கவக்³க³பூ⁴தானி காமஸுத்தாதீ³னி ஸோளஸ ஸுத்தானி. ஸரேன அப⁴ணீதி ஸுத்துஸ்ஸாரணஸரேன அபா⁴ஸி, ஸரப⁴ஞ்ஞவஸேன கதே²ஸீதி அத்தோ². ஸரப⁴ஞ்ஞபரியோஸானேதி உஸ்ஸாரணாவஸானே. ஸுக்³க³ஹிதானீதி ஸம்மா உக்³க³ஹிதானி. ஸுமனஸிகதானீதி ஸுட்டு² மனஸி கதானி. ஏகச்சோ உக்³க³ஹணகாலே ஸம்மா உக்³க³ஹெத்வாபி பச்சா² ஸஜ்ஜா²யாதி³வஸேன மனஸி கரணகாலே ப்³யஞ்ஜனானி வா மிச்சா² ரோபேதி, பத³பச்சா²ப⁴ட்ட²ங் வா கரோதி, ந ஏவமயங். இமினா பன ஸம்மதே³வ யது²க்³க³ஹிதங் மனஸி கதானி. தேன வுத்தங் – ‘‘ஸுமனஸிகதானீதி ஸுட்டு² மனஸி கதானீ’’தி. ஸூபதா⁴ரிதானீதி அத்த²தோபி ஸுட்டு² உபதா⁴ரிதானி. அத்தே² ஹி ஸுட்டு உபதா⁴ரிதே ஸக்கா பாளிங் ஸம்மா உஸ்ஸாரேதுங். கல்யாணியாஸி வாசாய ஸமன்னாக³தோதி ஸிதி²லத⁴னிதாதீ³னங் யதா²விதா⁴னவசனேன பரிமண்ட³லபத³ப்³யஞ்ஜனபரிபுண்ணாய போரியா வாசாய ஸமன்னாக³தோ ஆஸி. விஸ்ஸட்டா²யாதி விமுத்தாய. ஏதேனஸ்ஸ விமுத்தவாதி³தங் த³ஸ்ஸேதி. அனேலக³ளாயாதி ஏலா வுச்சதி தோ³ஸோ, தங் ந பக்³க⁴ரதீதி அனேலக³ளா, தாய நித்³தோ³ஸாயாதி அத்தோ². அத² வா அனேலக³ளாயாதி அனேலாய ச அக³ளாய ச நித்³தோ³ஸாய அக³ளிதபத³ப்³யஞ்ஜனாய, அபரிஹீனபத³ப்³யஞ்ஜனாயாதி அத்தோ². ததா² ஹி நங் ப⁴க³வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் கல்யாணவாக்கரணானங் யதி³த³ங் ஸோணோ குடிகண்ணோ’’தி (அ॰ நி॰ 1.206) ஏதத³க்³கே³ ட²பேஸி. அத்த²ஸ்ஸ விஞ்ஞாபனியாதி யதா²தி⁴ப்பேதங் அத்த²ங் விஞ்ஞாபேதுங் ஸமத்தா²ய.
Soḷasa aṭṭhakavaggikānīti aṭṭhakavaggabhūtāni kāmasuttādīni soḷasa suttāni. Sarena abhaṇīti suttussāraṇasarena abhāsi, sarabhaññavasena kathesīti attho. Sarabhaññapariyosāneti ussāraṇāvasāne. Suggahitānīti sammā uggahitāni. Sumanasikatānīti suṭṭhu manasi katāni. Ekacco uggahaṇakāle sammā uggahetvāpi pacchā sajjhāyādivasena manasi karaṇakāle byañjanāni vā micchā ropeti, padapacchābhaṭṭhaṃ vā karoti, na evamayaṃ. Iminā pana sammadeva yathuggahitaṃ manasi katāni. Tena vuttaṃ – ‘‘sumanasikatānīti suṭṭhu manasi katānī’’ti. Sūpadhāritānīti atthatopi suṭṭhu upadhāritāni. Atthe hi suṭṭu upadhārite sakkā pāḷiṃ sammā ussāretuṃ. Kalyāṇiyāsi vācāya samannāgatoti sithiladhanitādīnaṃ yathāvidhānavacanena parimaṇḍalapadabyañjanaparipuṇṇāya poriyā vācāya samannāgato āsi. Vissaṭṭhāyāti vimuttāya. Etenassa vimuttavāditaṃ dasseti. Anelagaḷāyāti elā vuccati doso, taṃ na paggharatīti anelagaḷā, tāya niddosāyāti attho. Atha vā anelagaḷāyāti anelāya ca agaḷāya ca niddosāya agaḷitapadabyañjanāya, aparihīnapadabyañjanāyāti attho. Tathā hi naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ kalyāṇavākkaraṇānaṃ yadidaṃ soṇo kuṭikaṇṇo’’ti (a. ni. 1.206) etadagge ṭhapesi. Atthassa viññāpaniyāti yathādhippetaṃ atthaṃ viññāpetuṃ samatthāya.
கதிவஸ்ஸோதி ஸோ கிர மஜ்ஜி²மவயஸ்ஸ ததியகொட்டா²ஸே டி²தோ ஆகப்பஸம்பன்னோ ச பரேஸங் சிரதரபப்³ப³ஜிதோ விய கா²யதி. தங் ஸந்தா⁴ய ப⁴க³வா புச்ச²தீதி கேசி, தங் அகாரணங். ஏவங் ஸந்தே ஸமாதி⁴ஸுக²ங் அனுப⁴விதுங் யுத்தோ, எத்தகங் காலங் கஸ்மா பமாத³மாபன்னோதி புன அனுயுஞ்ஜிதுங் ஸத்தா² ‘‘கதிவஸ்ஸோஸீ’’தி தங் புச்ச²தி. தேனேவாஹ – ‘‘கிஸ்ஸ பன த்வங் பி⁴க்கு² ஏவங் சிரங் அகாஸீ’’தி.
Kativassoti so kira majjhimavayassa tatiyakoṭṭhāse ṭhito ākappasampanno ca paresaṃ ciratarapabbajito viya khāyati. Taṃ sandhāya bhagavā pucchatīti keci, taṃ akāraṇaṃ. Evaṃ sante samādhisukhaṃ anubhavituṃ yutto, ettakaṃ kālaṃ kasmā pamādamāpannoti puna anuyuñjituṃ satthā ‘‘kativassosī’’ti taṃ pucchati. Tenevāha – ‘‘kissa pana tvaṃ bhikkhu evaṃ ciraṃ akāsī’’ti.
தத்த² கிஸ்ஸாதி கிங் காரணா. ஏவங் சிரங் அகாஸீதி ஏவங் சிராயி, கேன காரணேன ஏவங் சிரகாலங் பப்³ப³ஜ்ஜங் அனுபக³ந்த்வா அகா³ரமஜ்ஜே² வஸீதி அத்தோ². சிரங் தி³ட்டோ² மேதி சிரேன சிரகாலேன மயா தி³ட்டோ². காமேஸூதி கிலேஸகாமேஸு ச வத்து²காமேஸு ச. ஆதீ³னவோதி தோ³ஸோ. அபி சாதி காமேஸு ஆதீ³னவே கேனசி பகாரேன தி³ட்டே²பி ந தாவாஹங் க⁴ராவாஸதோ நிக்க²மிதுங் அஸக்கி²ங். கஸ்மா? ஸம்பா³தோ⁴ க⁴ராவாஸோ உச்சாவசேஹி கிச்சகரணீயேஹி ஸமுபப்³யூள்ஹோ அகா³ரியபா⁴வோ. தேனேவாஹ – ‘‘ப³ஹுகிச்சோ ப³ஹுகரணீயோ’’தி.
Tattha kissāti kiṃ kāraṇā. Evaṃ ciraṃ akāsīti evaṃ cirāyi, kena kāraṇena evaṃ cirakālaṃ pabbajjaṃ anupagantvā agāramajjhe vasīti attho. Ciraṃ diṭṭho meti cirena cirakālena mayā diṭṭho. Kāmesūti kilesakāmesu ca vatthukāmesu ca. Ādīnavoti doso. Api cāti kāmesu ādīnave kenaci pakārena diṭṭhepi na tāvāhaṃ gharāvāsato nikkhamituṃ asakkhiṃ. Kasmā? Sambādho gharāvāso uccāvacehi kiccakaraṇīyehi samupabyūḷho agāriyabhāvo. Tenevāha – ‘‘bahukicco bahukaraṇīyo’’ti.
ஏதமத்த²ங் விதி³த்வாதி காமேஸு யதா²பூ⁴தங் ஆதீ³னவத³ஸ்ஸினோ சித்தங் சிராயித்வாபி ந பதிட்டா²தி, அஞ்ஞத³த்து² பது³மபலாஸே உத³கபி³ந்து³ விய வினிவத்ததியேவாதி ஏதமத்த²ங் ஸப்³பா³காரதோ விதி³த்வா. இமங் உதா³னந்தி பவத்திங் நிவத்திஞ்ச ஸம்மதே³வ ஜானந்தோ பவத்தியங் தன்னிமித்தே ச ந கதா³சிபி ரமதீதி இத³மத்த²தீ³பகங் இமங் உதா³னங் உதா³னேஸி.
Etamatthaṃ viditvāti kāmesu yathābhūtaṃ ādīnavadassino cittaṃ cirāyitvāpi na patiṭṭhāti, aññadatthu padumapalāse udakabindu viya vinivattatiyevāti etamatthaṃ sabbākārato viditvā. Imaṃ udānanti pavattiṃ nivattiñca sammadeva jānanto pavattiyaṃ tannimitte ca na kadācipi ramatīti idamatthadīpakaṃ imaṃ udānaṃ udānesi.
தத்த² தி³ஸ்வா ஆதீ³னவங் லோகேதி ஸப்³ப³ஸ்மிங் ஸங்கா²ரலோகே ‘‘அனிச்சோ து³க்கோ² விபரிணாமத⁴ம்மோ’’திஆதி³னா ஆதீ³னவங் தோ³ஸங் பஞ்ஞாய பஸ்ஸித்வா. ஏதேன விபஸ்ஸனாவாரோ கதி²தோ . ஞத்வா த⁴ம்மங் நிருபதி⁴ந்தி ஸப்³பூ³பதி⁴படினிஸ்ஸக்³க³த்தா நிருபதி⁴ங் நிப்³பா³னத⁴ம்மங் யதா²பூ⁴தங் ஞத்வா நிஸ்ஸரணவிவேகாஸங்க²தாமதஸபா⁴வதோ மக்³க³ஞாணேன படிவிஜ்ஜி²த்வா. ‘‘தி³ஸ்வா ஞத்வா’’தி இமேஸங் பதா³னங் ‘‘ஸப்பிங் பிவித்வா ப³லங் ஹோதி, ஸீஹங் தி³ஸ்வா ப⁴யங் ஹோதி, பஞ்ஞாய தி³ஸ்வா ஆஸவா பரிக்கீ²ணா ஹொந்தீ’’திஆதீ³ஸு (பு॰ ப॰ 208; அ॰ நி॰ 9.42-43) விய ஹேதுஅத்த²தா த³ட்ட²ப்³பா³. அரியோ ந ரமதீ பாபேதி கிலேஸேஹி ஆரகத்தா அரியோ ஸப்புரிஸோ அணுமத்தேபி பாபே ந ரமதி. கஸ்மா? பாபே ந ரமதீ ஸுசீதி ஸுவிஸுத்³த⁴காயஸமாசாராதி³தாய விஸுத்³த⁴புக்³க³லோ ராஜஹங்ஸோ விய உக்காரட்டா²னே பாபே ஸங்கிலிட்ட²த⁴ம்மே ந ரமதி நாபி⁴னந்த³தி. ‘‘பாபோ ந ரமதீ ஸுசி’’ந்திபி பாடோ². தஸ்ஸத்தோ² – பாபோ பாபபுக்³க³லோ ஸுசிங் அனவஜ்ஜங் வோதா³னத⁴ம்மங் ந ரமதி, அஞ்ஞத³த்து² கா³மஸூகராத³யோ விய உக்காரட்டா²னங் அஸுசிங் ஸங்கிலேஸத⁴ம்மங்யேவ ரமதீதி படிபக்க²தோ தே³ஸனங் பரிவத்தேதி.
Tattha disvā ādīnavaṃ loketi sabbasmiṃ saṅkhāraloke ‘‘anicco dukkho vipariṇāmadhammo’’tiādinā ādīnavaṃ dosaṃ paññāya passitvā. Etena vipassanāvāro kathito . Ñatvā dhammaṃ nirupadhinti sabbūpadhipaṭinissaggattā nirupadhiṃ nibbānadhammaṃ yathābhūtaṃ ñatvā nissaraṇavivekāsaṅkhatāmatasabhāvato maggañāṇena paṭivijjhitvā. ‘‘Disvā ñatvā’’ti imesaṃ padānaṃ ‘‘sappiṃ pivitvā balaṃ hoti, sīhaṃ disvā bhayaṃ hoti, paññāya disvā āsavā parikkhīṇā hontī’’tiādīsu (pu. pa. 208; a. ni. 9.42-43) viya hetuatthatā daṭṭhabbā. Ariyo na ramatī pāpeti kilesehi ārakattā ariyo sappuriso aṇumattepi pāpe na ramati. Kasmā? Pāpe na ramatī sucīti suvisuddhakāyasamācārāditāya visuddhapuggalo rājahaṃso viya ukkāraṭṭhāne pāpe saṃkiliṭṭhadhamme na ramati nābhinandati. ‘‘Pāpo na ramatī suci’’ntipi pāṭho. Tassattho – pāpo pāpapuggalo suciṃ anavajjaṃ vodānadhammaṃ na ramati, aññadatthu gāmasūkarādayo viya ukkāraṭṭhānaṃ asuciṃ saṃkilesadhammaṃyeva ramatīti paṭipakkhato desanaṃ parivatteti.
ஏவங் ப⁴க³வதா உதா³னே உதா³னிதே ஆயஸ்மா ஸோணோ உட்டா²யாஸனா ப⁴க³வந்தங் வந்தி³த்வா அத்தனோ உபஜ்ஜா²யஸ்ஸ வசனேன பச்சந்ததே³ஸே பஞ்சவக்³கே³ன உபஸம்பதா³தி³பஞ்சவத்தூ²னி யாசி. ப⁴க³வாபி தானி அனுஜானீதி தங் ஸப்³ப³ங் க²ந்த⁴கே (மஹாவ॰ 242 ஆத³யோ) ஆக³தனயேன வேதி³தப்³ப³ங்.
Evaṃ bhagavatā udāne udānite āyasmā soṇo uṭṭhāyāsanā bhagavantaṃ vanditvā attano upajjhāyassa vacanena paccantadese pañcavaggena upasampadādipañcavatthūni yāci. Bhagavāpi tāni anujānīti taṃ sabbaṃ khandhake (mahāva. 242 ādayo) āgatanayena veditabbaṃ.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 6. ஸோணஸுத்தங் • 6. Soṇasuttaṃ
