| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. ஸோதஸுத்தங்
10. Sotasuttaṃ
140. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ நாகோ³ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ங்த்வேவ ஸங்க²ங் க³ச்ச²தி. கதமேஹி பஞ்சஹி? இத⁴, பி⁴க்க²வே, ரஞ்ஞோ நாகோ³ ஸோதா ச ஹோதி, ஹந்தா ச, ரக்கி²தா ச, க²ந்தா ச, க³ந்தா ச.
140. ‘‘Pañcahi, bhikkhave, aṅgehi samannāgato rañño nāgo rājāraho hoti rājabhoggo, rañño aṅgaṃtveva saṅkhaṃ gacchati. Katamehi pañcahi? Idha, bhikkhave, rañño nāgo sotā ca hoti, hantā ca, rakkhitā ca, khantā ca, gantā ca.
‘‘கத²ஞ்ச, பி⁴க்க²வே, ரஞ்ஞோ நாகோ³ ரக்கி²தா ஹோதி? இத⁴, பி⁴க்க²வே, ரஞ்ஞோ நாகோ³ ஸங்கா³மக³தோ ரக்க²தி புரிமங் காயங், ரக்க²தி பச்சி²மங் காயங், ரக்க²தி புரிமே பாதே³, ரக்க²தி பச்சி²மே பாதே³, ரக்க²தி ஸீஸங், ரக்க²தி கண்ணே, ரக்க²தி த³ந்தே, ரக்க²தி ஸொண்ட³ங், ரக்க²தி வாலதி⁴ங், ரக்க²தி ஹத்தா²ருஹங். ஏவங் கோ², பி⁴க்க²வே, ரஞ்ஞோ நாகோ³ ரக்கி²தா ஹோதி.
‘‘Kathañca, bhikkhave, rañño nāgo rakkhitā hoti? Idha, bhikkhave, rañño nāgo saṅgāmagato rakkhati purimaṃ kāyaṃ, rakkhati pacchimaṃ kāyaṃ, rakkhati purime pāde, rakkhati pacchime pāde, rakkhati sīsaṃ, rakkhati kaṇṇe, rakkhati dante, rakkhati soṇḍaṃ, rakkhati vāladhiṃ, rakkhati hatthāruhaṃ. Evaṃ kho, bhikkhave, rañño nāgo rakkhitā hoti.
‘‘கத²ஞ்ச , பி⁴க்க²வே, ரஞ்ஞோ நாகோ³ க²ந்தா ஹோதி? இத⁴, பி⁴க்க²வே, ரஞ்ஞோ நாகோ³ ஸங்கா³மக³தோ க²மோ ஹோதி ஸத்திப்பஹாரானங் அஸிப்பஹாரானங் உஸுப்பஹாரானங் ப²ரஸுப்பஹாரானங் பே⁴ரிபணவஸங்க²திணவனின்னாத³ஸத்³தா³னங். ஏவங் கோ², பி⁴க்க²வே, ரஞ்ஞோ நாகோ³ க²ந்தா ஹோதி.
‘‘Kathañca , bhikkhave, rañño nāgo khantā hoti? Idha, bhikkhave, rañño nāgo saṅgāmagato khamo hoti sattippahārānaṃ asippahārānaṃ usuppahārānaṃ pharasuppahārānaṃ bheripaṇavasaṅkhatiṇavaninnādasaddānaṃ. Evaṃ kho, bhikkhave, rañño nāgo khantā hoti.
‘‘கத²ஞ்ச, பி⁴க்க²வே, ரஞ்ஞோ நாகோ³ க³ந்தா ஹோதி? இத⁴, பி⁴க்க²வே, ரஞ்ஞோ நாகோ³ யமேனங் ஹத்தி²த³ம்மஸாரதி² தி³ஸங் பேஸேதி – யதி³ வா க³தபுப்³ப³ங் யதி³ வா அக³தபுப்³ப³ங் – தங் கி²ப்பமேவ க³ந்தா ஹோதி. ஏவங் கோ², பி⁴க்க²வே, ரஞ்ஞோ நாகோ³ க³ந்தா ஹோதி.
‘‘Kathañca, bhikkhave, rañño nāgo gantā hoti? Idha, bhikkhave, rañño nāgo yamenaṃ hatthidammasārathi disaṃ peseti – yadi vā gatapubbaṃ yadi vā agatapubbaṃ – taṃ khippameva gantā hoti. Evaṃ kho, bhikkhave, rañño nāgo gantā hoti.
‘‘இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ ரஞ்ஞோ நாகோ³ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ங்த்வேவ ஸங்க²ங் க³ச்ச²தி.
‘‘Imehi kho, bhikkhave, pañcahi aṅgehi samannāgato rañño nāgo rājāraho hoti rājabhoggo, rañño aṅgaṃtveva saṅkhaṃ gacchati.
‘‘ஏவமேவங் கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங் லோகஸ்ஸ. கதமேஹி பஞ்சஹி? இத⁴, பி⁴க்க²வே, பி⁴க்கு² ஸோதா ச ஹோதி, ஹந்தா ச, ரக்கி²தா ச, க²ந்தா ச, க³ந்தா ச.
‘‘Evamevaṃ kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Katamehi pañcahi? Idha, bhikkhave, bhikkhu sotā ca hoti, hantā ca, rakkhitā ca, khantā ca, gantā ca.
‘‘கத²ஞ்ச, பி⁴க்க²வே, பி⁴க்கு² ஸோதா ஹோதி? இத⁴, பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே தே³ஸியமானே அட்டி²ங்கத்வா மனஸி கத்வா ஸப்³ப³ங் சேதஸா ஸமன்னாஹரித்வா ஓஹிதஸோதோ த⁴ம்மங் ஸுணாதி. ஏவங் கோ², பி⁴க்க²வே, பி⁴க்கு² ஸோதா ஹோதி.
‘‘Kathañca, bhikkhave, bhikkhu sotā hoti? Idha, bhikkhave, bhikkhu tathāgatappavedite dhammavinaye desiyamāne aṭṭhiṃkatvā manasi katvā sabbaṃ cetasā samannāharitvā ohitasoto dhammaṃ suṇāti. Evaṃ kho, bhikkhave, bhikkhu sotā hoti.
‘‘கத²ஞ்ச, பி⁴க்க²வே, பி⁴க்கு² ஹந்தா ஹோதி? இத⁴, பி⁴க்க²வே, பி⁴க்கு² உப்பன்னங் காமவிதக்கங் நாதி⁴வாஸேதி, பஜஹதி வினோதே³தி (ஹனதி) 11 ப்³யந்தீகரோதி அனபா⁴வங் க³மேதி; உப்பன்னங் ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்…பே॰… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி , பஜஹதி வினோதே³தி (ஹனதி) 12 ப்³யந்தீகரோதி அனபா⁴வங் க³மேதி. ஏவங் கோ², பி⁴க்க²வே, பி⁴க்கு² ஹந்தா ஹோதி.
‘‘Kathañca, bhikkhave, bhikkhu hantā hoti? Idha, bhikkhave, bhikkhu uppannaṃ kāmavitakkaṃ nādhivāseti, pajahati vinodeti (hanati) 13 byantīkaroti anabhāvaṃ gameti; uppannaṃ byāpādavitakkaṃ…pe… uppannaṃ vihiṃsāvitakkaṃ…pe… uppannuppanne pāpake akusale dhamme nādhivāseti , pajahati vinodeti (hanati) 14 byantīkaroti anabhāvaṃ gameti. Evaṃ kho, bhikkhave, bhikkhu hantā hoti.
‘‘கத²ஞ்ச , பி⁴க்க²வே, பி⁴க்கு² ரக்கி²தா ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி; ரக்க²தி சக்கு²ந்த்³ரியங்; சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி; ரக்க²தி மனிந்த்³ரியங்; மனிந்த்³ரியே ஸங்வரங் ஆபஜ்ஜதி. ஏவங் கோ², பி⁴க்க²வே, பி⁴க்கு² ரக்கி²தா ஹோதி.
‘‘Kathañca , bhikkhave, bhikkhu rakkhitā hoti? Idha, bhikkhave, bhikkhu cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati; rakkhati cakkhundriyaṃ; cakkhundriye saṃvaraṃ āpajjati. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati; rakkhati manindriyaṃ; manindriye saṃvaraṃ āpajjati. Evaṃ kho, bhikkhave, bhikkhu rakkhitā hoti.
‘‘கத²ஞ்ச, பி⁴க்க²வே, பி⁴க்கு² க²ந்தா ஹோதி? இத⁴, பி⁴க்க²வே, பி⁴க்கு² க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ங்ஸமகஸவாதாதபஸரீஸ 15 பஸம்ப²ஸ்ஸானங்; து³ருத்தானங் து³ராக³தானங் வசனபதா²னங் உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங் கடுகானங் அஸாதானங் அமனாபானங் பாணஹரானங் அதி⁴வாஸகஜாதிகோ ஹோதி. ஏவங் கோ², பி⁴க்க²வே, பி⁴க்கு² க²ந்தா ஹோதி.
‘‘Kathañca, bhikkhave, bhikkhu khantā hoti? Idha, bhikkhave, bhikkhu khamo hoti sītassa uṇhassa jighacchāya pipāsāya ḍaṃsamakasavātātapasarīsa 16 pasamphassānaṃ; duruttānaṃ durāgatānaṃ vacanapathānaṃ uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātiko hoti. Evaṃ kho, bhikkhave, bhikkhu khantā hoti.
‘‘கத²ஞ்ச, பி⁴க்க²வே, பி⁴க்கு² க³ந்தா ஹோதி? இத⁴ , பி⁴க்க²வே, பி⁴க்கு² யா ஸா தி³ஸா அக³தபுப்³பா³ இமினா தீ³கே⁴ன அத்³து⁴னா, யதி³த³ங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³னங், தங் கி²ப்பஞ்ஞேவ க³ந்தா ஹோதி. ஏவங் கோ², பி⁴க்க²வே, பி⁴க்கு² க³ந்தா ஹோதி.
‘‘Kathañca, bhikkhave, bhikkhu gantā hoti? Idha , bhikkhave, bhikkhu yā sā disā agatapubbā iminā dīghena addhunā, yadidaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṃ, taṃ khippaññeva gantā hoti. Evaṃ kho, bhikkhave, bhikkhu gantā hoti.
‘‘இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி…பே॰… அனுத்தரங் புஞ்ஞக்கெ²த்தங் லோகஸ்ஸா’’தி. த³ஸமங்.
‘‘Imehi kho, bhikkhave, pañcahi dhammehi samannāgato bhikkhu āhuneyyo hoti…pe… anuttaraṃ puññakkhettaṃ lokassā’’ti. Dasamaṃ.
ராஜவக்³கோ³ சதுத்தோ².
Rājavaggo catuttho.
தஸ்ஸுத்³தா³னங் –
Tassuddānaṃ –
சக்கானுவத்தனா ராஜா, யஸ்ஸங்தி³ஸங் த்³வே சேவ பத்த²னா;
Cakkānuvattanā rājā, yassaṃdisaṃ dve ceva patthanā;
அப்பங்ஸுபதி ப⁴த்தாதோ³, அக்க²மோ ச ஸோதேன சாதி.
Appaṃsupati bhattādo, akkhamo ca sotena cāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஸோதஸுத்தவண்ணனா • 10. Sotasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. ஸோதஸுத்தவண்ணனா • 10. Sotasuttavaṇṇanā
