| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஸுபா⁴ஸிதஜயஸுத்தவண்ணனா
5. Subhāsitajayasuttavaṇṇanā
251. ‘‘சே²கதாயா’’தி வத்வா தஸ்ஸ வத்துங் சே²கபா⁴வங் த³ஸ்ஸேதுங் ‘‘ஏவங் கிரஸ்ஸா’’திஆதி³மாஹ. கா³ஹந்தி லத்³தி⁴ங். மோசெத்வாதி யஸ்ஸ புன ‘‘சோரோ’’தி உத்தரி வத்துங் ந ஸக்கோதி, ஏவங் விமோசெத்வாதி பட²மங் வத்துங் ந ஸக்கா. க³ரூதி பா⁴ரியங், து³க்கரந்தி அத்தோ². பச்சா²தி ‘‘பரஸ்ஸா’’தி வுத்தோ ஸோ கிஞ்சி பட²மங் வத³ந்தோ அத்தனோ அதி⁴ப்பாயங் பவேதே³தி நாம, தங் யதா²ஸத்தி விதி³தமனோ தஸ்ஸ உத்தரி வத்துங் ஸக்கோதி. தேனாஹ ‘‘பரஸ்ஸ வசனங் அனுக³ந்த்வா பன பச்சா² ஸுக²ங் வத்து’’ந்தி. அபி ச அஸுரிந்தே³ன ‘‘ஹோது, தே³வானமிந்த³, ஸுபா⁴ஸிதேன ஜயோ’’தி பட²மங் வுத்தங், விஸேஸோ ச புப்³ப³ங் உபனெந்தங் அனுவத்ததி. வசஸி குஸலோ ஸக்கோ தே³வராஜா தங் விஸேஸங் தேனேவ புப்³ப³ங் உபனயாபெந்தோ உபலாபனவஸேன ‘‘தும்ஹே க்²வெத்தா²’’திஆதி³மாஹ. புப்³ப³தே³வாதி ஸக்கபமுகா²ய தே³வபரிஸாய லோகே புப்³பே³வ உப்பன்னத்தா ‘‘புப்³ப³தே³வா’’தி பஸங்ஸவசனங். வேபசித்திங் ஸந்தா⁴ய ‘‘தும்ஹே’’தி ‘‘புப்³ப³தே³வா’’தி ச வுத்தத்தா ‘‘தும்ஹாகங் தாவ பவேணிஆக³தங் ப⁴ணதா²’’தி வுத்தங். கா³ரவட்டா²னியத்தா வேபசித்தினோ ப³ஹுவசனபயோகோ³. த³ண்டே³ன அவசாரோ அவசரணங் த³ண்டா³வசரோ, நத்தி² எத்த² வுத்தோ த³ண்டா³வசரோதி அத³ண்டா³வசரா, ஸக்கேன வுத்தா கா³தா²யோ.
251.‘‘Chekatāyā’’ti vatvā tassa vattuṃ chekabhāvaṃ dassetuṃ ‘‘evaṃ kirassā’’tiādimāha. Gāhanti laddhiṃ. Mocetvāti yassa puna ‘‘coro’’ti uttari vattuṃ na sakkoti, evaṃ vimocetvāti paṭhamaṃ vattuṃ na sakkā. Garūti bhāriyaṃ, dukkaranti attho. Pacchāti ‘‘parassā’’ti vutto so kiñci paṭhamaṃ vadanto attano adhippāyaṃ pavedeti nāma, taṃ yathāsatti viditamano tassa uttari vattuṃ sakkoti. Tenāha ‘‘parassa vacanaṃ anugantvā pana pacchā sukhaṃ vattu’’nti. Api ca asurindena ‘‘hotu, devānaminda, subhāsitena jayo’’ti paṭhamaṃ vuttaṃ, viseso ca pubbaṃ upanentaṃ anuvattati. Vacasi kusalo sakko devarājā taṃ visesaṃ teneva pubbaṃ upanayāpento upalāpanavasena ‘‘tumhe khvetthā’’tiādimāha. Pubbadevāti sakkapamukhāya devaparisāya loke pubbeva uppannattā ‘‘pubbadevā’’ti pasaṃsavacanaṃ. Vepacittiṃ sandhāya ‘‘tumhe’’ti ‘‘pubbadevā’’ti ca vuttattā ‘‘tumhākaṃ tāva paveṇiāgataṃ bhaṇathā’’ti vuttaṃ. Gāravaṭṭhāniyattā vepacittino bahuvacanapayogo. Daṇḍena avacāro avacaraṇaṃ daṇḍāvacaro, natthi ettha vutto daṇḍāvacaroti adaṇḍāvacarā, sakkena vuttā gāthāyo.
ஸுபா⁴ஸிதஜயஸுத்தவண்ணனா நிட்டி²தா.
Subhāsitajayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஸுபா⁴ஸிதஜயஸுத்தங் • 5. Subhāsitajayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸுபா⁴ஸிதஜயஸுத்தவண்ணனா • 5. Subhāsitajayasuttavaṇṇanā
