| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. ஸுப⁴ஸுத்தவண்ணனா
9. Subhasuttavaṇṇanā
462. ஏவங் மே ஸுதந்தி ஸுப⁴ஸுத்தங். தத்த² தோதெ³ய்யபுத்தோதி துதி³கா³மவாஸினோ தோதெ³ய்யப்³ராஹ்மணஸ்ஸ புத்தோ. ஆராத⁴கோ ஹோதீதி ஸம்பாத³கோ ஹோதி பரிபூரகோ. ஞாயங் த⁴ம்மந்தி காரணத⁴ம்மங். குஸலந்தி அனவஜ்ஜங்.
462.Evaṃme sutanti subhasuttaṃ. Tattha todeyyaputtoti tudigāmavāsino todeyyabrāhmaṇassa putto. Ārādhako hotīti sampādako hoti paripūrako. Ñāyaṃ dhammanti kāraṇadhammaṃ. Kusalanti anavajjaṃ.
463. மிச்சா²படிபத்திந்தி அனிய்யானிகங் அகுஸலபடிபத³ங். ஸம்மாபடிபத்திந்தி நிய்யானிகங் குஸலபடிபத³ங்.
463.Micchāpaṭipattinti aniyyānikaṃ akusalapaṭipadaṃ. Sammāpaṭipattinti niyyānikaṃ kusalapaṭipadaṃ.
மஹட்ட²ந்திஆதீ³ஸு மஹந்தேஹி வெய்யாவச்சகரேஹி வா உபகரணேஹி வா ப³ஹூஹி அத்தோ² எத்தா²தி மஹட்ட²ங். மஹந்தானி நாமக்³க³ஹணமங்க³லாதீ³னி கிச்சானி எத்தா²தி மஹாகிச்சங். இத³ங் அஜ்ஜ கத்தப்³ப³ங், இத³ங் ஸ்வேதி ஏவங் மஹந்தானி அதி⁴காரஸங்கா²தானி அதி⁴கரணானி எத்தா²தி மஹாதி⁴கரணங். ப³ஹூனங் கம்மே யுத்தப்பயுத்ததாவஸேன பீளாஸங்கா²தோ மஹாஸமாரம்போ⁴ எத்தா²தி மஹாஸமாரம்ப⁴ங். க⁴ராவாஸகம்மட்டா²னந்தி க⁴ராவாஸகம்மங். ஏவங் ஸப்³ப³வாரேஸு அத்தோ² வேதி³தப்³போ³. கஸிகம்மே செத்த² நங்க³லகோடிங் ஆதி³ங் கத்வா உபகரணானங் பரியேஸனவஸேன மஹட்ட²தா, வணிஜ்ஜாய யதா²டி²தங்யேவ ப⁴ண்ட³ங் க³ஹெத்வா பரிவத்தனவஸேன அப்பட்ட²தா வேதி³தப்³பா³. விபஜ்ஜமானந்தி அவுட்டி²அதிவுட்டி²ஆதீ³ஹி கஸிகம்மங், மணிஸுவண்ணாதீ³ஸு அச்சே²கதாதீ³ஹி ச வணிஜ்ஜகம்மங் அப்பப²லங் ஹோதி, மூலச்சே²த³ம்பி பாபுணாதி. விபரியாயேன ஸம்பஜ்ஜமானங் மஹப்ப²லங் சூளந்தேவாஸிகஸ்ஸ விய.
Mahaṭṭhantiādīsu mahantehi veyyāvaccakarehi vā upakaraṇehi vā bahūhi attho etthāti mahaṭṭhaṃ. Mahantāni nāmaggahaṇamaṅgalādīni kiccāni etthāti mahākiccaṃ. Idaṃ ajja kattabbaṃ, idaṃ sveti evaṃ mahantāni adhikārasaṅkhātāni adhikaraṇāni etthāti mahādhikaraṇaṃ. Bahūnaṃ kamme yuttappayuttatāvasena pīḷāsaṅkhāto mahāsamārambho etthāti mahāsamārambhaṃ. Gharāvāsakammaṭṭhānanti gharāvāsakammaṃ. Evaṃ sabbavāresu attho veditabbo. Kasikamme cettha naṅgalakoṭiṃ ādiṃ katvā upakaraṇānaṃ pariyesanavasena mahaṭṭhatā, vaṇijjāya yathāṭhitaṃyeva bhaṇḍaṃ gahetvā parivattanavasena appaṭṭhatā veditabbā. Vipajjamānanti avuṭṭhiativuṭṭhiādīhi kasikammaṃ, maṇisuvaṇṇādīsu acchekatādīhi ca vaṇijjakammaṃ appaphalaṃ hoti, mūlacchedampi pāpuṇāti. Vipariyāyena sampajjamānaṃ mahapphalaṃ cūḷantevāsikassa viya.
464. ஏவமேவ கோ²தி யதா² கஸிகம்மட்டா²னங் விபஜ்ஜமானங் அப்பப²லங் ஹோதி, ஏவங் க⁴ராவாஸகம்மட்டா²னம்பி. அகதகல்யாணோ ஹி காலங் கத்வா நிரயே நிப்³ப³த்ததி. மஹாத³த்தஸேனாபதி நாம கிரேகோ ப்³ராஹ்மணப⁴த்தோ அஹோஸி, தஸ்ஸ மரணஸமயே நிரயோ உபட்டா²ஸி. ஸோ ப்³ராஹ்மணேஹி ‘‘கிங் பஸ்ஸஸீ’’தி வுத்தோ? லோஹிதக⁴ரந்தி ஆஹ. ப்³ரஹ்மலோகோ போ⁴ ஏஸோதி. ப்³ரஹ்மலோகோ நாம போ⁴ கஹந்தி? உபரீதி. மய்ஹங் ஹெட்டா² உபட்டா²தீதி. கிஞ்சாபி ஹெட்டா² உபட்டா²தி , ததா²பி உபரீதி காலங் கத்வா நிரயே நிப்³ப³த்தோ. ‘‘இமினா அம்ஹாகங் யஞ்ஞே தோ³ஸோ தி³ன்னோ’’தி ஸஹஸ்ஸங் க³ஹெத்வா நீஹரிதுங் அத³ங்ஸு. ஸம்பஜ்ஜமானங் பன மஹப்ப²லங் ஹோதி. கதகல்யாணோ ஹி காலங் கத்வா ஸக்³கே³ நிப்³ப³த்ததி. ஸகலாய கு³த்திலவிமானகதா²ய தீ³பேதப்³ப³ங். யதா² பன தங் வணிஜ்ஜகம்மட்டா²னங் விபஜ்ஜமானங் அப்பப²லங் ஹோதி, ஏவங் ஸீலேஸு அபரிபூரகாரினோ அனேஸனாய யுத்தஸ்ஸ பப்³ப³ஜ்ஜாகம்மட்டா²னம்பி. ஏவரூபா ஹி நேவ ஜா²னாதி³ஸுக²ங் ந ஸக்³க³மொக்க²ங் லப⁴தி. ஸம்பஜ்ஜமானங் பன மஹப்ப²லங் ஹோதி. ஸீலானி ஹி பூரெத்வா விபஸ்ஸனங் வட்³டெ⁴ந்தோ அரஹத்தம்பி பாபுணாதி.
464.Evameva khoti yathā kasikammaṭṭhānaṃ vipajjamānaṃ appaphalaṃ hoti, evaṃ gharāvāsakammaṭṭhānampi. Akatakalyāṇo hi kālaṃ katvā niraye nibbattati. Mahādattasenāpati nāma kireko brāhmaṇabhatto ahosi, tassa maraṇasamaye nirayo upaṭṭhāsi. So brāhmaṇehi ‘‘kiṃ passasī’’ti vutto? Lohitagharanti āha. Brahmaloko bho esoti. Brahmaloko nāma bho kahanti? Uparīti. Mayhaṃ heṭṭhā upaṭṭhātīti. Kiñcāpi heṭṭhā upaṭṭhāti , tathāpi uparīti kālaṃ katvā niraye nibbatto. ‘‘Iminā amhākaṃ yaññe doso dinno’’ti sahassaṃ gahetvā nīharituṃ adaṃsu. Sampajjamānaṃ pana mahapphalaṃ hoti. Katakalyāṇo hi kālaṃ katvā sagge nibbattati. Sakalāya guttilavimānakathāya dīpetabbaṃ. Yathā pana taṃ vaṇijjakammaṭṭhānaṃ vipajjamānaṃ appaphalaṃ hoti, evaṃ sīlesu aparipūrakārino anesanāya yuttassa pabbajjākammaṭṭhānampi. Evarūpā hi neva jhānādisukhaṃ na saggamokkhaṃ labhati. Sampajjamānaṃ pana mahapphalaṃ hoti. Sīlāni hi pūretvā vipassanaṃ vaḍḍhento arahattampi pāpuṇāti.
ப்³ராஹ்மணா, போ⁴ கோ³தமோதி இத⁴ கிங் புச்சா²மீதி புச்ச²தி? ப்³ராஹ்மணா வத³ந்தி – ‘‘பப்³ப³ஜிதோ இமே பஞ்ச த⁴ம்மே பூரேதுங் ஸமத்தோ² நாம நத்தி², க³ஹட்டோ²வ பூரேதீ’’தி. ஸமணோ பன கோ³தமோ – ‘‘கி³ஹிஸ்ஸ வா அஹங் மாணவ பப்³ப³ஜிதஸ்ஸ வா’’தி புனப்புனங் வத³தி, நேவ பப்³ப³ஜிதங் முஞ்சதி, மய்ஹமேவ புச்ச²ங் மஞ்ஞே ந ஸல்லக்கே²தீதி சாக³ஸீஸேன பஞ்ச த⁴ம்மே புச்சா²மீதி புச்ச²தி. ஸசே தே அக³ரூதி ஸசே துய்ஹங் யதா² ப்³ராஹ்மணா பஞ்ஞபெந்தி, ததா² இத⁴ பா⁴ஸிதுங் பா⁴ரியங் ந ஹோதி, யதி³ ந கோசி அபா²ஸுகபா⁴வோ ஹோதி, பா⁴ஸஸ்ஸூதி அத்தோ². ந கோ² மே, போ⁴தி கிங் ஸந்தா⁴யாஹ? பண்டி³தபடிரூபகானஞ்ஹி ஸந்திகே கதே²துங் து³க்க²ங் ஹோதி, தே பதே³ பதே³ அக்க²ரே அக்க²ரே தோ³ஸமேவ வத³ந்தி. ஏகந்தபண்டி³தா பன கத²ங் ஸுத்வா ஸுகதி²தங் பஸங்ஸந்தி, து³க்கதி²தே பாளிபத³அத்த²ப்³யஞ்ஜனேஸு யங் யங் விருஜ்ஜ²தி, தங் தங் உஜுங் கத்வா தெ³ந்தி. ப⁴க³வதா ச ஸதி³ஸோ ஏகந்தபண்டி³தோ நாம நத்தி², தேனாஹ ‘‘ந கோ² மே, போ⁴ கோ³தம, க³ரு, யத்த²ஸ்ஸு ப⁴வந்தோ வா நிஸின்னோ ப⁴வந்தரூபோ வா’’தி. ஸச்சந்தி வசீஸச்சங். தபந்தி தபசரியங். ப்³ரஹ்மசரியந்தி மேது²னவிரதிங். அஜ்ஜே²னந்தி மந்தக³ஹணங். சாக³ந்தி ஆமிஸபரிச்சாக³ங்.
Brāhmaṇā, bho gotamoti idha kiṃ pucchāmīti pucchati? Brāhmaṇā vadanti – ‘‘pabbajito ime pañca dhamme pūretuṃ samattho nāma natthi, gahaṭṭhova pūretī’’ti. Samaṇo pana gotamo – ‘‘gihissa vā ahaṃ māṇava pabbajitassa vā’’ti punappunaṃ vadati, neva pabbajitaṃ muñcati, mayhameva pucchaṃ maññe na sallakkhetīti cāgasīsena pañca dhamme pucchāmīti pucchati. Sace te agarūti sace tuyhaṃ yathā brāhmaṇā paññapenti, tathā idha bhāsituṃ bhāriyaṃ na hoti, yadi na koci aphāsukabhāvo hoti, bhāsassūti attho. Na kho me, bhoti kiṃ sandhāyāha? Paṇḍitapaṭirūpakānañhi santike kathetuṃ dukkhaṃ hoti, te pade pade akkhare akkhare dosameva vadanti. Ekantapaṇḍitā pana kathaṃ sutvā sukathitaṃ pasaṃsanti, dukkathite pāḷipadaatthabyañjanesu yaṃ yaṃ virujjhati, taṃ taṃ ujuṃ katvā denti. Bhagavatā ca sadiso ekantapaṇḍito nāma natthi, tenāha ‘‘na kho me, bho gotama, garu, yatthassu bhavanto vā nisinno bhavantarūpo vā’’ti. Saccanti vacīsaccaṃ. Tapanti tapacariyaṃ. Brahmacariyanti methunaviratiṃ. Ajjhenanti mantagahaṇaṃ. Cāganti āmisapariccāgaṃ.
466. பாபிதோ ப⁴விஸ்ஸதீதி. அஜானநபா⁴வங் பாபிதோ ப⁴விஸ்ஸதி. ஏதத³வோசாதி ப⁴க³வதா அந்த⁴வேணூபமாய நிக்³க³ஹிதோ தங் பச்சாஹரிதுங் அஸக்கொந்தோ யதா² நாம து³ப்³ப³லஸுனகோ² மிக³ங் உட்ட²பெத்வா ஸாமிகஸ்ஸ அபி⁴முக²ங் கத்வா ஸயங் அபஸக்கதி, ஏவமேவங் ஆசரியங் அபதி³ஸந்தோ ஏவங் ‘‘ப்³ராஹ்மணோ’’திஆதி³வசனங் அவோச. தத்த² பொக்க²ரஸாதீதி இத³ங் தஸ்ஸ நாமங், ‘‘பொக்க²ரஸாயீ’’திபி வுச்சதி. தஸ்ஸ கிர காயோ ஸேதபொக்க²ரஸதி³ஸோ தே³வனக³ரே உஸ்ஸாபிதரஜததோரணங் விய ஸோப⁴தி, ஸீஸங் பனஸ்ஸ காளவண்ணஇந்த³னீலமயங் விய, மஸ்ஸுபி சந்த³மண்ட³லே காளமேக⁴ராஜி விய கா²யதி, அக்கீ²னி நீலுப்பலஸதி³ஸானி, நாஸா ரஜதபனாளிகா விய ஸுவட்டிதா ஸுபரிஸுத்³தா⁴, ஹத்த²பாத³தலானி சேவ முக²ஞ்ச கதலாகா²ரஸபரிகம்மங் விய ஸோப⁴தி. அதிவிய ஸோப⁴க்³க³ப்பத்தோ ப்³ராஹ்மணஸ்ஸ அத்தபா⁴வோ. அராஜகே டா²னே ராஜானங் காதுங் யுத்தமிமங் ப்³ராஹ்மணங், ஏவமேஸ ஸஸ்ஸிரிகோ, இதி நங் பொக்க²ரஸதி³ஸத்தா ‘‘பொக்க²ரஸாதீ’’தி ஸஞ்ஜானந்தி, பொக்க²ரே பன ஸோ நிப்³ப³த்தோ, ந மாதுகுச்சி²யந்தி இதி நங் பொக்க²ரே ஸயிதத்தா ‘‘பொக்க²ரஸாயீ’’திபி ஸஞ்ஜானந்தி. ஓபமஞ்ஞோதி உபமஞ்ஞகொ³த்தோ. ஸுப⁴க³வனிகோதி உக்கட்டா²ய ஸுப⁴க³வனஸ்ஸ இஸ்ஸரோ. ஹஸ்ஸகங்யேவாதி ஹஸிதப்³ப³கஞ்ஞேவ. நாமகங்யேவாதி லாமகங்யேவ. ததே³வ தங் அத்தா²பா⁴வேன ரித்தகங். ரித்தகத்தா ச துச்ச²கங். இதா³னி நங் ப⁴க³வா ஸாசரியகங் நிக்³க³ண்ஹிதுங் கிங் பன மாணவாதிஆதி³மாஹ.
466.Pāpito bhavissatīti. Ajānanabhāvaṃ pāpito bhavissati. Etadavocāti bhagavatā andhaveṇūpamāya niggahito taṃ paccāharituṃ asakkonto yathā nāma dubbalasunakho migaṃ uṭṭhapetvā sāmikassa abhimukhaṃ katvā sayaṃ apasakkati, evamevaṃ ācariyaṃ apadisanto evaṃ ‘‘brāhmaṇo’’tiādivacanaṃ avoca. Tattha pokkharasātīti idaṃ tassa nāmaṃ, ‘‘pokkharasāyī’’tipi vuccati. Tassa kira kāyo setapokkharasadiso devanagare ussāpitarajatatoraṇaṃ viya sobhati, sīsaṃ panassa kāḷavaṇṇaindanīlamayaṃ viya, massupi candamaṇḍale kāḷamegharāji viya khāyati, akkhīni nīluppalasadisāni, nāsā rajatapanāḷikā viya suvaṭṭitā suparisuddhā, hatthapādatalāni ceva mukhañca katalākhārasaparikammaṃ viya sobhati. Ativiya sobhaggappatto brāhmaṇassa attabhāvo. Arājake ṭhāne rājānaṃ kātuṃ yuttamimaṃ brāhmaṇaṃ, evamesa sassiriko, iti naṃ pokkharasadisattā ‘‘pokkharasātī’’ti sañjānanti, pokkhare pana so nibbatto, na mātukucchiyanti iti naṃ pokkhare sayitattā ‘‘pokkharasāyī’’tipi sañjānanti. Opamaññoti upamaññagotto. Subhagavanikoti ukkaṭṭhāya subhagavanassa issaro. Hassakaṃyevāti hasitabbakaññeva. Nāmakaṃyevāti lāmakaṃyeva. Tadeva taṃ atthābhāvena rittakaṃ. Rittakattā ca tucchakaṃ. Idāni naṃ bhagavā sācariyakaṃ niggaṇhituṃ kiṃ pana māṇavātiādimāha.
467. தத்த² கதமா நேஸங் ஸெய்யோதி கதமா வாசா தேஸங் ஸெய்யோ, பாஸங்ஸதரோதி அத்தோ². ஸம்முச்சாதி ஸம்முதியா லோகவோஹாரேன. மந்தாதி துலயித்வா பரிக்³க³ண்ஹித்வா. படிஸங்கா²யாதி ஜானித்வா. அத்த²ஸங்ஹிதந்தி காரணனிஸ்ஸிதங். ஏவங் ஸந்தேதி லோகவோஹாரங் அமுஞ்சித்வா துலயித்வா ஜானித்வா காரணனிஸ்ஸிதங் கத்வா கதி²தாய ஸெய்யபா⁴வே ஸதி. ஆவுதோதி ஆவரிதோ. நிவுதோதி நிவாரிதோ. ஓபு²டோதி ஓனத்³தோ⁴. பரியோனத்³தோ⁴தி பலிவேடி²தோ.
467. Tattha katamā nesaṃ seyyoti katamā vācā tesaṃ seyyo, pāsaṃsataroti attho. Sammuccāti sammutiyā lokavohārena. Mantāti tulayitvā pariggaṇhitvā. Paṭisaṅkhāyāti jānitvā. Atthasaṃhitanti kāraṇanissitaṃ. Evaṃ santeti lokavohāraṃ amuñcitvā tulayitvā jānitvā kāraṇanissitaṃ katvā kathitāya seyyabhāve sati. Āvutoti āvarito. Nivutoti nivārito. Ophuṭoti onaddho. Pariyonaddhoti paliveṭhito.
468. க³தி⁴தோதிஆதீ³னி வுத்தத்தா²னேவ. ஸசே தங், போ⁴ கோ³தம, டா²னந்தி ஸசே ஏதங் காரணமத்தி². ஸ்வாஸ்ஸாதி தூ⁴மசா²ரிகாதீ³னங் அபா⁴வேன ஸோ அஸ்ஸ அக்³கி³ அச்சிமா ச வண்ணிமா ச பப⁴ஸ்ஸரோ சாதி. ததூ²பமாஹங் மாணவாதி தப்படிபா⁴க³ங் அஹங். இத³ங் வுத்தங் ஹோதி – யதே²வ ஹி திணகட்டு²பாதா³னங் படிச்ச ஜலமானோ அக்³கி³ தூ⁴மசா²ரிகங்கா³ரானங் அத்தி²தாய ஸதோ³ஸோ ஹோதி , ஏவமேவங் பஞ்ச காமகு³ணே படிச்ச உப்பன்னா பீதி ஜாதிஜராப்³யாதி⁴மரணஸோகாதீ³னங் அத்தி²தாய ஸதோ³ஸா. யதா² பன பரிச்சத்ததிணகட்டு²பாதா³னோ தூ⁴மாதீ³னங் அபா⁴வேன பரிஸுத்³தோ⁴, ஏவமேவங் லோகுத்தரஜ்ஜா²னத்³வயஸம்பயுத்தா பீதி ஜாதிஆதீ³னங் அபா⁴வேன பரிஸுத்³தா⁴தி அத்தோ².
468.Gadhitotiādīni vuttatthāneva. Sace taṃ, bho gotama, ṭhānanti sace etaṃ kāraṇamatthi. Svāssāti dhūmachārikādīnaṃ abhāvena so assa aggi accimā ca vaṇṇimā ca pabhassaro cāti. Tathūpamāhaṃ māṇavāti tappaṭibhāgaṃ ahaṃ. Idaṃ vuttaṃ hoti – yatheva hi tiṇakaṭṭhupādānaṃ paṭicca jalamāno aggi dhūmachārikaṅgārānaṃ atthitāya sadoso hoti , evamevaṃ pañca kāmaguṇe paṭicca uppannā pīti jātijarābyādhimaraṇasokādīnaṃ atthitāya sadosā. Yathā pana pariccattatiṇakaṭṭhupādāno dhūmādīnaṃ abhāvena parisuddho, evamevaṃ lokuttarajjhānadvayasampayuttā pīti jātiādīnaṃ abhāvena parisuddhāti attho.
469. இதா³னி யே தே ப்³ராஹ்மணேஹி சாக³ஸீஸேன பஞ்ச த⁴ம்மா பஞ்ஞத்தா, தேபி யஸ்மா பஞ்சேவ ஹுத்வா ந நிச்சலா திட்ட²ந்தி, அனுகம்பாஜாதிகேன ஸத்³தி⁴ங் ச² ஆபஜ்ஜந்தி. தஸ்மா தங் தோ³ஸங் த³ஸ்ஸேதுங் யே தே மாணவாதிஆதி³மாஹ. தத்த² அனுகம்பாஜாதிகந்தி அனுகம்பாஸபா⁴வங்.
469. Idāni ye te brāhmaṇehi cāgasīsena pañca dhammā paññattā, tepi yasmā pañceva hutvā na niccalā tiṭṭhanti, anukampājātikena saddhiṃ cha āpajjanti. Tasmā taṃ dosaṃ dassetuṃ ye te māṇavātiādimāha. Tattha anukampājātikanti anukampāsabhāvaṃ.
கத்த² ப³ஹுலங் ஸமனுபஸ்ஸஸீதி இத³ங் ப⁴க³வா யஸ்மா – ‘‘ஏஸ இமே பஞ்ச த⁴ம்மே பப்³ப³ஜிதோ பரிபூரேதுங் ஸமத்தோ² நாம நத்தி², க³ஹட்டோ² பரிபூரேதீ’’தி ஆஹ, தஸ்மா – ‘‘பப்³ப³ஜிதோவ இமே பூரேதி, க³ஹட்டோ² பூரேதுங் ஸமத்தோ² நாம நத்தீ²’’தி தேனேவ முகே²ன ப⁴ணாபேதுங் புச்ச²தி.
Kattha bahulaṃ samanupassasīti idaṃ bhagavā yasmā – ‘‘esa ime pañca dhamme pabbajito paripūretuṃ samattho nāma natthi, gahaṭṭho paripūretī’’ti āha, tasmā – ‘‘pabbajitova ime pūreti, gahaṭṭho pūretuṃ samattho nāma natthī’’ti teneva mukhena bhaṇāpetuṃ pucchati.
ந ஸததங் ஸமிதங் ஸச்சவாதீ³திஆதீ³ஸு க³ஹட்டோ² அஞ்ஞஸ்மிங் அஸதி வளஞ்ஜனகமுஸாவாத³ம்பி கரோதியேவ, பப்³ப³ஜிதா அஸினா ஸீஸே சி²ஜ்ஜந்தேபி த்³வே கதா² ந கதெ²ந்தி. க³ஹட்டோ² ச அந்தோதேமாஸமத்தம்பி ஸிக்கா²பத³ங் ரக்கி²துங் ந ஸக்கோதி, பப்³ப³ஜிதோ நிச்சமேவ தபஸ்ஸீ ஸீலவா தபனிஸ்ஸிதகோ ஹோதி. க³ஹட்டோ² மாஸஸ்ஸ அட்ட²தி³வஸமத்தம்பி உபோஸத²கம்மங் காதுங் ந ஸக்கோதி, பப்³ப³ஜிதா யாவஜீவங் ப்³ரஹ்மசாரினோ ஹொந்தி. க³ஹட்டோ² ரதனஸுத்தமங்க³லஸுத்தமத்தம்பி பொத்த²கே லிகி²த்வா ட²பேதி, பப்³ப³ஜிதா நிச்சங் ஸஜ்ஜா²யந்தி. க³ஹட்டோ² ஸலாகப⁴த்தம்பி அக²ண்ட³ங் கத்வா தா³துங் ந ஸக்கோதி, பப்³ப³ஜிதா அஞ்ஞஸ்மிங் அஸதி காகஸுனகா²தீ³னம்பி பிண்ட³ங் தெ³ந்தி, ப⁴ண்ட³க்³கா³ஹகத³ஹரஸ்ஸபி பத்தே பக்கி²பந்தேவாதி ஏவமத்தோ² த³ட்ட²ப்³போ³. சித்தஸ்ஸாஹமேதேந்தி அஹங் ஏதே பஞ்ச த⁴ம்மே மெத்தசித்தஸ்ஸ பரிவாரே வதா³மீதி அத்தோ².
Na satataṃ samitaṃ saccavādītiādīsu gahaṭṭho aññasmiṃ asati vaḷañjanakamusāvādampi karotiyeva, pabbajitā asinā sīse chijjantepi dve kathā na kathenti. Gahaṭṭho ca antotemāsamattampi sikkhāpadaṃ rakkhituṃ na sakkoti, pabbajito niccameva tapassī sīlavā tapanissitako hoti. Gahaṭṭho māsassa aṭṭhadivasamattampi uposathakammaṃ kātuṃ na sakkoti, pabbajitā yāvajīvaṃ brahmacārino honti. Gahaṭṭho ratanasuttamaṅgalasuttamattampi potthake likhitvā ṭhapeti, pabbajitā niccaṃ sajjhāyanti. Gahaṭṭho salākabhattampi akhaṇḍaṃ katvā dātuṃ na sakkoti, pabbajitā aññasmiṃ asati kākasunakhādīnampi piṇḍaṃ denti, bhaṇḍaggāhakadaharassapi patte pakkhipantevāti evamattho daṭṭhabbo. Cittassāhametenti ahaṃ ete pañca dhamme mettacittassa parivāre vadāmīti attho.
470. ஜாதவத்³தோ⁴தி ஜாதோ ச வட்³டி⁴தோ ச. யோ ஹி கேவலங் தத்த² ஜாதோவ ஹோதி, அஞ்ஞத்த² வட்³டி⁴தோ, தஸ்ஸ ஸமந்தா கா³மமக்³கா³ ந ஸப்³ப³ஸோ பச்சக்கா² ஹொந்தி, தஸ்மா ஜாதவத்³தோ⁴தி ஆஹ. ஜாதவத்³தோ⁴பி ஹி யோ சிரங் நிக்க²ந்தோ, தஸ்ஸ ந ஸப்³ப³ஸோ பச்சக்கா² ஹொந்தி, தஸ்மா தாவதே³வ அவஸடந்தி ஆஹ, தங்க²ணமேவ நிக்க²ந்தந்தி அத்தோ². த³ந்தா⁴யிதத்தந்தி ‘‘அயங் நு கோ² மக்³கோ³ அயங் ந நு கோ²’’தி கங்கா²வஸேன சிராயிதத்தங். வித்தா²யிதத்தந்தி யதா² ஸுகு²மங் அத்த²ஜாதங் ஸஹஸா புச்சி²தஸ்ஸ கஸ்ஸசி ஸரீரங் த²த்³த⁴பா⁴வங் க³ண்ஹாதி, ஏவங் த²த்³த⁴பா⁴வக³ஹணங். நத்வேவாதி இமினா ஸப்³ப³ஞ்ஞுதஞ்ஞாணஸ்ஸ அப்படிஹதபா⁴வங் த³ஸ்ஸேதி. தஸ்ஸ ஹி புரிஸஸ்ஸ மாராவட்டனாதீ³னங் வஸேன ஸியா ஞாணஸ்ஸ படிகா⁴தோ, தேன ஸோ த³ந்தா⁴யெய்ய வா வித்தா²யெய்ய வா, ஸப்³ப³ஞ்ஞுதஞ்ஞாணங் பன அப்படிஹதங், ந ஸக்கா தஸ்ஸ கேனசி அந்தராயோ காதுந்தி தீ³பேதி.
470.Jātavaddhoti jāto ca vaḍḍhito ca. Yo hi kevalaṃ tattha jātova hoti, aññattha vaḍḍhito, tassa samantā gāmamaggā na sabbaso paccakkhā honti, tasmā jātavaddhoti āha. Jātavaddhopi hi yo ciraṃ nikkhanto, tassa na sabbaso paccakkhā honti, tasmā tāvadeva avasaṭanti āha, taṃkhaṇameva nikkhantanti attho. Dandhāyitattanti ‘‘ayaṃ nu kho maggo ayaṃ na nu kho’’ti kaṅkhāvasena cirāyitattaṃ. Vitthāyitattanti yathā sukhumaṃ atthajātaṃ sahasā pucchitassa kassaci sarīraṃ thaddhabhāvaṃ gaṇhāti, evaṃ thaddhabhāvagahaṇaṃ. Natvevāti iminā sabbaññutaññāṇassa appaṭihatabhāvaṃ dasseti. Tassa hi purisassa mārāvaṭṭanādīnaṃ vasena siyā ñāṇassa paṭighāto, tena so dandhāyeyya vā vitthāyeyya vā, sabbaññutaññāṇaṃ pana appaṭihataṃ, na sakkā tassa kenaci antarāyo kātunti dīpeti.
ஸெய்யதா²பி மாணவ ப³லவா ஸங்க²த⁴மோதி எத்த² ப³லவாதி ப³லஸம்பன்னோ. ஸங்க²த⁴மோதி ஸங்க²த⁴மகோ. அப்பகஸிரேனாதி அகிச்சே²ன அது³க்கே²ன. து³ப்³ப³லோ ஹி ஸங்க²த⁴மகோ ஸங்க²ங் த⁴மந்தோபி ந ஸக்கோதி சதஸ்ஸோ தி³ஸா ஸரேன விஞ்ஞாபேதுங், நாஸ்ஸ ஸங்க²ஸத்³தோ³ ஸப்³ப³ஸோ ப²ரி. ப³லவதோ பன விப்பா²ரிகோ ஹோதி, தஸ்மா ப³லவாதி ஆஹ. மெத்தாய சேதோவிமுத்தியாதி எத்த² மெத்தாயாதி வுத்தே உபசாரோபி அப்பனாபி வட்டதி, சேதோவிமுத்தியாதி வுத்தே பன அப்பனாவ வட்டதி. யங் பமாணகதங் கம்மந்தி பமாணகதங் கம்மங் நாம காமாவசரங் வுச்சதி, அப்பமாணகதங் கம்மங் நாம ரூபாரூபாவசரங். தேஸுபி இத⁴ ப்³ரஹ்மவிஹாரகம்மஞ்ஞேவ அதி⁴ப்பேதங். தஞ்ஹி பமாணங் அதிக்கமித்வா ஓதி⁴ஸகஅனோதி⁴ஸக தி³ஸாப²ரணவஸேன வட்³டெ⁴த்வா கதத்தா அப்பமாணகதந்தி வுச்சதி. ந தங் தத்ராவஸிஸ்ஸதி, ந தங் தத்ராவதிட்ட²தீதி தங் காமாவசரகம்மங் தஸ்மிங் ரூபாரூபாவசரகம்மே ந ஓஹீயதி ந திட்ட²தி. கிங் வுத்தங் ஹோதி? காமாவசரகம்மங் தஸ்ஸ ரூபாரூபாவசரகம்மஸ்ஸ அந்தரா லக்³கி³துங் வா டா²துங் வா ரூபாரூபாவசரகம்மங் ப²ரித்வா பரியாதி³யித்வா அத்தனோ ஓகாஸங் க³ஹெத்வா பதிட்டா²துங் வா ந ஸக்கோதி, அத² கோ² ரூபாரூபாவசரகம்மமேவ காமாவசரங் மஹோகோ⁴ விய பரித்தஉத³கங் ப²ரித்வா பரியாதி³யித்வா அத்தனோ ஓகாஸங் க³ஹெத்வா திட்ட²தி, தஸ்ஸ விபாகங் படிபா³ஹித்வா ஸயமேவ ப்³ரஹ்மஸஹப்³யதங் உபனேதீதி. ஸேஸங் ஸப்³ப³த்த² உத்தானமேவாதி.
Seyyathāpi māṇava balavā saṅkhadhamoti ettha balavāti balasampanno. Saṅkhadhamoti saṅkhadhamako. Appakasirenāti akicchena adukkhena. Dubbalo hi saṅkhadhamako saṅkhaṃ dhamantopi na sakkoti catasso disā sarena viññāpetuṃ, nāssa saṅkhasaddo sabbaso phari. Balavato pana vipphāriko hoti, tasmā balavāti āha. Mettāya cetovimuttiyāti ettha mettāyāti vutte upacāropi appanāpi vaṭṭati, cetovimuttiyāti vutte pana appanāva vaṭṭati. Yaṃ pamāṇakataṃ kammanti pamāṇakataṃ kammaṃ nāma kāmāvacaraṃ vuccati, appamāṇakataṃ kammaṃ nāma rūpārūpāvacaraṃ. Tesupi idha brahmavihārakammaññeva adhippetaṃ. Tañhi pamāṇaṃ atikkamitvā odhisakaanodhisaka disāpharaṇavasena vaḍḍhetvā katattā appamāṇakatanti vuccati. Na taṃ tatrāvasissati, na taṃ tatrāvatiṭṭhatīti taṃ kāmāvacarakammaṃ tasmiṃ rūpārūpāvacarakamme na ohīyati na tiṭṭhati. Kiṃ vuttaṃ hoti? Kāmāvacarakammaṃ tassa rūpārūpāvacarakammassa antarā laggituṃ vā ṭhātuṃ vā rūpārūpāvacarakammaṃ pharitvā pariyādiyitvā attano okāsaṃ gahetvā patiṭṭhātuṃ vā na sakkoti, atha kho rūpārūpāvacarakammameva kāmāvacaraṃ mahogho viya parittaudakaṃ pharitvā pariyādiyitvā attano okāsaṃ gahetvā tiṭṭhati, tassa vipākaṃ paṭibāhitvā sayameva brahmasahabyataṃ upanetīti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸுப⁴ஸுத்தவண்ணனா நிட்டி²தா.
Subhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. ஸுப⁴ஸுத்தங் • 9. Subhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. ஸுப⁴ஸுத்தவண்ணனா • 9. Subhasuttavaṇṇanā
