| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. ஸுப்³ரஹ்மஸுத்தவண்ணனா
7. Subrahmasuttavaṇṇanā
98. ஸுப்³ரஹ்மாதி தஸ்ஸ தே³வபுத்தஸ்ஸ நாமங். தஸ்ஸ ஸத்து² ஸந்திகூபஸங்கமனஸ்ஸ காரணங் த³ஸ்ஸெந்தோ ‘‘ஸோ கிரா’’திஆதி³மாஹ. ததே³வ ஸோகங் தஸ்ஸ தே³வபுத்தஸ்ஸ அட்டு²ப்பத்தி. அச்ச²ராஸங்க⁴பரிவுதோதி ஸஹஸ்ஸமத்தேன அச்ச²ராஸங்கே⁴ன பரிவுதோ. நந்த³னகீளிகந்தி நந்த³னவனகீளிகங். ஹத்த²ங் ஆக³ச்ச²தீதி ஹத்த²க³ய்ஹுபகோ³ ஹோதி. க³ந்தெ²ந்தீதி எத்த² மாலாவேட²னம்பி கி²ட்³டா³பஸுததாயாதி த³ட்ட²ப்³ப³ங். அஞ்ஞதா² புப்பா²னியேவ தாய தாய சித்தஸ்ஸ வஸேன மாலாபா⁴வேன ஹத்த²ங் உபக³ச்ச²ந்தீதி. உபச்சே²த³ககம்மவஸேனாதி தஸ்மிங் தே³வலோகே ஆயுஸேஸே ஸதி ஏவ தஸ்ஸ பன உபகா⁴தகஸ்ஸ லத்³தோ⁴காஸஸ்ஸ பாபகம்மஸ்ஸ வஸேன. ‘‘பஹாரோ’’தி தி³வஸஸ்ஸ ததியோ பா⁴கோ³ வுச்சதி, தஸ்மா ஏகப்பஹாரேனேவாதி ஏகவேலாயமேவாதி அத்தோ².
98.Subrahmāti tassa devaputtassa nāmaṃ. Tassa satthu santikūpasaṅkamanassa kāraṇaṃ dassento ‘‘so kirā’’tiādimāha. Tadeva sokaṃ tassa devaputtassa aṭṭhuppatti. Accharāsaṅghaparivutoti sahassamattena accharāsaṅghena parivuto. Nandanakīḷikanti nandanavanakīḷikaṃ. Hatthaṃ āgacchatīti hatthagayhupago hoti. Ganthentīti ettha mālāveṭhanampi khiḍḍāpasutatāyāti daṭṭhabbaṃ. Aññathā pupphāniyeva tāya tāya cittassa vasena mālābhāvena hatthaṃ upagacchantīti. Upacchedakakammavasenāti tasmiṃ devaloke āyusese sati eva tassa pana upaghātakassa laddhokāsassa pāpakammassa vasena. ‘‘Pahāro’’ti divasassa tatiyo bhāgo vuccati, tasmā ekappahārenevāti ekavelāyamevāti attho.
பியவத்து²கஸோகேனாதி பியவத்து²னிமித்தகேன ஸோகேன. ருப்பமானோதி பீளியமானோ. ஸத்தமே தி³வஸேதி மனுஸ்ஸக³ணனாய ஸத்தமே தி³வஸே. தத்தே²வாதி தஸ்மிங்யேவ நிரயே நிப்³ப³த்திதப்³ப³ங் இமினா தாஹி ச ஸஹேவ புப்³பே³ தஸ்ஸ பாபகம்மஸ்ஸ கதத்தா. ருப்பீதி சித்தஸந்தாஸங் ஆபஜ்ஜி. நித்³த⁴மிதுந்தி நீஹரிதுங் அபனேதுங். ஸத்து² ஸந்திகங் க³ந்த்வாதி தாஹி பஞ்சஸதாஹி அச்ச²ராஹி ஸத்³தி⁴ங் ப⁴க³வதோ ஸந்திகங் க³ந்த்வா.
Piyavatthukasokenāti piyavatthunimittakena sokena. Ruppamānoti pīḷiyamāno. Sattame divaseti manussagaṇanāya sattame divase. Tatthevāti tasmiṃyeva niraye nibbattitabbaṃ iminā tāhi ca saheva pubbe tassa pāpakammassa katattā. Ruppīti cittasantāsaṃ āpajji. Niddhamitunti nīharituṃ apanetuṃ. Satthu santikaṃ gantvāti tāhi pañcasatāhi accharāhi saddhiṃ bhagavato santikaṃ gantvā.
இத³ந்தி அத்தனோ சித்தங் த³ஸ்ஸேதி ஆஸன்னபச்சக்க²பா⁴வதோ. நிச்சந்தி ஸதா³. ஸ்வாயங் நிச்சத்தோ² அதி⁴ப்பாயவஸேன க³ஹேதப்³போ³தி தத்த² பஹாதப்³ப³ங் க³ஹேதப்³ப³ஞ்ச த³ஸ்ஸெந்தோ ‘‘தே³வலோகே’’திஆதி³மாஹ. ந க³ஹேதப்³போ³ ஹேதுபவத்திதோ புப்³பே³ தஸ்ஸ உத்ராஸஸ்ஸ அபா⁴வதோ. தேஸூதி து³க்கே²ஸு. தானி ஹி ஹேதுபச்சயேஹி கத்தப்³ப³தோ கா³தா²யங் ‘‘கிச்சே²ஸூ’’தி வுத்தானி. கிச்சே²ஸூதி வா கிச்ச²னிமித்தங். யாஸஞ்ஹி பயோக³விபத்தீனங் வஸேனஸ்ஸ தானி து³க்கா²னி உப்பஜ்ஜெய்யுங், தங்னிமித்தந்தி அத்தோ². தா ஹி அஸ்ஸ பயோக³விபத்தியோ க³திவிபத்தியோ ஸத்து² ஸந்திகங் உபக³மனேன ஹாயெய்யுங். நிப்³ப³த்தானங் தி³ட்டா²னீதி நிப்³ப³த்தானங் வஸேன தி³ட்டா²னி து³க்கா²னி. தேஸு ச து³க்கே²ஸு. ஸப்³ப³த்த² நிமித்தத்தே² பு⁴ம்மங். ட³ய்ஹமானோ விய சித்தஸந்தாபேன.
Idantiattano cittaṃ dasseti āsannapaccakkhabhāvato. Niccanti sadā. Svāyaṃ niccattho adhippāyavasena gahetabboti tattha pahātabbaṃ gahetabbañca dassento ‘‘devaloke’’tiādimāha. Na gahetabbo hetupavattito pubbe tassa utrāsassa abhāvato. Tesūti dukkhesu. Tāni hi hetupaccayehi kattabbato gāthāyaṃ ‘‘kicchesū’’ti vuttāni. Kicchesūti vā kicchanimittaṃ. Yāsañhi payogavipattīnaṃ vasenassa tāni dukkhāni uppajjeyyuṃ, taṃnimittanti attho. Tā hi assa payogavipattiyo gativipattiyo satthu santikaṃ upagamanena hāyeyyuṃ. Nibbattānaṃ diṭṭhānīti nibbattānaṃ vasena diṭṭhāni dukkhāni. Tesu ca dukkhesu. Sabbattha nimittatthe bhummaṃ. Ḍayhamāno viya cittasantāpena.
சத்தாரிபி ஸச்சானி பு³ஜ்ஜ²தி படிவிஜ்ஜ²தீதி போ³தி⁴, ஸதிஆதி³த⁴ம்மஸாமக்³கீ³, தஸ்மா பொ³ஜ்ஜா² போ³தி⁴தோ. ஸா பன போ³தி⁴ பா⁴வனாகாரேனேவ பவத்ததி, அஞ்ஞத்ரஸத்³த³யோகே³ன ச ‘‘பொ³ஜ்ஜா²’’தி நிஸ்ஸக்கவசனந்தி தத³த்த²ங் த³ஸ்ஸெந்தோ முஞ்சித்வாபத³ங் அபெக்கி²த்வா ‘‘பொ³ஜ்ஜ²ங்க³பா⁴வன’’ந்தி ஆஹ. தபோகு³ணந்தி து⁴தத⁴ம்மமாஹ. ஸோ ஹி தண்ஹாலோலுப்பஸ்ஸ தபனதோ தபோ, ஸயங் கு³ணஸபா⁴வத்தா கு³ணஸன்னிஸ்ஸயதோ ச கு³ணந்தி. தேனாஹ ‘‘து⁴தங்க³ஸங்கா²தங் தபோகு³ண’’ந்தி. ஸப்³பே³ ஸங்கா²ரக³தா நிஸ்ஸஜ்ஜீயந்தி எத்தா²தி ஸப்³ப³னிஸ்ஸக்³கோ³, அஸங்க²ததா⁴தூதி ஆஹ ‘‘ஸப்³ப³னிஸ்ஸக்³கா³தி நிப்³பா³னதோ’’தி.
Cattāripi saccāni bujjhati paṭivijjhatīti bodhi, satiādidhammasāmaggī, tasmā bojjhā bodhito. Sā pana bodhi bhāvanākāreneva pavattati, aññatrasaddayogena ca ‘‘bojjhā’’ti nissakkavacananti tadatthaṃ dassento muñcitvāpadaṃ apekkhitvā ‘‘bojjhaṅgabhāvana’’nti āha. Tapoguṇanti dhutadhammamāha. So hi taṇhāloluppassa tapanato tapo, sayaṃ guṇasabhāvattā guṇasannissayato ca guṇanti. Tenāha ‘‘dhutaṅgasaṅkhātaṃ tapoguṇa’’nti. Sabbe saṅkhāragatā nissajjīyanti etthāti sabbanissaggo, asaṅkhatadhātūti āha ‘‘sabbanissaggāti nibbānato’’ti.
இந்த்³ரியஸங்வரோவ பட²மங் வேதி³தப்³போ³ படிபத்திக்கமவஸேன தஸ்ஸேவ பட²மத்தா. தங் பன படிபத்திக்கமங் த³ஸ்ஸேதுங் ‘‘இந்த்³ரியஸங்வரே ஹீ’’திஆதி³மாஹ. நிப்பரியாயதோ மக்³க³பரியாபன்னா ஏவ பொ³ஜ்ஜ²ங்கா³தி ஆஹ ‘‘ஸஹவிபஸ்ஸனாய பொ³ஜ்ஜ²ங்கே³’’தி. தஸ்ஸாதி ததா²பா⁴வேன தஸ்ஸ யோகி³னோ. யஸ்மா தே³வபுத்தஸ்ஸ ஸத்தா² தங் கா³த²ங் வத்வா உபரி ச ஸச்சானி பகாஸேஸி, தஸ்மா வுத்தங் ‘‘ப⁴க³வா சதுஸச்சவஸேன தே³ஸனங் வினிவத்தேஸீ’’தி. தே³வபுத்தோ ஸோதாபத்திப²லே பதிட்ட²ஹீதி காமங் தஸ்ஸேவ விஸேஸாதி⁴க³மோ இதா⁴க³தோ, பஞ்சஸதமத்தாஹி பன அச்ச²ராஹி ஸத்³தி⁴ங் ஸோதாபத்திப²லே பதிட்ட²ஹீதி வேதி³தப்³ப³ங். தேனாஹ மஹாஸதிபட்டா²னஸுத்தவண்ணனாயங் (தீ³॰ நி॰ அட்ட²॰ 2.373; ம॰ நி॰ அட்ட²॰ 1.106) ‘‘ஸோ தே³ஸனாபரியோஸானே பஞ்சஹி அச்ச²ராஸதேஹி ஸத்³தி⁴ங் ஸோதாபத்திப²லே பதிட்டா²ய தங் ஸம்பத்திங் தா²வரங் கத்வா தே³வலோகமேவ அக³மாஸீ’’தி.
Indriyasaṃvarovapaṭhamaṃ veditabbo paṭipattikkamavasena tasseva paṭhamattā. Taṃ pana paṭipattikkamaṃ dassetuṃ ‘‘indriyasaṃvare hī’’tiādimāha. Nippariyāyato maggapariyāpannā eva bojjhaṅgāti āha ‘‘sahavipassanāya bojjhaṅge’’ti. Tassāti tathābhāvena tassa yogino. Yasmā devaputtassa satthā taṃ gāthaṃ vatvā upari ca saccāni pakāsesi, tasmā vuttaṃ ‘‘bhagavā catusaccavasena desanaṃ vinivattesī’’ti. Devaputto sotāpattiphale patiṭṭhahīti kāmaṃ tasseva visesādhigamo idhāgato, pañcasatamattāhi pana accharāhi saddhiṃ sotāpattiphale patiṭṭhahīti veditabbaṃ. Tenāha mahāsatipaṭṭhānasuttavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) ‘‘so desanāpariyosāne pañcahi accharāsatehi saddhiṃ sotāpattiphale patiṭṭhāya taṃ sampattiṃ thāvaraṃ katvā devalokameva agamāsī’’ti.
ஸுப்³ரஹ்மஸுத்தவண்ணனா நிட்டி²தா.
Subrahmasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. ஸுப்³ரஹ்மஸுத்தங் • 7. Subrahmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. ஸுப்³ரஹ்மஸுத்தவண்ணனா • 7. Subrahmasuttavaṇṇanā
