| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. ஸூசிலோமஸுத்தவண்ணனா
3. Sūcilomasuttavaṇṇanā
237. க³யாய அவிதூ³ரே ப⁴வோ கா³மோ ‘‘க³யா’’தி வுத்தோதி ஆஹ ‘‘க³யாய’’ந்தி, தேனாஹ ‘‘க³யாய அவிதூ³ரே நிவிட்ட²கா³மங் உபனிஸாயாதி அத்தோ²’’தி. கோ³சரகா³மனித³ஸ்ஸனங் ஹேதங். இத³ங் உபரி இத³ங் ஹெட்டா²தி நத்தி² உப்படிபாடியோ மஞ்சபாதா³னங் த்³வீஸு பஸ்ஸேஸு தீ³க⁴பா⁴வேன. ப³லிகம்மத்தா²ய கதங் தே³வதாதி⁴ட்டா²னந்தி அதி⁴ப்பாயேன தே³வட்டா²னே ட²பெந்தி. அட்ட²பாத³மஞ்சஸதி³ஸோ கிர ஸோ ஹெட்டு²பரிபரிவத்தேதப்³ப³தோ. கதி²னஸிப்³ப³னஸூசி கதி²னஸூசி. அபச்சத்த²ரித்வாதி கிஞ்சி ஸங்கி⁴கஸேனாஸனஸ்ஸ உபரி படிச்ச²த³னங் அபச்சத்த²ரித்வா. க³வச்சி²விஜ்ஜி²தங் வியாதி தேஹி ஸூசிலோமேஹி க³வச்சி²ஜாலங் விய க³தங் ஸப்³ப³ஸோ ஸமோஹதங்.
237. Gayāya avidūre bhavo gāmo ‘‘gayā’’ti vuttoti āha ‘‘gayāya’’nti, tenāha ‘‘gayāya avidūre niviṭṭhagāmaṃ upanisāyāti attho’’ti. Gocaragāmanidassanaṃ hetaṃ. Idaṃ upari idaṃ heṭṭhāti natthi uppaṭipāṭiyo mañcapādānaṃ dvīsu passesu dīghabhāvena. Balikammatthāya kataṃ devatādhiṭṭhānanti adhippāyena devaṭṭhāne ṭhapenti. Aṭṭhapādamañcasadiso kira so heṭṭhupariparivattetabbato. Kathinasibbanasūci kathinasūci. Apaccattharitvāti kiñci saṅghikasenāsanassa upari paṭicchadanaṃ apaccattharitvā. Gavacchivijjhitaṃ viyāti tehi sūcilomehi gavacchijālaṃ viya gataṃ sabbaso samohataṃ.
இதா⁴பி ‘‘க²ரஸரீரோ’’தி வத்வா க²ரஸரீரங் கதி²னஸூசிஸதி³ஸதாய லோமஸ்ஸாதி தஸ்ஸ ததா²பா⁴வஸ்ஸ காரணங் த³ஸ்ஸெந்தோ ‘‘ஸோ கிரா’’திஆதி³மாஹ. அத்தனோ ஹத்தே²ஹீதி ஸங்கி⁴கதேலஸம்மக்கி²தேஹி அத்தனோ ஸரீரங் மக்கே²ஸி. இதீதி வுத்தாகாரேன.
Idhāpi ‘‘kharasarīro’’ti vatvā kharasarīraṃ kathinasūcisadisatāya lomassāti tassa tathābhāvassa kāraṇaṃ dassento ‘‘so kirā’’tiādimāha. Attano hatthehīti saṅghikatelasammakkhitehi attano sarīraṃ makkhesi. Itīti vuttākārena.
ஸமாக³மட்டா²னந்தி யக்க²ஸன்னிபாதட்டா²னங். ஸோதி ஸூசிலோமோ யக்கோ². மந்தி ச தமேவ வத³தி.
Samāgamaṭṭhānanti yakkhasannipātaṭṭhānaṃ. Soti sūcilomo yakkho. Manti ca tameva vadati.
உட்டா²பெத்வாதி உத்³த⁴க்³கா³ கத்வா. அபனாமேஸீதி யதா² ஸோ அத்தனோ காயங் உபனேதுங் ந ஸக்கோதி, ததா² கரொந்தோ தோ²கங் அபனாமேஸி. அமனுஞ்ஞோதி ப²ருஸதிக்க²தாய ந மனுஞ்ஞோ. சித்தங் வா தே கி²பிஸ்ஸாமீதி மய்ஹங் ஆனுபா⁴வேன தவ சித்தவிக்கே²பங் வா கரிஸ்ஸாமி. யதா² பன ஸோ சித்தவிக்கே²பங் கரெய்ய, தங் த³ஸ்ஸேதுங் ‘‘யேஸஞ்ஹீ’’திஆதி³ வுத்தங். பே⁴ரவங் வாதி வுத்தாகாரேன அஞ்ஞதா² வா ப⁴யானகங் த³ஸ்ஸனமத்தேனேவ ஸத்தானங் ப⁴யங் ச²ம்பி⁴தத்தங் லோமஹங்ஸங் உப்பாதே³துங் ஸமத்த²ங். ‘‘கதெ²ந்தானங்யேவா’’தி வா பாடோ². தங் த்³வீஸு பாதே³ஸு க³ஹெத்வா பாரங் க³ங்கா³ய கி²பிஸ்ஸாமீதி யோஜனா.
Uṭṭhāpetvāti uddhaggā katvā. Apanāmesīti yathā so attano kāyaṃ upanetuṃ na sakkoti, tathā karonto thokaṃ apanāmesi. Amanuññoti pharusatikkhatāya na manuñño. Cittaṃ vā te khipissāmīti mayhaṃ ānubhāvena tava cittavikkhepaṃ vā karissāmi. Yathā pana so cittavikkhepaṃ kareyya, taṃ dassetuṃ ‘‘yesañhī’’tiādi vuttaṃ. Bheravaṃ vāti vuttākārena aññathā vā bhayānakaṃ dassanamatteneva sattānaṃ bhayaṃ chambhitattaṃ lomahaṃsaṃ uppādetuṃ samatthaṃ. ‘‘Kathentānaṃyevā’’ti vā pāṭho. Taṃ dvīsu pādesu gahetvā pāraṃ gaṅgāya khipissāmīti yojanā.
குதோனிதா³னாதி கஸ்மா காரணா? அட்ட²கதா²யங் பன ஸமாஸபத³மேதங், விப⁴த்திஅலோபேன நித்³தே³ஸோதி த³ஸ்ஸேதுங் ‘‘கிங்னிதா³னா கிங்பச்சயா’’தி? அத்தோ² வுத்தோ. சித்தங் ஒஸ்ஸஜந்தீதி குஸலசித்தங் பவத்திதுங் அப்பதா³னவஸேன புரதோ கி²பந்தி. குதோ ஸமுட்டா²யாதி மிச்சா²விதக்கானங் ஸமுட்டா²னங் புச்ச²தி?
Kutonidānāti kasmā kāraṇā? Aṭṭhakathāyaṃ pana samāsapadametaṃ, vibhattialopena niddesoti dassetuṃ ‘‘kiṃnidānā kiṃpaccayā’’ti? Attho vutto. Cittaṃ ossajantīti kusalacittaṃ pavattituṃ appadānavasena purato khipanti. Kuto samuṭṭhāyāti micchāvitakkānaṃ samuṭṭhānaṃ pucchati?
காமராகா³த³யோ ஸுப⁴னிமித்தாதீ³ஸு அயோனிஸோமனஸிகாரஹேதூ. காமோ பன அயோனிஸோமனஸிகாரோ ச நியகஜ்ஜ²த்தபரியாபன்னோதி ஆஹ ‘‘அயங் அத்தபா⁴வோ நிதா³னங் ஏதேஸந்தி இதோனிதா³னா’’திஆதி³. ஏவமேவாதி அட்ட²கதா²யங் கீளாபஸுதகுமாரகா விய மிச்சா²விதக்கா த³ட்ட²ப்³பா³, தேஸங் உப்பத்திட்டா²னபூ⁴தோ லோகோ விய அயங் அத்தபா⁴வலோகோ. தேஹி ஒஸ்ஸஜியமானங் த⁴ங்கங் விய சித்தங், தஸ்ஸ பாதே³ ப³த்³த⁴தீ³க⁴ஸுத்தகங் விய தங் தூ³ரானுப³ந்த⁴ங் ஸங்யோஜனந்தி ஏவங் உபமாய ஸங்ஸந்த³னங் த³ட்ட²ப்³ப³ங்.
Kāmarāgādayo subhanimittādīsu ayonisomanasikārahetū. Kāmo pana ayonisomanasikāro ca niyakajjhattapariyāpannoti āha ‘‘ayaṃ attabhāvo nidānaṃ etesanti itonidānā’’tiādi. Evamevāti aṭṭhakathāyaṃ kīḷāpasutakumārakā viya micchāvitakkā daṭṭhabbā, tesaṃ uppattiṭṭhānabhūto loko viya ayaṃ attabhāvaloko. Tehi ossajiyamānaṃ dhaṅkaṃ viya cittaṃ, tassa pāde baddhadīghasuttakaṃ viya taṃ dūrānubandhaṃ saṃyojananti evaṃ upamāya saṃsandanaṃ daṭṭhabbaṃ.
பாபவிதக்கானங் தங்ஸம்பயுத்தகிலேஸானஞ்ச தண்ஹா விஸேஸபச்சயோ தத³பா⁴வேன தேஸங் அபா⁴வதோதி ஆஹ ‘‘தண்ஹாஸினேஹதோ ஜாதா’’தி. அத்தபா⁴வபரியாபன்னத்தா ‘‘அத்தனி ஸம்பூ⁴தா’’தி வுத்தங். தேன நேஸங் அனஞ்ஞஹேதுகதங் த³ஸ்ஸேதி, நிக்³ரோத⁴ஸ்ஸேவ க²ந்த⁴ஜாதீதி இமினா பன புது²பா⁴வஞ்ச, விஸத்தாதிஆதி³னா து³ப்³பி³னிஸ்ஸடதஞ்ச. வத்து²காமேஸு ரூபாரம்மணாதீ³ஸு புதூ²ஸு. புதூ² கிலேஸகாமா காமரூபதண்ஹாத³யோ. தேஹி கிலேஸகாமேஹி கரணபூ⁴தேஹி. அத்தபா⁴வங் க²ந்த⁴பஞ்சகங். யே விபஸ்ஸனாய யுத்தபயுத்தா யாதா²வதோ ஜானந்தி.
Pāpavitakkānaṃ taṃsampayuttakilesānañca taṇhā visesapaccayo tadabhāvena tesaṃ abhāvatoti āha ‘‘taṇhāsinehato jātā’’ti. Attabhāvapariyāpannattā ‘‘attani sambhūtā’’ti vuttaṃ. Tena nesaṃ anaññahetukataṃ dasseti, nigrodhasseva khandhajātīti iminā pana puthubhāvañca, visattātiādinā dubbinissaṭatañca. Vatthukāmesu rūpārammaṇādīsu puthūsu. Puthū kilesakāmā kāmarūpataṇhādayo. Tehi kilesakāmehi karaṇabhūtehi. Attabhāvaṃ khandhapañcakaṃ. Ye vipassanāya yuttapayuttā yāthāvato jānanti.
யதோதி பச்சத்தே நிஸ்ஸக்கவசனந்தி ஆஹ ‘‘யங் நிதா³னமஸ்ஸா’’தி. ‘‘வினோதெ³ந்தீ’’தி கத்துனித்³தே³ஸேன யேன ந வினோதெ³ந்தி, தங் காரணங் பா³தி⁴தமேவாதி ஆஹ ‘‘மக்³க³ஸச்சேன வினோதெ³ந்தீ’’தி. வினோத³னஞ்செத்த² ஸந்தானதோ நீஹரணங் ப³ஹிகரணங் ஸப்³ப³ஸோ பஹானங், பஹீனே ச தஸ்மிங் கிலேஸே ஓக⁴ங் தரந்தீதி த³ஸ்ஸெந்தோ ‘‘து³த்தர’’ந்திஆதி³மாஹ. ஏதஸ்மிங் அதி⁴க³தே ந புன ப⁴வோதி அபுனப்³ப⁴வோ, நிப்³பா³னந்தி ஆஹ ‘‘அபுனப்³ப⁴வஸங்கா²தஸ்ஸா’’திஆதி³. யஸ்மா எத்த² ‘‘யே நங் பஜானந்தி, யதோனிதா³ன’’ந்தி பத³த்³வயேன து³க்க²ஸமுத³யஸச்சானி, வினோத³னக்³க³ஹணேன மக்³க³ஸச்சங், அபுனப்³ப⁴வக்³க³ஹணேன நிரோத⁴ஸச்சங் பகாஸிதங், தஸ்மா வுத்தங் ‘‘சத்தாரி ஸச்சானி பகாஸெந்தோ’’தி.
Yatoti paccatte nissakkavacananti āha ‘‘yaṃ nidānamassā’’ti. ‘‘Vinodentī’’ti kattuniddesena yena na vinodenti, taṃ kāraṇaṃ bādhitamevāti āha ‘‘maggasaccena vinodentī’’ti. Vinodanañcettha santānato nīharaṇaṃ bahikaraṇaṃ sabbaso pahānaṃ, pahīne ca tasmiṃ kilese oghaṃ tarantīti dassento ‘‘duttara’’ntiādimāha. Etasmiṃ adhigate na puna bhavoti apunabbhavo, nibbānanti āha ‘‘apunabbhavasaṅkhātassā’’tiādi. Yasmā ettha ‘‘ye naṃ pajānanti, yatonidāna’’nti padadvayena dukkhasamudayasaccāni, vinodanaggahaṇena maggasaccaṃ, apunabbhavaggahaṇena nirodhasaccaṃ pakāsitaṃ, tasmā vuttaṃ ‘‘cattāri saccāni pakāsento’’ti.
தஸ்மிங்யேவாதி யத்த² டி²தோ ‘‘ராகோ³ ச தோ³ஸோ சா’’திஆதி³னா பஞ்ஹங் புச்சி², தஸ்மிங்யேவ பதே³ஸே டி²தோ. தே³ஸனானுஸாரேனாதி ஸத்து² ஸாமுக்கங்ஸிகத⁴ம்மதே³ஸனாய அனுஸ்ஸரணேன. ஞாணங் பேஸெத்வாதி விபஸ்ஸனாபடிபாடியா நிப்³பா³னங் பதி அனுபோ³த⁴ஞாணங் பேஸெத்வா பவத்தெத்வா. ஸோதாபத்திப²லே பதிட்டி²தோதி ஸஹஸ்ஸனயபடிமண்டி³தஸ்ஸ பட²மமக்³க³ஸ்ஸ அதி⁴க³மேன பட²மப²லே பதிட்டி²தோ படிலப⁴தீதி யோஜனா. ந கிலிட்ட²த்தபா⁴வே திட்ட²ந்தி மஹானுபா⁴வத்தா அரியத⁴ம்மஸ்ஸ. ஸேதகண்டு³பீளகஸூசியோதி ஸேதபா⁴வங் பத்வா கண்டு³பீளகா லோமஸூசியோ ஸப்³பா³ அனவஸேஸா பதிதா பரிப⁴ட்டா² அபக³தா. பு⁴ம்மதே³வதாபரிஹாரந்தி பு⁴ம்மதே³வத்தபா⁴வந்தி.
Tasmiṃyevāti yattha ṭhito ‘‘rāgo ca doso cā’’tiādinā pañhaṃ pucchi, tasmiṃyeva padese ṭhito. Desanānusārenāti satthu sāmukkaṃsikadhammadesanāya anussaraṇena. Ñāṇaṃ pesetvāti vipassanāpaṭipāṭiyā nibbānaṃ pati anubodhañāṇaṃ pesetvā pavattetvā. Sotāpattiphale patiṭṭhitoti sahassanayapaṭimaṇḍitassa paṭhamamaggassa adhigamena paṭhamaphale patiṭṭhito paṭilabhatīti yojanā. Na kiliṭṭhattabhāve tiṭṭhanti mahānubhāvattā ariyadhammassa. Setakaṇḍupīḷakasūciyoti setabhāvaṃ patvā kaṇḍupīḷakā lomasūciyo sabbā anavasesā patitā paribhaṭṭhā apagatā. Bhummadevatāparihāranti bhummadevattabhāvanti.
ஸூசிலோமஸுத்தவண்ணனா நிட்டி²தா.
Sūcilomasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸூசிலோமஸுத்தங் • 3. Sūcilomasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸூசிலோமஸுத்தவண்ணனா • 3. Sūcilomasuttavaṇṇanā
