| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. ஸுக்கத⁴ம்மஸுத்தவண்ணனா
5. Sukkadhammasuttavaṇṇanā
42. பஞ்சமே ஸுக்காதி ந வண்ணஸுக்கதாய ஸுக்கா, ஸுக்கபா⁴வாய பன பரமவோதா³னாய ஸங்வத்தந்தீதி நிப்ப²த்திஸுக்கதாய ஸுக்கா. ஸரஸேனபி ஸப்³பே³ குஸலா த⁴ம்மா ஸுக்கா ஏவ கண்ஹபா⁴வபடிபக்க²தோ . தேஸஞ்ஹி உப்பத்தியா சித்தங் பப⁴ஸ்ஸரங் ஹோதி பரிஸுத்³த⁴ங். த⁴ம்மாதி குஸலா த⁴ம்மா. லோகந்தி ஸத்தலோகங். பாலெந்தீதி ஆதா⁴ரஸந்தா⁴ரணேன மரியாத³ங் ட²பெந்தா ரக்க²ந்தி. ஹிரீ ச ஒத்தப்பஞ்சாதி எத்த² ஹிரியதி ஹிரியிதப்³பே³ன, ஹிரியந்தி ஏதேனாதி வா ஹிரீ. வுத்தம்பி சேதங் ‘‘யங் ஹிரியதி ஹிரியிதப்³பே³ன, ஹிரியதி பாபகானங் அகுஸலானங் த⁴ம்மானங் ஸமாபத்தியா, அயங் வுச்சதி ஹிரீ’’தி (த⁴॰ ஸ॰ 30). ஒத்தப்பதி ஒத்தப்பிதப்³பே³ன, ஒத்தப்பந்தி ஏதேனாதி வா ஒத்தப்பங். வுத்தம்பிசேதங் ‘‘யங் ஒத்தப்பதி ஒத்தப்பிதப்³பே³ன, ஒத்தப்பதி பாபகானங் அகுஸலானங் த⁴ம்மானங் ஸமாபத்தியா, இத³ங் வுச்சதி ஒத்தப்ப’’ந்தி (த⁴॰ ஸ॰ 31).
42. Pañcame sukkāti na vaṇṇasukkatāya sukkā, sukkabhāvāya pana paramavodānāya saṃvattantīti nipphattisukkatāya sukkā. Sarasenapi sabbe kusalā dhammā sukkā eva kaṇhabhāvapaṭipakkhato . Tesañhi uppattiyā cittaṃ pabhassaraṃ hoti parisuddhaṃ. Dhammāti kusalā dhammā. Lokanti sattalokaṃ. Pālentīti ādhārasandhāraṇena mariyādaṃ ṭhapentā rakkhanti. Hirī ca ottappañcāti ettha hiriyati hiriyitabbena, hiriyanti etenāti vā hirī. Vuttampi cetaṃ ‘‘yaṃ hiriyati hiriyitabbena, hiriyati pāpakānaṃ akusalānaṃ dhammānaṃ samāpattiyā, ayaṃ vuccati hirī’’ti (dha. sa. 30). Ottappati ottappitabbena, ottappanti etenāti vā ottappaṃ. Vuttampicetaṃ ‘‘yaṃ ottappati ottappitabbena, ottappati pāpakānaṃ akusalānaṃ dhammānaṃ samāpattiyā, idaṃ vuccati ottappa’’nti (dha. sa. 31).
தத்த² அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னங் ஒத்தப்பங். அத்தாதி⁴பதெய்யா ஹிரீ, லோகாதி⁴பதெய்யங் ஒத்தப்பங். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பங். ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங்.
Tattha ajjhattasamuṭṭhānā hirī, bahiddhāsamuṭṭhānaṃ ottappaṃ. Attādhipateyyā hirī, lokādhipateyyaṃ ottappaṃ. Lajjāsabhāvasaṇṭhitā hirī, bhayasabhāvasaṇṭhitaṃ ottappaṃ. Sappatissavalakkhaṇā hirī, vajjabhīrukabhayadassāvilakkhaṇaṃ ottappaṃ.
தத்த² அஜ்ஜ²த்தஸமுட்டா²னங் ஹிரிங் சதூஹி காரணேஹி ஸமுட்டா²பேதி – ஜாதிங் பச்சவெக்கி²த்வா, வயங் பச்சவெக்கி²த்வா, ஸூரபா⁴வங் பச்சவெக்கி²த்வா, பா³ஹுஸச்சங் பச்சவெக்கி²த்வா. கத²ங்? ‘‘பாபகரணங் நாமேதங் ந ஜாதிஸம்பன்னானங் கம்மங், ஹீனஜச்சானங் கேவட்டாதீ³னங் கம்மங், மாதி³ஸஸ்ஸ ஜாதிஸம்பன்னஸ்ஸ இத³ங் கம்மங் காதுங் ந யுத்த’’ந்தி ஏவங் தாவ ஜாதிங் பச்சவெக்கி²த்வா பாணாதிபாதாதி³பாபகம்மங் அகரொந்தோ ஹிரிங் ஸமுட்டா²பேதி. ததா² ‘‘பாபகரணங் நாமேதங் த³ஹரேஹி கத்தப்³ப³கம்மங், மாதி³ஸஸ்ஸ வயே டி²தஸ்ஸ இத³ங் கம்மங் காதுங் ந யுத்த’’ந்தி ஏவங் வயங் பச்சவெக்கி²த்வா பாணாதிபாதாதி³பாபகம்மங் அகரொந்தோ ஹிரிங் ஸமுட்டா²பேதி. ததா² ‘‘பாபகரணங் நாமேதங் து³ப்³ப³லஜாதிகானங் கம்மங், மாதி³ஸஸ்ஸ ஸூரபா⁴வஸம்பன்னஸ்ஸ இத³ங் கம்மங் காதுங் ந யுத்த’’ந்தி ஏவங் ஸூரபா⁴வங் பச்சவெக்கி²த்வா பாணாதிபாதாதி³பாபகம்மங் அகரொந்தோ ஹிரிங் ஸமுட்டா²பேதி. ததா² ‘‘பாபகரணங் நாமேதங் அந்த⁴பா³லானங் கம்மங், ந பண்டி³தானங், மாதி³ஸஸ்ஸ பண்டி³தஸ்ஸ ப³ஹுஸ்ஸுதஸ்ஸ இத³ங் கம்மங் காதுங் ந யுத்த’’ந்தி ஏவங் பா³ஹுஸச்சங் பச்சவெக்கி²த்வா பாணாதிபாதாதி³பாபகம்மங் அகரொந்தோ ஹிரிங் ஸமுட்டா²பேதி. ஏவங் அஜ்ஜ²த்தஸமுட்டா²னங் ஹிரிங் சதூஹி காரணேஹி ஸமுட்டா²பேதி. ஸமுட்டா²பெத்வா ச பன அத்தனோ சித்தே ஹிரிங் பவேஸெத்வா பாபகம்மங் ந கரோதி. ஏவங் ஹிரீ அஜ்ஜ²த்தஸமுட்டா²னா நாம ஹோதி.
Tattha ajjhattasamuṭṭhānaṃ hiriṃ catūhi kāraṇehi samuṭṭhāpeti – jātiṃ paccavekkhitvā, vayaṃ paccavekkhitvā, sūrabhāvaṃ paccavekkhitvā, bāhusaccaṃ paccavekkhitvā. Kathaṃ? ‘‘Pāpakaraṇaṃ nāmetaṃ na jātisampannānaṃ kammaṃ, hīnajaccānaṃ kevaṭṭādīnaṃ kammaṃ, mādisassa jātisampannassa idaṃ kammaṃ kātuṃ na yutta’’nti evaṃ tāva jātiṃ paccavekkhitvā pāṇātipātādipāpakammaṃ akaronto hiriṃ samuṭṭhāpeti. Tathā ‘‘pāpakaraṇaṃ nāmetaṃ daharehi kattabbakammaṃ, mādisassa vaye ṭhitassa idaṃ kammaṃ kātuṃ na yutta’’nti evaṃ vayaṃ paccavekkhitvā pāṇātipātādipāpakammaṃ akaronto hiriṃ samuṭṭhāpeti. Tathā ‘‘pāpakaraṇaṃ nāmetaṃ dubbalajātikānaṃ kammaṃ, mādisassa sūrabhāvasampannassa idaṃ kammaṃ kātuṃ na yutta’’nti evaṃ sūrabhāvaṃ paccavekkhitvā pāṇātipātādipāpakammaṃ akaronto hiriṃ samuṭṭhāpeti. Tathā ‘‘pāpakaraṇaṃ nāmetaṃ andhabālānaṃ kammaṃ, na paṇḍitānaṃ, mādisassa paṇḍitassa bahussutassa idaṃ kammaṃ kātuṃ na yutta’’nti evaṃ bāhusaccaṃ paccavekkhitvā pāṇātipātādipāpakammaṃ akaronto hiriṃ samuṭṭhāpeti. Evaṃ ajjhattasamuṭṭhānaṃ hiriṃ catūhi kāraṇehi samuṭṭhāpeti. Samuṭṭhāpetvā ca pana attano citte hiriṃ pavesetvā pāpakammaṃ na karoti. Evaṃ hirī ajjhattasamuṭṭhānā nāma hoti.
கத²ங் ஒத்தப்பங் ப³ஹித்³தா⁴ஸமுட்டா²னங் நாம? ‘‘ஸசே த்வங் பாபகம்மங் கரிஸ்ஸஸி, சதூஸு பரிஸாஸு க³ரஹப்பத்தோ ப⁴விஸ்ஸஸி.
Kathaṃ ottappaṃ bahiddhāsamuṭṭhānaṃ nāma? ‘‘Sace tvaṃ pāpakammaṃ karissasi, catūsu parisāsu garahappatto bhavissasi.
‘‘க³ரஹிஸ்ஸந்தி தங் விஞ்ஞூ, அஸுசிங் நாக³ரிகோ யதா²;
‘‘Garahissanti taṃ viññū, asuciṃ nāgariko yathā;
வஜ்ஜிதோ ஸீலவந்தேஹி, கத²ங் பி⁴க்கு² கரிஸ்ஸஸீ’’தி. –
Vajjito sīlavantehi, kathaṃ bhikkhu karissasī’’ti. –
பச்சவெக்க²ந்தோ ஹி ப³ஹித்³தா⁴ஸமுட்டி²தேன ஒத்தப்பேன பாபகம்மங் ந கரோதி. ஏவங் ஒத்தப்பங் ப³ஹித்³தா⁴ஸமுட்டா²னங் நாம ஹோதி.
Paccavekkhanto hi bahiddhāsamuṭṭhitena ottappena pāpakammaṃ na karoti. Evaṃ ottappaṃ bahiddhāsamuṭṭhānaṃ nāma hoti.
கத²ங் ஹிரீ அத்தாதி⁴பதெய்யா நாம? இதே⁴கச்சோ குலபுத்தோ அத்தானங் அதி⁴பதிங் ஜெட்ட²கங் கத்வா ‘‘மாதி³ஸஸ்ஸ ஸத்³தா⁴பப்³ப³ஜிதஸ்ஸ ப³ஹுஸ்ஸுதஸ்ஸ து⁴தவாதி³ஸ்ஸ ந யுத்தங் பாபகம்மங் காது’’ந்தி பாபகம்மங் ந கரோதி. ஏவங் ஹிரீ அத்தாதி⁴பதெய்யா நாம ஹோதி. தேனாஹ ப⁴க³வா –
Kathaṃ hirī attādhipateyyā nāma? Idhekacco kulaputto attānaṃ adhipatiṃ jeṭṭhakaṃ katvā ‘‘mādisassa saddhāpabbajitassa bahussutassa dhutavādissa na yuttaṃ pāpakammaṃ kātu’’nti pāpakammaṃ na karoti. Evaṃ hirī attādhipateyyā nāma hoti. Tenāha bhagavā –
‘‘ஸோ அத்தானங்யேவ அதி⁴பதிங் கரித்வா அகுஸலங் பஜஹதி, குஸலங் பா⁴வேதி, ஸாவஜ்ஜங் பஜஹதி, அனவஜ்ஜங் பா⁴வேதி, ஸுத்³த⁴மத்தானங் பரிஹரதீ’’தி (அ॰ நி॰ 3.40).
‘‘So attānaṃyeva adhipatiṃ karitvā akusalaṃ pajahati, kusalaṃ bhāveti, sāvajjaṃ pajahati, anavajjaṃ bhāveti, suddhamattānaṃ pariharatī’’ti (a. ni. 3.40).
கத²ங் ஒத்தப்பங் லோகாதி⁴பதெய்யங் நாம? இதே⁴கச்சோ குலபுத்தோ லோகங் அதி⁴பதிங் ஜெட்ட²கங் கத்வா பாபகம்மங் ந கரோதி. யதா²ஹ –
Kathaṃ ottappaṃ lokādhipateyyaṃ nāma? Idhekacco kulaputto lokaṃ adhipatiṃ jeṭṭhakaṃ katvā pāpakammaṃ na karoti. Yathāha –
‘‘மஹா கோ² பனாயங் லோகஸன்னிவாஸோ. மஹந்தஸ்மிங் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ , தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் பஜானந்தி, தேபி மங் ஏவங் ஜானிஸ்ஸந்தி ‘பஸ்ஸத² போ⁴ இமங் குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸந்தி தே³வதா இத்³தி⁴மந்தினியோ தி³ப்³ப³சக்கு²கா பரசித்தவிது³னியோ, தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் பஜானந்தி, தாபி மங் ஏவங் ஜானிஸ்ஸந்தி ‘பஸ்ஸத² போ⁴ இமங், குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸோ லோகங்யேவ அதி⁴பதிங் கத்வா அகுஸலங் பஜஹதீ’’தி (அ॰ நி॰ 3.40).
‘‘Mahā kho panāyaṃ lokasannivāso. Mahantasmiṃ kho pana lokasannivāse santi samaṇabrāhmaṇā iddhimanto dibbacakkhukā paracittaviduno , te dūratopi passanti, āsannāpi na dissanti, cetasāpi cittaṃ pajānanti, tepi maṃ evaṃ jānissanti ‘passatha bho imaṃ kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. Santi devatā iddhimantiniyo dibbacakkhukā paracittaviduniyo, tā dūratopi passanti, āsannāpi na dissanti, cetasāpi cittaṃ pajānanti, tāpi maṃ evaṃ jānissanti ‘passatha bho imaṃ, kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. So lokaṃyeva adhipatiṃ katvā akusalaṃ pajahatī’’ti (a. ni. 3.40).
ஏவங் லோகாதி⁴பதெய்யங் ஒத்தப்பங்.
Evaṃ lokādhipateyyaṃ ottappaṃ.
லஜ்ஜாஸபா⁴வஸண்டி²தாதி எத்த² லஜ்ஜாதி லஜ்ஜனாகாரோ, தேன ஸபா⁴வேன ஸண்டி²தா ஹிரீ. ப⁴யந்தி அபாயப⁴யங், தேன ஸபா⁴வேன ஸண்டி²தங் ஒத்தப்பங். தது³ப⁴யங் பாபபரிவஜ்ஜனே பாகடங் ஹோதி. தத்த² யதா² த்³வீஸு அயோகு³ளேஸு ஏகோ ஸீதலோ ப⁴வெய்ய கூ³த²மக்கி²தோ, ஏகோ உண்ஹோ ஆதி³த்தோ. தேஸு யதா² ஸீதலங் கூ³த²மக்கி²தத்தா ஜிகு³ச்ச²ந்தோ விஞ்ஞுஜாதிகோ ந க³ண்ஹாதி, இதரங் தா³ஹப⁴யேன, ஏவங் பண்டி³தோ லஜ்ஜாய ஜிகு³ச்ச²ந்தோ பாபங் ந கரோதி, ஒத்தப்பேன அபாயபீ⁴தோ பாபங் ந கரோதி. ஏவங் லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பங்.
Lajjāsabhāvasaṇṭhitāti ettha lajjāti lajjanākāro, tena sabhāvena saṇṭhitā hirī. Bhayanti apāyabhayaṃ, tena sabhāvena saṇṭhitaṃ ottappaṃ. Tadubhayaṃ pāpaparivajjane pākaṭaṃ hoti. Tattha yathā dvīsu ayoguḷesu eko sītalo bhaveyya gūthamakkhito, eko uṇho āditto. Tesu yathā sītalaṃ gūthamakkhitattā jigucchanto viññujātiko na gaṇhāti, itaraṃ dāhabhayena, evaṃ paṇḍito lajjāya jigucchanto pāpaṃ na karoti, ottappena apāyabhīto pāpaṃ na karoti. Evaṃ lajjāsabhāvasaṇṭhitā hirī, bhayasabhāvasaṇṭhitaṃ ottappaṃ.
கத²ங் ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங்? ஏகச்சோ ஹி ஜாதிமஹத்தபச்சவெக்க²ணா, ஸத்து²மஹத்தபச்சவெக்க²ணா, தா³யஜ்ஜமஹத்தபச்சவெக்க²ணா, ஸப்³ரஹ்மசாரிமஹத்தபச்சவெக்க²ணாதி சதூஹி காரணேஹி தத்த² கா³ரவேன ஸப்பதிஸ்ஸவலக்க²ணங் ஹிரிங் ஸமுட்டா²பெத்வா பாபங் ந கரோதி, ஏகச்சோ அத்தானுவாத³ப⁴யங், பரானுவாத³ப⁴யங், த³ண்ட³ப⁴யங், து³க்³க³திப⁴யந்தி சதூஹி காரணேஹி வஜ்ஜதோ பா⁴யந்தோ வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங் ஸமுட்டா²பெத்வா பாபங் ந கரோதி. எத்த² ச அஜ்ஜ²த்தஸமுட்டா²னாதி³தா ஹிரொத்தப்பானங் தத்த² தத்த² பாகடபா⁴வேன வுத்தா, ந பன நேஸங் கதா³சி அஞ்ஞமஞ்ஞவிப்பயோகோ³. ந ஹி லஜ்ஜனங் நிப்³ப⁴யங், பாபப⁴யங் வா அலஜ்ஜனங் அத்தீ²தி.
Kathaṃ sappatissavalakkhaṇā hirī, vajjabhīrukabhayadassāvilakkhaṇaṃ ottappaṃ? Ekacco hi jātimahattapaccavekkhaṇā, satthumahattapaccavekkhaṇā, dāyajjamahattapaccavekkhaṇā, sabrahmacārimahattapaccavekkhaṇāti catūhi kāraṇehi tattha gāravena sappatissavalakkhaṇaṃ hiriṃ samuṭṭhāpetvā pāpaṃ na karoti, ekacco attānuvādabhayaṃ, parānuvādabhayaṃ, daṇḍabhayaṃ, duggatibhayanti catūhi kāraṇehi vajjato bhāyanto vajjabhīrukabhayadassāvilakkhaṇaṃ ottappaṃ samuṭṭhāpetvā pāpaṃ na karoti. Ettha ca ajjhattasamuṭṭhānāditā hirottappānaṃ tattha tattha pākaṭabhāvena vuttā, na pana nesaṃ kadāci aññamaññavippayogo. Na hi lajjanaṃ nibbhayaṃ, pāpabhayaṃ vā alajjanaṃ atthīti.
இமே சே, பி⁴க்க²வே, த்³வே ஸுக்கா த⁴ம்மா லோகங் ந பாலெய்யுந்தி பி⁴க்க²வே, இமே த்³வே அனவஜ்ஜத⁴ம்மா யதி³ லோகங் ந ரக்கெ²ய்யுங், லோகபாலகா யதி³ ந ப⁴வெய்யுங். நயித⁴ பஞ்ஞாயேத² மாதாதி இத⁴ இமஸ்மிங் லோகே ஜனிகா மாதா ‘‘அயங் மே மாதா’’தி க³ருசித்தீகாரவஸேன ந பஞ்ஞாயேத², ‘‘அயங் மாதா’’தி ந லப்³பெ⁴ய்ய. ஸேஸபதே³ஸுபி ஏஸேவ நயோ. மாதுச்சா²தி மாதுப⁴கி³னீ. மாதுலானீதி மாதுலப⁴ரியா. க³ரூனந்தி மஹாபிதுசூளபிதுஜெட்ட²பா⁴துஆதீ³னங் க³ருட்டா²னியானங். ஸம்பே⁴த³ந்தி ஸங்கரங், மரியாத³பே⁴த³ங் வா. யதா² அஜேளகாதிஆதீ³ஹி உபமங் த³ஸ்ஸேதி. ஏதே ஹி ஸத்தா ‘‘அயங் மே மாதா’’தி வா ‘‘மாதுச்சா²’’தி வா க³ருசித்தீகாரவஸேன ந ஜானந்தி, யங் வத்து²ங் நிஸ்ஸாய உப்பன்னா, தத்த²பி விப்படிபஜ்ஜந்தி. தஸ்மா உபமங் ஆஹரந்தோ அஜேளகாத³யோ ஆஹரி. அயஞ்ஹெத்த² ஸங்கே²பத்தோ² – யதா² அஜேளகாத³யோ திரச்சா²னா ஹிரொத்தப்பரஹிதா மாதாதி³ஸஞ்ஞங் அகத்வா பி⁴ன்னமரியாதா³ ஸப்³ப³த்த² ஸம்பே⁴தே³ன வத்தந்தி, ஏவமயங் மனுஸ்ஸலோகோ யதி³ லோகபாலகத⁴ம்மா ந ப⁴வெய்யுங், ஸப்³ப³த்த² ஸம்பே⁴தே³ன வத்தெய்ய. யஸ்மா பனிமே லோகபாலகத⁴ம்மா லோகங் பாலெந்தி, தஸ்மா நத்தி² ஸம்பே⁴தோ³தி.
Imece, bhikkhave, dve sukkā dhammā lokaṃ na pāleyyunti bhikkhave, ime dve anavajjadhammā yadi lokaṃ na rakkheyyuṃ, lokapālakā yadi na bhaveyyuṃ. Nayidha paññāyetha mātāti idha imasmiṃ loke janikā mātā ‘‘ayaṃ me mātā’’ti garucittīkāravasena na paññāyetha, ‘‘ayaṃ mātā’’ti na labbheyya. Sesapadesupi eseva nayo. Mātucchāti mātubhaginī. Mātulānīti mātulabhariyā. Garūnanti mahāpitucūḷapitujeṭṭhabhātuādīnaṃ garuṭṭhāniyānaṃ. Sambhedanti saṅkaraṃ, mariyādabhedaṃ vā. Yathā ajeḷakātiādīhi upamaṃ dasseti. Ete hi sattā ‘‘ayaṃ me mātā’’ti vā ‘‘mātucchā’’ti vā garucittīkāravasena na jānanti, yaṃ vatthuṃ nissāya uppannā, tatthapi vippaṭipajjanti. Tasmā upamaṃ āharanto ajeḷakādayo āhari. Ayañhettha saṅkhepattho – yathā ajeḷakādayo tiracchānā hirottapparahitā mātādisaññaṃ akatvā bhinnamariyādā sabbattha sambhedena vattanti, evamayaṃ manussaloko yadi lokapālakadhammā na bhaveyyuṃ, sabbattha sambhedena vatteyya. Yasmā panime lokapālakadhammā lokaṃ pālenti, tasmā natthi sambhedoti.
கா³தா²ஸு யேஸங் சே ஹிரிஒத்தப்பந்தி சேதி நிபாதமத்தங். யேஸங் ஸத்தானங் ஹிரீ ச ஒத்தப்பஞ்ச ஸப்³ப³தா³வ ஸப்³ப³காலமேவ ந விஜ்ஜதி ந உபலப்³ப⁴தி. வோக்கந்தா ஸுக்கமூலா தேதி தே ஸத்தா குஸலமூலபச்சே²தா³வஹஸ்ஸாபி கம்மஸ்ஸ கரணதோ குஸலகம்மானங் பதிட்டா²னபூ⁴தானங் ஹிரொத்தப்பானமேவ வா அபா⁴வதோ குஸலதோ வோக்கமித்வா, அபஸக்கித்வா, டி²தத்தா வோக்கந்தா ஸுக்கமூலா, புனப்புனங் ஜாயனமீயனஸபா⁴வத்தா ஜாதிமரணகா³மினோ ஸங்ஸாரங் நாதிவத்தந்தீதி அத்தோ².
Gāthāsu yesaṃ ce hiriottappanti ceti nipātamattaṃ. Yesaṃ sattānaṃ hirī ca ottappañca sabbadāva sabbakālameva na vijjati na upalabbhati. Vokkantā sukkamūlā teti te sattā kusalamūlapacchedāvahassāpi kammassa karaṇato kusalakammānaṃ patiṭṭhānabhūtānaṃ hirottappānameva vā abhāvato kusalato vokkamitvā, apasakkitvā, ṭhitattā vokkantā sukkamūlā, punappunaṃ jāyanamīyanasabhāvattā jātimaraṇagāmino saṃsāraṃ nātivattantīti attho.
யேஸஞ்ச ஹிரிஒத்தப்பந்தி யேஸங் பன பரிஸுத்³த⁴மதீனங் ஸத்தானங் ஹிரீ ச ஒத்தப்பஞ்சாதி இமே த⁴ம்மா ஸதா³ ஸப்³ப³காலங் ரத்திந்தி³வங் நவமஜ்ஜி²மத்தே²ரகாலேஸு ஸம்மா உபக³ம்ம டி²தா பாபா ஜிகு³ச்ச²ந்தா பா⁴யந்தா தத³ங்கா³தி³வஸேன பாபங் பஜஹந்தா. விரூள்ஹப்³ரஹ்மசரியாதி ஸாஸனப்³ரஹ்மசரியே மக்³க³ப்³ரஹ்மசரியே ச விரூள்ஹங் ஆபன்னா, அக்³க³மக்³கா³தி⁴க³மேன ஸப்³ப³ஸோ ஸந்தகிலேஸதாய ஸந்தகு³ணதாய வா ஸந்தோ, புனப்³ப⁴வஸ்ஸ கே²பிதத்தா கீ²ணபுனப்³ப⁴வா ஹொந்தீதி.
Yesañca hiriottappanti yesaṃ pana parisuddhamatīnaṃ sattānaṃ hirī ca ottappañcāti ime dhammā sadā sabbakālaṃ rattindivaṃ navamajjhimattherakālesu sammā upagamma ṭhitā pāpā jigucchantā bhāyantā tadaṅgādivasena pāpaṃ pajahantā. Virūḷhabrahmacariyāti sāsanabrahmacariye maggabrahmacariye ca virūḷhaṃ āpannā, aggamaggādhigamena sabbaso santakilesatāya santaguṇatāya vā santo, punabbhavassa khepitattā khīṇapunabbhavā hontīti.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. ஸுக்கத⁴ம்மஸுத்தங் • 5. Sukkadhammasuttaṃ
