| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. ஸுனக்க²த்தஸுத்தவண்ணனா
5. Sunakkhattasuttavaṇṇanā
55. ஏவங் மே ஸுதந்தி ஸுனக்க²த்தஸுத்தங். தத்த² அஞ்ஞாதி அரஹத்தங். ப்³யாகதாதி கீ²ணா ஜாதீதிஆதீ³ஹி சதூஹி பதே³ஹி கதி²தா. அதி⁴மானேனாதி அப்பத்தே பத்தஸஞ்ஞினோ, அனதி⁴க³தே அதி⁴க³தஸஞ்ஞினோ ஹுத்வா அதி⁴க³தங் அம்ஹேஹீதி மானேன ப்³யாகரிங்ஸு.
55.Evaṃme sutanti sunakkhattasuttaṃ. Tattha aññāti arahattaṃ. Byākatāti khīṇā jātītiādīhi catūhi padehi kathitā. Adhimānenāti appatte pattasaññino, anadhigate adhigatasaññino hutvā adhigataṃ amhehīti mānena byākariṃsu.
56. ஏவஞ்செத்த² ஸுனக்க²த்த ததா²க³தஸ்ஸ ஹோதீதி ஸுனக்க²த்த எத்த² ஏதேஸங் பி⁴க்கூ²னங் பஞ்ஹப்³யாகரணே – ‘‘இத³ங் டா²னங் ஏதேஸங் அவிபூ⁴தங் அந்த⁴காரங், தேனிமே அனதி⁴க³தே அதி⁴க³தஸஞ்ஞினோ, ஹந்த³ நேஸங் விஸோதெ⁴த்வா பாகடங் கத்வா த⁴ம்மங் தே³ஸேமீ’’தி, ஏவஞ்ச ததா²க³தஸ்ஸ ஹோதி. அத² ச பனிதே⁴கச்சே…பே॰… தஸ்ஸபி ஹோதி அஞ்ஞத²த்தந்தி ப⁴க³வா படிபன்னகானங் த⁴ம்மங் தே³ஸேதி. யத்த² பன இச்சா²சாரே டி²தா ஏகச்சே மோக⁴புரிஸா ஹொந்தி, தத்ர ப⁴க³வா பஸ்ஸதி – ‘‘இமே இமங் பஞ்ஹங் உக்³க³ஹெத்வா அஜானித்வாவ ஜானந்தா விய அப்பத்தே பத்தஸஞ்ஞினோ ஹுத்வா கா³மனிக³மாதீ³ஸு விஸேவமானா விசரிஸ்ஸந்தி, தங் நேஸங் ப⁴விஸ்ஸதி தீ³க⁴ரத்தங் அஹிதாய து³க்கா²யா’’தி ஏவமஸ்ஸாயங் இச்சா²சாரே டி²தானங் காரணா படிபன்னகானம்பி அத்தா²ய ‘‘த⁴ம்மங் தே³ஸிஸ்ஸாமீ’’தி உப்பன்னஸ்ஸ சித்தஸ்ஸ அஞ்ஞதா²பா⁴வோ ஹோதி. தங் ஸந்தா⁴யேதங் வுத்தங்.
56.Evañcettha sunakkhatta tathāgatassa hotīti sunakkhatta ettha etesaṃ bhikkhūnaṃ pañhabyākaraṇe – ‘‘idaṃ ṭhānaṃ etesaṃ avibhūtaṃ andhakāraṃ, tenime anadhigate adhigatasaññino, handa nesaṃ visodhetvā pākaṭaṃ katvā dhammaṃ desemī’’ti, evañca tathāgatassa hoti. Atha ca panidhekacce…pe… tassapi hoti aññathattanti bhagavā paṭipannakānaṃ dhammaṃ deseti. Yattha pana icchācāre ṭhitā ekacce moghapurisā honti, tatra bhagavā passati – ‘‘ime imaṃ pañhaṃ uggahetvā ajānitvāva jānantā viya appatte pattasaññino hutvā gāmanigamādīsu visevamānā vicarissanti, taṃ nesaṃ bhavissati dīgharattaṃ ahitāya dukkhāyā’’ti evamassāyaṃ icchācāre ṭhitānaṃ kāraṇā paṭipannakānampi atthāya ‘‘dhammaṃ desissāmī’’ti uppannassa cittassa aññathābhāvo hoti. Taṃ sandhāyetaṃ vuttaṃ.
58. லோகாமிஸாதி⁴முத்தோதி வட்டாமிஸ-காமாமிஸ-லோகாமிஸபூ⁴தேஸு பஞ்சஸு காமகு³ணேஸு அதி⁴முத்தோ தன்னின்னோ தக்³க³ருகோ தப்பப்³பா⁴ரோ. தப்பதிரூபீதி காமகு³ணஸபா⁴கா³. ஆனேஞ்ஜபடிஸங்யுத்தாயாதி ஆனேஞ்ஜஸமாபத்திபடிஸங்யுத்தாய. ஸங்ஸெய்யாதி கதெ²ய்ய. ஆனேஞ்ஜஸங்யோஜனேன ஹி கோ² விஸங்யுத்தோதி ஆனேஞ்ஜஸமாபத்திஸங்யோஜனேன விஸங்ஸட்டோ². லோகாமிஸாதி⁴முத்தோதி ஏவரூபோ ஹி லூக²சீவரத⁴ரோ மத்திகாபத்தங் ஆதா³ய அத்தனோ ஸதி³ஸேஹி கதிபயேஹி ஸத்³தி⁴ங் பச்சந்தஜனபத³ங் க³ச்ச²தி, கா³மங் பிண்டா³ய பவிட்ட²காலே மனுஸ்ஸா தி³ஸ்வா ‘‘மஹாபங்ஸுகுலிகா ஆக³தா’’தி யாகு³ப⁴த்தாதீ³னி ஸம்பாதெ³த்வா ஸக்கச்சங் தா³னங் தெ³ந்தி, ப⁴த்தகிச்சே நிட்டி²தே அனுமோத³னங் ஸுத்வா – ‘‘ஸ்வேபி, ப⁴ந்தே, இதே⁴வ பிண்டா³ய பவிஸதா²’’தி வத³ந்தி. அலங் உபாஸகா, அஜ்ஜாபி வோ ப³ஹூனங் தி³ன்னந்தி. தேன ஹி, ப⁴ந்தே, அந்தோவஸ்ஸங் இத⁴ வஸெய்யாதா²தி அதி⁴வாஸெத்வா விஹாரமக்³க³ங் புச்சி²த்வா விஹாரங் க³ச்ச²ந்தி. தத்த² ஸேனாஸனங் க³ஹெத்வா பத்தசீவரங் படிஸாமெந்தி. ஸாயங் ஏகோ ஆவாஸிகோ தே பி⁴க்கூ² புச்ச²தி ‘‘கத்த² பிண்டா³ய சரித்தா²’’தி? அஸுககா³மேதி. பி⁴க்கா²ஸம்பன்னாதி? ஆம ஏவரூபா நாம மனுஸ்ஸானங் ஸத்³தா⁴ ஹோதி. ‘‘அஜ்ஜேவ நு கோ² ஏதே ஏதி³ஸா, நிச்சம்பி ஏதி³ஸா’’தி? ஸத்³தா⁴ தே மனுஸ்ஸா நிச்சம்பி ஏதி³ஸா, தே நிஸ்ஸாயேவ அயங் விஹாரோ வட்³ட⁴தீதி. ததோ தே பங்ஸுகுலிகா புனப்புனங் தேஸங் வண்ணங் கதெ²ந்தி , தி³வஸாவஸேஸங் கதெ²த்வா ரத்திம்பி கதெ²ந்தி. எத்தாவதா இச்சா²சாரே டி²தஸ்ஸ ஸீஸங் நிக்க²ந்தங் ஹோதி உத³ரங் பா²லிதங். ஏவங் லோகாமிஸாதி⁴முத்தோ வேதி³தப்³போ³.
58.Lokāmisādhimuttoti vaṭṭāmisa-kāmāmisa-lokāmisabhūtesu pañcasu kāmaguṇesu adhimutto tanninno taggaruko tappabbhāro. Tappatirūpīti kāmaguṇasabhāgā. Āneñjapaṭisaṃyuttāyāti āneñjasamāpattipaṭisaṃyuttāya. Saṃseyyāti katheyya. Āneñjasaṃyojanena hi kho visaṃyuttoti āneñjasamāpattisaṃyojanena visaṃsaṭṭho. Lokāmisādhimuttoti evarūpo hi lūkhacīvaradharo mattikāpattaṃ ādāya attano sadisehi katipayehi saddhiṃ paccantajanapadaṃ gacchati, gāmaṃ piṇḍāya paviṭṭhakāle manussā disvā ‘‘mahāpaṃsukulikā āgatā’’ti yāgubhattādīni sampādetvā sakkaccaṃ dānaṃ denti, bhattakicce niṭṭhite anumodanaṃ sutvā – ‘‘svepi, bhante, idheva piṇḍāya pavisathā’’ti vadanti. Alaṃ upāsakā, ajjāpi vo bahūnaṃ dinnanti. Tena hi, bhante, antovassaṃ idha vaseyyāthāti adhivāsetvā vihāramaggaṃ pucchitvā vihāraṃ gacchanti. Tattha senāsanaṃ gahetvā pattacīvaraṃ paṭisāmenti. Sāyaṃ eko āvāsiko te bhikkhū pucchati ‘‘kattha piṇḍāya caritthā’’ti? Asukagāmeti. Bhikkhāsampannāti? Āma evarūpā nāma manussānaṃ saddhā hoti. ‘‘Ajjeva nu kho ete edisā, niccampi edisā’’ti? Saddhā te manussā niccampi edisā, te nissāyeva ayaṃ vihāro vaḍḍhatīti. Tato te paṃsukulikā punappunaṃ tesaṃ vaṇṇaṃ kathenti , divasāvasesaṃ kathetvā rattimpi kathenti. Ettāvatā icchācāre ṭhitassa sīsaṃ nikkhantaṃ hoti udaraṃ phālitaṃ. Evaṃ lokāmisādhimutto veditabbo.
59. இதா³னி ஆனேஞ்ஜஸமாபத்திலாபி⁴ங் அதி⁴மானிகங் த³ஸ்ஸெந்தோ டா²னங் கோ² பனேதந்திஆதி³மாஹ. ஆனேஞ்ஜாதி⁴முத்தஸ்ஸாதி கிலேஸஸிஞ்சனவிரஹிதாஸு ஹெட்டி²மாஸு ச²ஸு ஸமாபத்தீஸு அதி⁴முத்தஸ்ஸ தன்னின்னஸ்ஸ தக்³க³ருனோ தப்பப்³பா⁴ரஸ்ஸ. ஸே பவுத்தேதி தங் பவுத்தங். ச² ஸமாபத்திலாபி⁴னோ ஹி அதி⁴மானிகஸ்ஸ பஞ்சகாமகு³ணாமிஸப³ந்த⁴னா பதிதபண்டு³பலாஸோ விய உபட்டா²தி. தேனேதங் வுத்தங்.
59. Idāni āneñjasamāpattilābhiṃ adhimānikaṃ dassento ṭhānaṃ kho panetantiādimāha. Āneñjādhimuttassāti kilesasiñcanavirahitāsu heṭṭhimāsu chasu samāpattīsu adhimuttassa tanninnassa taggaruno tappabbhārassa. Se pavutteti taṃ pavuttaṃ. Cha samāpattilābhino hi adhimānikassa pañcakāmaguṇāmisabandhanā patitapaṇḍupalāso viya upaṭṭhāti. Tenetaṃ vuttaṃ.
60. இதா³னி ஆகிஞ்சஞ்ஞாயதனஸமாபத்தி லாபி⁴னோ அதி⁴மானிகஸ்ஸ நிக⁴ங்ஸங் த³ஸ்ஸேதுங் டா²னங் கோ² பனாதிஆதி³மாஹ. தத்த² த்³வேதா⁴ பி⁴ன்னாதி மஜ்ஜே² பி⁴ன்னா. அப்படிஸந்தி⁴காதி கு²த்³த³கா முட்டி²பாஸாணமத்தா ஜதுனா வா ஸிலேஸேன வா அல்லீயாபெத்வா படிஸந்தா⁴துங் ஸக்கா. மஹந்தங் பன குடாகா³ரப்பமாணங் ஸந்தா⁴யேதங் வுத்தங். ஸே பி⁴ன்னேதி தங் பி⁴ன்னங். உபரி ஸமாபத்திலாபி⁴னோ ஹி ஹெட்டா²ஸமாபத்தி த்³வேதா⁴பி⁴ன்னா ஸேலா விய ஹோதி, தங் ஸமாபஜ்ஜிஸ்ஸாமீதி சித்தங் ந உப்பஜ்ஜதி. தேனேதங் வுத்தங்.
60. Idāni ākiñcaññāyatanasamāpatti lābhino adhimānikassa nighaṃsaṃ dassetuṃ ṭhānaṃ kho panātiādimāha. Tattha dvedhā bhinnāti majjhe bhinnā. Appaṭisandhikāti khuddakā muṭṭhipāsāṇamattā jatunā vā silesena vā allīyāpetvā paṭisandhātuṃ sakkā. Mahantaṃ pana kuṭāgārappamāṇaṃ sandhāyetaṃ vuttaṃ. Se bhinneti taṃ bhinnaṃ. Upari samāpattilābhino hi heṭṭhāsamāpatti dvedhābhinnā selā viya hoti, taṃ samāpajjissāmīti cittaṃ na uppajjati. Tenetaṃ vuttaṃ.
61. இதா³னி நேவஸஞ்ஞானாஸஞ்ஞாயதனலாபி⁴னோ அதி⁴மானிகஸ்ஸ ச நிக⁴ங்ஸங் த³ஸ்ஸெந்தோ டா²னங் கோ² பனாதிஆதி³மாஹ. தத்த² ஸே வந்தேதி தங் வந்தங். அட்ட²ஸமாபத்திலாபி⁴னோ ஹி ஹெட்டா²ஸமாபத்தியோ வந்தஸதி³ஸா ஹுத்வா உபட்ட²ஹந்தி, புன ஸமாபஜ்ஜிஸ்ஸாமீதி சித்தங் ந உப்பஜ்ஜதி. தேனேதங் வுத்தங்.
61. Idāni nevasaññānāsaññāyatanalābhino adhimānikassa ca nighaṃsaṃ dassento ṭhānaṃ kho panātiādimāha. Tattha se vanteti taṃ vantaṃ. Aṭṭhasamāpattilābhino hi heṭṭhāsamāpattiyo vantasadisā hutvā upaṭṭhahanti, puna samāpajjissāmīti cittaṃ na uppajjati. Tenetaṃ vuttaṃ.
62. இதா³னி கீ²ணாஸவஸ்ஸ நிக⁴ங்ஸங் த³ஸ்ஸெந்தோ டா²னங் கோ² பனாதிஆதி³மாஹ. தத்த² ஸே உச்சி²ன்னமூலேதி ஸோ உச்சி²ன்னமூலோ. உபரி ஸமாபத்திலாபி⁴னோ ஹி ஹெட்டா²ஸமாபத்தி மூலச்சி²ன்னதாலோ விய உபட்டா²தி, தங் ஸமாபஜ்ஜிஸ்ஸாமீதி சித்தங் ந உப்பஜ்ஜதி. தேனேதங் வுத்தங்.
62. Idāni khīṇāsavassa nighaṃsaṃ dassento ṭhānaṃ kho panātiādimāha. Tattha se ucchinnamūleti so ucchinnamūlo. Upari samāpattilābhino hi heṭṭhāsamāpatti mūlacchinnatālo viya upaṭṭhāti, taṃ samāpajjissāmīti cittaṃ na uppajjati. Tenetaṃ vuttaṃ.
63. டா²னங் கோ² பனாதி பாடியேக்கோ அனுஸந்தி⁴. ஹெட்டா² ஹி ஸமாபத்திலாபி⁴னோ அதி⁴மானிகஸ்ஸபி கீ²ணாஸவஸ்ஸபி நிக⁴ங்ஸோ கதி²தோ, ஸுக்க²விபஸ்ஸகஸ்ஸ பன அதி⁴மானிகஸ்ஸபி கீ²ணாஸவஸ்ஸபி ந கதி²தோ. தேஸங் த்³வின்னம்பி நிக⁴ங்ஸங் த³ஸ்ஸேதுங் இமங் தே³ஸனங் ஆரபி⁴. தங் பன படிக்கி²த்தங். ஸமாபத்திலாபி⁴னோ ஹி அதி⁴மானிகஸ்ஸ நிக⁴ங்ஸே கதி²தே ஸுக்க²விபஸ்ஸகஸ்ஸபி அதி⁴மானிகஸ்ஸ கதி²தோவ ஹோதி, ஸமாபத்திலாபி⁴னோ ச கீ²ணாஸவஸ்ஸ கதி²தே ஸுக்க²விபஸ்ஸககீ²ணாஸவஸ்ஸ கதி²தோவ ஹோதி. ஏதேஸங் பன த்³வின்னங் பி⁴க்கூ²னங் ஸப்பாயாஸப்பாயங் கதே²துங் இமங் தே³ஸனங் ஆரபி⁴.
63.Ṭhānaṃkho panāti pāṭiyekko anusandhi. Heṭṭhā hi samāpattilābhino adhimānikassapi khīṇāsavassapi nighaṃso kathito, sukkhavipassakassa pana adhimānikassapi khīṇāsavassapi na kathito. Tesaṃ dvinnampi nighaṃsaṃ dassetuṃ imaṃ desanaṃ ārabhi. Taṃ pana paṭikkhittaṃ. Samāpattilābhino hi adhimānikassa nighaṃse kathite sukkhavipassakassapi adhimānikassa kathitova hoti, samāpattilābhino ca khīṇāsavassa kathite sukkhavipassakakhīṇāsavassa kathitova hoti. Etesaṃ pana dvinnaṃ bhikkhūnaṃ sappāyāsappāyaṃ kathetuṃ imaṃ desanaṃ ārabhi.
தத்த² ஸியா – புது²ஜ்ஜனஸ்ஸ தாவ ஆரம்மணங் அஸப்பாயங் ஹோது, கீ²ணாஸவஸ்ஸ கத²ங் அஸப்பாயந்தி. யத³க்³கே³ன புது²ஜ்ஜனஸ்ஸ அஸப்பாயங், தத³க்³கே³ன கீ²ணாஸவஸ்ஸாபி அஸப்பாயமேவ. விஸங் நாம ஜானித்வா கா²தி³தம்பி அஜானித்வா கா²தி³தம்பி விஸமேவ. ந ஹி கீ²ணாஸவேனபி ‘‘அஹங் கீ²ணாஸவோ’’தி அஸங்வுதேன ப⁴விதப்³ப³ங். கீ²ணாஸவேனபி யுத்தபயுத்தேனேவ ப⁴விதுங் வட்டதி.
Tattha siyā – puthujjanassa tāva ārammaṇaṃ asappāyaṃ hotu, khīṇāsavassa kathaṃ asappāyanti. Yadaggena puthujjanassa asappāyaṃ, tadaggena khīṇāsavassāpi asappāyameva. Visaṃ nāma jānitvā khāditampi ajānitvā khāditampi visameva. Na hi khīṇāsavenapi ‘‘ahaṃ khīṇāsavo’’ti asaṃvutena bhavitabbaṃ. Khīṇāsavenapi yuttapayutteneva bhavituṃ vaṭṭati.
64. தத்த² ஸமணேனாதி பு³த்³த⁴ஸமணேன. ச²ந்த³ராக³ப்³யாபாதே³னாதி ஸோ அவிஜ்ஜாஸங்கா²தோ விஸதோ³ஸோ ச²ந்த³ராகே³ன ச ப்³யாபாதே³ன ச ருப்பதி குப்பதி. அஸப்பாயானீதி அவட்³டி⁴கரானி ஆரம்மணானி. அனுத்³த⁴ங்ஸெய்யாதி ஸோஸெய்ய மிலாபெய்ய. ஸஉபாதி³ஸேஸந்தி ஸக³ஹணஸேஸங், உபாதி³தப்³ப³ங் க³ண்ஹிதப்³ப³ங் இத⁴ உபாதீ³தி வுத்தங். அனலஞ்ச தே அந்தராயாயாதி ஜீவிதந்தராயங் தே காதுங் அஸமத்த²ங். ரஜோஸூகந்தி ரஜோ ச வீஹிஸுகாதி³ ச ஸூகங். அஸு ச விஸதோ³ஸோதி ஸோ ச விஸதோ³ஸோ. தது³ப⁴யேனாதி யா ஸா அஸப்பாயகிரியா ச யோ விஸதோ³ஸோ ச, தேன உப⁴யேன. புது²த்தந்தி மஹந்தபா⁴வங்.
64. Tattha samaṇenāti buddhasamaṇena. Chandarāgabyāpādenāti so avijjāsaṅkhāto visadoso chandarāgena ca byāpādena ca ruppati kuppati. Asappāyānīti avaḍḍhikarāni ārammaṇāni. Anuddhaṃseyyāti soseyya milāpeyya. Saupādisesanti sagahaṇasesaṃ, upāditabbaṃ gaṇhitabbaṃ idha upādīti vuttaṃ. Analañca te antarāyāyāti jīvitantarāyaṃ te kātuṃ asamatthaṃ. Rajosūkanti rajo ca vīhisukādi ca sūkaṃ. Asu ca visadosoti so ca visadoso. Tadubhayenāti yā sā asappāyakiriyā ca yo visadoso ca, tena ubhayena. Puthuttanti mahantabhāvaṃ.
ஏவமேவ கோ²தி எத்த² ஸஉபாதா³னஸல்லுத்³தா⁴ரோ விய அப்பஹீனோ அவிஜ்ஜாவிஸதோ³ஸோ த³ட்ட²ப்³போ³, அஸப்பாயகிரியாய டி²தபா⁴வோ விய ச²ஸு த்³வாரேஸு அஸங்வுதகாலோ, தது³ப⁴யேன வணே புது²த்தங் க³தே மரணங் விய ஸிக்க²ங் பச்சக்கா²ய ஹீனாயாவத்தனங், மரணமத்தங் து³க்க²ங் விய அஞ்ஞதராய க³ருகாய ஸங்கிலிட்டா²ய ஆபத்தியா ஆபஜ்ஜனங் த³ட்ட²ப்³ப³ங். ஸுக்கபக்கே²பி இமினாவ நயேன ஓபம்மஸங்ஸந்த³னங் வேதி³தப்³ப³ங்.
Evameva khoti ettha saupādānasalluddhāro viya appahīno avijjāvisadoso daṭṭhabbo, asappāyakiriyāya ṭhitabhāvo viya chasu dvāresu asaṃvutakālo, tadubhayena vaṇe puthuttaṃ gate maraṇaṃ viya sikkhaṃ paccakkhāya hīnāyāvattanaṃ, maraṇamattaṃ dukkhaṃ viya aññatarāya garukāya saṃkiliṭṭhāya āpattiyā āpajjanaṃ daṭṭhabbaṃ. Sukkapakkhepi imināva nayena opammasaṃsandanaṃ veditabbaṃ.
65. ஸதியாயேதங் அதி⁴வசனந்தி எத்த² ஸதி பஞ்ஞாக³திகா. லோகிகாய பஞ்ஞாய லோகிகா ஹோதி, லோகுத்தராய லோகுத்தரா. அரியாயேதங் பஞ்ஞாயாதி பரிஸுத்³தா⁴ய விபஸ்ஸனாபஞ்ஞாய.
65.Satiyāyetaṃadhivacananti ettha sati paññāgatikā. Lokikāya paññāya lokikā hoti, lokuttarāya lokuttarā. Ariyāyetaṃ paññāyāti parisuddhāya vipassanāpaññāya.
இதா³னி கீ²ணாஸவஸ்ஸ ப³லங் த³ஸ்ஸெந்தோ ஸோ வதாதிஆதி³மாஹ. தத்த² ஸங்வுதகாரீதி பிஹிதகாரீ. இதி விதி³த்வா நிருபதீ⁴தி ஏவங் ஜானித்வா கிலேஸுபதி⁴பஹானா நிருபதி⁴ ஹோதி, நிருபாதா³னோதி அத்தோ². உபதி⁴ஸங்க²யே விமுத்தோதி உபதீ⁴னங் ஸங்க²யபூ⁴தே நிப்³பா³னே ஆரம்மணதோ விமுத்தோ. உபதி⁴ஸ்மிந்தி காமுபதி⁴ஸ்மிங். காயங் உபஸங்ஹரிஸ்ஸதீதி காயங் அல்லீயாபெஸ்ஸதி. இத³ங் வுத்தங் ஹோதி – தண்ஹக்க²யே நிப்³பா³னே ஆரம்மணதோ விமுத்தோ கீ²ணாஸவோ பஞ்ச காமகு³ணே ஸேவிதுங், காயங் வா உபஸங்ஹரிஸ்ஸதி சித்தங் வா உப்பாதெ³ஸ்ஸதீதி நேதங் டா²னங் விஜ்ஜதி. ஸேஸங் ஸப்³ப³த்த² உத்தானத்த²மேவாதி.
Idāni khīṇāsavassa balaṃ dassento so vatātiādimāha. Tattha saṃvutakārīti pihitakārī. Itividitvā nirupadhīti evaṃ jānitvā kilesupadhipahānā nirupadhi hoti, nirupādānoti attho. Upadhisaṅkhaye vimuttoti upadhīnaṃ saṅkhayabhūte nibbāne ārammaṇato vimutto. Upadhisminti kāmupadhismiṃ. Kāyaṃ upasaṃharissatīti kāyaṃ allīyāpessati. Idaṃ vuttaṃ hoti – taṇhakkhaye nibbāne ārammaṇato vimutto khīṇāsavo pañca kāmaguṇe sevituṃ, kāyaṃ vā upasaṃharissati cittaṃ vā uppādessatīti netaṃ ṭhānaṃ vijjati. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஸுனக்க²த்தஸுத்தவண்ணனா நிட்டி²தா.
Sunakkhattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. ஸுனக்க²த்தஸுத்தங் • 5. Sunakkhattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. ஸுனக்க²த்தஸுத்தவண்ணனா • 5. Sunakkhattasuttavaṇṇanā
