| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ஸுனெத்தஸுத்தங்
9. Sunettasuttaṃ
73. 1 ‘‘பூ⁴தபுப்³ப³ங், பி⁴க்க²வே, ஸுனெத்தோ நாம ஸத்தா² அஹோஸி தித்த²கரோ காமேஸு வீதராகோ³. ஸுனெத்தஸ்ஸ கோ² பன, பி⁴க்க²வே, ஸத்து²னோ அனேகானி ஸாவகஸதானி அஹேஸுங். ஸுனெத்தோ ஸத்தா² ஸாவகானங் ப்³ரஹ்மலோகஸஹப்³யதாய த⁴ம்மங் தே³ஸேஸி. யே கோ² பன, பி⁴க்க²வே 2, ஸுனெத்தஸ்ஸ ஸத்து²னோ ப்³ரஹ்மலோகஸஹப்³யதாய த⁴ம்மங் தே³ஸெந்தஸ்ஸ சித்தானி நப்பஸாதே³ஸுங் தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜிங்ஸு. யே கோ² பன, பி⁴க்க²வே, ஸுனெத்தஸ்ஸ ஸத்து²னோ ப்³ரஹ்மலோகஸஹப்³யதாய த⁴ம்மங் தே³ஸெந்தஸ்ஸ சித்தானி பஸாதே³ஸுங் தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிங்ஸு.
73.3 ‘‘Bhūtapubbaṃ, bhikkhave, sunetto nāma satthā ahosi titthakaro kāmesu vītarāgo. Sunettassa kho pana, bhikkhave, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, bhikkhave 4, sunettassa satthuno brahmalokasahabyatāya dhammaṃ desentassa cittāni nappasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘பூ⁴தபுப்³ப³ங் , பி⁴க்க²வே, மூக³பக்கோ² நாம ஸத்தா² அஹோஸி…பே॰… அரனேமி நாம ஸத்தா² அஹோஸி…பே॰… குத்³தா³லகோ 5 நாம ஸத்தா² அஹோஸி…பே॰… ஹத்தி²பாலோ நாம ஸத்தா² அஹோஸி…பே॰… ஜோதிபாலோ நாம ஸத்தா² அஹோஸி…பே॰… அரகோ நாம ஸத்தா² அஹோஸி தித்த²கரோ காமேஸு வீதராகோ³ . அரகஸ்ஸ கோ² பன, பி⁴க்க²வே, ஸத்து²னோ அனேகானி ஸாவகஸதானி அஹேஸுங். அரகோ நாம ஸத்தா² ஸாவகானங் ப்³ரஹ்மலோகஸஹப்³யதாய த⁴ம்மங் தே³ஸேஸி. யே கோ² பன, பி⁴க்க²வே, அரகஸ்ஸ ஸத்து²னோ ப்³ரஹ்மலோகஸஹப்³யதாய த⁴ம்மங் தே³ஸெந்தஸ்ஸ சித்தானி நப்பஸாதே³ஸுங், தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜிங்ஸு. யே கோ² பன, பி⁴க்க²வே, அரகஸ்ஸ ஸத்து²னோ ப்³ரஹ்மலோகஸஹப்³யதாய த⁴ம்மங் தே³ஸெந்தஸ்ஸ சித்தானி பஸாதே³ஸுங், தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிங்ஸு.
‘‘Bhūtapubbaṃ , bhikkhave, mūgapakkho nāma satthā ahosi…pe… aranemi nāma satthā ahosi…pe… kuddālako 6 nāma satthā ahosi…pe… hatthipālo nāma satthā ahosi…pe… jotipālo nāma satthā ahosi…pe… arako nāma satthā ahosi titthakaro kāmesu vītarāgo . Arakassa kho pana, bhikkhave, satthuno anekāni sāvakasatāni ahesuṃ. Arako nāma satthā sāvakānaṃ brahmalokasahabyatāya dhammaṃ desesi. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni nappasādesuṃ, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni pasādesuṃ, te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘தங் கிங் மஞ்ஞத², பி⁴க்க²வே, யோ இமே ஸத்த ஸத்தா²ரே தித்த²கரே காமேஸு வீதராகே³ அனேகஸதபரிவாரே ஸஸாவகஸங்கே⁴ பது³ட்ட²சித்தோ அக்கோஸெய்ய பரிபா⁴ஸெய்ய, ப³ஹுங் ஸோ அபுஞ்ஞங் பஸவெய்யா’’தி? ‘‘ஏவங், ப⁴ந்தே’’. ‘‘யோ, பி⁴க்க²வே, இமே ஸத்த ஸத்தா²ரே தித்த²கரே காமேஸு வீதராகே³ அனேகஸதபரிவாரே ஸஸாவகஸங்கே⁴ பது³ட்ட²சித்தோ அக்கோஸெய்ய பரிபா⁴ஸெய்ய, ப³ஹுங் ஸோ அபுஞ்ஞங் பஸவெய்ய. யோ ஏகங் தி³ட்டி²ஸம்பன்னங் புக்³க³லங் பது³ட்ட²சித்தோ அக்கோஸதி பரிபா⁴ஸதி, அயங் ததோ ப³ஹுதரங் அபுஞ்ஞங் பஸவதி. தங் கிஸ்ஸ ஹேது? நாஹங், பி⁴க்க²வே, இதோ ப³ஹித்³தா⁴ ஏவரூபிங் க²ந்திங் வதா³மி யதா²மங் ஸப்³ரஹ்மசாரீஸு’’.
‘‘Taṃ kiṃ maññatha, bhikkhave, yo ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo, bhikkhave, ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, bhikkhave, ito bahiddhā evarūpiṃ khantiṃ vadāmi yathāmaṃ sabrahmacārīsu’’.
‘‘தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘ந நோ ஸப்³ரஹ்மசாரீஸு 7 சித்தானி பது³ட்டா²னி ப⁴விஸ்ஸந்தீ’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமங்.
‘‘Tasmātiha, bhikkhave, evaṃ sikkhitabbaṃ – ‘na no sabrahmacārīsu 8 cittāni paduṭṭhāni bhavissantī’ti. Evañhi vo, bhikkhave, sikkhitabba’’nti. Navamaṃ.
Footnotes:
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. அக்³கி³க்க²ந்தோ⁴பமஸுத்தாதி³வண்ணனா • 8-9. Aggikkhandhopamasuttādivaṇṇanā
