| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. ஸுஸிமஸுத்தவண்ணனா
10. Susimasuttavaṇṇanā
70. த³ஸமே க³ருகதோதி க³ருபா⁴வஹேதூனங் உத்தமகு³ணானங் மத்த²கப்பத்தியா அனஞ்ஞஸாதா⁴ரணேன க³ருகாரேன க³ருகதோ. மானிதோதி ஸம்மாபடிபத்தியா மானிதோ. தாய ஹி விஞ்ஞூனங் மனாபதாதி ஆஹ ‘‘மனேன பியாயிதோ’’தி. சதுபச்சயபூஜாய ச பூஜிதோதி இத³ங் அத்த²வசனங். யத³த்த²ங் ஸங்கீ³திகாரேஹி ‘‘தேன கோ² பன ஸமயேன ப⁴க³வா ஸக்கதோ ஹோதீ’’திஆதி³னா இமஸ்ஸ ஸுத்தஸ்ஸ நிதா³னங் நிக்கி²த்தங், தஸ்ஸ அத்த²ஸ்ஸ உல்லிங்க³வஸேன வுத்தந்தி த³ட்ட²ப்³ப³ங். ஏஸ நயோ ஸேஸபதே³ஸுபி. அங்ஸகூடதோதி உத்தராஸங்கே³ன உபோ⁴ அங்ஸகூடே படிச்சா²தெ³த்வா டி²தா த³க்கி²ணஅங்ஸகூடதோ, உப⁴யதோ வா அபனெந்தி. பரிசிதக³ந்த²வஸேன பண்டி³தபரிப்³பா³ஜகோ, யதோ பச்சா² விஸேஸபா⁴கீ³ ஜாதோ. விசித்தனயாய த⁴ம்மகதா²ய கத²னதோ ‘‘கவிஸெட்டோ²’’தி ஆஹங்ஸு.
70. Dasame garukatoti garubhāvahetūnaṃ uttamaguṇānaṃ matthakappattiyā anaññasādhāraṇena garukārena garukato. Mānitoti sammāpaṭipattiyā mānito. Tāya hi viññūnaṃ manāpatāti āha ‘‘manena piyāyito’’ti. Catupaccayapūjāya ca pūjitoti idaṃ atthavacanaṃ. Yadatthaṃ saṃgītikārehi ‘‘tena kho pana samayena bhagavā sakkato hotī’’tiādinā imassa suttassa nidānaṃ nikkhittaṃ, tassa atthassa ulliṅgavasena vuttanti daṭṭhabbaṃ. Esa nayo sesapadesupi. Aṃsakūṭatoti uttarāsaṅgena ubho aṃsakūṭe paṭicchādetvā ṭhitā dakkhiṇaaṃsakūṭato, ubhayato vā apanenti. Paricitaganthavasena paṇḍitaparibbājako, yato pacchā visesabhāgī jāto. Vicittanayāya dhammakathāya kathanato ‘‘kaviseṭṭho’’ti āhaṃsu.
தேஜுஸ்ஸதோ³தி மஹாதேஜோ. புரேப⁴த்தகிச்சாதீ³னங் நியதபா⁴வேன நியமமனுயுத்தோ. விபஸ்ஸனாலக்க²ணம்ஹீதி ஞாணங் தத்த² கதி²தங். த⁴ம்மந்தி தஸ்ஸங் தஸ்ஸங் பரிஸாயங் தே²ரஸ்ஸ அஸம்முகா² தே³ஸிதங் த⁴ம்மங். ஆஹரித்வா கதே²தி ததா² வரஸ்ஸ தி³ன்னத்தா.
Tejussadoti mahātejo. Purebhattakiccādīnaṃ niyatabhāvena niyamamanuyutto. Vipassanālakkhaṇamhīti ñāṇaṃ tattha kathitaṃ. Dhammanti tassaṃ tassaṃ parisāyaṃ therassa asammukhā desitaṃ dhammaṃ. Āharitvā katheti tathā varassa dinnattā.
கிஞ்சாபி ஸுஸிமோ பூரணாத³யோ விய ஸத்து²படிஞ்ஞோ ந ஹோதி, தித்தி²யேஹி பன ‘‘அயங் ப்³ராஹ்மணபப்³ப³ஜிதோ பஞ்ஞவா வேத³ங்க³குஸலோ’’தி க³ணாசரியட்டா²னே ட²பிதோ, ததா² சஸ்ஸ ஸம்பா⁴விதோ. தேன வுத்தங் ‘‘அஹங் ஸத்தா²தி படிஜானந்தோ’’தி, ந ஸஸ்ஸததி³ட்டி²கத்தா. ததா² ஹேஸ ப⁴க³வதோ ஸம்முகா² உபக³ந்துங் அஸக்கி².
Kiñcāpi susimo pūraṇādayo viya satthupaṭiñño na hoti, titthiyehi pana ‘‘ayaṃ brāhmaṇapabbajito paññavā vedaṅgakusalo’’ti gaṇācariyaṭṭhāne ṭhapito, tathā cassa sambhāvito. Tena vuttaṃ ‘‘ahaṃ satthāti paṭijānanto’’ti, na sassatadiṭṭhikattā. Tathā hesa bhagavato sammukhā upagantuṃ asakkhi.
அஞ்ஞாதி அரஹத்தஸ்ஸ நாமங் அஞ்ஞிந்த்³ரியஸ்ஸ சிண்ணந்தே பவத்தத்தா. தங் பவத்திந்தி யங் அஞ்ஞப்³யாகரணங் வுத்தங், தங் ஸுத்வா. அஸ்ஸ ஸுஸிமஸ்ஸ, பரமப்பமாணந்தி உத்தமகோடி. ஆசரியமுட்டீ²தி ஆசரியஸ்ஸ முட்டி²கதத⁴ம்மோ.
Aññāti arahattassa nāmaṃ aññindriyassa ciṇṇante pavattattā. Taṃ pavattinti yaṃ aññabyākaraṇaṃ vuttaṃ, taṃ sutvā. Assa susimassa, paramappamāṇanti uttamakoṭi. Ācariyamuṭṭhīti ācariyassa muṭṭhikatadhammo.
அங்க³ஸந்ததாயாதி நீவரணாதீ³னங் பச்சனீகத⁴ம்மானங் விதூ³ரபா⁴வேன ஜா²னங்கா³னங் வூபஸந்ததாய. நிப்³பு³தஸப்³ப³த³ரத²பரிளாஹதாய ஹி தேஸங் ஜா²னானங் பணீததரபா⁴வோ. ஆரம்மணஸந்ததாயாதி ரூபபதிபா⁴க³விக³மேன ஸண்ஹஸுகு²மாதி³பா⁴வப்பத்தஸ்ஸ ஆரம்மணஸ்ஸ ஸந்தபா⁴வேன. யத³க்³கே³ன ஹி தேஸங் பா⁴வனாதிஸயஸம்பா⁴விதஸண்ஹஸுகு²மப்பகாரானி ஆரம்மணானி ஸந்தானி, தத³க்³கே³ன ஜா²னங்கா³னங் ஸந்ததா வேதி³தப்³பா³. ஆரம்மணஸந்ததாய வா ததா³ரம்மணத⁴ம்மானங் ஸந்ததா லோகுத்தரத⁴ம்மாரம்மணாஹி பச்சவெக்க²ணாஹி தீ³பேதப்³பா³. ஆருப்பவிமொக்கா²தி அரூபஜ்ஜா²னஸஞ்ஞாவிமொக்கா². பஞ்ஞாமத்தேனேவ விமுத்தா, ந உப⁴தோபா⁴க³விமுத்தா. த⁴ம்மானங் டி²ததா தங்ஸபா⁴வதா த⁴ம்மட்டி²தி, அனிச்சது³க்கா²னத்ததா, தத்த² ஞாணங் த⁴ம்மட்டி²திஞாணந்தி ஆஹ ‘‘விபஸ்ஸனாஞாண’’ந்தி. ஏவமாஹாதி ‘‘புப்³பே³ கோ², ஸுஸிம, த⁴ம்மட்டி²திஞாணங், பச்சா² நிப்³பா³னே ஞாண’’ந்தி ஏவமாதி³.
Aṅgasantatāyāti nīvaraṇādīnaṃ paccanīkadhammānaṃ vidūrabhāvena jhānaṅgānaṃ vūpasantatāya. Nibbutasabbadarathapariḷāhatāya hi tesaṃ jhānānaṃ paṇītatarabhāvo. Ārammaṇasantatāyāti rūpapatibhāgavigamena saṇhasukhumādibhāvappattassa ārammaṇassa santabhāvena. Yadaggena hi tesaṃ bhāvanātisayasambhāvitasaṇhasukhumappakārāni ārammaṇāni santāni, tadaggena jhānaṅgānaṃ santatā veditabbā. Ārammaṇasantatāya vā tadārammaṇadhammānaṃ santatā lokuttaradhammārammaṇāhi paccavekkhaṇāhi dīpetabbā. Āruppavimokkhāti arūpajjhānasaññāvimokkhā. Paññāmatteneva vimuttā, na ubhatobhāgavimuttā. Dhammānaṃ ṭhitatā taṃsabhāvatā dhammaṭṭhiti, aniccadukkhānattatā, tattha ñāṇaṃ dhammaṭṭhitiñāṇanti āha ‘‘vipassanāñāṇa’’nti. Evamāhāti ‘‘pubbe kho, susima, dhammaṭṭhitiñāṇaṃ, pacchā nibbāne ñāṇa’’nti evamādi.
வினாபி ஸமாதி⁴ந்தி ஸமத²லக்க²ணப்பத்தங் புரிமஸித்³த⁴ங் வினாபி ஸமாதி⁴ந்தி விபஸ்ஸனாயானிகங் ஸந்தா⁴ய வுத்தங். ஏவந்தி வுத்தாகாரேன. ந ஸமாதி⁴னிஸ்ஸந்தோ³ அனுபுப்³ப³விஹாரா விய. ந ஸமாதி⁴ஆனிஸங்ஸோ லோகியாபி⁴ஞ்ஞா விய. ந ஸமாதி⁴ஸ்ஸ நிப்ப²த்தி ஸப்³ப³ப⁴வக்³க³ங் விய. விபஸ்ஸனாய நிப்ப²த்தி மக்³கோ³ வா ப²லங் வாதி யோஜனா.
Vināpisamādhinti samathalakkhaṇappattaṃ purimasiddhaṃ vināpi samādhinti vipassanāyānikaṃ sandhāya vuttaṃ. Evanti vuttākārena. Na samādhinissando anupubbavihārā viya. Na samādhiānisaṃso lokiyābhiññā viya. Na samādhissa nipphatti sabbabhavaggaṃ viya. Vipassanāya nipphatti maggo vā phalaṃ vāti yojanā.
ரூபாதீ³ஸு சேதேஸு திண்ணங் லக்க²ணானங் பரிவத்தனவஸேன தே³ஸனா தேபரிவட்டதே³ஸனா. அனுயோக³ங் ஆரோபெந்தோதி நனு வுத்தங், ஸுஸிம, இதா³னி அரஹத்தாதி⁴க³மேன ஸப்³ப³ஸோ பச்சயாகாரங் படிவிஜ்ஜி²த்வா தத்த² விக³தஸம்மோஹோதி அனுயோக³ங் கரொந்தோ. பாகடகரணத்த²ந்தி யதா² த்வங், ஸுஸிம, நிஜ்ஜா²னகோ ஸுக்க²விபஸ்ஸகோ ச ஹுத்வா ஆஸவானங் க²யஸம்மஸனே ஸுப்பதிட்டி²தோ, ஏவமேதேபி பி⁴க்கூ², தஸ்மா ‘‘அபி பன தும்ஹே ஆயஸ்மந்தோ’’திஆதி³னா ந தே தயா அனுயுஞ்ஜிதப்³பா³தி.
Rūpādīsu cetesu tiṇṇaṃ lakkhaṇānaṃ parivattanavasena desanā teparivaṭṭadesanā. Anuyogaṃ āropentoti nanu vuttaṃ, susima, idāni arahattādhigamena sabbaso paccayākāraṃ paṭivijjhitvā tattha vigatasammohoti anuyogaṃ karonto. Pākaṭakaraṇatthanti yathā tvaṃ, susima, nijjhānako sukkhavipassako ca hutvā āsavānaṃ khayasammasane suppatiṭṭhito, evametepi bhikkhū, tasmā ‘‘api pana tumhe āyasmanto’’tiādinā na te tayā anuyuñjitabbāti.
ஸுஸிமஸுத்தவண்ணனா நிட்டி²தா.
Susimasuttavaṇṇanā niṭṭhitā.
மஹாவக்³க³வண்ணனா நிட்டி²தா.
Mahāvaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸுஸிமஸுத்தங் • 10. Susimasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஸுஸிமஸுத்தவண்ணனா • 10. Susimasuttavaṇṇanā
