૧-૧૦. સુવણ્ણબિબ્બોહનિયત્થેરઅપદાનાદિવણ્ણના

1-10. Suvaṇṇabibbohaniyattheraapadānādivaṇṇanā

અટ્ઠવીસતિમે વગ્ગે પઠમાપદાનં ઉત્તાનમેવ.

Aṭṭhavīsatime vagge paṭhamāpadānaṃ uttānameva.

૫. દુતિયાપદાને મનોમયેન કાયેનાતિ યથા ચિત્તવસેન પવત્તકાયેનાતિ અત્થો.

5. Dutiyāpadāne manomayena kāyenāti yathā cittavasena pavattakāyenāti attho.

૧૦. તતિયાપદાને મહાસમુદ્દં નિસ્સાયાતિ મહાસાગરાસન્ને ઠિતસ્સ પબ્બતસ્સ અન્તરે પબ્બતલેણેતિ અત્થો. સિદ્ધત્થો ભગવા વિવેકકામતાય વસતિ પટિવસતીતિ અત્થો. પચ્ચુગ્ગન્ત્વાનકાસહન્તિ અહં તસ્સ ભગવતો પટિઉગ્ગન્ત્વા સમીપં ગન્ત્વા વન્દનાદિપુઞ્ઞં અકાસિન્તિ અત્થો. ચઙ્કોટકમદાસહન્તિ સિદ્ધત્થસ્સ ભગવતો અહં પુપ્ફભરિતં ચઙ્કોટકં કદમ્બં અદાસિં પૂજેસિન્તિ અત્થો.

10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.

૧૪. ચતુત્થાપદાને અકક્કસચિત્તસ્સાથાતિ અફરુસચિત્તસ્સ, અથ-સદ્દો પદપૂરણે.

14. Catutthāpadāne akakkasacittassāthāti apharusacittassa, atha-saddo padapūraṇe.

૧૯. પઞ્ચમાપદાને ઉદુમ્બરે વસન્તસ્સાતિ ઉદુમ્બરરુક્ખમૂલે રુક્ખચ્છાયાય વસન્તસ્સ તિસ્સસ્સ ભગવતો. નિયતે પણ્ણસન્થરેતિ નિયામિતે પટિબદ્ધે પણ્ણસન્થરે સાખાભઙ્ગાસને નિસિન્નસ્સ. વુત્થોકાસો મયા દિન્નોતિ વિવિત્તોકાસે મણ્ડપદ્વારાદીહિ પિહિતોકાસો મયા દિન્નો સમ્પાદિતોતિ અત્થો.

19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.

૨૪. છટ્ઠાપદાને પોત્થદાનં મયા દિન્નન્તિ પોત્થવટ્ટિં પોત્થછલ્લિં તાળેત્વા કતં સાટકં વિસમં ગોફાસુકેન ઘંસિત્વા નિમ્મિતં સુત્તં ગહેત્વા કન્તિત્વા તેન સુત્તેન નિસીદનત્થાય વા ભૂમત્થરણત્થાય વા સાટકં વાયાપેત્વા તં સાટકં મયા રતનત્તયસ્સ દિન્નન્તિ અત્થો.

24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.

૨૭. સત્તમાપદાને ચન્દભાગાનદીતીરેતિ ચન્દભાગાય નામ નદિયા તીરતો, નિસ્સક્કે ભુમ્મવચનં . અનુસોતન્તિ સોતસ્સ અનુ હેટ્ઠાગઙ્ગં વજામિ ગચ્છામિ અહન્તિ અત્થો. સત્ત માલુવપુપ્ફાનિ, ચિતમારોપયિં અહન્તિ અહં માલુવપુપ્ફાનિ સત્ત પત્તાનિ ગહેત્વા ચિતકે વાલુકરાસિમ્હિ વાલુકાહિ થૂપં કત્વા પૂજેસિન્તિ અત્થો.

27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.

૩૧-૩૨. અટ્ઠમાપદાને મહાસિન્ધુ સુદસ્સનાતિ સુન્દરદસ્સનસુન્દરોદકધવલપુલિનોપસોભિતત્તા સુટ્ઠુ મનોહરા મહાસિન્ધુ નામ વારિનદી અહોસિ. તત્થ તિસ્સં સિન્ધુવારિનદિયં સપ્પભાસં પભાય સહિતં સુદસ્સનં સુન્દરરૂપં પરમોપસમે યુત્તં ઉત્તમે ઉપસમે યુત્તં સમઙ્ગીભૂતં વીતરાગં અહં અદ્દસન્તિ અત્થો. દિસ્વાહં વિમ્હિતાસયોતિ ‘‘એવરૂપં ભયાનકં હિમવન્તં કથં સમ્પત્તો’’તિ વિમ્હિતઅજ્ઝાસયો અચ્છરિયબ્ભુતચિત્તોતિ અત્થો. આલુવં તસ્સ પાદાસિન્તિ તસ્સ અરહતો અહં પસન્નમાનસો આલુવકન્દં પાદાસિં આદરેન અદાસિન્તિ અત્થો.

31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.

નવમદસમાપદાનાનિ ઉત્તાનાનેવાતિ.

Navamadasamāpadānāni uttānānevāti.

અટ્ઠવીસતિમવગ્ગવણ્ણના સમત્તા.

Aṭṭhavīsatimavaggavaṇṇanā samattā.

Next: ૨૯. પણ્ણદાયકવગ્ગો • 29. Paṇṇadāyakavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact