| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
11. ஸக்கஸங்யுத்தங்
11. Sakkasaṃyuttaṃ
1. பட²மவக்³கோ³
1. Paṭhamavaggo
1. ஸுவீரஸுத்தவண்ணனா
1. Suvīrasuttavaṇṇanā
247. அபி⁴யங்ஸூதி யுத்³த⁴ஸஜ்ஜாபி⁴முகா² ஹுத்வா க³ச்சி²ங்ஸு. தத்ராதி தஸ்மிங் அஸுரானங் அபி⁴யானே அயங் தா³னி வுச்சமானா அனுபுப்³ப³தோ கதா². தெத்திங்ஸ புரிஸே க³ஹெத்வாதி தெத்திங்ஸ புரிஸே புஞ்ஞகிரியாய ஸஹாயபூ⁴தே க³ஹெத்வா. ‘‘யாவஜீவங் மாதாபிதுப⁴ரோ அஸ்ஸ’’ந்திஆதி³னா ஸமாதி³ன்னானி ஸத்த வதபதா³னி பூரெத்வா. அதி⁴க³ண்ஹந்தங் அபி⁴ப⁴வந்தங். புத்தஹதாயாதி ஹதபுத்தாய. ஸா ஸுரா ந ஹோதி, ந ஸுரங் பிவிம்ஹாதி அதி⁴ப்பாயோ. ததோ பட்டா²யாதி ‘‘ந ஸுரா’’தி வுத்தகாலதோ பட்டா²ய. ‘‘ந ஸுரந்தி ந தி³ப்³ப³ந்தீதி அஸுரா’’தி கேசி. ஹெட்டி²மதலே அந்தோபூ⁴மியங் ஆயாமதோ த³ஸயோஜனஸஹஸ்ஸங்.
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
உரகா³தி³ஸஹசரிதானி டா²னானி உரகா³தீ³னீதி ஆஹ ‘‘உரகா³தீ³ஸு பஞ்சஸு டா²னேஸூ’’தி. பட²மாலிந்தே³தி பட²மே பரிப⁴ண்டே³. பஞ்சயோஜனஸஹஸ்ஸவித்தா²ரபுது²ப³ஹலாஹி ஸினேருஸ்ஸ சதூஸுபி பஸ்ஸேஸு சத்தாரோ பரிப⁴ண்டா³. ஸினேருஸ்ஸ ஹி தஸ்மிங் தஸ்மிங் பஸ்ஸே யுக³ந்த⁴ராதீ³ஸு பஞ்சஸதபரித்ததீ³பபரிவாரே மஹாதீ³பே ச லபி⁴தப்³ப³ஸ்ஸ மஹதோ அத்த²ஸ்ஸ வஸேன மஹத்தா². குபிதாவிலசித்தாதி குபிதேன கோபேன ஆகுலசித்தா. யுத்³தே⁴ஸீதி யுத்³தே⁴ஸினோ. ஸேஸேஸூதி ஸேஸேஸு பரிப⁴ண்டே³ஸு. ஸேஸாதி ஸுபண்ணாத³யோ.
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
வம்மிகமக்கி²காதி ஸபக்கி²கஉபசிகா. ஓஸக்கித்வாதி பிட்டி²பா⁴கே³ன நிவத்தித்வா.
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
பமாத³ங் ஆபாதே³ஸீதி ஸக்கஸ்ஸ ஆணாய பமாத³ங் ஆபஜ்ஜி. ஸட்டி²யோஜனங் வித்தா²ரேன. ஸுவண்ணமஹாவீதி²ந்தி ஸுவண்ணமயபூ⁴மிஜக³திவீதி²ங்.
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
அனுட்ட²ஹந்தோதி உட்டா²னங் காயிகவீரியங் அகரொந்தோ. அவாயமந்தோதி வாயாமங் சேதஸிகவீரியங் அகரொந்தோ. கிஞ்சி கிச்சந்தி கஸிவாணிஜ்ஜாதி³பே⁴த³ங் அஞ்ஞதரங் கிச்சங் கத்தப்³ப³கம்மங். வரந்தி பவரங். தேனாஹ ‘‘உத்தம’’ந்தி. தஞ்ச கோ² கஸிதப்³ப³ட்டா²னங் அதி⁴ப்பேதந்தி ஆஹ ‘‘ஓகாஸ’’ந்தி. கம்மங் அகத்வாதி கிஞ்சிபி ஜீவிதஹேதுபூ⁴தங் கம்மங் அகத்வா. ஜீவிதட்டா²னங் நாமாதி தஸ்ஸ ஜீவிதஸ்ஸ ஹேது நாம. நிப்³பா³னஸ்ஸ மக்³கோ³தி நிப்³பா³னஸ்ஸ அதி⁴க³முபாயபூ⁴தோ மக்³கோ³.
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
ஸுவீரஸுத்தவண்ணனா நிட்டி²தா.
Suvīrasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸுவீரஸுத்தங் • 1. Suvīrasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸுவீரஸுத்தவண்ணனா • 1. Suvīrasuttavaṇṇanā
