| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. தாலபுடஸுத்தவண்ணனா
2. Tālapuṭasuttavaṇṇanā
354. வாலோதி வுச்சதி தாலோ, தஸ்ஸ தாலபுடங் நாம. யதா² ஆமலகீப²லஸமானகங், ஸோ பன தாலஸதி³ஸமுக²வண்ணத்தா தாலபுடோதி ஏவங்னாமகோ. தேனாஹ ‘‘தஸ்ஸ கிரா’’திஆதி³. அபி⁴னீஹாரஸம்பன்னோ அனேகேஸு கப்பேஸு ஸம்ப⁴தஸாவகபோ³தி⁴ஸம்பா⁴ரோ. ததா² ஹேஸ அஸீதியா மஹாஸாவகேஸு அப்³ப⁴ந்தரோ ஜாதோ. ஸஹஸ்ஸங் தெ³ந்தி நச்சங் பஸ்ஸிதுகாமா. ஸமஜ்ஜவேஸந்தி நேபச்சவேஸங். கீளங் கத்வாதி நச்சகீளிதங் கீளித்வா, நச்சித்வாதி அத்தோ².
354. Vāloti vuccati tālo, tassa tālapuṭaṃ nāma. Yathā āmalakīphalasamānakaṃ, so pana tālasadisamukhavaṇṇattā tālapuṭoti evaṃnāmako. Tenāha ‘‘tassa kirā’’tiādi. Abhinīhārasampanno anekesu kappesu sambhatasāvakabodhisambhāro. Tathā hesa asītiyā mahāsāvakesu abbhantaro jāto. Sahassaṃ denti naccaṃ passitukāmā. Samajjavesanti nepaccavesaṃ. Kīḷaṃ katvāti naccakīḷitaṃ kīḷitvā, naccitvāti attho.
புப்³பே³ ததா²பவத்தவுத்தந்தத³ஸ்ஸனே ஸச்சேன, தப்³பி³பரியாயே அலிகேன. ராக³பச்சயாதி ராகு³ப்பத்தியா காரணபூ⁴தா. முக²தோ…பே॰… த³ஸ்ஸனாத³யோதி ஆதி³-ஸத்³தே³ன முக²தோ அக்³கி³ஜாலனிக்க²மத³ஸ்ஸனாதி³கே ஸங்க³ண்ஹாதி. அஞ்ஞே ச…பே॰… அபி⁴னயாதி காமஸ்ஸாத³ஸங்யுத்தானங் ஸிங்கா³ரஹஸ்ஸஅப்³பு⁴தரஸானஞ்சேவ ‘‘அஞ்ஞே சா’’தி வுத்தஸந்தபீ³ப⁴ச்ச²ரஸானஞ்ச த³ஸ்ஸனகா அபி⁴னயா. தோ³ஸபச்சயாதி தோ³ஸுப்பத்தியா காரணபூ⁴தா. ஹத்த²பாத³ச்சே²தா³தீ³தி ஆதி³-ஸத்³தே³ன ஸங்க³ஹிதானங் ருத்³த³வீரப⁴யானகரஸானங் த³ஸ்ஸனகா அபி⁴னயா. மோஹபச்சயாதி மோஹுப்பத்தியா காரணபூ⁴தா. ஏவமாத³யோதி ஆதி³-ஸத்³தே³ன ஸங்க³ஹிதானங் கருணாஸந்தப⁴யானகரஸானங் த³ஸ்ஸனகா அபி⁴னயா. தே ஹி ரஸே ஸந்தா⁴ய பாளியங் ‘‘யே த⁴ம்மா ரஜனீயா, யே த⁴ம்மா தோ³ஸனீயா, யே த⁴ம்மா மோஹனீயா’’தி ச வுத்தங்.
Pubbe tathāpavattavuttantadassane saccena, tabbipariyāye alikena. Rāgapaccayāti rāguppattiyā kāraṇabhūtā. Mukhato…pe… dassanādayoti ādi-saddena mukhato aggijālanikkhamadassanādike saṅgaṇhāti. Aññe ca…pe… abhinayāti kāmassādasaṃyuttānaṃ siṅgārahassaabbhutarasānañceva ‘‘aññe cā’’ti vuttasantabībhaccharasānañca dassanakā abhinayā. Dosapaccayāti dosuppattiyā kāraṇabhūtā. Hatthapādacchedādīti ādi-saddena saṅgahitānaṃ ruddavīrabhayānakarasānaṃ dassanakā abhinayā. Mohapaccayāti mohuppattiyā kāraṇabhūtā. Evamādayoti ādi-saddena saṅgahitānaṃ karuṇāsantabhayānakarasānaṃ dassanakā abhinayā. Te hi rase sandhāya pāḷiyaṃ ‘‘ye dhammā rajanīyā, ye dhammā dosanīyā, ye dhammā mohanīyā’’ti ca vuttaṃ.
நடவேஸங் க³ஹெத்வாவ பச்சந்தி கம்மஸரிக்க²விபாகவஸேன. தங் ஸந்தா⁴யாதி தங் யதா²வுத்தங் நிரயே பச்சனங் ஸந்தா⁴ய. ஏதங் ‘‘பஹாஸோ நாம நிரயோ, தத்த² உபபஜ்ஜதீ’’தி வுத்தங். யதா² லோகே அத்த²விஸேஸவஸேன ஸகம்மகானிபி பதா³னி அகம்மகானி ப⁴வந்தி ‘‘விமுச்சதி புரிஸோ’’தி, ஏவங் இத⁴ அத்த²விஸேஸவஸேன அகம்மகங் ஸகம்மகங் கத்வா வுத்தங் – ‘‘நாஹங், ப⁴ந்தே, ஏதங் ரோதா³மீ’’தி. கோ பன ஸோ அத்த²விஸேஸோ? அஸஹனங் அக்க²மனங், தஸ்மா ந ரோதா³மி ந ஸஹாமி, ந அக்க²மாமீதி அத்தோ². ரோத³னகாரணஞ்ஹி அஸஹந்தோ தேன அபி⁴பூ⁴தோ ரோத³தி. தமேவஸ்ஸ ஸகம்மகபா⁴வஸ்ஸ காரணபூ⁴தங் அத்த²விஸேஸங் ‘‘ந அஸ்ஸுவிமோசனமத்தேனா’’தி வுத்தங். மதங் வா, அம்ம, ரோத³ந்தீதி எத்தா²பி மதங் ரோத³ந்தி, தஸ்ஸ மரணங் ந ஸஹந்தி, நக்க²மந்தீதி பாகடோயமத்தோ²தி.
Naṭavesaṃgahetvāva paccanti kammasarikkhavipākavasena. Taṃ sandhāyāti taṃ yathāvuttaṃ niraye paccanaṃ sandhāya. Etaṃ ‘‘pahāso nāma nirayo, tattha upapajjatī’’ti vuttaṃ. Yathā loke atthavisesavasena sakammakānipi padāni akammakāni bhavanti ‘‘vimuccati puriso’’ti, evaṃ idha atthavisesavasena akammakaṃ sakammakaṃ katvā vuttaṃ – ‘‘nāhaṃ, bhante, etaṃ rodāmī’’ti. Ko pana so atthaviseso? Asahanaṃ akkhamanaṃ, tasmā na rodāmi na sahāmi, na akkhamāmīti attho. Rodanakāraṇañhi asahanto tena abhibhūto rodati. Tamevassa sakammakabhāvassa kāraṇabhūtaṃ atthavisesaṃ ‘‘na assuvimocanamattenā’’ti vuttaṃ. Mataṃ vā, amma, rodantīti etthāpi mataṃ rodanti, tassa maraṇaṃ na sahanti, nakkhamantīti pākaṭoyamatthoti.
தாலபுடஸுத்தவண்ணனா நிட்டி²தா.
Tālapuṭasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. தாலபுடஸுத்தங் • 2. Tālapuṭasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. தாலபுடஸுத்தவண்ணனா • 2. Tālapuṭasuttavaṇṇanā
